Lesson 9: AKICIAN PENPEN LAHTELNA

SINNA 9 November 24 – 30
AKICIAN PENPEN LAHTELNA

SABBATH NITAK Nov. 24

Tukal sung sim dingte: John 11:51, 52; Eph. 2:13-16; 2 Cor. 5:17-21; Eph. 4:25-5:2; Rom. 14:1-6; Sawl. 1:14.

LAI SIANGTHO BULPHUH: “Hih bangin thu a gen ciangin ama lungsim a gen hilo a, tua kum in siampi lian pen a sem ahihna tawh Jew mite’ tangin Jesu a si ding ahihna thu a genkhol ahi hi. Jew mite a ding bek hilo in a kithehthang Pasian’ mite khempeuh pumkhat a suah nading in a kikaihkhopna ding thu zong a genkhol ahi hi.” (John 11:51, 52).

Nung kal in Jesu pen Honpa ahihna leh hun tawpni ciangin Lai Siangtho thutak te bulphuh ding cih thupuak neihkhopna tawh kipumkhatna muhtheih in om ahihna i sinkhin zo hi. Pasian in hong piak thupuak leh leitungah tua thupuak tangko ding sapna hangin eite i hihna  dik kilang hi.
Tu kal in, pawpi kipumkhatna in i Christian te nisim nuntakna leh pawlpi nasepna ah ki muhthei ahihna thu i bulphuh ding hi. Jesu genna  ah, pawlpi pen hotkhiatna leh kilemkikna tawh kisai Pasian thupuak a tangko mawk bek hilo hi. Pawlpi kipumkhatna ngiat in tua kilemkikna a langsak khat ahi hi. Mawhna leh langdona tawh kidim leitungah, pawlpi in Christ vangliatna leh hotkhiatna nasep a langsak teci ahi hi. Teci ahi pawlpi in kipumkhatlo in sepkhopna om kei leh Singlamteh i hotkhiat vangliatna leitung in mu tel theilo ding hi. “Christ tawh kipumkhatna in khat le khat hong kipumkhat sak hi. Hih kipumkhatna in Christ i thupi liatna leh deihhuaina, Ama mawhmaisak theihna vangliatna a kilangsak teci kician penpen ahi hi.” – Ellen G. White Comments, The SDA Bible Commentary, vol. 5, laimai 1148.

SUNDAY November 25
JESU’ SINGLAMTEH NUAI AH

A mite tungah Pasian hong piak kha thupha dang tampi te mah bangin pawlpi kipumkhatna zong Pasian letsong khat ahi hi. Kipumkhatna in mihing te hanciamna, sephoihnate leh deihna ngimna bek tawh aki bawl thei hilo hi. A bulpi in, Jesu in Ama sihna leh thawhkikna tawh tua kipumkhatna bawl hi. Ama sihna leh thawhkikna upna hangin tuiphumna leh eite mawhna maisakna tawh tua kithuahkhopna ah a kihel i hi aa, leitung mite kiang vansawltak thum te’ thupuak tangkona tawh Amah tawh pumkhat i hih mah bangin khat le khat a kipumkhat i hi hi.
John 11:51, 52 leh Ephesian 1:7-10 sim in. Jesu nuntakna ah bang thu pen in Seveth-day Adventist te’ sungah kipumkhatna ding tawphah hi pen hiam?
_______________________________________________________________
“Hih bangin thu a gen ciangin ama [Caiaphas] lungsim a gen hilo a, tua kum in siampi lianpen a sem ahihna tawh Jew mite tangin Jesu a si ding ahihna thu a genkhol ahi hi. Jew mite a ding bek hilo in a kithehthang Pasian mi khempeuh pumkhat a suah nadingin a kikaihkhopna ding thu zong a gen a hi hi” (John 11:51, 52). Caiaphas in Jesu sihna dingin thu a piakna ah bang hih ci a ki theihloh hangin Jesu sihna thu a telgen dingin Pasian in Caiaphas a zatna lamdang mahmah hi. Siampipa in zong ama thugen a thupina thei hetlo hi. Gamvai tawh kisai a gen bek in Caiaphas kingaihsun hi. Ahizongin, John in eite tangin Jesu hong sihna thutak in a citak Pasian mite khempeuh “pumkhat suak aa” a kikaihkhopna ding lahna dingin zang hi.

