Lesson 2 *April 4–10

Laisiangtho’ Bulpi le Pianzia

Nipini (Sabbath) Nitaklam April 4

Tukalsung Simding: 2 Peter 1:19–21; 2 Timothy 3:16, 17; Deut. 18:18; Exodus 17:14; Joh 1:14; Hebrew 11:3, 6.

Kamngah: “Note kiangah Pasian thu ka hong genuh ciangin no thu um mite sungah ama’ thu tawh kisai in, Pasian in na hongsem ahih manin, kote’ thugente pen, Pasian’ thu taktak ahih mahbangin, kote thugenna na zak uh ciangin, mihing’ thu bangin ngaihsun loin, Pasian’ thu taktak mahin hong sang na hih manun, hihthu hangin Pasian tungah, ka lungdamna uh ka ko uhhi.” 1 Thessalonika 2:13.

Laisiangtho’ bulpi le pianzia i teldandan in, i pawlpi le ei mimal nundan hong piangsak hi. I Laisiangtho khiatdan le i teldante pen, Pasian hong piak dan le humuapdan i tel bangbang in piang ahi hi. Diktak mantakin i tel nopleh, Laisiangtho daikaihte i tel masa ding hi. Mi nuntak dan le mipi omzia kihello in Mathematic kisin theilo hi.

Tangthu theilo pi in zong physics zong kisinthei tuanlo hi. Tua mahbangin, Pasian omlo cih upna thukhunte tellopi khawngin, Laisiangtho zong kisinthei tuanlo hi. Pasian- Mihingpa’ thu tellopi in, Laisiangtho zong kikhia theilo hi. Diktak in khiattheih na’ng in, umlo giauguau le muangphalo mialmual khawng sangin upna kip tawh khiat kisamzaw hi.

Nimasani (Sunday) April 5

Pasian’ Kipulaakna Laisiangtho

2 Peter 1:19–21 simin. Peter in ama’ thupuak kammalte’ bulpi koipan ci hiam?

…………………………………………………………………………

Laisiangthobu in laibu dangte tawh kibang hetlo hi. Sawltak Peter in, Khasiangtho in kamsangte zangin, Pasian kiang pan thupuakte ngah uh cihi. Phuaktawm hetlo uhhi. “Phuaktawm thu” (2Peter 1:16) hi hetlo, Pasian kiang pan hong pai, thukip muanhuaite ahi hi. “Khasiangtho’ sawlna tawh Pasian’ misiangthote in gen hi” (2Peter 1:21) ci hi. Pasian in Ama’ deihmi teelkhia in, Ama’ thu pulaaksak hi. Pasian tawh maitang kimu kihona a omloh phamawhlian hi. Tua ahih manin, Laisiangtho pen, Pasian’ thuneihna hi a, i khiatna ah zong, Pasian’ deihna mah zuih kul hi. Laikungpupi pen Pasian ahih manin “Laisiangtho” (Rom. 1:2; 2Tim. 3:15) kici hi.

Zatpah theihding ngiimna zong hong pia hi. “Thuman thutak hilh nading, a khialte taai nading, a manlote a manin puah nading, aman in nuntak theih nading thuhilh nading” (2Tim. 3:16, 17) cihi. Pasian in hong pulakte nuntakpih theih nadingin, Khasangtho’ panpihna zong i kisamlai hi. Peter in, Pasian hong piak thute, eima ngaihsutdan khawng a mawkkhiat ding hi hetlo a, thuman thutak i teltheih nadingin Khasiangtho in khentel siamna hongpia ding hi cihi.

Amos in zong “Topa Pasian in, ama nasem kamsangte tungah ama’ geelna theisak masa lopi in, bangmah hih hetlo hi” (Amos 3:7) cihi. Laisiangtho kammal “pulaak” cihpen, a kiseelcip khat a siin hongkhia, kimusak cihna ahi hi. Mawhnei mihing i hih manin, Pasian tawh kigamla i hihmanin, Ama’ deihna i teltheihna dingin, hong pulaakkhiat kul hi.

Pasian hongpiak hiphial mahleh, Laisiangtho pen upding haksakhop lel hi. Tuate um nawnlo in Pasian’ liatna khawng awlmawh kei leng bang i suakthei ding hiam?

