Lesson 4

Late le Paunak Sung a Hehpihna le Thumaanna

July 20 –  26

 

Sabbath  Nitaklam                         July 20

Tukaalsung simding : Psalms 9:7-9,  13-20;   Psalms  82;   Psalms  101;  Psalms 146; Prov. 10 :4;  Prov.  13: 23, 25; 30:7-9.

Kamngah: “A ginalo mite leh pa aneilo mite tungah thuman unla, a thuakte leh a cimawhte tungah thu a manin khen un. A ginalo mite leh a cimawh  mite hon unla, migilote’ khutsungpan amaute honkhia un.”  Psalms 82 : 3, 4.

            Late leh Paunakte in, biakpiakna sungbek a hilo, i nisim nuntaksung mahmah ah, Pasian tawh kikholhna te ciamteh hi. Paunakte in, ki gualzopna leh innkuanvai, nasep silbawl leh gam-ukte a ding pil-kammal te vive hi a; Late leuleu teh, lawpna lungnopna leh khalam phutkhak thute tungtang phatna cihte kikaikhawm a hihi.Pasian in i nuntakna hong kem tawntung a hih manin, i upna in i nuntakna kilamdang sak tawntung ding a hihi.

            Bangbang hi taleh, i nuntak sungin, mihingte nuntakna sungah thumaanlohna tawh kidimkhin cihpen awlmawh lo in i omthei kei ding hi. Tua thumaanlohna te khempeuh pan noptuamna i ngahtheih na dingin, i Topa in lampi zong hi. Amahpen lam-etbei te’ lam-etna ahi hi.

            Hih thulu tawh kisai in i laibu te geel genna te simthei bek i hih hang, hih i lai sinna in mizawngte, ki nengniamte leh a ki mangngilhte tungah nasep dingdan hong siamsak tuam ding hi.

 

Sunday                                                          July  21

Late: Ki Nengniamte’ ading Lam-etna Late

             Lungkham haksat thuakte Pasian in mu a za hi. Late sungah a om munpenpen in, Pasian muang napi, thumaanna a mu nailo te thumna te hi. Pasian’ hoihna, thumaanna leh vangliatna te pen, leitung thumaanlohna,  ki nenniamna te in tuamcip zaw phial a hihna hih Late sungah kilang hi.

            Hih latepen tuni ciangdong mah a kisasa late ahi hi.A upna te uh mit nailo hi. Lam-etna zong bei nailo hi. Pasian tungah a kinnget mahmah thu bel, a ziakai luatma, siatna in a galzawhma, nenniam thuakte kisiatna in a zawhma in, Pasian gamtang vat ding cih a hihi.

            Psalms 9:7-9,13-20 simin. Late phuakpa David dinmun na muhsak thei hiam? Pasian hoihna a muanzia leh a thuakna te kikal ah a haksatzia te na phawksak hiam? Haksat mahmah hunsungin, Pasian tungah upna leh muanna tawh bangzah na kisaan hiam?

…………………………………………………………………………………………………………………..

            Late buppi sungah, a kidawn phatphatna in, Pasian’ hoihna leh thumaanna bekmah lam-etna om hi. Siatna leh thumaanlohna in tulaitakin gualzo ding tawh kibang hi. A thuaksia mite’n mun a ngahkik leh a thaksuak kikni ciangin, amaute in thukkikna sang ding uhhi. Tulai Lai Siangtho simte in, Pasian thukhenna pen lauhuai mahmah dingin gen uhhi. Jew te upna danin “mi tultampi neihsa lamhsa a taante in, amau lampan a thutang khenna te za ding uhhi. Amau un thukhenna laulo uhhi. Amau thu pen dawntheihloh hilo hi. Pasian thukhen ni ciangin hihbangin hong tung ding hi” C.S.Lewis. Reflections on the Psalms p. 11.

            Late sungah, a ki nengniamte in, tu leh tu mahmah in a thuaksiatna te leh a lungkiatna te uh pan lam-etna omcih i mu hi.

