Lesson 11: A SAGIHNA GIMNA NUNUNG

Lesson 11                                                                                March  9 – 15

A SAGIHNA GIMNA NUNUNG

Sabbath Nitaklam                                                                                                          March 9

Tukaalsung sim ding: Mang 15:1; 7:1-3; 14; 9,10; 16 :1-12; 17:1; Daniel 5; Mang 16:16; 2 Thess  2:9-12.

                      KAMNGAH:                 “Topa aw, Nang kua in hong kihta lo ding a, Na liatna hong phatlo ding a hi hiam? Nangbek na siangtho hi. Thumaan in na sepna te mi khempeuh in mu uh a hih manin, minam khempeuh nang kiangah hong pai in, Na mai ah hong bia ding uh hi.” Mangmuhna 15 : 4.

Mangmuhna 11:18 na in, Armageddon galpi madeuh a thupiangding teng tomkaih in hong lak hi. “Minam te heh mahmah uh hi” cih kammal pen, Zeisu in (Luka 21:25) sung a, hun nunung a ding a genkholna hi a, Pasian’ hehna leh thukhenna a hi, gimna sagihte in a kisiklo mite a dingin hong zomto pah ding (Mang 15:1).

Mangmuhna 15 na pen, vantungmi sagih leh, a tawi uh Pasian hehna hai sagihte tawh kipanpah hi. Tua hai te a buaksuk madiak in, Pasian’ misiangtho te dinguh hi.

SUNDAY                                                                            March 10

A Sagihna Gimna Nunung’  Khiatna

Mite in, Pasian maw Babylon khat teitei, amau khatciat teelkhin ta uh hi. Khazih hong pai madiak in, vantungmite letcip, Satan’ hehna huihpi (Mang 7:1-3) kikhahta a, gimna sagih te’n zuipah hi.

Mangmuhna 15:1 leh Paikhiatna 7: 10 simkhawm in. Hong tungding gimna sagih te pen, taanglai Egypt te tungah a tung, gimna sawmte mahbangin, ki thuhilhna a hihlam na bangci gentheih diam?

……………………………………………………………………………………………………………………

Gimna sagihte in, leitung hun nunung penpen a hong tunguh a hihmanin, hun nunung gimna sagihte kici hi. Etkaak dingin, pengkul sagihte in, Christian te hun khempeuh huam gai hi. Lungdamthu a kihilh kawmkawm mah in tawntung (Mang 10:8-11:14), palai sepna zong kisem (Mang 8:2-5) toto hi. Hehpihna tawh kithuah a, Pasian’ galte kisikkik ding a deihna a hihi. Thukhat ah, gimna sagih te pen, Zeisu hong pai madiak a kibua a hihi. A kisik lo, Pasian langpanna tawh lungtang khauh, Pharoah kumpipa bangte tungah (Mang 16:11) a kibuak a hihi.

Pasian’ hehna pen, a dik thukhenna hi a, mite’n, amau’ lungsim khentatna om bangin (Rom. 1:26-28) a gah a aat uh hi.

Mang 15:5-8; Pai. 40:34,35; leh 1 Kumpi 8:10,11 simin. “Kuamah biakinnpi sung lut zolo” (Mang 15:8) a cih in, gimna sagihte hong tunhun ding, bangzah hong lamen sak tuam thei hiam?

…………………………………………………………………………………………………………………….

“Kuamah biakinnpi sung lut zolo” (Mang 15:8) a cih in, hehpihna kong kikhak hong lak hi (Mang 22:11). Khazih in, a Palai nasep a zawh ciangin, kisik kikna kongpi, a tawntungin kikhak ta ding hi. Tua a hihmnain, gimna sagihte in, kisik kikhun kuamah pia nawnlo ding a, Babylon lam panglua kisa, Pasian bang mudah zaw sem lai ding uh hi.

Leitung a siat semsem, na mu hi. Pasian’ heh-pihna hangin, gimna te ki ziakai sak cih, bangci lak theih ding na hiam?

