ZSS 1: Laisimna pan Telcianna ah

Hualngo Sabbath School Lesson  1   Laisimna pan Telcianna ah December 28–January 3, 2020

Lesson  1:   Laisimna pan Telcianna ah

December 28–January 3

 

Sabbath Nitaaklam                                                     Dec 28

Tu kalsung simding: Luke 24:25–27; 2 Pet. 3:11–13; Jonah 3:3–10; Num. 14:34; Daniel. 9:23; 10:11, 12.

 

Kamngah: “Philip zong ama kiang va tai a, Kamsang Isaiah laibu a simna za a hih manin “Na laisim a khiatna na thei hiam” ci in a dongh hi. (Acts 8:30).

 

            Pawlpi in tu quarter sungteng sin ding ahi, Daniel laibu lai maitang pan hong piangkhia ahi hi. I simsuk kawmkawm in, telciantheih nadingin, a nuai a teng lungngai in sim kul ding hi.

            Amasa in, Zeisu in Laisiangtho buppi le Daniel laibu’ laigilpi cih phawk masa ni.

            Anihna, Daniel kammal luan hoihna in a deihna bulpi hong telsak tuam mahmah hi.

            Athumna, a beisa tangthu mawkmawk le hun nunung thupiang dingte khentel theih ding thupi hi. Hih bang teng in, Daniel laibu le laibu dangte Isaiah, Amos, le Jeremiah cihte kilamdanna hong telsak ding hi.

            Alina, Daniel genkholh hunthute i simteh, kum-ni (year-day) zangin hun tampi sung huam cih theih kul hi.

            Angana, Daniel’ kammalte in genkholhna tebek hilo a, nisim in nuntakpih ding zong hong deihsak cihthu phawkciat ni.

 

Sunday                                                            December 29

Khazih: Daniel’ Laibu’ Thu Laigilp

           

                Luke 24:25–27; John 5:39; le 2 Cor. 1:19, 20 cihte simin. Koi ci daan in, Khazih in Laisiangtho thulaigil in om hiam?

…………………………………………………………………………………………………………………………………………………………………

 

            Zeisu pen, Daniel’ laibu a kihel Laisiangtho buppi’ thulaigil a hihna pen dotdot kullo lel hi. Gentehna: Alian 1 na, kicingtaak lopi mah, Daniel’ thuaksiat nate in, Zeisu’ thuaksiatna, vantung nusia in, leitung khuamial ukte khutnuai hong omnate tawh kisuun mahmah hi. Himah taleh, Daniel le a lawmte in, Babylon ngeinate lakah gualzawhna a ngah na’ngin, Khazih’ pilna bang pilna kiguan hi. Alian 2 na in, leitung a beisak Suang in Khazih’ kumpigam hi a, leitung kumpigam khempeuh a luahding tawntung gam ahi hi. Alian 3na in, Khazih in, a thumaan nasemte tawh meikuang sung dong tonkhawm cih hong lak leuleu hi. Alian 4na in, “Vantung in uk” cih a kitheihna’ng in, kumpi Nebuchadnezzar tawmvei sung a kumpi dinmun pan hemkhia ci hi (Dan. 4:26).

            “Vantung in uk” cih thu in Khazih pen “Mihing’ tapa” (Dan. 7:13), Daniel 7 sung bangin, Kumpigam le ukzawhna ngah ci hi. Alian 5na in, Kumpi Belshazzar zualzanna le zukhamna hangin, ama’ tung thukhenna le, Babylon in Persians khut sung a tunna hong lak hi. Hih tangthu in, Khazih le a vanmite in, Satan le hun nunung Babylon zo in susia ding cih zong hong lakkhol hi. Alian 6na in, mawhna neilo Daniel kithangsiah mah bangin, mawhneilo Zeisu zong Siampilian pa in thangsiah in mawhsak cihte hong lak hi. Kumpi Darius nangawn in, Daniel gum nuam napi’n gum zolo, Pilate in zong Zeisu gum nuam napi’n gum zolo cihte hong musak hi (Matt. 27:17–24).

