HSS 10: LALPA CHU CHIBAIBÛKIN

Zomi Sabbath School 10: Topa Bia PDF

ZIRLÂI 10       November 30–December 6

LALPA CHU CHIBAIBÛKIN

 

SABBATH CHAWHNÛ            November 10

 

CHHIAR TÛRTE: Neh. 12:27–47; 1 Chro. 25:6–8; 1 Joh. 1:7– 9; Joh. 1:29, 36; 1 Kor. 5:7; Heb. 9:1–11.

 

CHÂNGVAWN: “‘Ani chu a tha si a, a ngilneihna chu Israel mite chungah a awm kumkhua dâwn a ni’ tiin LALPA fak leh a hnêna lâwmthu sawiin hla-in an inchhâwn a” (Ezra 3:11).

TUN kâr zirlâi chângvawn hian Hebrai miten Pathian biak inkhâwm an kalpui thin dân leh Pathian chunga an lâwmzia chu amah fakna hla sak hmanga an tihlan thin thu min hrilh a. B.C. 515-ah khân tempul thar hlanna leh lawmna hun an lo hmang tawh a (Ezra 6:15–18), chumi hnu kum 60 vêlah Jerusalem kulh sak that leh tâk hlanna leh lawmna an nei ve leh a ni (Neh. 6:15–7:3; 12:27– 43).

Nehemia hian a lehkhabu bung 11 leh 12-a chhûngkaw hrang hrangte hming a ziah chhuah hnu-ah khawpui kulh hlanna leh lawmna hun an hman dân a sawi ve ta thung a. Hetih hun lâi hian Pathian hnêna thil hlan an chîng hle a: tempul te, khawpui kulh te, mi mal in leh vântlâng hmun te pawh an hlân thîn. Chutianga thil hlanna hun hman dân tûr chu uluk takin an lo duang lâwk sa vek thîn a, hla an sa a, rimâwi chi hrang hrang an rem a, hâlral thilhlante an hlân a, an intithianghlim a, lâwm leh hlim takin an awm thîn a ni. Davida khân thil hlan nîa hâlral thilhlante hlan hi a lo tichhuak a, a fapa Solomona   pawh khân tempul chhûnga thuthlung bâwm lâk luh a nih khân hâlral thilhlan a hlân ve leh bawk (1 Lalte 8:5), chumi hnu chuan Israel hruaitu dangte pawhin an chîng chhunzawm ta zêl a ni.

Tûn kârah hian thil eng emaw an hlan nîkhuaa LALPA chibai an bûk thin dân kan en ho ang a, an thil tih dân atang hian keini LALPA thuhmun chibaibûktutena zirlâi zir chhuah theih kan neihte chu hriat kan tum dâwn a  ni.

 

SUNDAY          December 1

LALPA HLATE CHU SA-IN

Nehemia 12:27–29 chhiar la. Pathian chibai an bûkna leh fakna kha eng ang nge a nih tih tilangtu thumal thenkhatte chu sawi ang che. Pathian chibai an bûk dân kha eng tin nge i hrilhfiah ang?

Israel hnam hian Levia-ho-te zînga mi thenkhat kha tempula zâi thîn tûr leh rimâwite tum thîn tûrin an ruat a. Tempul rawngbâwlna chu a mâwia a lo zahawm theih nân amah Pathian ngeiin hla an sak dân tûr leh rimâwi an tum dân tûr nên lam a hrilh thlap a ni.

Lal Davida khân tûn hmâa an lo tih thin dân âia ropui leh mumal zâwkin ruahmanna thar a rawn siam a. Tempula hla satute hotu ni tûra Davidan a ruat Asafa thlahte tho kha Nehemia pawhin LALPA ina hla sa tûr leh rimâwite tum tûrin a ruat ve leh a ni (Neh.  11:22).

1 Chronicles 25:6–8 chhiar la. Hei hian Pathian chibai an bûknaa rimâwi leh ‘LALPA hlate’ an sakin hmun a luah thûkzia leh pawimawhzia eng tin nge min hrilh le?

