Lesson 12: BABYLON TUNG A THUKHENNA

Lesson 12                                                    March  16 –  22

BABYLON TUNGA THUKHENNA

Sabbath Nitaklam                                                                                                          March 16

Tukaalsung sim ding: Mang 17; Jer. 51:13; Paik 28:36 – 38; Mang 13:1-10; 13:5 – 8.

KAMNGAH:    “Keima mite aw, a mawh gamtatna ah kihelkha in, a gimthuakna thuakpih kha ding na hihmanun, hong paikhia un, Ama mawhna in vanbaan a, a gamtat hoihlohna te Pasian in phawk gige hi.” Mangmuhna 18:4, 5.

Gukna gimna in, Euphrates gunpi kangsak hi a cihmah bangin, khemthuak mipi te in, Babylon panpih nawnlo ding uh hi. Satan in, Armageddon gal a,Pasian’ mite do dingin, migilo te a kaihkhop lawhcing mahmah hi. Kidona nunung lamah, sagihna gimna kipat na’ngin, nakpi takin zinliing a, tua zinliingin Babylon khen thum in khenkhamh (Mang 16:18) hi. Hun nunung Babylon pen, Pasian’ mite a langdo dingin, kumpi lam leh biakna lamte ki pawlna hi a, Babylon khuapi tawh genteh a, tua khuapi puk in bei ding hi.

Mang 16:19 na ah bel, Babylon kumpigam beina hi a, a lian 17, 18 sungah, a pukdan taktak teng hong gen hi. Babylon khuapi a pukna leh a hangthu (Mang 17:12 -18:24) te a gen ma in, a lian 17 sungah, Babylon zual-zangna, langdona te pulaak masa hi. Tua sungah, sapi san a tuang, numei gilo khat, ama gitlohna tawh leitung kumpi te a mawhpih nu (Mang 17:1- 11) tawh hong lak hi.

SUNDAY                                                                            March 17

Angzuaknu  Babylon

Mangmuhna 17: 1 leh Jeremiah 51: 13 simkhawm lecin, Babylon tutna “ tui tampi “ a cihin, Euphrates gunpi a hihi. 17: 15 na bangin hi leh, ‘ tui ‘ in bang cihnop na hiam?

……………………………………………………………………………………………………………………

Numei in ‘Pasian’ mite cihna hi. Mangmuhna in, Pasian’ pawlpi manpen ‘numei siangtho’ tawh (Mang 12:1; 22:17) lak hi. Numei angzuaknu a hih leh, pawlpi maanlo hipah hi. Tua angzuaknu pen (Mang 17:5) in, Babylon cisuk pah hi. Tanglai Babylon khuapi in, Euphrates gunpi tawh nungta a hih mah bangin, tuhun Babylon in zong, amah a thapia mipi mah tawh nungta hi.

Mang 17:2; 14:8; leh 18:2 te simkhawm in. Bang mipi namnih in kizopna nei a, hun nunung Babylon in, amau bangci zol hiam?

…………………………………………………………………………………………………………………….

Mipi masa pen in, leitung ukna aana nei kumpi te a hihi. Amau te in, angzuaknu Babylon tawh, zualzang uh ci hi. Laisiangtho lui hunlai in, zualzanna pen, Israel te’n Pasian nusia in, biakna dangkhawng a zuih uh ciangin a kammal zat (Isa. 1:21; Jer. 3:1-10) a hihi. Kumpite leh angzuaknu a kizopna a cih ciangin, biakna leh kumpi kipawlkhop na neihna a hihi.

A nihna, Babylon angzuaknu tawh kipawl mipawl a hihleh, leitung mite hi uh a, amau te pen, Babylon in ama’ zualzangna lenggahzu khamsak hi ci hi. Kumpi aana neite tawh a kibanglo in, tua mipi te in, angzuaknu Babylon thuhilhna maanlo um in, tua Babylon in, hong gumzo ding hi ci in muanna a neihna pen, ama’ zualzanna lenggahzu kham ci hi. Mi peuhmah zu a kham ciangin, thuman thukhial, hoihtakin khentat thei nawnlo (Isa. 28:7) hi. A beibaang mipawlte lobuang, leitungmi khempeuh in, tua Babylon nung zui uh hi.