            Alian 7 na in, Khazih in mihing’ tapa hi a, Amite’ tungah ukzawhna ngah hi cih hong hilh hi. Alian 8na in, Khazih pen vantung biakbuuk Siampipa cih hong hilh hi. Alian 9 na in, Khazih pen sagawh biakpiakna ganno tawh genteh a, Ama’sihna in, Pasian le amite’ kikal kizopna kipkiksak cih hong lak hi. Alian 10–12 in, Khazih pen Michael hi a, siatna khempeuh do in, Pasian mite’ sihna pan a honkhia galkap Mangpipa hi cih hong lak leuleu hi. Tua a hih manin, Daniel laibu thulaigil in Khazih mahhi cih phawk tawntung ni. A khaanliansim in, Khazih a kawk thute vive helsuk diudeu hi.

            Gimna, zia-et haksatnate le lungnop hauhnate lakah, na nuntakna laigilpi in koici bangin Khazih hithei ding hiam? Banghangin tuabang a hihding thupi hiam?

 

Monday                                                               December 30

Daniel’ Laibu Omdan

            Daniel laibu Aramaic lam thu teng, A lian 2 pan 7 (Daniel khenkhat Hebrew pau hi a, khenkhat Aramaic pau hi), a nuai a bangin a khen a khen in kigelh a, thupuak laigilpi zong ki teltuam zaw ding hi.

READ  HSS 2: NEHEMAIA

A. Nebuchadnezzar’ mangmuhna Kumpi 4 tethu (Daniel 2)

      B. Daniel’ lawmte meikuang sungpan honkhia (Daniel 3)

            C.Nebuchadnezzar tungah Thukhenna (Daniel 4)

            D. Belshazzar tungah thukhenna (Daniel 5)

       E. Pasian in Daniel Humpi kuapan honkhia (Daniel 6)

F. Kumpi 4 tethu Daniel’ mangmuhna (Daniel 7)

                        Hihbang laigualhdan in, a deihna bulpi laitasak ngiatin, hong telsak pah hi. C le D (Daniel 4 and 5): Pasian in Nebuchadnezzar khut sung pan kumpi dinmun tawmveino sung hepkhiatsak a, Belshazzar khut sung pan hemkhia paisuak hi. Tua ahih manin, alian 2 pan 7 dong deihna bulpi pen, Pasian in, leitung kumpite nangawn uk, kipsak in hemkhia cih hong lak hi. Thupuak khat peuhpeuh a kitelzawk nadingin, ki genkik phapha hi. Gentehna, Pasian in, Egypt’ mailam thu ding, Pharaoh tungah, mang nih tawh hilhkhol hi (Gen. 41:1–7). Mang masa sungah, bawng thau sagihte bawng gawng sagihte in valhtum hi. Mang nihna sungah, Buhvui hoih sagih pen buhvui hawm sagih in valhtum leuleu hi. Tua mang nihgel a deihna kibang hi: Hauh hun kum sagih khit ciangin zawnhun kum sagih hong tungding cihna hi.

                        Daniel’ laibu sungah zong Pasian in genkikkik hi. Genkholhthu thu 4 om a, tuate kigen kik phapha hi. Atawpna ah Pasian bekin ukzawhna aana nei cih, tua thute in hong hilh hi. Genkholhna thute khempeuh pen, muhdaan tuamtuam tawh ki genkhol hi napi: a nuai a sazian ombangin, hunkhat sung a thupiang ding teng a namtuamtuam a genkhol hibek hi.

 Daniel 2              Daniel 7                Daniel 8, 9                     Daniel 10 – 12

Babylon                  Babylon           

Media-Persia        Media-Persia      Media-Persia            Media-Persia

Greece                   Greece                Greece                          Greece 

Rome                     Rome                 Rome                             Rome

Pasian gam          Vantung             Biakbuk                        Micheal

Kiphut                 thukhenna         siansuah                       hong dingto

                             Leithak hong tun            

                                                              

                 Hihbang hunsaupi thupiang ding genkholna in bang lam-etna lian hong guan naci hiam? Daniel 2:44, Ps. 9:7–12, 2 Pet. 3:11–13.

