ZSS Lesson 1: NUNTAK ZIA - Zomi Adventist Innkuan

LESSON 1 March 30-April 5

NUNTAK ZIA

SABBATH NITAK March 30

Tukalsung Sin Ding: Gen. 1; Gen. 8:22; Ps. 90:10; Job 1:13-19; Acts 9:1-22; Phil 1:6; Rom 8:1.

Kamngah: “Hih leitungah a piang thu khempeuh, Pasian in ama pianhun ding a sehsa hunin a piansak ahi hi.” (Eccl. 3:1).

Solomon’ hong gelhkhiat lakammal hoihpen pawlkhat in: 1- Hih leitungah a piang thu khempeuh, Pasian in ama pian hun ding asehsa hunin apiansak ahi hi. 2- Suah hun om a, sih hun om hi. Suan hun om a, bawhkhiat hun om hi. 3- Gawh hun om a, khoi hun om hi. Phel hun om a, lam hun om hi. 4- Kah hun om a, nuih hun om hi. Dah hun om a, laam hun om hi. 5- Lupkhop hun om a, luptuam hun om hi. Kikawi hun om a, kikhah hun om hi. 6- Zon hun om a, mansuah hun om hi. Kep hun om a, paihkhiat hun om hi. 7- Balkek hun om a, phop hun om hi. Daih hun om a, pau hun om hi. 8- It hun om a, muh dah hun om hi. Kido hun om a, kilem hun om hi” (Eccl. 3:1-8).

Hih kammal te in mihing te omzia, gamtatzia, leh nuntakzia hong kilang sak mahmah hi. I nuntakna in i pianhun pan kipan kikhelna tuamtuam hangin nuntakzia tuam tek kinei hi. Tua kikhel nate a hoih om a, asia zong om hi. Ei khelzawh om a, ei khelzawh loh zong om hi. I innkuan sungah huzap a nei tua nuntak hun leh nuntak zia te, tukalsung in enkik ni.

SUNDAY March 31

A kipatcil in

“A kipatcil in” cih kammal tawh kituakin Laisiangtho in leitung kipat hun tawh hong pankhia hi (Gen. 1:1). I leitung in “lim leh mel nei lo, awngthawlpi” cihna pan hong kipan in, niguk ni ah Pasian in “hoih sa mahmah” ciang hongtung hi. Hih in, i leitung hong kipat zia ahi hi.

Gen. 1 na sim in: Leitung nate amah leh mah a piang thei diam? A hihkei leh Pasian in ahun leh amun zui in a piang masa ding leh a piang nunung ding cihdan seh in a piansak a hi diam? Pasian gamtatzia bang ci’n na mu hiam?

………………………………………………………………………………………………………………………………………………………………………

Ellen G. White gelhna sung ah “hunzuihna pen vantung thulet masa hi” na ci hi (Signs of the Times, June 8, 1908); leitung ah zong tua bang mah hi. Mawhna in leitung kisia sak mahmah ahih hang, hunzuihna, pianzia, leh kalsuanzia om veve lai hi.

Gen. 8:22 sim in: Hunzuihna tawh kisai bang ci kigelh hiam?

………………………………………………………………………………………………………………………………………………………………………

Mawhna honglutkhit nangawn zong, ni leh khuahun te a hunzui in kikhel hi. Pasian bawlsa ni, kha, leh aksi te zong Pasian sehsa dan mah in ahun zui in kipei uh hi. Tua hunzuihna te leitung bek ah hilo a, vantung i tun ciang zong Pasian sehsa hun leh zia te i zuih kullai ding hi (Isa 66:23).

Sabbath ngeina in nang leh na innkuan te nuntakna ah bangzah in huzap nei cih ngaihsun in. Sabbath tanna ngeina in bang kilamdanna leh phattuamna hong pia hiam?

MONDAY April 1

Nuntak zia

Leitung ah mipil khat ahi Arnold Sameroff in “Circadian Rhythms” ci in, mihing pumpi sung nate i a hunzui in nasep nate hong mukhia hi. Leitung khuahun, kimlehpam bek hilo in, i pumpi mahmah in zong a hunzui in timing tawh nasem hi.

Mihing te nuntak hunsung aki genkhol thei hunzuihna te bangteng ahiam? A nuai a Laisiangtho munte sim in.

Eccl. 3:2 …………………………………………………………….

Gen. 21:8, Judg. 13:24 ………………………………………………

Ps. 71:5, Pau 5:18 …………………………………………………..

Gen. 15:15, Judg. 8:32 ………………………………………………

Ps. 90:10 …………………………………………………..

Suahni leh Sihni kikal in mimal khatciat in nuntakzia tuamtuam kinei hi. A piankhit a sawtlo a sipah naungek om a, teksia guaisia dong mah a nungta zong om veve hi. Naupang ciatciat zong, apauthei masa om a, lampaithei masa om hi. Pilna zondan zong kibang khin lo a, nasep zong kibang khinlo hi.