Ninihni (Monday) April 6

A Ki-Humuap Daan

Pasianin, Ama’ deihna pulaak nadingin kampau zang ahih manin, laibu in zong kigelhthei pah hi. Theihsa mahbangin, Laisiangtho cihpen, Pasian’ thumaan Khasiangtho in hong lahna hi a, mihingte mah zangin hong pulaakkhia hi. Tua ahih manin, Piancil pan Mangmuhna dongmah, thu bulpi kipumkhat sitset hi (etpak ding Genesis 3:14, 15 le Revelation 12:17).

2 Peter 1:21, 2 Timothy 3:16, le Deut. 18:18 cihte simin. Laisiangtho ki humuapna tungtang bang gen hiam?

…………………………………………………………………………

Laisiangtho buppi Pasian humuap hi a, tulai hun tawh a kituak nawnlo khawng omphial mahleh (gtna, Hebrewte pawihun tulai kizang nawnlo) Pasian humuapsa mah hi veve hi. Bangbang hitaleh, tulaihun zat nawnlohte hiphial lehzong, i teltheih dingin sinngiat kul hi. Laisiangtho buppi Pasian in, maitang kimu in a piak zong hikhin khollo hi. Khatveivei, laikungpute in kantawmsak lelthei hi (Joshua 10:13 leh Luke 1:1-3) enpah in.

Avekpi in humuap hiphotphot hi (2Tim. 3:16). Tua manin Paul in a “kigelh” khempeuh eite hong thuhilh na’ng hi a, “hong thahatsak le lametna hongpia” hi (Rom. 15:4). Laisiangtho in a laikungpu Pasian ahih lam pulaak himahleh, a gelhtaktak pen mihing’ khut mah hi veve hi. Laibu tuamtuamte in laikungpu tuamtuamte omdan tuamtuam honglak hi. Tua thuman khempeuh “Pasian humuamsa”(2Tim. 3:16) hi napi; mihing’ kammal mah tawh kiciamteh hi. EGWhite, Kidona Lianpi p. 7.

Tuni tuhun ciangin, Laisiangtho sung a Pasian’liatna khawng a nial zong omuh hi: a thupi mahmah piansakna, paikhiatna leh thawhkikna cihte nialmai uhhi. Tuate tawh kisai kongpi honsak leng hoihlo diam? Pasian’thukhenna peuh i thuak kha diai maw?

Nilaini (Tuesday) April 7

A Kigelh Pasian’ Kammal

Topa’n Moses kiangah, “hih thute gelhin. Hih thute tawh kizui in nang le Israel tawh thuciamna khat kabawlzo hi” (Paikhiat 34:27). Topa in, mipite kiangah genziau dingbek cilo in gelhsukteek dingin banghangin sawl hiam? Akigelh kammal in bang hamphatna omhiam?

…………………………………………………………………………

Thu a gen Pasian in, mihing’ kampau a piangsakpa ahih manin, Amah tawh a kizomthei, ama’ thumaan a pulaak thei ding mi muanhuai teelkhia hi. Tua ahih manin, Laisiangtho laikungpute khempeuh in Pasian kiangmah ah ki-aap masasak uhhi.

Anuai a munte’n a kigelh Mangmuhna tawh kisai bang gen uh hiam?

Paikhiat. 17:14; 24:4 ………………………………………………

Joshua 24:26 ………………………………………………………

Jeremiah 30:2 ………………………………………………………

Revelation 1:11,19;21:5;22:18,19…………………………………… .. ..

Pasianin, banghangin Mangmuhna gelhsuk dingin sawl hiam? Mangngilh pakloh nading ci pak ni. Pasianin, Ama’ deih bangin eite hong makaih tawntung ahihna, Laisiangtho kammalte in honglak hi. Kammal 100 tawh gen sangin, lai malkhat tawh ciaptehna in kipkho zaw hi. Kamtawh ki gensawn sangin, laitawh ki teisawn leh muibun zaw hi. Kamtawh ahihleh, hunkhat munkhat a mimal ciangtanhsa in khatvei kigen thei sam hi. Lai tawh hileh, leitung gam tuamtuam ah simzawh loh mitampi te’n ciangtanh omlo in laisim thei a, khangsawnte zong in simsuksuk theilai hi. Amau teekin simthei keiphial leh zong, mi sim ngaithei lailai uhhi.

