Lungdamna Thu Nuntakpih
Lesson 10: Lungdamna Thu Nuntakpih
Aug. 31 – Sept. 6
Sabbath Nitaklam Aug 31
Tukaalsung sim ding: Rome 8:20-23; John 3:16,17; Matt. 9:36; Eph. 2:8-10; 1 John 3:16, 17; Rev. 14:6, 7.
Kamngah: “Note upna hangin, Pasian hehpihna tawh hotkhiatna angah na hi uhhi.Pasian hong piakkhong hi.Zeisu Khazih tawh i kipawl ciangin, i nuntak na ah gamtat hoih a nei dingin, ahong bawl ahi hi.” Ephet 2:8-10.
Pasian hongthupiak te, hong lamlahna te gimpipi a zuihna tawh Pasian’ mai- pha ngah in hotkhiatna zong ngah ding i kisa kha hi. Lai Siangtho in bel Zeisu’ sihna bekmah in hong gum cih hong gengen hi. Eite behlaptheih bang om peuhmah ding hiam? EGWhite in, “Ahoih, asiangtho, a ithuai kici khempeuh kaikhawm inla, mi te gupkhiatna ding kipiakkhiatna ci in Pasian’ vantung mite mai ah lui lecin, langdona ci in hong ki nial lel ding hi” (Faith and Works, laimai. 24).
Eite’ hehpihna leh itna te zong lampi khat a pai dendan hilo in, Pasian hotkhiat na thu i telsiang semsem ciangin, Pasian in mizawngte leh nenniamte a ding a ngiim na te zong i tel semsemzaw lai dinghi. I ngah mahbangin i piakhia kik ding hi. Pasian in eite hong itzah leh, midangte a itzah telzo leng, eite’n zong tuazah mah itding in hong sawl hi.
Sunday September 1
“Pasian in It hi . . .”
John 3:16 in “Pasian in leitung it hi . . .” ci hi. Abulpi Greekpau in kosmos hi a, “a piansaksa leitung, a tuamkoih sitset” cihna hi (SDA Bible Commentary vol. 5 lai. 929). Hih Lai Siangtho munin leitung hong gupkhiatna’ng bek hi a, a ngiimna bulpi pen, vannuai khempeuh gupkhiat na’ng ahi hi.
Romans 8 : 20-23 sim in. Hih Lai Siangtho mun in, gupkhiat na’ng ngiimna a zaizaw in hong koici hilh nasa hiam?
……………………………………………………………………………………………………………………
Thu khat panin, gupkhiatna cih limlimpen, Topa leh eite aituam kizopna hi zaw hi. Tua banah, dik kisakna cihzong pen, mawhmaina lel bek hilo hi. Zeisu leh Khasiangtho tawh, Topa in, Pasian’ innkuan piangsak a, mawhmaina tungtawn in, gamtat hoih te tawh leitungah teci pang ding cihi.
John 3:16, 17 na sim khit teh, aneu 17 na in 16 na i telsemsem na dingin hong bangci huh hiam?
…………………………………………………………………………………………………………………….
Pasianin mi hong it cih i sangthei hi. Ei itte zong amah’n it a, tua hangin i lung zong nuam hi. I phakzawh khempeuh amah’n hong itsak a, eite’n hih thuman i kipsakna pen, amaute i vaphakna ahi hi. Dik i saklohte leh i kihtak te nangawn Pasian in itlai hi. Mun khempeuh a om mi khempeuh, i deihlohte nangawn amah’n it lailai hi.
Piansakna zong hihteng mah hong lahkhiatna ahi hi.Lai Siangtho in Pasian’ hoihna vive hong laksuk diudeu hi: “Amah in mihoihte leh misia te tungah a kibang in Ni tangsak khawm a, a gamtatpha te leh a gamtatsia te tungah a kibangin guah zu sak khawm hi” (Matt. 5:45). I nuntakna mahmah zong Pasian hong piakkhong hi a, thuhkikna khat beekzong hong ngetloh sasa in, a thupha sangte i hihi.
Midang khempeuh zong, Pasian bawlsa hi a, amah’n it hi cih na theih ciangin, midangte tungah na lungsim puak koici in hong kikheel hiam?