Leitungmi awn tulval om lakah, i zialehtong kibang namun tampi om napi’n (Acts 17:26), ki lamdan na khat ciat kinei veve hi. Hihbang in ki lamdanna cihpen, septheih tuamtek nei cihna hi a, ei septheih munciat ah thupha i bawlding kisam hi. “Khangnote’ thahatna pen amau’ minthanna hi a, khanghamte’ sam kanna pen amau’ thupina lim ahi hi” (Pro. 20:29) acih mahbang in, mikim in Pasian tungbek ah hilo, mihing tung mahmah ah zong i kipiakkhiat theihna om hi.

Tulaitak na nuntak na dinmun tawh midang khat ading bangci thupha na bawlthei ding hiam? Banghang in tua thupha te bawlnailo na hi hiam?

TUESDAY April 2

Lametloh

Job 1:13-19, 2:7-9 sung sim in. Job in bang tuakkha hiam? Job i tuakkhak thu te in tulai na nuntakzia leh na tuakkhakna te bang ci’n hong telsak hiam?

…………………………………………………………………………………..

……………………………………………………………………………………

Greek mipil Heraclitus in “Leitung ah a kikhel ngeilo na khat pen ‘kikhelna’ bek hi” na ci hi. Na khempeuh mavang ing, daupai ing i kicih hunlai in nasep senpyi lohna, liamna, baina, natna, sihna cih te in lametloh in hongpiang thei a, i nuntakzia hong khel zel hi.

A sia lam kikhelna bek hilo, a hoihlam kikhelna tampi zong omthei hi. Nasepna ah zaa Khanna, lawmngaih leh zi ding pasal ding muhna cihte zong om thei veve hi. Hibang kikhelna te ngeina in i seh laitak lametloh thute hong pian ciang, i nuntakzia tampi hong kilaih hi.

Job in zong a nuntakzia thak kilaih ding thu, “paubang lo, a thutang, Pasian a zahtak mi, gamtat hoihlo a peel mi” (Job 1:1) cih zah dong tun ding na lamen het lo hi. Job nuntak hun masa lam in, zi nei, tapa sagih leh ta-numei thum a nei mihau khat cih pen ki thei hi (Job 1:2, 3). Job tangthu bu alai lam tunciang haksatna nam guk bang na thuakkhin hi. A neihsa van teng bei, nasem sila nei nawnlo, a ta teng si, a pumpi natna vei, a zi in mawhsak, bek thamlo, a lawm leh gual te’n thapia lo sawnsawn hi. a nuntakzia a masalam tawh hong ki lehbulh lian hi.

Job thuakna tawh genteh thamkei zong, ei lakah haksatna thuak lo kuamah ki omlo hi. I nuntakna lem mahmah i cih laitak in Lametloh thu tuamtuam hang in i nuntakzia nakpi’n hong kikhel a, a ngei bang nawn lo thei hi.

Hibang thute alamdang hilo hi. Abel in cikmah hun in thahthuak ding ki lamen lo hi. Joseph in zong Egypt te’ sila in kizuak ding na lamen hetlo hi. Ei theihkholh dingin Laisiangtho in hidan thupiang tampi hong genkhol khin hi.

Na nuntakzia hong khelthei zeh-etna te natuah ciang, na upna in bangci’n hong huh hiam?

WEDNESSDAY April 3

Kikhelnate

Ei mihing te in ngeina seh thei te i hi hi. I kum hong tam semsem ciang, tua i sehkhak ngeina te khelhak semsem hi.Ei mihing te’n kikhel pakpak hetlo hi hang. Mihing tektek kikhel sak ding haksa sem lai hi. A hihhang Pasian in mihingte khel ding nasemsem hi. I nuntakzia a bup in hong khel kei zong in, i gamtat zia hongkhel hi. Pasian in Ama sungah mithak i hihtheih na’ng in hong khel a, tua in ei ading Hotkhiatna leh nuntakna lampi hipah hi.

Tarsus khuami Saul tungah bang kikhelna lianpi piang hiam, bang ci piang hiam? Acts 8:1, 3; Acts 9: 1- 22; Gal 1:15- 17.

………………………………………………………………………………………………………………………………………………………………………

Saul in Khasiangtho khelna sungah a ki-ap ciang in, a lampial hunlam kiphawk a Pasian thupiak te a tangzai hunlam hong tel hi. A kiphasak Pharisee, thukham zuihna a suang mipa in, tun Pasian maiah naupang bangin kiniamkhiat in a kikhailum leh sihna a zo honpa’ sianthona bek lamen in omta hi.