Nilini (Wednesday) April 8

Khazih le Laisiangtho Kithutuak

John 1:14; John 2:22; John 8:31, 32; le John 17:17 simin. Ci le Sa hong suak Pasian’ thu – Zeisu le a kigelh Laisiangtho Pasian’ thu a ki thutuakna bang na mu hiam?

…………………………………………………………………………

Ci le sa hongsuak Pasian’ thu-Zeisu le a kigelh Laisiangtho-Pasian’ thu a ki thutuakna khat; Zeisu pen Khasiangtho in numei gaisak in, mihing in hong piangsak a, Laisiangtho zong Khasiangtho mah in mihing tungtawnin hong piak ahihi.

Zeisu in hunkhat munkhat ah mihing in hongpiang in hong teeng hi. Tua in a Pasian dinmun mansuah saklo a, khangthu ah zong beh leh phung khensak tuanlo hi. Vannuai leitungbup honkhia ding amah bekmah a hihi (Acts 4:12). Tua mahbangin, a kigelh Laisiangtho-Pasian’ thu zong, hunkhat leh mihing ngeina khat sungah hong kipia ahihi. Zeisu mah bangin, Laisiangtho zong hun zui a kikheel hilo hi. Hunkhat, munkhat ah hong kipia hi napi, leitung khang tawntung daih dingin hong piak ahihi.

Pasianin mihing’ dinmun ah hong tuaksuk in hong kilaak hi. Zeisu’ mihing dinmun ah, ei mihing’ dinmun a dimin pua hi. Piancil pan kum 4000 sung a kiamsuksa mihing’ dinmun lianmah hong omhi. Aih hang mawhna neituanlo hi. Tua mahbangin Laisiangtho zong, mihing’ kam mah hi a, “mikhengval” kam, mi telzawhloh hituanlo hi. Kam khatpeuh pen, ciangtanh omlua ahih manin, kam piangsakpa Pasian in, a muanhuai theiding lampi zongin hong makaih hi. Tehpihna khempeuh in ciangtanh nei uhhi. Zeisu le Laisiangtho zong ki zakimlo hi. Laisiangtho pen, Pasian hong sunglut hi hetlo hi. Pasian in laibu hilo hi. Pasian in Zeisu sungah mihing hongsuak hibek hi. Gumpa in, Ama’ thu Laisiangtho sungah hong pulaak ahih manin, tua Laisiangtho i it hi.

Laisiangtho pen Pasian-Mihing kipumkhat ahi hi. EGWhite in zong: “Pasian hong piak thumaan Laisiangtho pen mihing’ kammal mah zangin, mihing-Pasian kipumkhatna thu hong gen hi. Tua kipumkhatna in Khazih’ pianzia hi a, Pasian’ Tapa, mihing’ tapa ahi hi. Laisiangtho in zong Khazih pen “Thu mihing hongsuak a, eite lakah hong teeng” (John 1:14) ci hi. –Ellen G. White, Kidona Lianpi, laimai 8.

Banghangin, Laisiangtho in eite upna tawphah hiding hiam? Amah omkei leh, koiteng khawng i tungtam maw?

Ningani (Thursday) April 9

Upna Sungah Laisiangtho Telthei

Hebrews 11:3, 6 simin. Banghangin, Pasian le A’ thu teltheihna’ng upna kisam thei hiam? Banghangin upnalo tawh Pasian ki lungdamsak theilo hiam?

Pilna man taktak upna sungah ombek hi. Nu le Pa tungtawn a pilna thak a sinden taneute in a nu le pa a muanbang hipah hi. Taneute’n, Nu le Pa muangtak in, nuntakzia leh itna a bulsin mahmah bang ahihi. Pilna le theihnate zong ki itna leh kimuanna pan hong khangkhia ahihi.