Seventh-day Adventist te in bang dang i um zongin, ei bek in bang thupuak i tangko zongin, eite tangin Jesu hong si ahihna i sankimna in i kipumkhatna tawphah bulpi ahi hi.
Tua ban ah, tuiphumna tungtawn in hih Christ sungah kipumkhatna i nuntakpih hi. “Christ Jesu tawh na kipawl manun note khempeuh Pasian tate na suah theihna uh pen na upna hang uh ahi hi. Christ sungah a kiphum note in Christ pianzia a nei khinte na hi uh hi”  (Gal. 3:26, 27). Adventist te in i neihkhop hong khihkhawm thu dangkhat in tuiphumna hi a, tua in Christ sungah i upna limla hi. Eite in Pa khat i neikhawm a, tua hangin, eite Pasian tapate leh tanute i hi hi. Eite in Ama sihna leh thawhkikna ah i nei khawm hi (Rom. 6:3, 4).

Ei Seventh-day Adventist te lak ah ngeina, taangpi nunzia, minam, leh gamvai kibatlohna tampi a om hangin, Jesu sungah i neikhop upna in tua kikhenna te banghang in pailet (vuknelh) huai hiam?

MONDAY November 26
KILEMKIKNA DING NASEPNA

Hih leitung in omzia diklo, buaina, gal, leh kilemlohna vive tawh kidim hi. Hih thute in i mimal, khuatual, leh gamkhat nuntakna dong sukha hi. Khat veivei i nuntakna khempeuh buaina tawh kidim ding bang hi. Himahleh, kipumkhatlohna leh buaina te in gualzo tawntung lo ding hi. Khuavannuai ah kipumkhatna a omna dingin Pasian in nasem hi. Mawhna in kithuhualna hong tun aa, kilemkik ding a tawntung Pasian geelna in kilemna leh picinna hong tun hi.

See also  Sinna 4:  Khatguak Omciang

Ephesian 2:13-16 sungah, thu-umte lak ah kilemna a om theihna dingin Christ sepzia thugui te Paul in hong lak a: singlamteh tungah Ama sihna tungtawn in Jesu in Jew leh Gentile te mipawlkhat suaksak a, amaute a khen nam leh biakna daltanna te susia hi. Kum zalom khatna
lai in Christ in Jew te leh Gentile te aa dingin hih bang sem thei ahih leh tu hun i pawlpi sungah kikhenna a piangsak beh le phung, minam, leh ngeina daltanna te bangzah takin susia thei lai ding ahi hiam?

Hih mun pan kipan in, leitung bup ah kipumkhatna om thei ding hi.

2 Cor. 5:17-21 ah Christ sungah eite piansak thak i hi a, Pasian tawh kilemkikte ihi hi ci-in Paul in hong gen hi. Tua ahih leh hih leitungah i sep ding bang hiam? a kipumkhat pawlpi hihna tawh i khuatual ah bang kilamdanna bawl thei ding i hiam?
_______________________________________________________________

Pasian piansak thak i hihna tawh, thu-umte in a thupi nasep ahi a kilemna ding nasep a zahthum in i ngah hi. (1) i pawlpi in nidangin Pasian tawh kigamla thu-umte tawh a kidim pawlpi hi a, ahizongin Christ sihna hehpihna tungtawn in Kha Siangtho tungtawn in Pasian tawh a kipumkhat te ihi hi. Eite in hunbei kuan thupuak a tangko a cianlai (a beibang) te ihi hi. Eite nasep in Pasian tawh a kigamla lai mite Pasian tawh kilemkik in eite nasepna ah hong kipawl nading in zawn ding ahi hi. (2) Pawlpi in khat le khat a kilem Pasian mite ahi hi. Christ tawh kipumkhat cih in khat le khat kipumkhatna hi. Hih in a deihhuai ngaihsutna bek hilo in muh theih taksuak ahih ding kisam hi. Khat le khat kilemkikna, kilemna, leh kithuhualna in Jesu Christ in eite Honpa leh Tanpa ahihna leitung mite mai ah a khial theilo teci ahi hi.. “Note khat le khat na ki-it uh leh ka nungzuite na hih lam uh mi khempeuh in a thei ding uh hi” (John 13:35). (3) Hih kilemkikna nasep tungtawn in, khuavannuai ah Pasian hotkhiatna ding geelna in dik in vanlian hi cih pawlpi a tangko ding ahi hi. Kidona lianpi in Pasian leh ama nungzia tawh kisai thu ahi hi. Pawlpi in kipumkhatna leh kilemkikna a sep zahzah a tawntung Pasian pilna na khuavannuai in mu ding hi (Eph. 3:8-11
en in).