            Thukhenna pen a kihtakhuai lam hi zawlo in, a hoihzawlam in i koici lak theih ding hiam? 

 

Monday                                                         July  22

“Na Khatpeuh Hong Semin, Pasian”

See also  Thuhilhkikna-ah Thumakai

             Psalms 82 sung simin. Bang thupuak a om hiam?

…………………………………………………………………………………………………………………….

            Pasian in Israel mipi ki ukna ding apiak thukhamna te akhang akhang in zuizolo uh hi. A kimkot vua om minamdang te bangin, thumaanlohna, kinenniamna te zangin om lel uhhi. Makai leh thukhente in amau ading bek ngaihsun uh a, a mai pha uh pen golhguk hangin pia ziauziau uhhi. A kembit ding zumpi omlo a hih man in, mi mawkmawk te leh mizawngte in suksiatna thuakzel uhhi.

            Psalms 82 na pen hih teng a thukna ahi hi. Pasian pen thukhen lianpenpa hi a, makai te leh thukhen mangte tungah thukhen ci hi. Tua la in, mipi lak a thukhenza a ngah te pen “Amah nuai ah a ngah” (EGWhite, Prophets and Kings. lai 198) na ci hi. Amau dinmun te pen Pasian khutnuai bekah a ngah uh hi cihi. Laphuakpa muhna ah, lei-tungthukhen te in, Pasian thumaanna tawh kizui in thumaan in khending deih hi. Tuabang a hihlo te, amau te thu kikhen ding hi. Hih la sungah, Pasian in na hong sem nawh ding (Psalms 82:8), thumaanlohna te khawlsak ding insam hi.La dangte mah bangin hih la in zong, thumaanlohna hang a pauhun a ngah zolo, nenniam thuakte a dingin ngetna aw gingsak hi. Pasian in sangpen lianpenpa a hihna tungah a ngen ahi hi. Amah sangin zumh lianzaw om nawnlo hi. Leitung zumh te in, mizawngte, nen niam thuakte otna aw a zakloh uh ciangin, kuamah in a nial zawhloh huhna nget na ding mun omsak lai hi.

            Khatveivei teh nenniamna i thuaktheikhading a, khatveivei teh eimah in mi a nengniamte zong i hi thei kha ding hi. Psalms 82 na nasim ciang in, nang leh nang a nengniampa maw, nenniam a thuak maw cih na tel ding hi. Pasian in a thumaanlo thukhenpa thei a, a hoihzaw nuntakdan a neihtheihna dingin zol hi (Psalms 82:6). Mi a nengniam te i  hih khak leh zong, ki puahphat nopna lungsim i neih nakleh lam-etna om veve lai hi.

 

Tuesday                                         July 23

Kumpipa’ Kamciamna

            Psalms 101 simin.  Makai te a ding a kigelh himah taleh, bang dinmun peuh a na om zongin, nangma ading pilna bangteng nalak theihding na mu hiam?

…………………………………………………………………………………………………………………..

            Psalms 101 pen makai te a ding ahi hi. David in Israel te kumpi a suakcil lam hun a aphuak hi dingin ki um hi.A kumpi suakding a kamciamna khawngte hihtuak hi. Saul in a galneih manin a bukcip hunlai thu te, kumpi khat in a lampi a totkhialh leh minam buppi leh ama’ innkuan kisiatna a hih thute kihel hi. David in tuate tawh a kibanglo makaihoih suaksawm tuak hi.

            Eite zong gamvai leh minam makai i hi kha thei ding a, midang te thapiak zawhna leh huzaap zawhna hunhoih a ngah i hihi. Hihpen i nasepna i veng, innkuan leh pawlpi peuh zong hikha sop ding hi. EGWhite in  “Psalms 101 sung a, David’ kam ciamna tepen, innkuan bangkua makai te kamciamna dingin hoih hi” (Counsels to Parents, Teachers and Students.  lai 119) ci hi.Tuabang hunhoih i ngah leh, hihbang kamciam te laamsang ciat ni. I makaihna peuhpeuh ah David’ makaihna daan zangleng, midang te a dingin thupha hong hi ding hi.