Tulai hun mahmah in zong, mipi peuhmah, paikhial denden hi. Tua a hih manin, bangzah in minthang mah taleh, mipi nung zuihding a lauhuai zia bangci theih ding i hi hiam?

See also  MSS 11: ဒုံရင်းပြန်၍ဖောက်ပြန်သောလူမျိုး

MONDAY                                                                                                          March 18

Sapisan a Tuang Angzuaknu

Mangmuhna 17: 3 simin. Vuntungmi sagih lakah khat in, gimna nunung tawh a kidim hai sagih tawi a cih teh, tui tampi tung a tuu angzuaknu a cihna a hihi. John muhlai in, sapi san a tuang hi. Tui leh sapi in Babylon lam a pangte lim bangci puakthieh hiam?

……………………………………………………………………………………………………………………

John in, tua numei, sapisan tungtuang in mu hi. Angzuakna in biakna kipawlna hi a, sapi in ukzawhna aana limpua hi. Biakna kipawlna in, kumpi ukzawkna aana tungtuang cih ciangin, biakna leh kumpi aana kigawmkhawm cihna hi. Genkholhna in, hih nihgel hun nunung ah kigawm ding cih genkhol hi. Sapi tuang cih limlim ukzawhna hi a, hih sapi a tuang nu, hun nunung pawlpi in, kumpite leh mipite tungah ukzawhna nei ding cihna a hihi.

Mang 12 leh 13 sung a, angzuaknu gamtatna te in, gulpi, tuipi sapi leh leisung sapi, hiteng thum omdan bangci kawk nasa hiam?

Angzuaknu in, puansan puandup leh suang-manpha, kep cihte tawh uangtakin kizeem in om hi : tuabang kizeemna te pen, angzuakte in, mite a huupna (Jer. 4:30) a hihi. Puansan cih zong, biakna bawlsiatna ah a luang sisan te cihna hi lai hi. Angzuaknu puan meel, a san, a dup leh khamte in, (Paikhiatna 28:5,6) na sung a, Pasian’ Siampite’ puan meel te a sut a hihi. Angzuaknu’ taltang ah min daisakna om a cih zong, Pasian Siampi te taltang tungah “Topa a ding Siangtho” (Paik. 28:36 – 38) cihpen a laihna a hihi. A khutsung a hai in, kumpi Belshazzar zudawn na hai, Pasian’ biakbuk pan a kilakhia te hong phawksak hi (Dan 5:2 – 4). Tua hai in, thumaan kiseelcip in, zuau thu bektawh, leitung mite, Pasian kiangpan kaikhia ding cihna a hihi. Angzuaknu in, Pasian a ding thuman teci a pang misiangtho te’ sisan kham in om hi. Hih sisan luanna zong, pope makaihna tawh, thuman a zui mitampi takte in, thahna a thuakna te a cihna hi.

Angzuaknu Babylon tawh kisai in, Thyatira pawlpi ah Jezebel milimpi kisuang (Mang 2 : 20 -13) hi. Tua te geel in kizopna bang nei hiam?

TUESDAY                                                                        March 19

Sapisan thu Suutna

Mang 17:3 in, 13 sunga, Pasian mi siangthote do a, a zo (Mang 13:5 -7) tuipi sapi tawh a kibang sapisan thugen hi. Bawlsiatna kipatna lam hi a, numei zong ni 1260 sung AD 538 -1798 dong gamlakah bucip (Mang 12:13,14) hi.

Mang 17:8 simin la, 13:8 tawh khaikaak in. Sapi i omdan namthum bangteng hiam gen dih in.

Sapisan pen bel, omngei, om nawnlo, mong neilo dumsungpan hong kahto kikin, kisiatna ah tunghi ci hi. Hih khenthum phakna zong, Pasian min langdona, “omngei, tu’n om, omlai ding (Mang 1:4; 4:8) cih tawh a kidim a hihi. Sapi omzia khenthum a phakna tawh saikaak leng:

  1. Sapi “omngei” hi. Kha 42 a kici, ni/kum 1260 (Mang 13:5) sungteng bawlsiat hun.
  2. “Omlo”. Si dektakin liamna ngah a (Mang 13:3), 1798 pan kipan, Sapi in kuamah bawlsia zolo in omcip a, khatvei hong thokik hi.
  3. A tawpna ah, a liamna teng damkik in, Satan vangtawh hong nungta kik ding hi.

