Lesson 7: Pengkul 7te

Lesson 7                                                          February 9 – 15

PENGKUL SAGIHTE

Sabbath Nitaklam                                                                Feb 9

Tukaalsung sim ding : Mang 8:1-13; Gamlak 10:8-10; Eze. 10:2; Mang 10:1-11; Daniel 12:6,7; Siampi 16.

                                       KAMNGAH:      “A sagihna vantungmi in a pengkul a tum ciangin, ama nasem kamsangte tungah a gensa bangin, Pasian in ama ip thusim a geelte hong semkhia ding hi.” Mangmuhna10 : 7.

Seal ngana lai in, a thuman Pasian mite’ bawlsiat thuakna kahna te i muzo hi. Tua kha te in, biakna tau nuai a omin, “Topa aw, bangtan sawtlai ding hiam?” (Mang 6:10), ci in a kiko uh hi ci hi. Vantungpan aw in, ngak tentan lai un, Topa thukkikna ni hong tung ding hi ci in hanthawn hi. Mang 6:15-17 na ah, Zeisu hong kumsukkik in, migilo te tungah thu a khenna hong lak hi.

Seal ngana, misiangtho te thuakna cih teh, Abel pan kipan hunbei dong misiangtho khempeuh i thuakna te hangin, “Ama’ nasemte sisan phu a la kik hi” a cihte (Mang 19: 2) a hihi. A thuaksia Pasian mite in, a thungetna uh Pasianin za cih thei in kiptakin om ding uh hi.

Pengkul sagih te in, a misiangtho te a bawlsia migilo te tungah, Pasian in thukkikna a piakna leh a thukhenna te a hihi. Pengkul sagih te i deihna bulpi in, Pasian mite’ thuaksiatna te tungah, vantung in awlmawh selo a om a hihlohna hong lak hi.

SUNDAY                                                                                                               Feb 10

Misiangthote’ Thungetna

Mangmuhna 8 patna lamah, vantungmi sagihte Pasian maiah dingin a pengkulte mutding kigingsa in omna lim i mu hi. Pengkul te a mutma in, ngaihsutding thudang khat om hi. Pengkulte a khiatna i telding kisam hi.

Mangmuhna 8:3,4 sungteng simin, Jerusalem biakinnpi sungah biakbuk nasepte tawh tehkak ni. Jew Laisiangtho hilhcianna laibu khatin, nitak biakpiakna tuuno pen meihal biakna tau tungah kikoih in, a sisan te biaknatau bulah kibua hi. A kiseh siampi khatin paknuamtui hai tawi in biakbuk sung siangthona mun khamtawh kibawl biaknatau tungah paknamtui hal hi. Siampipa hong pusuak ciang in, a tawi paknuamtuihai leiah a paihna aw ging hi. Tuaciang in vantungmi sagihte in a pengkul te uh mut a, tua ni ading biakbuk nasep te a kizo hi.

Mangmuhna 8:3-5 sung a zat kammal te ngaihsut huai hi. Vantungmi in Pasian’ tokhom mai a om khamtawh kibawl biaknatau (Mang 8:3) mai ah paknuamtui a sang hi. Paknamtui in Pasian’ misiangtho te’ thungetna lim la a, amau thungetna Pasian in a dawng cihna hi.

Mangmuhna 8:3-5 sung ah Pengkul thu mang-muhna om hi.

  1. Pengkul sagih te khiatna in, bawlsiat thuak misiangthote’ thungetna dawng in Pasian in a langpang migilote tung thu a khenna hi.
  • Pengkul sagih te in, “Zeisu in tuuno bangin hong sihna thu” Tanglai hunpan kipan Zeisu a nihvei hong kumkik dong a huam hi (Mang 11:15-18).

Mang 8:5 leh Eze 10:2 simkhawm in. Ezekial’ mangmuhna sung a, Pasian langpang Jerusalem mite’ tung mei-am a thehna te in, Mangmuhna sung kigelh pengkulte thu bangci’n hong hilhcian hiam?

……………………………………………………………………………………………………………………

Vantungmi in biaknatau tung a mei-am te la in, leitung ah thehsuk hi. Hih mei-am/meikuang te pen, misiangtho te thungetna biaknatau tung a mei-am te ahi hi. Akhiatna in, Pasian in a misiangtho te’ thungetna sangin, leitung mite tungah thukhen ding hi. Tuahun ciang Pasian in a misiangtho te’ lam pangin nasem ding hi. Mei-am kuang/paknuamtui halna kuang lei ah paaikhia cihna in zong, tua hun ciang Zeisu in mite’ mawhna ading a thumsakna te khawlding cihna hi. Hehpihna kong hong kikhak tading hi (Mang 22:11, 12).