 Zâi tûra an mi ruatte hi Levia chî-te niin tempul- ah khân an chêng ve chawt mai a. Khatia tempula hla an sak leh rimâwi an rem khân hlawh an nei thîn a ni. Davida hun lâi khân rimâwi tum zirna hmun changtlûng deuh tak siam a lo ni tawh a, amah ngei khân a hmunah a vil thîn nghe nghe. Chutah chuan zirtîrtute leh zirlâite an awm a, a thente chu la thalâi deuhte an ni a, upa deuh tawhte pawh an awm ve tho bawk. Khâng mite khân tempula Pathian fakna hla sak leh rimâwite rem chu an kutken tawp mai a. An zînga thenkhat kha rimâwi tumtu an ni a, thenkhat kha zâi thiam an ve thung; tin, thenkhat dang leh khân an rimâwi bungruate leh rimâwi tumtute thawmhnaw hâk thinte kha an lo enkawl ve bawk a ni. Hetianga an hna tûr theuh sem a nih chhan hi eng nge ni ang? A chhan chu hetianga chan an insem hian an talen kawl theuh chu a tipung a, Pathian chibaibûk inkhâwm a lo changtlûngin a lo phuisui phah sawt bawk. Pathian chibaibûknaah hian kan theih tâwka a tha ber zêla tih kan tum tûr a ni a. Pathian faknate chu thinlung atanga lo chhuak a ni tûr a nih bâkah, thlarau lama châwisân kan nih theh nân a tha thei ang bera lan chhuahtîr tûr a ni bawk. Chutiang chu a nih avângin tempula thawk rimâwi tumtute leh zâi mite kha inkhâwm kâihruaitu tûrte an  nih avângin uluk taka thlan chhuah an ni ngei ang tih a rin theih.

Eng tiang kawngte-in nge rimâwi hmanga Pathian chibai bûk hlimawmzia hi i lo hriat ve tawh le? Chutiang chu eng tiangin nge i tân a pawimawh viau?

 

THAWHTANNI            December 2

INTIHTHIANGHLIMNA

                Nehemia hian Jerusalem kulh hlan a nih dân leh a hnua zâi  mite an  lo  kal  khâwm thu  a  sawi hnu-in an intihthianghlum thu a sawi ve leh thung a (Neh. 12:30). “Chutichuan, puithiamte leh Levi-hote chu an intithianghlim a, tin, mipui te, kulh te, a kawngkhârte pawh an tithianghlim bawk a” (NKJV) tiin. Hebrai tawnga ‘tithianghlim’ tih an sawina thumal, thr awmzia chu ‘tifâi,’ ‘tithianghlim’ tihna a ni a, Thuthlung Hlui lehkhabu-ahte hian kawng hrang hranga hman niin Pathian hmâa rilru thianghlim pû sawina atân pawh hman a ni bawk.

See also  Zirlai 7: TÂWTAWRÂWT PASARIHTE CHU

He thu hi ngun takin han ngaihtuah teh: “Nimahsela, amah chu ênga awm a nih angin êngah kan kal a nih chuan kan za-in kan inpâwl tlâng ang a, a Fapa Isua thisen chuan kan sual zawng zawng min tlenfâisak bawk ang. Sual eng mah nei lo nia kan inchhâl a nih chuan mahni leh mahni inbum mai kan ni ang a, thutak chu keimahniah a awm lo tihna a ni bawk ang. Kan sualte kan puang a nih erawh chuan ani chu a rinawma a fel bawk avângin kan sualte min ngâidam ang a, fel lohna zawng zawng lak atangin min tithianghlim bawk dâwn a ni” (1 Joh. 1:7–9, NIV). He thu hian (1) mihring nihphung chungchâng te, (2) Pathian ngaihdamna chungchâng te, (3) kan nuna Pathian thiltihtheihna chungchâng te eng tin nge min hrilh le?