 

Tuesday                                                              December 31

Daniel in Hun Nunungthu Genkhol

            Daniel’ kamsaan mangmuhnate le Laisiangtho Lui sung kamsang dangte luandaan tawhkitumdang diak hi. Daniel’ kamsaanna pen hun nunung thupiang dingte hiphadiak a, Laisiangtho Lui kamsang dangte a leuleu pen tangthu ciaptehna lampian hizaw hi. Hih kamsangte thuluandaan kitumdanna teltheihna in, laisiangtho thumaan kitel taktak pan ding hi.

            Hun nunung genkholhnate in, tangthu ciaptehnate tawh a kitumdanna a nuai a bangin om hi:

            Mangmuhna le mangmatna: Pasian in hun nunung thupuak a piak ciangin, kamsangte mang mansak in, mang musak hi. Tangthu lamsang a hihleh, kamsang te’n “Pasian kiangpan kam sang uh hi,”—mangmuhna zong kihel thei veve a,—kamsaanna 1600 veibang sungah, ki tumdanna themthembel omhi.

            Limpua tampi Kigawmkhawm: Tangthu ciaptehna ah, limpua pawlkhat om a, nisim nuntakna ah zatpah na khat peuh hi a; hun nunungthu genkholhna ahihleh, mihing muhngeiloh limpua khatpeuh, ganhing, sapi, kha le kii cihbangte zang hi.

            Pasian’ Ukzawhna Ciangtan Omlo: Tangthulam ciaptehna ah, Pasian’ sapna mite’n a dawndaan dungzui in, picinna ngah uh hi. Hun nunung thu a hihleh, ciangtanh omvetlo hi. Hun nunungthu a genna ah, Pasian in Daniel hunpan kipan leitung bei dong, kumpi piang ding le a puukdaan dingte genkhia hi. Hihbang genkholhnate pen, mihing teeltheih hivetlo, Pasian bekin a letkip thupiangte ahi hi.

READ  ZSS 4: Langdonate Maingat

            Jonah 3:3–10 simin. Tangthu maw le, hun nunungthu? Teci lak in. Daniel 7:6 e leh?

            Hihbang a tangthu le mailam thupiangding genkholhnate teltheihna in, hamphatna tampi hong ngahsak ding hi. A masa in, Pasian in, lam tuamtuam tawh pupate tungah thu na genngeizo cih hong theisak hi (Heb. 1:1). A nihna, hih pilna in, a hoih mahmah le a telhak mahmah Laisiangtho thusungah hong lawpsak hi. A thumna, hi theihna in, Laisiangtho khiatna hong teltuam sak a, “Pasian thumaan a maantakin hilh” theihna hong pia hi (2 Tim. 2:15).

            Hosea 3:4, 5; Amos 8:11; Zechariah 9:1 cihte sim lecin; Tulai Khristian pawlkhat te’n, leitungtangthupen, Nisuahna gamlaizangte khawngah tawpding in lam en mawkmawk uh hi. Bangsung kipelh hiam? A tunga tangthu lam le hun nunung thute khentelthei le uh, bangzah nuamtuam dingin na um hiam?

Wednesday                                                          January 1

Pasian’ Hunsehna

            A thupi mahmah lungngaih dingin, Daniel laibu sungah, tangthu tawh hunnungthu honglak cihthu telcian in. Thu beisa ente, mailam thukante, thungaihsunpha mite’ langdona tawh enkaak leng kitelphazaw lai ding hi.

            Thubeisa ente in Daniel sung thupiangte pen, thubeisa vive ci uh hi.

            Mailam thukante in bel, hong tangtung laiding thute vive hi ci uh hi.

         Thungaihsunte, leuleu in, tangthu sungah a taktakin omlo, khalam thute hilel ci uh hi.