Monday September 2
Hehpihna leh Kisikkikna
Gupkhiatna leh Kidona Lian a kihelzau tangthu in, i leitung leh eimahmah a ki bulphuh nuntakna thumaan thutak i teltheihna dingin hong lak a, tua thumaan in : leitung puukkhin, kisiakhin, mawhkhin cihthu a hihi.I leitungpen a kibawlding leitungbang hilo a, eite’n zong Pasian’ meel lim i puakteei hangin, a kisiasa leitung meel lim tawh kihel in i pua hi. I nuntakna sung a om mawhna in natna, nenniamna leh suksiatna a piangsak siatna mah ahi hi.
Natna, lung noplohna, dahna leh kamsiatna te i thuakding mah ahi hi. Tua nat na te thuakzawh i ciam kul hi. Late sungah kahlagui te, Jeremiah leh kamsang dangte’ kahla te, Zeisu’n hong itna tawh a luansak khitui te in, leitung leh a siatna te tua siatna hang a thuakgimte a dingin a kilawm mahmah thu te ahi hi.
Matt. 9:36, Luke 19:41,42; leh John 11:35 simkhawm in. Itna tawh Zeisu a gamtang sak bang a hiam? I kimkot a nat leh sat te hangin, i lungsim bangci ki nemsak thei ding i hi hiam?
………………………………………………………………………………………………………………………………..
I phawkden ding thu khatahsiatna leh mawhnate pen “hualai ah om” cih hi mawkmawk lo a: “Mawhna ka neikei hi i cihleh, eite a kineihkhem i hi a, a thutaklo i hihi” (1John 1 : 8).Lai Siangtho kamsangte in, mawhna pen kamsiatna hang hilo zaw a, thukham palsat manin, Pasian leh mi kikal kizopna kitat bek thamlo, i mawh nate in midang zong sukha hi cihi.Nasia in nasia kei taleh siatna in siatna mah hi.
Angsungkhualna, huaihamna, tualniamna, golguk piakna leh ginatlohna te in leitung’ siatna, thumaanlohna, zawnna leh nenniamna te’ bulpi ahi hi. I mawhna i pulaakna in siatna pulaak khiatna hi a, Pasian’ itna in ama’ ommun taktakah omsak kikna ahi hi: “Ahi zongin Pasian kiangah i mawhna te va pulaak le hang, amah thumaan in citak ahih manin, i mawhna te hong maisak in, i hoihlohna te khempeuh hong siangtho sak ding hi” (1 John 1 : 9).
Nang leh nang ki enkik in, sawtsak ke’n. Bangteng kisiatna nanei hiam? Thubuai lian bang nanei hiam? Dawnna khatbek om, bang ahi tam, etding munkhat bek om, bang ahi tam?
Tuesday September 3
Hehpihna leh Gamtat Hoihte
Ephet 2: 8-10 sungteng nangma kammal in tomlaak inla, hehpihna leh gamtat hoihna bangci kizop sak nasa hiam?
……………………………………………………………………………………………………………………
Lai Siangtho in eite pen Pasian bia ding leh midang te huhding a piang hong ci hi. Ngaihsun lecin, mawhna omlohna ah hihte i hih thei diam? Tu’n bel mawhna hang in i puuk a, Pasian hehpihna tawh, Zeisu in leitungbup ading a kipiakkhiat na in mawh maisakna leh damsakna lampi hong honsak hi. Tua hangin apuksa hih leitungah, Pasian naseppihte i suak thei a, damsakna, puahphatna nate i sem ding hi (Ephet 2:10). “Asangte limlim in hawmsawn tahen. Mi tungah lawptak in piakkhiat dingpen Pasian’ deihna hi” (EGWhite, The Ministry of Healing laimai 103).
Khatvei kik, eite in, gupna ngahna dingin, mizawng te don,nenniam te lamto, gilkial te anvak i hi hetkei hi. Upna tungtawn in Khazih sungah, i kisap tawntung Pasian tawh i tonkhawm hi. Mawhnei i hih hang Pasian in itna tawh hong honkhia cih zong phawk tawntung ni. Mawhzolna in angkhualna lamah hong kaih laitakin, ki niamkhiatna leh ki piakkhiatna a neipa hehpihna tawh nuntakna thakah hong galkah sak hi.