TUESDAY November 27
KIPUMKHATNA NUNTAKPIHNA (A TAKTAK A KIPUMKHATNA)

1902 kum in Ellen G. White in: “Leitung ah Christ nuntakzia in Christian khempeuh nunzia ding hi. Ama genbanglo sianthona bek ah hilo in ama lungduaina, nunnemna, leh lungsim melpuak deihhuaina te ah eite etteh ding ahi hi.” – Ellen G. White, in Signs of the Times, July 16, 1902. Hih kammal te in Philippi te tungah Paul thumna “note in Christ Jesu lungsim bang na nei un” cih thu hong phawkkik sak hi (Phil. 2:5).

Ephesians 4:25- 5:2 leh Colosse 3:1-17 sim inla hih dotna tegel dawng in. I nuntakna bang pen tawh Jesu tungah i cihtakna a lak dingin hong kisam hiam? Mi honpi lak i nuntakna in koi bangin Jesu lungdamna thu teci thei ding hiam?
_______________________________________________________________

Jesu etteh ding leh Pasian hehpihna midangte tungah teci a pang dingin Christian te hong kisapna Lai Siangtho mun tampi ah kimu thei hi. Midang te hoihna dingin hanciam ding (Matt. 7:12), khat le khat vangik kipuak pihding (Gal. 6:2), pualam kizepnate sangin sunglam hoihna kha nunzia neih ding (Matt. 16:24-26; 1 Pet. 3:3, 4), leh cidam uai nunzia te zuih ding (1 Cor. 10:31) in eite hong kisam hi.

“Kong it lawmte aw, na kha uh hong do den, mawhdim lunggulhnate pan a kidek dingin leitungah gamdang mite le mikhual te bangin kong kun hi. Lawiki te lak ah tua bang nuntakna hoih na nungta un. Amaute in a khial a hong ngawh uh hangin na gamtat hoihte uh mu thei ding a, Pasian in eite hong veh ni ciangin amah a minthang sak ding uh hi” (1 Pet. 2:11,12). Ei hong vil hon gen den mite tungah i Christian nunzia in bangzah huzaap nei cih i neu ngaihsut kha zel hiam? nawngkaisak hun ah i lungduaina, buaina le kitelkhialhna kawmkal ah  khal (thukhun bang) aa nuntakna, kamkauh le ngongtatna te nunnem tawh thukkiknate in eite kilat khiatsak ding Jesu lungsim puakzia limte ahi hi. Pasian omzia a telkhial leitung mite tungah thupuak ahi Seventh-day Adventist te in hoihna i thahatna leh Pasian vangliatna ding ahi hi.
Christ tangding (ai-awh) te ihih mah bangin nunzia hoihna bek tawh hong kithei ding hilo in midangte hoihna ding i lunggulhpihna tawh zong hong kithei ding ahi hi. I kha nuntakna in a dik a maan ahih leh, ama thu in hong kilang ding aa kiim-le-paam ah huzaap nei ding hi. Leitung mite tungah Christ nunzia a lak a kipawlkhawm thu-umte in a vanglian teci te hi taktak ding uh hi. Midangte tungah bangci na lak hiam? Jesu a zuih nop nading un mite in na nuntakna ah bang thu a mu diam?

See also  ZSL 12: Saklam le Khanglam pan Gamhoih ah

WEDNESDAY November 28
KIBATLOHNA KAWMKAL AH KIPUMKHATNA

Rom. 14 leh 15 sungah, Rome khua pawlpi a khenkham buaina te Paul in hong gen hi. Hih buaina thu a dawnna ah Rome khua pawpi mite khat le khat lungduai iin a kithuakzawh ding kun aa, hih thu te tawh pawlpi kikhensak loh ding gen hi. Hih ngaihsut piakna panin bang thu sin thei ding i hiam?
Rom. 14:1-6 sim in. Rome khua pawlpi mite bang ngaihsutna te hangin khat le khat thu kikhen inkithuahkhawm lo uh hiam?
_________________________________________________________________