        Tangthu pute in, hun nunungthu Pasian genkholh-na hi a, kamsangte hunpan kipan leitung beidong thupiangte honglak hi ci uh hi. Daniel’ laibu sinsuksuk leng, a mangmuhna khempeuh in (Daniel 2, 7, 8, 11),tangthu teng vive suutkikik a, muhna thak hong musak hi. Adventist mimasa te le EGWhite in zong Daniel le Mangmuhna genkholh thute tangthu lampanin telmuh mahmah uh hi.

            Num. 14:34 le Ezekiel 4:5, 6 simin. Genkholhna tungtangah “Ni” cih kammal koici kizat hiam?

            Daniel’ laibu sinsuksuk leng, genkholhna hunpeuhmah pen kum-ni tawh zang cih muding hihang. Genkholhna ah ni khat cih ciang kum khat cihna hipah hi. Zingsang le nitak 2300 vei a cihna ah zong kum 2300 hipah hi (Dan. 8:14). Kaal 70 a cihna ah zong, kum 490 cihna hi (Dan. 9:24–27).

            Mangmuhna in limpua vive a hih manin, ahun gente’n zong limpua ahi hi. (2) Tua mangmuhna in hunsaupi sungthu gen a hihmanin, “hunbei dong” a cih liangte bangpen tua bang hipah lel ding hi. (3) Kum-ni thupen zong Daniel in kipsak hi. A kician mahmah kaal 70 thubel, Kumpi Artaxerxes hun pan Zeisu Messiah hongpian hundong huamsuk hi. Tua a hihmanin Daniel genkholh hunte peuhmah kum-ni thukhun tawh let leng dikthei pen hi.

            Genkholhthu te’n, kum zalom peuh, kum tullom peuh huam miaimuai a hihteh, tuate in bang thuakzawhna hong guan naci hiam?

Thursday                                                               January 2

Huntawh Kituakna Nei Daniel

            Daniel’ laibu pen, a beisa kum 2500 laipek a hikhin mahleh, kum zalom 21 sung a om eite ading zong kituakna nei veve lai hi. Eitawh a kituak thuthum lungngai dihni.

            Pasian in eite hong uk gige: Thusia tampi piang tamahleh, Pasian in amite uk gige in, amau ading a hoihpenpen in vaihawmpih den hi. Babylon ah Daniel phutkhakte in, Egypt ah Joseph le Persia ah Esther tawh kisuun mahmah hi. Hih khangno thumte pen gamdang milimbia mite’ galmat hipeuh hi. Amau dinmun etpak in, thanemhuai le Pasian in phawklo cihnophuai mahmah taleh, Pasian in, amaute thulian mahmah bawl dingin zang zawsop hi. Haksatna, thuaksiatna le langdona phuutciangin, Pasian in, Daniel, Joseph le Esther a zatdaan enpha kikkik in. Topa pen eite Topa hi gige lai a, eite’ haksat laitak le bawlsiat thuak laitak in hong nusialo cih phawkden in.   

READ  ZSL 5: ZEISU EITE’ SIAPIPA

            Pasian in tangthu paipih gige: Leitungin mawhna le gitlohna dimlua ahih manin, lungkham in cihna’ng theilo in omthei hi hang. Daniel’ thupuak in, Pasian in makaih ci hi. Daniel a khaanlian khatsim ah, Pasian in tangthu pai hawl gige ci hi. Ellen G. White in, “Gamte a piankhiatna mihing tangthu, kumpite piangin a puukkikna thute in, tua mite’ pilna siamna tungah zong omhi. Thu a piansak tepen, amau ngaihsut siamna, utna le lungkip lohna khawngtawh kisai hi. A hihhang, Laisiangtho sungah, Pasian in puandalna hong liipkhiatsak a: Mihingte in, amau ngaihsut bangin thuman maw manlo, a sepna khempeuh ah, a kimulo Pasian in, amau nungvuah nasem khinkhian a, Ama’ deihna mah picingsak hi” ci hi. Education, p. 173.