See also  SINNA 12: CAESAREA AH A KIKHUMCIPNA

MONDAY                                                                               Feb 11

Pengkulte’ A Khiatna

Pasian in, a misiangthote’ lam pangin na a sepna te, Mangmuhna Laibu in thukhunlui hunlai pengkul zatte tawh genteh hi. Pengkul cihpen tanglai Israel te’ nisim nuntakna ah aki zangh mahmah khat hi (Gamlak 10:8-10; 2 Khang 13:14, 15). Pengkul aw te in, Israel mite ading in biakpiakna hunte, galdo hunte, anlak hunte, leh pawi thupi te phawksakna a hihi.

Pengkul mutna in thungetna tawh ki zawitawn hi. Tua aw in biakpiak laitak leh pawi thupi te ah Pasian leh a mite’ kiciamna phawksak hi. Pasian’ ni (Joel 2:1) ading kiginsak na zong hilai hi. Galdo hunsung pengkul mutna in amau tatzia ding hilhna zong hi a, Pasian’ huhna khut a sapna uh zong hipah hi. Hih thute mah bulphuh in Mangmuhna laisiangtho in pengkul tawh thu hong genteh hi.

Mangmuh 8:13; 9:4, 20, 21 sung simin. Pengkul sagihte in, kuate tungah thukhen hiam?

……………………………………………………………………………………………………………………

Mangmuhna sung kigelh pengkul te in, Pasian in tanglai a misiangtho te’ thungetna sangin na a sepna te ahihi. ‘Seal’ cih pen Pasian lampang ding a khensat te a hi a, pengkul awging in, leitung lampang mite tung ah thukhenna hi (Mangmuh 8:13). Leitung mite kisikkik na’ng a ziakai ma in, theihkholh sakna zong a hihi.

Pengkul sagihte in, John hunpan kipan, leitung beidong hun khempeuh huam (Mang 11:15 – 18) hi. Tua pengkulte a kitum hun in, vantungah mawh thumna a kibawl laitak (Mang 8:3 – 6), leitungah lungdam thu a kihilh laitak (Mang 10:8 – 11:14) a hihi. Pengkul thukhenna te in khen thum suah khenkhat tungbek a hihi. Pengkulte hunin, pawlpi sagihte’ hun leh seal sagihte hun tawh a kibang mah hi a, pengkul sagihna in, Pasian ukzawkna aana a lakkik hun hong tungta cihna a hihi.

a.           Pengkul khatna leh nihna te in, Khazih singlamteh ah khai a, pawlpi masa a bawlsia, Jerusalem leh Rome kumpi tungah thukhenna a hihi.

b.         Thumna leh lina pengkul in, hun laizang hun a, a zualzang Tapidaw pawlpi tungah thukhenna a hihi.

c.         Ngana leh gukna pengkul in, pawlpi kipuahphat hunlai a, biakna galdona te lak hi. Tua gal kidona te in, Armageddon galpi sung a, Satan’ nasepna te hong musak hi.

Tangthu in, sisan leh dahna tawh na kidim mah taleh, tua te in, Zeisu hong kamciamna te sungah bangzah hong thahat saktuam hiam?

TUESDAY                                                                             Feb 12

Vantungmi Leh A Kihong Laibu

Pengkul gukna in hunbeina hong lak hi. Tua hun laitakin, Pasian mite in bang hih uh hiam? Pengkul sagihna a tum ma in, hun nunung ciangin Pasin’ mite hih dingte, kihilhna khat om ding hi.

Mangmuhna 10:1- 4 simin. Bang thu piang hiam?

…………………………………………………………………………………………………………………….

“Tua a thahat vantungmi pen, a dang hilo, Zeisu mah hi pah hi.” E G White, SDA Bible Commentary vol. 7, laimai 971. A khete tuitung leh leitungah koih a, leitung buppi zak dingin thu tangko hi. Humpinelkai hawkbang in awng hi. Pasian awpen humpi nelkai aw tawh genteh (Hosea 11:10; Mang 5:5) hi.

See also  Myanmar Sabbath School Lesson 4th Quarter 2019

Mang 10:5 -7 simin la, Daniel 12: 6,7 tawh saikaak in. Kammal kibang a zat bang om hiam?