Tempul leh a rawngbâwlnate hi hmânlâi Israel sakhuaah khân a pêng pawimawh tak a ni a. Mahse, tempul leh a rawngbâwlnate ngau ngau kha chu sakhuain mi hruai thlen a tumna ni lovin, hruai thlen min tumna kawng leh hmanrua mai a ni zâwk. A tum tak chu, thu an thlunpui Pathian, LALPA Isua Krista nêna chhandamna thlen thei inlaichînna neihtîr leh, an nuna a thiltihtheihna hriattîr a ni. Pathianin thil a lo tih tawh leh eng lak atangin nge LALPAN  min  chhandam  tih  hriatna  hian  amah chu hmangaiha chibaibûk nachâng min hriattîr thîn a. Chu tak chu hmânlâi Israel miten hun kal tawha Pathianin thil a  lo tihsak tawhte an sawi chhuah leh fo thin chhan pawh a ni rêng a ni. LALPA thatzia leh hmangaihna ngahzia hre tûrin a pui a, chu chu an chibaibûkna inkhâwm boruak luah khattu hlimna leh lâwmna an neih theih phahna pawh a ni bawk. Keini tûnlâi huna mite tân pawh hian sual ngaihdamna channa leh ngaihdam nih nawmzia hriatna chu Pathian chunga lâwmna leh hlimna kumhlun atanga lo chhuak a ni tûr a ni a. Chutiang a nih chuan, LALPA fak leh a nungchang mâwizia sawi lan chu thil awlsam tak a ni ngei ang. Krawsa an khâi kân Isua kan thlîr tluka Pathian nungchang târ lanna ropui zâwk thil dang kan nei thei dâwn em ni? Ani chuan kan sualte avânga hremna chu a tuar a, chumi azârah chuan hremna kan lo pumpelh ta hlauh a ni si a.

Tûn hmâa thil sual i lo tih tawhte emaw, tûna i nungchang emaw kha chu eng pawh lo ni se, krawsah chuan ngaihndamna pumhlûm i chang thei a—tin, tûnah ngei pawh hian i chang nghâl thei bawk. Chuti a nih chuan, Isuan pêk a tum che ngaihdamna chu eng vângin nge tûnah ngei hian i ta neih nghâl mai lo ang ni?

 

THAWHLEHNI            December 3

ZÂIPÂWL LIAN TAK TAK PAHNIH

Nehemia 12:31–42 chhiar la. Eng vângin nge kulh thar hlanna leh lawmnaah khân rimâwi rem chu a thil pawimawh tak pakhat a nih le?

Nehemia hun lâia Pathian chibaibûkna inkhâwmah khân Jerusalem vêla fakna hla sa chunga kal kual thîn zâipâwl pahnih an awm a. Chûng zâipâwl pahnihte chu hmun pakhatah an zâi ho phawt a, chumi hnu chuan inthenin khawpui chhûng hmun hrang hrangah an kal kual ta thîn a ni. Zâipâwl pakhat zâwk chu Ezran hovin hma a hruai a, pakhat dang chu Nehemia’n ho ve thungin tlar hnung berah a lo ding thîn a. Chutianga hmun hrang hranga a zâi kual hnu chuan Ruam Kawngka an tihah chuan an intâwk khâwm leh a, chuta tang chuan tempul lam panin an kal ta thîn a ni. Tâwtawrâwt hâmtu puithiamte chuan hêng zâipâwl pahnihte hi zah takin an lo dawngsawng a. Zâipâwlte tempul chhûnga an luh hnu chuan a inhmachhawn zâwngin an thû a. An thil tih vêl dân hrim hrim kha a fel fâiin a khûn êm êm mai a ni. Kulh thar hlanna leh lâwmna bâkah, Pathian chibai an bûknaa rimâwi remin hmun pawimawh tak a chan thin chhan hre tûr chuan tempul rawngbâwlnaa rimâwi an hman dân kha kan hriat hmasak phawt a ngâi ang. Tempula rimâwi an hman dân hi chu Vânapa Hall vêla zâithiam tu tuten emaw an zâi leh che vêl lo thlîrtute lawmah tia an chhepchher chi hrang hrangte an tiri chhuai chhuai ang hi a ni ve lo. Khatia zâi mite an zâi a, rimâwi tumtuten an rimâwi ken theuhte an han tum khân mipuite chu kûnin an lo tawngtâi thîn a. Chutiang chuan zâi leh rimâwi tum kha Pathian chibaibûkna kawng khat a ni ve tho a ni.