            Pasian in Hunnunungmi’ Etteh ding Mi koih: Daniel le apawlte pen, amau hunsungin, leitungmi muhdan nangawn ah mikampha hi uh a, etteh takcing uh hi. A’upna uh sinna hongtun ciangin, Babylon deihna zui a Pasian nial ding sangin, Pasian’ kammal tungah dingkip zaw uh hi. A cihtakna uh le a ki pumpiakna uh tepen, lungdamna thu tangko eite phutkhak ding langdona le bawlsiatnate maingat ngamzo dingin tha hongpia hi. Tua banah Pasian tungah thumaan kawm in gam tungah zong ki thumaan thei cih hong hilhlai hi.

            Daniel 9:23; Daniel 10:11, 12; le Matt. 10:29–31 cihte simin. Pasian in ei mimal mahmah hong lunglut a hihna hih laiasiangtho munte in bang hong lak hiam?

 

 

Friday                                                                     January 3

Ngaihsutbeh ding: “Piangsakpa deihna zuining a ci peuhmah ading inlaisiangtho in lampi hi. Pasian in thuman hong genkhol zo hi; Vanmi le Khazih tektek hong paisuk a, Daniel le John tungah, asawt lo in thupiang dingte lak hi. Ei honggup nading a thupi mahmah selsim in koihlo hi. Thuman a zong mite ading, lungsim a buaisak lel ding khawngin laklel lohi. Habakkuk tungtawnin Topa in, ‘Nangmah kongmuhsak thukhempeuh, a simnop mahmah dingin gelh in’ Habakkuk 2:2. Thungetna tawh ki-aap in na sim leh, Pasian’thu kician mahmah lel hi. Lungsim citakte in thuman khuavak sung hong zuan ding uh hi. ‘Thuman mite tungah khuavak hongtang hi.’ Ps. 97:11.Pawlpimite in, a kiseel khinkhian thuman thutak, lungsim takpi tawh a zonkei vua le siangthona sungah mainawt zolo ding uh hi.” Ellen G. White, Kidona Lianpi, laimai. 521, 522.

            “Daniel le a lawmte thu simin. Pumpi deihna zuihtheih ding zia-etna tampi thuak mahleh, Pasian pahtawi teiteizaw uh hi. Siatna kici peuhmah pelh ding khentat uh hi. Galpa lampi totding nialzaw uh hi. Tua ahih manin, Pasian in zong, a thumaanna uh hangin, thaman in thupha tampi piakik hi.” Ellen G. White, Manuscript Releases [No. 224], vol. 4, pp. 169, 170.

 

 Kikup Ding Dotnate:

 

  1. Daniel’ laibu sinsuk leng, vangnei thupi khat hong omding hi. Pasian in ukzawhna nei bek hilo in, eite tawh kikimdong hong tuaksuk a, hong kholhpih hi. Gentehna in, Daniel 2 sungah, milimbia kumpikhat hopih in mangpia hi. Mi khat’ lungsim sung a luttheih na’ng in, a ihmut laitakin mangmansak cihpen a kinaihna kiteh theilo hi. Tua kawmin, a mangmat in, leitung kumpite nangawn Pasian in uk a, na khempeuh a tawpna tung ding cih hilh hi. Hih thute panin bang hehnepna le lam-etna ih ngah thei diam? Tua laitak mahin, Pasian in nang kiang tekah om a, na ngaihsut khempeuh hong thei cih naphawk hiam? Singlamteh ah kamciam in banghangin thupi hiam?

 

  1. Na khansung vuah, tangthu le mailam thupiang dingte cih kammalte kikum un. Laisiangtho sung mundang ah tuabang thute a omlai hiam?

Lesson 1:

Download (PDF, 3.13MB)

1st Quarter MYUM

Download (PDF, 557KB)

1st Quarter MUC

Download (PDF, 304KB)

Tags: , ,

Admin

Admin

Top