MONDAY                                                                                   March 11

Gimna Nunungte Hong Kibuakna

Khazih in, a Palai nasep khawlta a hih manin, mi khempeuh’ mailamthu khentatsa vive hi ta hi. Pasian’ lungdamna thu a nial mite a dingin, Pasian’ hehna a dimlet in hong tungta ding hi. Tua gimna sagihte pen, Egypt a tungte mah (Pai. 7-11) a hihi. Egypt tungah a tun hangin, Israel mite kihawi sese a hih mah bangin, tua hong tungding gimna pan in, misiangtho te, Pasian in kemtuam (Late 91:3-10; Kidona Lianpi 629, 630) ding hi. Egypt gimna te in Pharoah lungtang khauhna leh amau’ pasian te in bangmah hih zolo cih pulaak sak hi. Tua mahbangin, gimna sagihte in, sapi a bia te lungsim khauhsak semsem ding a, Babylon in a mau gumzolo cih musak ding hi.

See also  ZSL 9: PAWLPI LEH PILNA

Mangmuhna 16:1 – 11 sung simin. Bang thu piang a, bangci hong kilak hiam?

…………………………………………………………………………………………………………………….

Gimnate, a masalam 4 teng pen, leitungbup hilo a, mi khempeuh in thuaklo hi, Kidona lianpi 628. A khatna gimnapen, sapi a bia te tungah meima tum piang hi. A nihna leh a thumna in, luitui, guntui leh tuipi tui te sisan suak hi. Dawnding tui a omloh teh, mite’n thuak zolo uh hi. A lina in Ni sukha a, ni sa mahmah in, mite kaanggawp in thuak-hak mahmah hi.

Tuabang a haksatna a thuakuh hangin, a lungsim uh nemsak tuanlo in, hihbang a gimna hong tunsak mahmah ci in, Pasian samsia lai uh a, kisik tuan mahmah lo uh hi. Mang 16:10, 11 leh Paikhiatna 10:21 – 23 sungah, gimna ngana in, Sapi’ tokhom sukha (Mang 13:2) lian hi. Satan’ vangliatna in zong, Pasian piak gimna te dozo tuanlo hi. A thuak kawmkawm un mite’n, Babylon in hong gum zolo cih muta mah leh, Pasian langdo na lungsimte kheel tuanlo uh hi.

I Topa tawh kinai takin tonkhawm in, haksatna te thuak kawmkaal ah, I Topa hong itna muang in i om thei diam?

TUESDAY                                                                        March 12

Euphrates Gunpi Kangsak

Mangmuhna 16:12; 17:1,15 sung simin. Euphrates gunpi in bang a cihnopna hiam? Gimna sagih te a tun laitak in, Euphrates gun kangsak cihpen, bang cihnopna hiam?

…………………………………………………………………………………………………………………….

Laisiangtho lui hunlai in, Euphrates gunpi pen, Israel te galte a hi Assyria leh Babylon te a dingin, a kizang mahmah gunpi a hihi. Babylon khuapi kantan in luang a, annek tuidawn khempeuh a sik gunpi a hihi. Euphrates gunpi lotawh, Babylon nungta zolo hi. Mang 17:1 in, Babylon pen tui tampi tungah tuu ci a, Euphrates mah a cihna (Jer. 51:13) hi. Mang 17:15 in zong, “hun nunung ah Babylon tutna tui tampi cihpen, amah a um, leitungmi a lian, a neu, kumpite khempeuh a hihi” ci hi. Tuate in zong, amau’ huhna pia nawnlo ding ci lailai hi.

Gimna gukna in, tanglai Babylon pen, Persian kumpipa Cyrus in amatna (Dan. 5) kawk hi. Tangthu siampa Herodotus in, kumpipa Belshazzar leh a milian te’n, pawi a bawl zan in, Persia te in, Euphrates gun heikhia in, tui a kangkhin gundung panin, khuapi sung lut in, upmawh hetlohpi in khuapi susia hi.

A limla bek ahi, Mang 16:12 sung a, Euphrates kansakna zong hun nunung ciang hong piang ding hi. Mangmuhna Euphrates in, leitungmi a lian, a neu leh kumpite leh amah a thapia khempeuh hi a : Euphrates kangsak cih ciangin, amau panpihna khemepuh khawl in, anungciang Babylon lehdo kik phialzaw a, Babylon kicimh ding hi. Babylon pen belhtak hi ci in leitung mite in beel ding (Mang 16:3- 9) hi. Tua laitak gimna ngana hong kibuak ciangin, Babylon ukna aana tungah hong kibua sukpah a (Mang 16:10,11), Babylon in nang zolo cih a hong thei ta uh hi. Tua ciangin, mipi te in, khemna thuak a hih lamtak uh theitel ta in, Babylon hong lehdo zaw a, Babylon puklawh hi (Mang 17:16). A hihhang, theihsa mahbangin, amaute’n a lungtang uh khauhsak teitei uh a, lei maitang pan a ki hepkhiatgaih mateng, Satan in amaute makaih in mainawtpih zel hi.