Tua mahbangin, tumging tumpa khat in zong, a tumging tum siam mahmah phial mahleh, a la, a phuakpa le a van a it ciangbekin tumpan hi. Tua tawh kibangin, eite’n zong Laisiangtho pen ummel losa khawng, muanlahna khawngpeuh tawh i sim sangin, itna le upna tawh simleng, kitel zawtham hi. Paul in “Upna lo tawh kuamahin Pasian ki lungkimsak zolo hi” (Heb. 11:6) ci hi. Upna lo peuhmah in Laisiangtho kineek theilo a, mihing’ laibu mawkmawk hihetlo, mihing khengval laibu hi cih upna tawh simkul hi.

Seventh-day Adventist-te in, pawlpi upna laibu sungah: “Laisiangtholui le thak anihmah in, a kigelh Pasian’ thu hi a, Pasian humuapna pan hi cihi. Laikungpute in, Khasiangtho sawlna bangin paukhia in laigelh uhhi. Hih thu sungah hotkhiatna ding a kisam bangbang pilna theihna hongpia hi. Tua Laisiangtho in ukzawhna, vanglianpen nei a, a puktheilo Pasian deihna honglak hi. Eite nuntaksung etteh ding, thuman upna le tangthu sungah Pasian thumanna cihte ciaptehna hi(Psalms 119:105; Paunak 30:5, 6; Isaiah 8:20; John 17:17; 1 Thess. 2:13; 2 Tim. 3:16, 17; Hebrew 4:12; 2 Peter 1:20, 21.)”

Mite in upna lopi tawh Laisiangtho a simuh ciangin bangsung a kisam omhiam? Hih upna in banghangin mittawlo hiam? Upna neite hamphatna leh Laisiangtho thuman thutak teltheih nading in, banghangin upna kisam sese hiam?

Kiginni (Friday) April 10

Ngaihsutbeh ding: Anuai a teng zon na’ng mun “Methods of Bible Study”: “Presuppositions Arising from the Claims of Scripture”) Authority. “Methods of Bible Study” omna mun www.adventistbiblicalresearch.org/materials/bible-interpretation-hermeneutics/methods-bible-study).

Eite upna sungah Laisiangtho kul ahih mah bangin, Khasiangtho’ humuapna omkei zenleh, simsuk simtoh hangin khalam hamphatna bangmah i ngah tuankei ding hi.

“Athu sungah, Pasian in hong hotkhiatna’ng theihding a kisamteng hong guan hi. Laisiangtho pen ukzawhna nei, a puktheiloPasian’deihna hi cih umin. Nuntakzia, upna leh pilna theihna ah etteh ding dinmun ahihi.Pasian’deihna mihing tungah hong ki pulaak hi mahleh, Khasiangtho makaihna kisamlo theilo hi. Khasiangtho in, Gumpa’n hong hilhsa khempeuh hong phawkkik sak ding hong kamciam hi.Pasian’ Khasiangtho in Laisiangtho humuap ahih mah bangin, khasiangtho mah in hong hilhloh in kitel zolo hi”—Ellen G. White, The Great Controversy, p. 9.

Kikup Ding Dotnate:

Banghangin Pasianin a deihna honglak hiam? Banghangin Mangmuhna kisam?
Pasianin hong koici kilak hiam? Lampi tuamtuam zangin hong kilak hi. Piansak nate peuh zanglel a, mang khawngzong hong zang hi (Dan. 7:1); mangmuhna (Genesis 15:1); lim (1 Kings 18:24, 38); leh Zeisu Khazih (Heb. 1:1, 2). Nang mimal tungah Pasian hong kilaakngei hiam? Ki hawmsawn dih vou.
Laisiangthosiam pawlkhat in, phuahtawm tangthu maimai hi ci uhhi. Piancilna tangthu Adam le Eve, paikhiatna tangthu le Daniel’ tangthute bangpen, khalam hat nadingin a kiphuaktawm hi ci uhhi. Mihingte’n Pasian’ thu tungah hihbangin thukhen ziau lel uhhi. Bangzah in lauhuai nasa hiam?
Pasianin Ama’ deihna, Laisiangtho sungah khauhtakin hong pulaak hi. Zeisu Khazih tungtawn bekin hotkhiatna ngahlam zong pulak ding deihlai hi. Mite’n nanggamtatna hong et-ciangin, koibang Pasian a mu uhtam maw?