Mang 17 in zong, 13:1- 8 sung a sapi liamna damkik mah gen hi. Tua liamna damkik sapi tungah, Babylon tu hi. A thakin, khatvei, biakna leh kumpi ki gawmkhopna, tanglai a mahbangin, tawmvei hong om ding a, bawlsiatna zong om ding hi.

See also  Sinna 13: Hun Nunungah  Lungsim Kikheel

Langdona, aana zatna, bawlsiatna te a omnop leh omta hen la, thulang upte’n, thumaan nusia ding uh a, Christian taktak te’n bel, a upna khauhzaw semin, nopsakna hunte sangin, suangtumpi bangin dingkip ding uh hi. E G White, Kidona Lianpi laimai 602.

WEDNESDAY                                                                                                          March 20

Sapi’  Lutang Sagihte

Mang 17:9 – 11 leh 13:18 simkhawm in. Lutang sagih thu theihtelna in pilna a hihi. Bang pilna lam hiam? Mikhat in tuabang Pasian piak pilna bangci ngah theih ding hiam?

…………………………………………………………………………………………………………………….

Vantungmi in, lutang sagihte pen, mual sagih ci hi. Lailet te in, tua mual sagihte pen, Rome khua kilamna mual sagihte hi ci hi. Greekpau in “oroi” hi a, “mualbawk” cihna hi. Kumpi sagihte zong om a, mual sagihmah kici hi. Hih mualte in, omkhat a om ngeingai lo a, khat khit khat kizom in omzaw uh hi.

Hih mualte pen kumpi a mal a genna hilo zawhi. Mangmuhna in, mimal thu genlo a, ngeina, sepdaan (system) te genzaw hi. Laisiangtho sungah, mual cih limlim in, kumpigam te a genna (Jer. 51: 25; Eze. 35: 2,3) hi zaw hi. Genkholhna ah “kumpi” cih teh “Kumpi gam” hi denzaw hi. Mual sagih a cih ciangin, tangthu sungah a kizom a hong khang kumpi sagih hi a, Satan in Pasian’ mite a bawlsiat na’ng a khutzat te a hihi.

John muhna ah, nga puk khin zo a, khat omlai a, khat hong pai nailo hi ci hi. A pukkhin sa nga teng pen, Egypt, Assyria, Babylon, Medopersia leh Greece cihte hi a, khat a omlai a cihpen, John hun laitak a om Rome kumpi hi. A sagihna pen “hong pai nailo” a cih mahbangin, Mang 13 na sapi, a liamna damkik pen, a vang neikik pope, John sihkhit Rome kumpi gam om nawnloh khit ciang a, Pasian’ mite bawlsia ding a hong piang kumpi hi.

John in, a giatna sapi a hi, sapisan khat mu a, tua in, lutang sagihte lakah khat hi bek hi. Sagih lakah koipen hi ding hiam? Liam a damkik pen hi ding hi. Hih a giatna kumpi uk hunsung in, sapisan hong khang a, angzuak Babylon nasepna te mainawtsak hi. Tuni tuhun in eite in, liamna damkikpa hun a om i hi a, lutang giatna hong khang ding a, kisiatna ah tungsuak ding hi ta hi.

 

THURSDAY                                                                                                          March 21

Babylon tung Thukhenna

Mang 17:12-15 leh 16:12-16 simkhawm in. Kumpi sawmte thu bang teng na mu hiam?

…………………………………………………………………………………………………………………….

Lailet tampi takte in, kumpi sawmte minlo in genmah leh, Mangmuhna in tuazah genkhol lo hi. Angzuaknu a thapia, sawt a mang khollo kumpite ahi hi. Nambat 10 cihin, sapi tung a thuman kumpi te cihna hi. Mang 17:13,14 in, 16:12 – 16 sung a, Armageddon galmah gen phapha hi. Satan vangtawh gulpi, tuipi sapi leh kamsang zuaute tawh kipawl in Tuuno galin do ding uh hi. Armageddon i cihpen, galkapte kidona gal hilo zaw a, Zeisu nihveina hong kumsukni ciang a, Satan leh a pawlte khempeuhin Zeisu leh a vantungmi honpi te, dohuan dinguh hizaw hi.