Hih thute a tamzaw Jew ngeina tawh kizui aa siangtholohna te hi leh kilawm hi. Paul genna ah hih thute in “kisel theihna thute” (Rom. 14:1) hi aa, hotkhiatna tawh kisai thu phamawh te hilo in mimal hoihsakna tawh kizui thute in ngaihsut theih thute ahihna hong gen hi (Rom. 14:5).
Hih kiselna tea masa in nekna vai ahi hi. Hih lai a Paul gen thu in Siampi. 11 sunga a kiphallo ganhing sa nekna tawh kisai buaina hilo hi. Paul hun lai in Christian masa te in voksa leh sa sianglo te a nekna uh lahtelna ding matlap omlo a, Peter in zong tua bang ante nelo ahihna i thei hi (Sawl. 10:14). A thanem te in anteh bek ne uh a (Rom. 14:2) cih thu leh dawnna tawh kisai kiselna thu in (Rom. 14:17, 21) siangtholohna tawh kisai ngeina te bulphuh na hong lak hi. Rom. 14:14 sunga “nin” cih kammal (koinos) pan kitel hi. Hih kammal in tanglai Greek kamphenna (kamletna) ah Thukhun Lui a siangl ganhingte genna in kizang a, Siampi. 11 sunga sa sianglo te genna hilo hi. Tu alai a Rome pawlpi mite lak ah kithuahkhopna annek ciangin ante nek dingin hoihtak kibawllo leh milim biakna dingin kizang hi cih muanmawhna hangin a ne nuamlo pawlkhat om hi.

Nite siangtho sakna zong tua mah bang ahi hi. Paul in a ngeina bangin siangtho sak ahih manin hih thu in kaalsim Sabbath siangthosakna thu hilo hi (Sawl. 13:14; 16:13).Jew te pawi nite leh antan nite a gen hizaw ding hi. Hih banga lungsim siangtho tawh hoihsa aa a ngaihsun mite in hotkhiatna ngahna ding in hih ngeinate a ngaihsut kei nak leh kitelsiam aa kithuakzawh ding a gen ahi hi. Thuakzawhna leh a diak in  pna thu tawh kisai a thupi lua lo nate ah kithukimlohna a om ciangin kithuaksiamna ah Christian kipumkhatna kilang hi.

Class sungah hih dotna dongin: Seventh-day Adventist i hihna tawh i up leh i zat thute lak ah Adventist kici te in up leh sep ding a kullo thu a om hiam?

THURSDAY November 29
NASEPNA AH KIPUMKHATNA

Luke 22:24 sunga Topa’ Nitak-An nek hun in nungzuite lungsim omzia leh Sawl. 1:14 leh 2:1, 46 sunga Pentecost madeuh in nungzui te lungsim omzia saikaak in. Bangin amau nuntakna ah tua zah in kilamdanna piangsak hiam?
________________________________________________________________

Sawl. 1:14 leh 2:46 sungah, “kithukhat” cih kammalin “ngaihsut kikhat in om” cihna zong ahi hi. Amaute mun khat ah omkhawm in Hehnempa sawl ding Jesu kamciam a tangtun theih nading in thu a ngetkhopna hang uh ahi hi. A ngak kawm un khat lekhat kigensia in  kimawhsak dinguh nak baih lua mahmah ding hi. Pawlkhat in Peter in Jesu a nialna (John 18:15-18, 25-27) leh Jesu thawhkikna thu Thomas in a muanmawhna (John 20:25) kawk kha thei ding hi. Jesu kumpi gam ah munhoih (za hoih) ngahna dingin John le James te ngetna thu te (Mark 10:35-41) leh Matthew pen nidang in a huathuai siahdongpa ahihna (Matt. 9:9) phawkkik kha thei ding uh hi.

See also  ZSL 10: Mawh Pulakna pan Hehnep Thapiakna ah

Bangbang hi leh, “hih kipuahphatna (kiginna) nite in lungsim tawng zonna (sittelna) nite ahi hi. Nungzuite in khalam ah a kisapnate uh phawk uh a, kha gupkhiat nasep na tawh a kilawm tehihna dingun Topa tungah a siangtho sathau nilhna ngen uh hi. Amaute mimal aa ding
thupha te ngenlo uh hi. Kha hotkhiatna ding vangik tawh amaute kitawiteh uh hi. Lungdamna thu leitung bup ah tangko ding a kisapna phawksan uh a, Christ kamciam vangliatna amau te in gen in om uh hi.” – Ellen G. White, The Acts of the Apostles, laimai 37.