“A kisik Pharisee pa thungetna te Pasian in mawksuak sak lo hi. A ngaihsutna leh lungdeihna te Pasian hehpihna in tuam a, Pasian deihna tawh kituak ding in a siangtho lungsim puasak hi. Khazih sianthona in Saul ading in nakhempeuh hong hi ta hi.” Sawltakte nasepna laimai 119, 120.

Saul tangthu bang in i kikhel na thute lamdang lua kei mah ta leh, ei munciat Pasian hong khel na tangthu thu gentheih ding kisam hi.

Phi 1:6 leh Rom 8:1 sung a kigelh kamciam nihte bangte hiam? Christian te nuntakna tawh bangci’n kituak thei hiam?

THURSDAY April 4

Kizopna

Laisiangtho in kizopna thu vive gen hi. Pasian mite khat leh khat kiho ding leh kizom ding in hongbawl hi. Ei nuntakna in zong ei aituam ding sang’ mi ading aki nungta hizaw hi. Naungek in i pianhun pan hong khoi ding mi kisam hi hang. Ompihding leh kholhpihding mi kilunggulh a, khatguak a omte na-ngawn in zong ganhing note khawi veve uh hi.

I nuntakzia huzap a nei, hong kikhel saktheipen ei leh ei hilo a, innkuanpih te leh midang te hizaw hi. Midangkhat gamtatna in ei tung ah huzap hong neihtheih mah bangin, eite in zong midang tung ah huzap i nei thei hi. Tua huzap te in a hoih lam hi thei a, a sia lam zong hi thei kawikawi hi. Huzap i neihte pen a diakdiak in i innkuanpih te hi masa zel ahih man in, i gamtat na te in a hoih lamah bangci huzap ding cih ngaihsut huai mahmah hi.

Midang te tawh kizopna ah bang teng sep huai hiam? Hih mun te sim in.

Rom 15:7; Eph 4:2, 32; 1 Thess 3:12; James5:16.

………………………………………………………………………………………………………………………………………………………………………

A thupaizia in gennop mahmah lel hi. Midangkhat tungah gamtat hoih, kamhoih leh itna i lak leh

amau tung ah huzap hoih i nei ding a, a nuntakna mahmah zong kikhel lawhzo ding hi. Zeisu in gamtat hoih tawh nuntakna tampi a khel mahbang in, en zong mite tungah gamtat hoih i lakthei hi. Ciapteh ding ah, asia apha huzap i neihpen midang sang’ ei innkuan sungah khauhpen den hi.

Luke 11:34 leh Marka 4:24, 25 te ah Zeisu thugen tegel ngaihsun in. Mi tawh kizopna bangzah in thupi ci hiam?

FRIDAY April 5

Ngaihsut ding thu:

Khazih tawh kikholhna hangin a nungzuite nuntakna ah bang phattuamna teng piang cih ngaihsun in. Nungzui a tamzaw in pilna sang neilo, theihna tawm, bekthamlo Jew makai te thuhilhna tawh khangkhia uh a, tu’n Galilee gam aa om, Laisiangtho siamte mawhkawkna hong tuak ta uh hi. Nungzui te lak mahmah ah zong kihuat na (Mat 20:20-24), kiselna (John 3:25), uplahna (Mark 9:28, 29) bek thamlo in, Zeisu a nusia (Matt. 26:56), Zeisu a lehhek (Matt 26:69-74) nangawn om hi. Tuadan hoihlohna kawmkal pan khalam ah khantohna zong nei veve uh a, a kampau leh gamtat dan in Zeisu na sun veve uh hi (Matt 26:73). Jew Makai Senhedrin te nangawn in zong Peter leh John te in ‘Laitan pilna sang’ neilo napi’n na lianpi te a sepna uh a muh ciang in lamdang sa uh hi. Tua ciangin “Zeisu tawh a kikhawlkhin ngeite” ahihna uh a phawk uh hi (Acts 4:13).

Tuadan na gamtat hoihna tawh a hoihlam in na huzap leh na innkuanpih te bek hilo, mite’n zong “Zeisu tawh a kikhawlkhin ngeite” ci’n hong mu thei ding hi.

Ellen G. White laigelhna sungah “Adventist innkuan sung ah neih leh lam bangmah een huai kei ta leh, itna kammal luankhiatna leh deihsakna tawh gamtat namun hi.” Adventist Home. laimai 18.

Kikupding Thute:

Eccl. 3:1-8 na sim in. Hih Laisiangtho mun in bang hong gen hiam? Na nuntakna sungah bangci’n na zangh thei ding hiam?

Lesson kikupna sungah, nuntakzia kikhel lawhte, na tuahkhak thu manpha te, theihhuai napi’n na sinkhak loh thute kikum in. A hunlap in na theihkhakloh na te tungpan bang na sin kha hiam? Tua nuntakzia hong khelthei thupiang te’n na innkuan sung thu bang ci’n hong ki lamdang sak hiam?