See also  ZSL 1: EDEN HUAN SUNGA PILNA

Mihingte leh mihing kipawlna te muan ding bangzah lauhuai hiam?

WEDNESDAY                                                                 March 13

Satan’ Khemna Lianpi Nunungpen

Mangmuhna 16:12 in, Euphrates gunpi a ki kansakna deihna pen, “nisuahna lam kumpite’ ading lampi honsak ci hi. Laisiangtholui sungah, “nisuahna lam kumpi” a cih ciangin, Cyrus leh a pawlte, saklampan hong tuaksuk napi, khuapi sungah, nisuahna lam pan (Isa. 41:25) hong lut-uh hi. Amau galzawhna in, Pasian’ mite a gam zuanin ciahkik sak thei (Isa. 44: 27,28) hi.

Mang 16:12 sung a, nisuahna lam kumpite cih pen, Khazih leh vantungmite, nihvei kumkikna ah misiangthote puan (Mang 15:6) a hi “puanpaakte silh” (Mang 19:14) in hong tuaksuk ding a, Khazih in, a misiangthote a bawlsia Satan pawlte (Mang 17:14) thuhkikna pia ding hi (Mate 24:30, 31 sim kaak in). Zeisu hong kumsuk madiak a, tua gal kidona nunungpen, Armageddon kici hi.

Mang 16:13,14 simin. Armageddon a ding a kha-nin thum hong paikhia cihpen, bang a cihnopna hiam? Mang 14 sung a, vantungmit thumte tangkona te bangci in langdo hiam? (1Tim. 4:1 simbeh in).

……………………………………………………………………………………………………………………

Hun nunung ciangin, hehpihna kong kikhak ding a hih manin, mikim in, Armageddon galsung ah, langnih omte khat, ama panmun ding a teel kul hi. John in, Satan’ khemna pen, a kihhuai uiphuk bang in, kha-nin thum paikhia kamu ci hi. Gulpi (pagan Rome leh sikha biakna), tuipi sapi (Roman Catholic), kamsang zuaute (lampial Tapidawte) khempeuh in, Satan’ khutnuai ah hong kipawlkhawm (Mang 13:11,12) ding hi. Tuuno sapi bawltheih na lamdangte, sikha biakna te, Satanin, a pawlte bawlsak ding (Mang 13:13-17) hi. Na lamdang te bawlna pen, hun nunung a, Satan’ mikhemna a khutzat thupi pen hi ding hi. Bangmah theilo pi in, leitung makaipi te in, Satan’ khemna te umin, biakna lam tawh khimgawp ding hi (2 Thess 2:9-12). Amau kipawlna te tawh leitung bei dong kalsuan ding uh hi.

THURSDAY                                                                                                          March 14

Gal Nunungpen ading Kikaikhawm

Mang 16:16 simin. Satan in, Armageddon gal a dingin, a nunung pen khemna tawh leitung mite a kaihkhop ciangin, bangzah lawhcing zo ding hiam?

……………………………………………………………………………………………………………………

Satan’ khemna nunungpen in, leitung buppi mah khemzo ding hi. Laisiangtho thumaan te nusia zaw in, mihing te’n, khemna na lamdang kibawlte umzaw (2 Thess 2:9-12) ding uh hi. Hebrew pau in “Armageddon” ki ci, “Megiddo Mual” cihna munah ki kaikhawm ding uh hi. Megiddo cihmun in mual hilo zaw a, Carmel mualbul “Jezreel” zaangkuam a om gal-nanna “Kulhpi” hi zaw hi. “Esdraelon” zangkuam zong ki ci a, Israel tangthu sungah, khemna tawh galdo na mun (Thukhente 5:19; 6:33; 2 Kumpi 9:27; 23:29,30) ahi hi. Armageddon galpen, Khazih leh Satan kikal kidona lianpen hi a, leitung mite in, Satan lam pangin, Pasian do uh hi.