See also  ZSS 4: Meikhuk Pan Kumpi Inn-ah

Temple rawngbâwlna leh Pathian chibaibûknaa a laimu ber chu hâlral thilhlan hlan a ni a, chu chu thil tih nuam lo angreng tak a ni nghe nghe. A chhan pawh pawi sawi lo ransate chu phuar betin an hrawka an zaisak thin vâng a ni. Mahse, mâwi leh nalh tak maia rimâwi an han tum khân mipuite ngaihtuahna chu vân lama hruai chhoh a nih bâkah an Pathian chibaibûk inkhâwm boruak hrim hrim pawh a tinuam sawt thîn a ni.

Bible-ah hian rimâwi rem chu Pathian chibaibûkna inkhâwma thil pawimawh tak a nihzia hmun tam takah kan hmu a. Hêngte hi han en teh: Exodus 15:1; 2 Chronicles 20:21, 22; leh Thupuan 15:2–4.

Vânah a ni emaw, leiah a ni emaw, rimâwi rem hi Pathian chibaibûknaa thil tel ve ngei ngei thîn a ni a. A chûnga Bible châng kan târ lanahte khian an hla sak chu LALPAN a mite tâna thil a tihsak chungchâng sawina a ni hlawm a, ‘sakawlh chunga’ hnehna a chan avânga châwimâwina pawh a tel bawk. A khâikhâwm nân, mihringte chhandam an nih theihna tûra a thiltihte avânga Pathian fakna a ni kan ti thei  ang.

Pathianin thil a lo tihsak tawh che leh chumi avânga amah fakna hla i sak ngei a tûl chhan thenkhat han sawi teh.

 

NILÂINI           December 4

INTHÂWINA HI PATHIAN CHIBAIBÛKNA A NI

Nehemia 12:43 chhiar la. Pathian chibai an bûknaa inthâwina ropui takin pawimawhna a neih chu eng nge ni?

Tempul rawngbâwlnaah khân hâlral thilhlan/ inthâwina hlan chu Pathian chibaibûkna pêng pawimawh tak pakhat a ni a. Chumi atân chuan thil chi hrang hrang— ngaihdam dîlna atân te, hlimna lantîrna atân te leh Pathian hnêna lâwmthu sawina atân te—an hmang thîn. Hâlral thilhlante kha Pathian chibaibûknaa a laimu ber niin, chibaibûktute chu Pathian thutak a hriattîr a, Pathian chu tu nge a nih tih a hrilh bâkah, an tâna a nun la hlântu tûr Messia, Pathian Berâmno chu a kawhhmuh bawk a ni.

Johana 1:29, 36; 1 Korin 5:7; leh Thupuan 5:6, 12, 13 chhiar la. Hêng chângte hian hâlral thilhlanin a entîr chungchâng eng nge min hrilh? Hmânlâi Israel-te kha thutak entîrtu an ran vulh an thaha chungah pawh an lâwm thei a ni a, keini hian anni âia kan lâwm zâwkna chhan tûr eng nge kan neih le?

Nehemia 12:43-ah ringawt pawh hian Pathian chibaibûktute chu an hlima an lâwmzia vawi eng emaw zât sawi nawn a ni a. A awmzia chu, Pathian chibaibûk inkhâwm an neih lâi hian urhsûnin (an sualte thâwi nâna ran an talh kha thil urhsûn tak mai a ni hrim hrim  bawk a, Pathian chu zah hle mah se, hlimna leh lâwmna boruak pawh a awm tel ve tho tihna a ni. Chutiang chuan keini pawhin Pathian chu zah leh tih tak, lâwm chung bawk siin chibai kan bûk ve tûr a ni a. Sâm 95-ah pawh hian Pathian chibaibûkna dik takah chuan hla sak te, hlim taka âu te, Pathian châwimâwi nâna rimâwi tum te, a hmâa kûn leh thingthit te a tel a ni tih min hrilh a. Siamtu chu châwimâwi a, fak a, chibaibûk thei tûr chuan a chunga kan lâwmna leh amah kan zahna hi inbûk tâwk taka kalpui dân kan zawn a pawimawh hle a ni.