Singlamteh i etciangin, eite a ding a lianmahmah ki piakkhiatna i muthei a, tua Khazih hong piakte tawh kizom ding bangmah i behlap theikei hi. Tuabang cih teh bangmah sep kullo cihna zong hilo hi. Thukkikna pen i sep dingmah hi a, eite it na hong lakpa hangin midangte itna i lak ding ahi hi.
1 John 3:16,17 sim in. Hih Lai Siangtho mun in, singlamteh hoihna i thuk kik ding ahihlam bangci bangin hong lak hiam?
……………………………………………………………………………………………………………………
Wednesday September 4
Mihing I Hihna
Zeisu in a nasepna leh a thuhilhnate tawh, i bul i bal khempeuh hong huamgai hi. Lungsim takpi tawh amah a zong numei ginalo te, siahdongte, phakte, Siamazih te, Roman galkapmangte, biakna makai te leh naupangte, Amah’n hoihtak in sanghi. Pawlpi masa in, ki puahphat lampi a tot mahbangin, gupkhiatna zong mu pah uhhi.
Thu um masa te in lungdamna thupha pen a huamzo thu a hih lam a phawkuh ciangin, gamtatpha gamta mawkmawk bek hi nawnlo in, upna tungtawnin a “Hoih” a hi uhhi. Lungdamna thu amau nuntakna, nasepna leh Zeisu sihna ah mu lua uh ahih manun, amau adingin thu laigil pi ahi hi. Dotna khat peuhpeuh hong om ciangin, genteh na in, makaite phadiak pan Paul leh Peter (Acts 10:9-20), pawlpi leh Jerusalem council (Acts 15), lungdamna thuhangin amau nakpi takin kikheelzo cih phawk in, Pasian’ itna in a huamzo itna cih tel in, ama nungzui dingte koici gamtat ding cih zong thei uh hi.
A nuaiah Lai Siangtho munte in mihing i hihkimna hong koici hilh hiam? Khat sim in, mitungah i lungsim puakzia dingte koibangin hong huzaap hiam?
Malachi 2 : 10
…………………………………………………………………………………………….
Acts 17 : 26
…………………………………………………………………………………………….
Rom. 3 : 23
…………………………………………………………………………………………….
Gal. 3 : 28
…………………………………………………………………………………………….
Gal. 3:28 na pen Zeisu gen, Siamazih mihoihpa thu tomcing ahi hi. Mawhpuak neite om hilo hiam cihcih sangin, ei pai vingveng in semlel leng, i lamet hetloh te’n zong ei ading hong sepkhak dingzong kigingsa in ompah un. Leitung innkuan khat in i omkhopna uh panin, lungdamthu innkuan khatin i om khawm ding hi: “Jew mi i hi a, Gentile mi ihi zongin, sila ihi a, silalo ihi zongin, eite minam tuamtuam i hih hangin, Khasiangtho khat bekmah in, Zeisu’ pumpi a suak dingin, Ama sungah hong phum a” (1 Cor. 12 : 13).
Thursday September 5
Tawntung Lungdamna Thu
Kipuahphat ding hong sapna leh lungdamna thu “nam khempeuh, pau khem peuh, mi khempeuh” tungah tangko ding sapna (Rev. 14 : 6) pen Christian tangthu tawntungah om hi. Ahih hang, Mangmuhna in, Zeisu leh hun nunung thupiang ding te honglak hi.
Rev. 14:6,7 simin. Lungdamna thu pen koici bangin kitel kimtek hiam? Theihkim tek khatpen in, John 3:16; hi a, vantungmi’ thupuak Rev. 14:7 na a kihel hi.
…………………………………………………………………………………………………………………….
Rev. 14 : 7 na in, tusung i sinna sungpan, thu thum ahi siatna, zawnna leh nenniamna cihte Lai Siangtho tangthu sung a omden teng hong gawmkhop sakhi.