See also  ZSS 4: Late le Paunak Sung a Hehpihna le Thumaanna

Megiddo mual cih zong, Carmel mual paina hi a, tanglai Meggido khuapi omngei na mun a hihi. Carmel mual bel, Israel tangthu sung a, Pasian’ kamsangpa Elijah leh Baal kamsang zuau te kisualna mun (1 Kumpi 18) hi. “Pasian maantaktak kua hizaw hiam” cih ki sittelna a hihi. Vanpan in “mei” hong kia a hihmanin, Topa in Pasian taktak hi a, biak takcing taktakpa hi cih hong lak hi. Armageddon gal hong tun ciangin zong: Pasian lamah maw, Satan, gulpi, sapi leh kamsang zuaute lamah maw cih pen, gimna te hong kibuak ma in teelkholh kul (Mang 16:13) hi. Satan in, Judas a zat mah bangin, amau zong zang (Luka 22:3) ding hi. Mual aw suang aw kicimh in hong vuk un (Mang 6: 16; 2 Thess 1: 7, 8) ci in kap ding uh hi.

Armageddon cih pen, nisuahna gam laizang lam a kido ding hilo hi. Taksa kidona hilo a, Khazih leh Satan, khalam a kidona (2 Kor. 10: 4) hi ding hi. Carmel mual mah bangin, Pasian in galzo ding a, munkhatbek hilo in, leitungbup khuamial tungah galzawhna hi ding hi.

Pawlkhat te’n, nisuahna gam laizang lamah, Armageddon galpi hong om ding hi ci in um uh hi. A hun, a ni khawng hih mawkmawk uh hi. Hi bang khawkkhat sung thusia piang lel khawng pen, Pasian genkholna tangtunna a hihloh zia i bangci lak thei diam?

FRIDAY                                                                          March 15

Ngaihsut Beh Ding

“Laisiangtho sungah bulkip tak a dinglo kuama peuhmah, tua hun nunung haksatna sungah thuakzolo ding uh hi. Mi khatsim kisinkhiatna hong tung dinghi : Pasian maw, mi, kua muangzaw ding? Paul in, “Mite in thumaan a ngaih noploh hun, amaute’ deihna bek a zuih nophun,  amaute’ zaknop thubek a gen ding sia a cialnop hun hongtung ding hi” (2 Tim. 4: 3). Mipi te’n, amau deihna a kawkkawk, Laisiangtho deih nawnlo ta, Satan in, amau’ deihte tawh khemta hi. Pasian in, Laisiangtho tungbek a ding ngeungau mi pawlkhat nei veve hi. Mipilte’ pilna te, biakna makaite’ khentatna te, pawlpi sung mipite’ deihna te, tuate peuhmah biakna upna dik hi ngeilo hi. Pawlpi upna bullet ding ciang, ‘Topa’n ci hi’ cih kammal i kisam hi.

“Khemna lianpen dingin, Satan in, Khazih hong kineih ding hi. Sawtpi pekpan a gumpa hong paikik ding i lam etet, zuaukhempa in, Khazih hong paikhin in kineih ding hi. Leitung mun tuamtuamah, a taang mahmah, John in a muh (Mang 1:13 -15) Pasian Tapa bangin, hong kilak ding hi. Tua vaangtaan na bel, mihing’ mittang muh ngei vaang sang in, taangzaw lolel ding hi. “Khazih hong pai  khinta hi” ci in phatna aw gingin, mite’n zahtakna pia ding uh hi.

“Awnem tak leh, itna kidimtak aw tawh, vantung thumaan te hong gen ding a, Sabbath pan Sunday in kilaih  khinzo hi, tua ni pahtawi zaw un hong ci ding hi. Ni sagih ni bekmah pahtawi tentan a, vantung mite’ tung pan khuavak tawh hong kipia ni a nialte in, ama’ min a daisak hi ci ding hi. Tua in khemna lianpen hi ding hi” E G White, Kidona Lianpi, 593,595, 624.

KIKUP DING DOTNA TE

  1. Mang 16:15 sim lecin, Armageddon aa lut ding te, Zeisu hanthotna om hi. Laodicea pawlpi tungah a ngetna te lungngai in (Mang 3: 18). Laodicea pawlpi tung a thupuak in, Armageddon gal a ding kigin-kholhna dingin bangzah thupi hiam? Nangma a ding bangzah na zangthei diam?
  2. Puanpaak in Khazih hoihna hi a (Mang 3: 4,5; 19:7 -9). Tua Khazih’ puanpaak a silhte bekin, hun nunung haksatna te lakah dingkip zo bek ding hi. Zeisu’ sisan sungah, i puante a paak theih na’ngin, bangci sawp ding hiam?
Tags: ,

Admin

Admin

Top