Vantungmi in, “hun om nawnlo hi (Mang 10: 6) a cihpen, Greek pau in chronos hi a, hunkhat limlim a cihnopna hi. Daniel 12:6,7 a, misiangtho te thuakding bawlsiatna in hunkhat hun te leh hunlang ci a, AD 538 – 1798 kikal kum 1260 sung, Pope in a mi bawlsiat hun ding teng a hihi. Daniel leh Mangmuhna sung “Ni” a cih teh kumkhat limpua (Gamlak 14:34; Eze. 4:6) a hih mahbangin, ni 360 in kum 360 mah hi pah; hun thum leh a lang a cih teh, ni 1260, aih ke’h kum 1260 hi pah a, tuakhit teh, beina hong tung ding hi.

Daniel 8:14 a, ni 2300 (457 BC – AD 1844) khit ciangin, tuabang ni leh kum kikhel genkholna om nawnlo ding hi. EGWhite in, “vantungmi in kamciam kip tawh hong gen Topa hong pai na ding ni te thu agenna a hihi. Hih hun ciangtanh khit teh, a dang hun ciangtanh om nawnlo ding hi. 1842 pan 1844 dong a sawt hun ciangtanh khit nungah, hun ciangtanh dang om nawnlo ding hi. A saupen hun ciangtanh in, 1844 kum, phalbi kuan dong huamto hi.” EGWhite SDA Bible Commentary vol 7. laimai 971.

Ei leh ei a ni ciangtanh khawng bawl mawkmawk ding a hoihlohna banghang hiam?

WEDNESDAY                                                                                                               Feb 13

Laizial Neekna

Mangmuhna 10:8 – 11 simin. Laisiangtho sungah “ne” cih limlim, mipi tung hawpsawn ding, Pasian kiangpan kam sang, thu sang (Eze. 2:8 – 3:11; Jer. 15:16) hi. Kam a sanlai in, thuhoih hi napi, a gensawnkik ciang, mipi hehna leh nialna piang thei hi. John mangsung a khum/kha laizial pen, Daniel laibu hi a, hun nunung thu tampen hi. Tawntung lungdamna thu tangko ding pen, “a beibang” pawlpi (Mang 14:6,7) hi ding ci hi.

Tua banah, a khum/kha khat pen, kum 2,300 beikuan a, Miller pawlte in, 1844 kumin, Zeisu hongpai ding cih upna a neih laitakin khum mahmah hi. Zeisu hong pai takpiloh ciangin, lungkiatna dahna thuak uh a, kha mahmah leuleu a, laisiangtho limsim mahmah kik uh hi.

Mangmuhna 11 : 1,2 simin. John bang hih ding kisawl hiam?

…………………………………………………………………………………………………………………….

Mangmuhna 10 tawh a kizomto a hihi. Biakinn, biakna tau, leh biakna piate teh ding kisawl hi. Laisiangtho in “teh” a cih ciangin, thukhen (Matt. 7 : 2) cihna hi. A kiteh ding biakinn pen, vantung biakinn hi a, Zeisu’n eite a ding “palai” hong sepsak hi. Biakinn, biakna tau leh biakna pia te cih in, Mawhphel Ni (Siampi 16 : 16 – 19) cihna hi. Tua ni pen, “teh ni” hi in, Pasian in, a mite’ mawhna thu a khen ni a hihi. Mang 11 : 1 a thukhenna zong, Zeisu hong pai ma in om ding hi. Hih thukhenna pen, biakna piate, Pasian mite a ding vilvel a hihi.

Mang 11:1 na ah, vantung biakbuk thu pen, lungdamna thu laigilpi hi cih hong lak hi. Pasian nasepna tengzong hong musak hi. Leitung mite’ a ding in, Zeisu hong gupna nasep teng khempeuh cingtakin hong musak hi.

Mawhmaisak nani in, sisan pen thu laigil a hihlam (Siampi 16) phawkin la, thukhenna pen eite a dingin lungdamthu a hihna bangci theih ding i hi hiam? Banghangin hih thu thupi mahmah hiam?

See also  Thuhilhkikna sungah Tulai Thuman

THURSDAY                                                                        Feb 14

Teci Nihte

Mangmuhna 11 : 3 – 6 simin. Teci nihte pen, Siampi puantual a silh, Zerubbabel leh Joshua te a hihna bangci ki muh hiam?

…………………………………………………………………………………………………………………….