Nungzuite kithuahkhopna leh nakpi tak aa a thungetna uh in Pentecost a dingin puahpha (kigingsak) hi. Pasian tawh kingaih semsem in mimal kilamdanna te nawlkhin uh a, hangsan leh laulo takin Jesu thawhkikna thu teci a pan theih nading un Kha Siangtho in amaute puahpha hi. Jesu in amau kicinlohnate maisak khin cih amaute in thei uh aa, tua in amaute mainawtna ding tha guan hi. Amaute nuntakna ah jesu in bang sepsak khin cih amaute in thei uh hi. Ama sungah kimu hotkhiatna kamciam amaute in thei uh ahih manun “thu-umte ngimna in Christ nunzia tawh kibang nunzia lah ding leh Ama kumpi gam zaina dingin nasep ding” ahi hi.” – laimai 48.

Topa in amaute tungtawn in na lianpi tampi sem thei ahihna lamdang lo hi. Tu hun pawlpi a dingin bang sin ding hilhlak om hiam?

Midangte nuntakna ah khialhna muh ding baih tawntung hi. A kipumkhat pawlpi i hihna tawh a lianzaw Pasian deihna sepna dingin  midangte khialhna te nawlkhin theih ding koi bangin kisin thei ding i hiam?

FRIDAY November 30

NGAIHSUT BEH DING: Ellen G. White gelh Evangelism laibu sunga “Kilamdanna sungah Kipumkhatna” laimai 98-103.
Anuai a thu in amaute kibatlohna kawmkal ah pawlpi masate Christ sungah a kipumkhatzia hong lak a, tua thu in leitung ite mai ah a vanglian teci suak hi. “Lai Siangtho in pawlpi masate thukhensatna ah Kha Siangtho in koi bangin pawlpi makaih cih hong lak hi. Hih bang thukhensatna te a kizom dimdiam, a tawmpen, thu thum tawh sem uh hi: khatna ah, mangmuhna (gtn. Kha Siangtho in bang sem ding cih mite gen, Cornelius, Ananias, Philip leh ai-sanna zong), nihna ah, Lai Siangtho (Lai Siangtho tawh pawlpi in thukhupna khensatna nei hi), thumna ah, mi a tamzaw thukimna (Pawlpi mite lak ah Kha Siangtho in nasem aa, kithukupna leh thusinna te ah lungkimna, thukimna tamzaw ngahna panin pawlpi sungah Kha Siangtho in nasem cih mu thei uh hi). Thu-umte lak ah ngeina, upna thu, leh Pasian thu (theological) buaina a om ciangin Kha Siangtho in a tamzaw khensatna tawh na sem hi. Hih sepna ah, makaite bek hilo in thu-umte sepna ahi khentel siamna dingin thungetna a thupina kimu thei hi. Pasian kammal teltheihna ah Kha Siangtho makaihna kimu tawntung a, pawlpite kisapna le tuahkhaknate ah, leh makaite nasepna te ah Kha Siangtho makaihna kimu thei hi. Kha Siangtho makaihna tungtawn in Lai Siangtho, thungetna, leh tuahkhak muhna thute tungtawn in Pasian thutawh kisai (theological) pawlpi thukhensatna te kibawl hi.” – Denis Fortin, “The Holy Spirit and the Church,” in Agel Manuel Rodriguez, ed., Message, Mission, and Unity of the Church, laimai 321, 322.

KIKUP DING DOTNATE:

1. Class sungah, Wednesday ni a dotna na dawnna ngaihsun inla Adventist te aa dingin bang thuhilhna leh sepna te thupi aa bangte thupi lo hiam cih kikum un.

2. Eite mah bangin Jesu sihna leh thawhkikna thu a um Christian dangte tawh koi bangin kizom i hiam? Ahuampi in: Jesu in hong it bangin sanggamte khat le khat ki-itna in a kician pen kipumkhatna lahna ahi hi. I mawhnate hong kimaisakna leh Advnetist hihna ah i sankhop hotkhiatna te in i kithuahkhopna hong khihkhawm lianpen te ahi hi. Eite kipumkhatna leh upna thute leitung mite maiah i lak thei ta ding hi.

Tags: ,

Admin

Admin

Top