See also  Lesson 7: Innkuan Pumkhatna Tawhtangte

            A kipatcilna ah David in Pasian hehpihna leh thumaanna pahtawi masa a, tua te in na khempeuh i bulpi hong suak hi (Psalms 101:1).Tuabang a hih theih na’ngin, khialhtheih na’ng, siat theih na’ng leh thumaanloh theih na’ng a makai te thaang a kisiah te kantanzo phot ding hi. Ngaihsutna hoih a piathei ding thupisa a hihmanin, mi muanhuaite zong, aulian in koih hi. Ama makaihna ah thumaanna leh hehpihna omsak ngiat hi.

                      Eite zong kumpi ulian khawng suak kei phialmah leng zong,eima om mun ciangciang ah thumaanna leh hehpihna i koici omsak theih ding hiam?

 

Wednesday                                     July  24

Topa tawh Tonkhawm

            Late laibu tawpna lamahphatna awte in ngaih semsem tuak hi. A tawpna lam tang 5 te zong “Topa phat un”  cih tawh kipan a; 146 na tang masa penbel, mizawngte leh nenniam te’ Topa aphatna ding uh thu a hipen hi.

            Psalms 146 na simin. Bang thupuak om a, a neu 5-9 sungah, Pasian cihnop phatdiak bang a hi diam?

………………………………………………………………………………………………………………….

            Pasian pen hih leitung a piangsakpa a hih mahbangin (Psalms 146 : 6), hih la in zong Pasian thukhenpa, khahkhiapa, damsakpa, huhpa lehgaldalpa in pulaak hi. Mi zawngte huh ding khawng pen, Pasian cihman peuh khawng a sem zong ki om hi. Hih la in, Pasian’ sepsepsa eite’n a panpih i hi bek hi ci hi. Zawnna, nenniamna, nat-na te langah na isepnakleh, Pasian deihna sem i hihi. Psalms 146 sung a ombang  in, Pasian tawh ma pankhopna sang a hamphatzawkna dang om nawnlo hi.

            Ei-meet na’ng zong omveve hi.Khristian te’n, Pasian a zon dan leh a kinaih dan te gengen uh hi. Aih hang Psalms 146 : 7-9 leh a dang mun tuamtuam te genbang hi leh, Pasian sep bangbang seppihna bekmah tawh Amah kimu thei cih hong lak hi. Ama’n mizawngte, damlo te, nenniamte lamto takpi a hih leh, ei zong Amah bang a na i sep kul hi. “Khazih in, mizawng te leh thuaksia te kiangah hongpai ahi hi. Ama’ donna lianpen a ngahkha uhhi.A tate tungtawnin mizawngte leh thuaksia te kiangah hawh kawikawi in noptuam pia hi.

            Thuaksiatna khempeuh leh zawngkhalna khempeuh hong lakkhiat sak Pasian’ hehpihna leh itna i tel zawhna ding lampi dang omlo hi. “Mizawngte leh thuaksia te donna sang a hoihzaw lungdamna thudang om nawnlo  hi” EGWhite, Testimonies for the Church vol.7. p. 226.

             Pasian tawh nasemkhawm a, midangte a ding nasepna te na genkhiat theih ding a om hiam?

Thursday                                                 July 25

Paunakte : Mizawngte hehpihna                

           Pil kammalte ki kaihkhopna a hih mah bangin, Paunak laibu sungah, phutkhak taktak thute vive ahi hi. Zawnna, hauhna, lungkimna, thumaanna, leh thumaan-lohna cihte om neunau hi. Pasian a muang mahmah te nangawn, a nuntakna uh, a tawntungin maam dikdek lo a hih manin, Paunakte in kidopsiam pilvang tak in, nuntak dan teelsiam ding hong hanthawn hi.