Teci nihte cihpen, Jew ki -ukna thukhun sungah, teci a tawmpen nih in thu kipsak ding (John 8: 17) cihpan a hong pai a hihi. Tua teci nihte in, Laisiangtho lui leh Laisiangtho thak zong hi pah a, tua geel kikhenkha theilo hi. Pasian mite in, tua Pasian thupiakte leitung khempeuh ah i tangko ding hi. Hih teci te geel in, puansia silh ci hi. Kum 1260 hun (AD 538 – 1798) sungteng hi a, puansia in dahna lim (Piancil 37: 34) ciing hi. Laisiangtho thuman kiselcip a, mite’ phuaktawm ngeina te a kizuih hunte a kawk a hihi.

Mang 11:7- 13 simin. Ni/Kum 1260 tawpna ah, teci nihte tung bangthu piang hiam gendih in.

…………………………………………………………………………………………………………………….

Teci nihte a that Sapi zong Satan pan hong piang hi a, teci nihte a thahna zong, Laisiangtho um nawnlo a, Pasian omlo cih upna hong piang in, Pianthit (France) gam kidona pi tawh kizom hi. Pianthit gam a biakna langdona hong omna in, Sodom ginatlohna te piangsak a, Egypt te kiphatsakna tawh Pasian uplohna te leh Jerusalem langdona te piang sak hi. Zeisu hun a Jerusalem a thupiangte mah, tulai ei hunah hong piang veve hi.

Teci nihte hong thokik cih penin, Pianthit kidona pi khit, biakna khanlawhna om in, nihveina hong kumkik ding thute ki tangko a, laisiangtho kipawlna (Bible Society) kibawl in, leitung khempeuhah laisiangtho kihawmkhia cih te a hihi. Hun bei madeuh in, leitungbup in laisiangtho bulphuhna (Mang 18:1-4) hong nei ding hi. Tua in, dawimangpa vangliatna khangsak ding a, leitung khempeuh in, Sapi biakna tawh, Pasian mite dona lam ah makaih ding hi (Mang 16:13-16; 4:12).

FRIDAY                                                                                  Feb 15

Ngaihsutbeh ding

Pengkul sagihna in, hun nunung thupiangte (Mang 11:15 -18) kawk hi. A langdo hih leitung in, Satan’ khutnuai ah kum tultampi a om khit ciangin, Pasian kiang hong zuatkik ding hun hong tungta hi. Zeisu, singlamteh tung a sihna leh a vankah kikna te khempeuh in a gualzawhna (Mang 12:10,11) hizaw hi. Satan in, hun tomno bek neilai (Mang 12:12) a hih manin, a hih theihtawp in, suksiatna hong bawl ding hi.

Pengkul sagihna in, laibu sungah om pulak nailoh teng hong pulak hi. (1) Minamte heh mahmah : Mang 12 – 14, Satan hehlua (Mang 12:17); a kipawlpih nihte, tuipi lakpan Sapi leh leilakpan Sapi tegel in, Pasian mite do ding in kithawisak hi. (2) Na hehna hong tungta hi : mipite hehna pen, Pasian in, Ama hehna, gimna sagihna tawh dawng hi (Mang 15 : 1). (3) Misisa te tung thukhenna (Mang 20:11- 15). (4) Pasian nasemte thaman kipia (Mang 21 – 22).

  • Leitung a susia te susia kik ding : (Mang 19: 2) Hun nunung Babylon in leitung susia a hih manin, amah ki susia ding. A nunungpen in, Satan leh a nungzui te khempeuh kidona lianpi sungah kisusia ding (Mang 19:11 – 20:15).

KIKUP DING DOTNA TE

  1. Khat veivei lungdamthu tangkona in, kha thei hi (Mang 10 : 10). I genkhiat kammal te hong kisanglo, ki simmawh thei hi. Langdona khawng bang piangsak zawzen hi. Tuabang te a tuak kha Laisiangtho sungah kua na mu hiam? Bang pilna i ngah thei diam?
  2. Hun ciangtanh te awlmawh ding, Topa’n hong lak denden hi. Hun ciangtanh thak omngei nawnlo ding hi. Khasiangtho hong kibuak ding hun, Zeisu hong kumsuk ding hun cihte ciangtanh omlo hi. EGWhite, Selected Messages bu 1 na, laimai 188. 1844 khitciang hong tungding thu te, hun ciangtanh piak mawkmawk bangzah in lauhuai hiam? Tua lauhuai thu te pan bangci kidoptheih om ding hiam?
Tags: ,

Admin

Admin

Top