Krawsah khan thil siam zawng zawngte Siamtu (Johana 1:1–3 en la) chu khâi kânin a awm a, a thilsiamte sual tlan nân a thi a ni tih kan ngaihtuah hian eng tin nge kan rilru a lo awm thin? Krawsa Isua thihna kha kan ngaihtuah châng hian lâwm hle tûr kan nih chhan eng nge awm le?

 

NINGANI         December 5

CHIBAIBÛKNAA PUITHIAMTE LEH LEVIA-HOTE

Nehemia 12:44–47 chhiar la. Eng vângin nge Juda- te kha rawngbâwltu puithiamte leh Levi-hote chungah an lâwm êm êm? Anni khân eng nge pawimawhna an neih?

 Puthiamte (anni hi Levia chite an ni a) hnathawh khân eng nge a entîr? Hebrai 9:1–11 en rawh.

“Van biak bûka mihringte âiawha Kristan sawipuina hna a thawh hi kraws-a a thihna ang thova chhandamna ruahman pêng pawimawh tak a ni a. A thihna hmang khân chu hna chu thawk tanin thlân atanga a thawhleh hnu khân chu hna chu thawk zo tûrin vânah a chho leh ta a ni. Chumi puanzâr chhûng, kan tâna hmahruaitu a luhnaah chuan (Hebrai 6:20) rinnain kan lût ve ngei tûr a ni.”— Ellen G. White, The Great Controversy (Indona Ropui), p. 489.

Hetih lâi huna mite hian keini tûnlâi huna miten êng kan neih ang hi la nei ve lo mah sela tempula rawngbâwl hna thawk thei awm chhun Levia-hote hnathawh kha a pawimawh hle a ni tih hre tûr chuan hriatthiamna an nei ve tho a. Anmahni kal tlang hian Pathianin hna a thawk dâwn a ni tih hriain an phûr êm êm thîn.

Israel hnam khân Pathian Thu chhiara, tawngtâia, chibaibûka, ama hnêna inhlan thar lehna hun te hmangin Pathian nên hun an lo hmang tawh thîn a. Mahse, chutiang thil ti reng chung si khân tempul rawngbâwlnate chu an lo thlahthlam daih tawh mai a, din thar leh a tûl a ni tih an hre chhuak leh hnuhnawh a nih kha. Tûnah chuan hêngte hi din thar leh a ni tawh a, mipuite chuan anmahni âiawha Levia-hoten hna pawimawh tak an thawh tûr chu hriain an lâwm a. Tempul rawngbâwlnate chu chibaibûkna kalpui dân tûra ruahmanna a lo siamah khân a pêng pawimawh tak a ni tih Pathianin a hriattîr a  ni

See also  SINNA 12: CAESAREA AH A KIKHUMCIPNA

Vânduaithlâk takin, rawngbâwltu te, Pathian Thu zirtîrtu te leh rimâwi tumtu te kha an pawimawhzia an lo hre lo thîn a. Nehemia hun lâi pawh khân Levia-hote chuan a chângin ngaihsak an han hlawh hle a, a châng leh an hlawh lo leh êm êm a. Mipuiten sâwma pakhat leh thawhlâwmte an pêk loh miau avângin an nupui fanaute châwm nân anmahni hna a han thawh leh lâwp lâwp a tûl tum te pawh an awm ngun mai.

Sâwma pakhat leh thawhlâwmte tel lo chuan khawvêl pum huapa inawpna nei kohhran a ding thei lo va. Kan rawngbâwlna pêng hrang hrangte hi chhawnzawm zêl ni se kan ti a nih chuan sum leh pâi thawh a, tawngkâa lâwmthute hrilhin kan rawngbâwltute hi kan tanpui ngei ngei tûr a ni. Kohhran hi kan duh anga tha famkim chu a ni thei ngâi kher lo vang; mahse, chumi avâng chuan Pathian hnêna thilpêk pêk kan tîm tûr a ni chuang lo. Khawvêl pumah hian a hnathawh chu chhunzawm zêl a nih theih nân kan tih theih tâwk theuh i ti ang   u.