            Prov. 10:4;  13:23, 25; 14:31;  15:15,16; 19:15,17 leh 30:7-9 cihte simkhawm inla saikaak in.  Hih munte in hauhna, zawnna leh mi huhna tungtang bangthu gen hiam?

See also  ZSL 2: Laisiangtho’ Bulpi le Pianzia

…………………………………………………………………………………………………………………….

            Paunakte in, mizawngte Pasian hehpihna thupisak hi. Zawn theihna thu te pen a zawnga pianna, teelkhialhna, suksiat thuakna cihbangte hang hi a, bangbang hi ta leh, Pasian in, amaute a piangsakpa (Prov. 22:2), gal dalsakpa (Prov. 22:22,23) ka hihi cihi. Bangbang in khial taleh, hihte pen simmawh ding hilo hi. Paunak in teelsiamna leh Pasian thumanna hangin, nuntak nuamzaw thei hi cihi.  Aih hang, hauhna leu leu pen, Pasian thupha hi khinlo hi ci hi.  Pasian tungah cihtakna pen, vanngah theih na sangin manphazaw: “Thumaanlo in hauhna sangin thumaan in tawmno neihna a hoihzaw a hihi” (Prov. 16:8) ci hi.  Paunak pen mimal bek hilo in, mipi mahmah in khatleh khat kihuh kidon in khantoh ding hong deih hi.

            Paunak mundang khatah, cihtakna leh khaikim theihna cih te pen sumzonna, ki ukna ah phamawh (Prov. 14:5, 25; 16:11-13; 17:15; 20:23; 21:28; 28:14-16) hi. Makai te leh ukzo te peuhmah in Pasian panpihna ngen ding (Prov. 8:15,16) a, mi zawngte huhna ah zong Pasian aiawh a sem ding hi cihi.

            Mi cimawhte tungah “dahtak ing” cih lel ding baih mahmah hi. Tua i dahpihna te bangci gamtatna tawh i lak thei diam?

Friday                                                           July 26

Ngaihsut beh ding:             EG White lai, Patriarchs and Prophets laimai 746 – 755 sungah  “The Last Years of David”  leh:  C.S. Lewis laibu ‘Reflections on the Psalms’  sungpan “Judgment” cih te simin.

            “David’ late in mawhna dum a thukpen sungpan kipan, a sangpen Pasian tawh kikholhna leh phatna te dong in om hi.  David nuntakna sungah, mawhna in maizum na leh samsiatna bek hong tun thei  hi napi;  Pasian hehpihna in a thukpen dong va phasuk a, upna in lamto a hihmanin, Pasian’ tate suakthei uhhi” EGWhite lai, Patriarchs and Prophets laimai 754.

            “Hihte pen biakna lam leh mipi hoihna ding ahi hi. Neihsa leh nuntakna lungmuan om na ding zong hih thukhun te mah tawh ahi hi” EG White, Education lai 137.

Kikup ding Dotna te:

  1. Nang leh nang makai khat aih keileh, huzaap lian nei khatin na ki ngaihsun hiam? Thumaanna tawh a sem khat na koici hih theih ding hiam?
  2. Na veng vuah a om minam ngeina te lungngai inla, mi cimawh te huhtheihna dingin, a om sunsun ngeina te na bangci zat theih dinghiam?
  3. Kipawlna hoih khat hong piankhiat theihna dingin bang thumaan leh liangko kim theihna’ng thukhun te thupi hiam?
  4. Paunak laibu in, pil kammal te tungah kinga a hih mah bangin, Pasian zong hong koici lak hiam?

Tomlakna :  Late leh Paunak laibu tegel in, nuntak haksatna sungah thumaan tak a nuntak theihna hong pulaak hi.A bunih mah un Pasian in mizawngte leh nenniamte don a hihna hong lak hi. Late sungah kahna aw te leh, Paunak sungah pil kammal te in, bawlsiat thuak te leh a kidonlo te kemcing a hihna zong gen hi. Pasian in tuabang dan a hih leh eite zong tua bang mah in i hih ding kul hi.

Download (PDF, Unknown)

Top