Mang 17:16 – 18 na sim teh, 16:2 – 12 sung a kumpi sawmte in, Babylon tungah a lungsimpuak uh khel na dingin bang om hiam? Babylon tung thupiang i nungah kua om hiam?

See also  ZSL 11:  Galphual pan Zawhna ah

…………………………………………………………………………………………………………………….

Europe gam a kumpi sawmte in, hehna lianpi tawh, angzuaknu Babylon (hun nunung pope) lehdo kik a, tangguakin koih in, a sa ne in, meitawh haltum dinguh hi. Angzuak Babylon tung a thupiang dingte, John in a gen ciangin, a zualzang Jerusalem (Jer. 4:30) thu a genna kammal te zangkik hi. Siampi khat i tanu zualzang ahih manin, mei tawh haltum ngei hi (Siam 21:9). Babylon in gimna te panin gum zolo cih, leitung kumpi te in theita uh hi. Khemthuak a hihlam uh thei ta a, lehdo kik uh hi. Hun nunung lampial biakna leh amau a teel mite khempeuh in, Pasian thukhenna maan hi ci in teltaktak ta uh hi.

Hun nunung vai dotna tampi takmah, kidawng nailo in om a, i lungsim buaisak zo hi. Mangmuhna 17:14 na in, bang kamciam hongpia a, tua kamciam eite a dingin, bangzah thupi hiam?

FRIDAY                                                                           March 22

Ngaihsut Beh Ding

Babylon a cip madiak in a sung a omlai te kiangah, vantungpan aw khatin, “tua nu sungpan hong paikhia un, ka mite aw” (Mang 18: 4) ci hi. Pasian a bia mi tampitak in, thu tuamtuam tawh, tua Babylon sungah om gige lai hi. Pasian in, tua mite ama mawhna sungah a kihel loh na’ng, samkhia dingin, a pawlpi mite hongsawl hi. A suahtak na’ngun hong paikhiat uh kul hi. Pasian in mi khatpeuh kisiat khakding deihlo (2 Peter 3:9) hi. Mang 19:1-10 sungah zong, Babylon sung a omlai, Pasian a itmi tampi takin, tua sapna dawng dinguh ci hi. A beibaang, Pasian’ pawlpi mite i hihna tawh, maban lian mahmah nei i hihlam ngaihsun in. I lungsim sungah, Pasian’ thumaan paai a i om ding leh, Khasiangtho hong kibuak ding i kisap mahmah zia i thei hiam?

KIKUP DING DOTNA TE

  1. Mang 14 in, Pasian a kihta mi tampitak omlai te “Ka mite” ci hi. “Hih thupuakte i puak ding a, eibang a khuavak ngah nailo te, mawhsakna leh lauhthawnna tawh hihlo ding hi. Catholic pawlpi zong, kosia gawplo ding hi hang. Catholic sungah zong Christian taktak na om kha ding a, Pasian in, amau sungah nasem ding hi. Thumanlo upna sungah kiptak a omte sangin, thuman taktak deih a, kipuahphat theihna ding a lem theilo mi pawlkhat om a, tuate kisiat khak ding Pasian in lauhuai sazaw hi. EGWhite, Evangelism 575. Tua a hih manin, mite bangci kizoppih thei ding i hi hiam?
  2. Mangmuhna 17 in, angzuaknu pen sapisan tungah tuang ci hi. 12 na a numei in, Pasian’ pawlpi maan hi a, 17 na numei bel, a lampial nu a hihi. Amaute geel, a kibatna leh a ki lamdanna gen in. Hi bang saikaakna pan bang theihbeh na nei hiam?
  3. Tukaal sungtengin, Zeisu in gualzawhna lianpi tawh hong tuaksuk madiak a leitung kumpi te tung thupaing ding teng i sin hi. Pasian thuman thutak ah citak, siangtho thuman a omna bangzahin phamawh hiam? Mang 16 : 15 simin. Lampial langdona lak ah, thumaan ding hong kisam hi. Hilhkholna te lakah i bangci kidoptheih ding hiam?
Tags: ,

Admin

Admin

Top