 

 

ZIRTÂWPNI     December 6

ZIR BELHNA: Ellen G. White-i lehkhabu, Krista Panna Kâilâwn phêk 50–58-a, ‘Kristaa Thanlenna’ tih kha chhiar ni se.

“Krista kraws chanchin hi tlanten chatuan chatuana an zir tur leh hla sak bera an neih tur a ni a. Chawimawia awm tawh Kristaah chuan khenbeha awm hnu Krista kha an hmu ang. Van boruak zau taka khawvel chhiar sen loh awmte siamtu leh chelhtu, Pathian Fapa duh tak, vana lalber, cherubte leh serafim eng mawi tak takten an chawimawi nin ngai loha chu suala tlu tawh mihringte kaitho turin a rawn intitlawm a, suala bo tawh khawvel chungpiknaten a thinlung a tihkeh a, Kalvari krawsa a nunna a laksak thlengin sual avanga inthiamlohna leh zahna chu phur tluan parh a, ama Pa ngei pawhin a tukhun a chhawn khum nghe nghe a nih kha. Khawvel zawng zawngte Siamtu, mi zawng zawngte chan tur la rel feltu tur ni bawk chuan a ropuina chu hlipin amah leh amah a intitlawm a, mihringte a hmangaihzia kha vana awm zawng zawngte mak tih leh chawimawi a ni kumkhua tawh ang. Chhandamten an Tlantu chu an han thlîr a, a hmelah chatuana Pa ropuina hmel eng mawi tak chu an hmu a; a lalthutphah chu an han en leh a, chu chu chatuan ata chatuan thlenga awm a nih avangin a lalram chuan kin ni a nei dawn lo a ni tih an hria a, tichuan lawmna hla ropui tak, ‘Beramno talh tawha chu thiltihtheihna te, hausakna te, finna te chakna te, chawimawina te, ropuina te, malsawmna te hmu tlak a ni e” tih chu an sa ta a ni.”— Ellen G. White, The Great Controversy (Indona Ropui), p. 652.

 

SAWI HO TÛRTE:

  1. In class-ah khân Pathian chibaibûknaa amah zahna leh a chunga lâwmna hi inbûk tâwk taka kalpui a pawimawh dân sawi ho ula. A nih loh pawhin, he zawhna hi sawi ho ang che u: Pathian zahna leh a chunga lâwmna hi thil hrang daih, inkungkaihna eng mah nei lo a ni em?
  2. Israel mite khân Jerusalem kulh chu a hlanna hun hmangin Pathian vênna hnuaia awm tûrin an dah a, Pathianin a vêng a nih loh chuan awmze nei lo mai a ni dâwn tih an hre chiang hle tihna a ni. Solomona pawhin heti hian a lo sawi ve chiah mai: “LALPAN in a sak loh chuan a satute chuan an thawk thlâwn mai a ni. LALPAn khawpui a vên loh chuan a vêngtute chu an meng thlâwn mai a ni” tiin (Sâm 127:1, NIV). LALPA tâna hna kan thawh hmâa kan tih hmasak phawt ngâi awm chu eng nge ni?

 

  1. In kohhran Pathian biak inkhâwmah khân rimâwiin hmun pawimawh tak a chang em?

 

  1. Pathian Lehkha Thu hian Isua chu kan Puithiam Lalber niin vân biak bûkah khian rawng a bâwl mêk a ni tih chiang takin a sawi a. Khitah khian eng hna chiah nge maw a han thawh rêng le? Lei biak bûka puithiamte rawngbâwlna khân vân biak bûka kan tâna Isua hnathawh chu hrethiam thei tûrin min pui em?

 

 

 

 

 

 

 

 

 

 

 

 

 

 

Tags: ,

Admin

Admin

Top