Thukhenna: Thumaan thukhenna pen khang tangthu sungah nenniamna bawlsiatna te tungah khen ding hi. Pasian in tuabang haksatna thuakte kahna aw za hi cihi.
Biakpiakna: Hebrew kamsangte’ laigelhte in biakpiakna leh gamtatpha zom zel a, Pasian maan bia ung a cite mah in a biakkhialhna te uh hong lak hi. Isaiah 58 sungah, Pasian in a deihpenpen biakpiakna in, mizawng te tungah diktatna ci hi.
Piansakna: Innkuan khat i hihna sungah Pasian in, thumaanna a deihna bulpi in, Ama’ meel lim suun a hongbawl, hongit a hihmanin, kuamah ki simmawh loding, kibawlsia loding, ki haza loding hi. Hun nunung lungdamthu tangkona ah, apuksa leimite tatna, gupna, puahphatna cih bangin zai mahmah hi. Amaan leh a maanlo biakpiakna leh bawlsiatna lak ah (Rev. 14:8-12), Pasian in, thumaan in a dingtang, Pasian’ thukham leh Zeisu upna a nei, siatna sangpen hun nangawn in kiptak in a ding mi nei hi cihi.
Vantungmi thumte tangkona te sungah lam-etna leh lauhuai nate, mite tungah i hilh kawmkawm in, a kisapna te uh i panpih theih na’ng lampi i muzo diam?
Friday September 6
Ngaihsut Beh Ding : EGWhite lai, The Desire of Ages, laimai 19– 26 sung a om “Eitawh Omkhawm Pasian” leh, The Ministry of Healing laimai 95-107 sung “Nasem dingin Kigumkhia” cihte simin.
“Leitung buppi pen lenggahhuan hi Pasian in ci hi. Tulaitak galpa khutsungah a om hang, Pasian aa hi. Tatkhiatna leh a neuzaw tuanlo Piansakna hangin Pasian aa hi. Leitung adingin Khazih hong kipia hi. “Pasian in leitung a it manin a Tapa neihsun hong pia hi” John 3:16. Hong piakkhong nakhat tungtawnin adang teng zong mite’n sangthei uhhi. Nisim in leitungbup in Pasian’ thupha sang tawntung uh hi. Guahmal sim, nitang malsim leh singteh singgah te in, Pasian lungduaina leh itna te hong lak hi” EGWhite, Christ’s Object Lessons laimai 301, 302.
“Khazih sungah Jew mi leh Greekmi omlo a, sila mi leh silalo mi omlo, a sisan tawh hong tat manin a kibangkim na hi uhhi” (Gal. 3:28; Ephet 2:13). “Biakna upna bangzah in ki lamdang mahleh, thuaksiatna hang a kikona te kidawng hamtang ding hi. . . Eite i zawngkim a, hehpihna kammal, panpihna te i kisamkim hi. Huhna kisam meigong te zong a om hi. Kepcing ding a Pasian hong piak tagah te zong om hi. Tuate i paisan zelzel hi. Puan neilo, a hampi, deih huailo mahleh, Pasian aa hi. Man tawh a kileisa hi. Eimah bangin Pasian mai ah manpha hi. Pasian innkuanpih te hi. Christiante kemcingte in mawhpuak i nei hi. EGWhite, Christ’s Object Lessons 387.
Kikup Ding Dotna Te
- Huh piakna tawh gamtatpha zong a, Pasian in sang hi, eite zong hong hoihzaw sak, hong meetsak hi cih khemna te koici leng i dozo ding hiam?
- Na omna pawlpi in “ki deidanna omlo” Khazih sungah pumkhat a hi hiam? Koibang in tuabang suak thei hiam? Mi bangzah huamzo hiam?
Tomlaak na :Gupkhiatna ngiimna sung a om Pasian’ itna in, Zeisu ki piakkhiatna hangin, mawhmaisakna, nuntakna leh lam-etna hong guan hi. Tua hehpihna a sangkha eite in, gupna thalawhna a hi hetlo, Pasian in hibang ding mah a hong bawlngiat a hi, hawmsawn piakkhiatna i nei ding hi. Tua bangin lungdamthu in, i kizopna te khangtosak a, a zawngte hong donsak hi.