Zo Phualva Vol 09, Issue 01: Lungsim Zatui 1

Kum 9 a pha Braun pen London khuapi tawh kigamla lo khuano khat ah teng hi. Braun nu le pa in Pasian om cih zong a um selo te ahi uh hi. Himah leh, a nuntak sung khatvei beek biakinn a tun ding kilawmsa uh ahih manin akilawm puan silhsak in biakinn ah a paipih na dingin a kemnu kiang gen uh hi.

      Tua nipi ni in aa thugenpa in singlamteh tungah kikhai Mipa thu gen hi. Sikkilh te in thupha tampi a bawlna, mi tampi te ahuhna khut-te kilh aa kikeek in si a luanna, linghiam-te tawh kibawl lukhu in dikna meel a langsak a tangtang tunga a luvun te sukeek aa amaitang ah sisan a taak keuhkeuhna, a pangpi tei tawh kisun in sisan le tui a luankhiatna te gen hi. Mipa’ mit ah dahna leh thuaksiatna lianpi kilang aa, amah a bawlsiate aa dingin itna le dahna kammal kigawm khawm in “Pa aw, amaute in bang hih uh cih theilo uh ahih manun a mawhna uh na maisak in” ci aa a thungetna te gen hi.

Thugenpa thugen laitak in, Braun in kap kauhkauh kawmsa in, “Mikhat peuh bang lo khat hih lo ding maw? Kikhawm mipite dingto in tua singlamteh tungah kikhai Mipa lakhia lo ding maw?” ci in a gen kawm in kikhawm mipi te a et leh mipi te lungnuam phamawhsak neih tuak hetlo aa tu dimdiam a muh teh lamdang sa mahmah hi. Amah acingnu kiangah, “Hih mite a bangci uh hiam, bang hangin singlamteh tunga kikhai Mipa hotkhiat ding ngaihsun lo uh hiam” ci in a dot ciangin, Braun liangko zut kawmin, “Braun, Braun, kap nawn kei oo. Hih pen tangthu hi lel hi. Na lung himawh sak kei in. Lungnuam takin tangthu ngai lel in. Inn i tun ciangin hih tangthu mangngilh pah lel ni teh” ci in a cingnu in gen hi.

Singlamteh thu in nang’ adingin tangthu mawkmawk hi lel hiam? A zaknop dinga kigen tangthu khat bang hi lel hiam? Na saksak ngei zel la khat hi lel hiam? Na thungetna sungah na hel theih zel thukhat hi lel hiam? Thugenna te ah na zak zelzel thu khat a hi lel hiam? Singlamteh thu na zak ciangin na bangci thuak hiam? Na mawhna leh kicinlohnate hong phawk sak hiam? Dahna leh lungnehno in na khi a luang ngei hiam?

Tedim Labu (ZBC) No. 118 ah:

1. Kei hong Honpa a si luangin, ka Kumpi hong si maw! Tangtel bang bek keimah ading, a luting hong zangh maw!
2. Keima gitlohnate hangin, singlamteh tung tau maw! Lamdang hehpihna le itna, bang tawh the thei ding maw!
3. Kei zong singlamteh ka muh ciang, zum in ka kiseel diam! Lungdamna tawh lung nehno in, ka khi ka luang sak diam!
4. Ahihhang khitui takna in, itna lohna khin zo kei. Topa ka pumpi kong pia hi, hih kan’ ka hih thei kei.

Hih la na sak ciangin, na khitui a luang ngei hiam?

Isaiah 53:5-7: Ahi hangin eite tatsiatna hangin amah kisunlet a, i tatkhialh nate hangin amah kisatnim hi; eite in lungnopna i ngah nadingin amah in dan thuaka, ama liammate hangin eite i dam hi. Eite khempeuh tuu bangin lam i pial khin a, eima utna ciatah i pial hi; TOPA in eite khempeuh mawhna ama tungah a suan hi. Amah kinengniamin kihingimsak napi a kam a kek kei hi; a kigo ding tuu bangin amah kipaipih a, a mul metpa mai-ah a ham lo tuu bangin a kam a kek kei hi.

Tangthu gelh: Mark Finley

Tangthu lakna: Signs of the Times (August, 1996)

Ref: Dr Kham Khan Khai

Lecturer, Faculty of Education,

Asia-Pacific International University

CIDAMNA THU

Buhtui pen numei te ading in melhoih nading thusim ki ci thei phial hi. A hi zongin tuhun ciangin an pen beel tawh ki huan mel nawnlo aa mei tawh ki huan hun hong tungta ahih manin buh tui a cih pen banghiam cin a theilo zong ki om kha mai ding hi. Buh tui ih cih pen buhsih tui tawh huan in an tui ih dit ciang, ih dit khiat antui pen a gen ih hihi. Buhtui pen melhoih nading bek hilo cidam nading in zong a thupi mahmah khat ahi hi.

A siangtho a etlawm maitang hong guan thei hi.

Numeite in mai ih phiat khit ciangin a ki khingsak sa buhtui pen pattawh la-in maitangteng nuh lehang ki zepna ahi Toner bang mahin mai hong nosuah sak thei hi. Buhtui sungah Inositol a ki ci Vitamin (B) nam khat ki hel ahih manin guaina zekai sak bekthamlo sisan paidaan hong hoihsak hi. Maitang aa khua-ul pusuakna a vanggolte neusak tuamin mai hong ngo sak thei hi.

Tua ban ah maitangah tuidat ki cingsak hi. Antioxidant zong ki hel ahih manin hong moisuah sak hi. Nisa katna pan hong dal thei aa nikat na hangin apiang thei maivomna te omnawnlo hi.

Sam ading zong hoih hi.

Sam na sawp khit ciangin a ki khingsak sa buhtui tawm nuh in. Hun sawtlo minutes 15 kiim khit ciang tui tawh buakkhia kik in. Tua bangin na sam sawp sim in hih den lecin buhtui lak ah a kihel Protein dat in na sammal te hong tangsak bekthamlo in samka cih bang omnawnlo ding hi.

Vun cidam sak hi.

Vun damlohna, vun taakna cih bang te zong damsak thei hi. Vun bawkte, vun damlohna khat peuhpeuh anei te in nisim in minutes (15) kiim ta buhtui nuh lecin 20% bang damsak thei hi ci-in Brussels University ten a kantel na uh pan na mukhia uh hi.

Pumpi cidam nading in manpha mahmah hi.

Buhtui sungah cidam nading in a ki sam tha tampi om ahih manin dawn ding thupi mahmah hi. Buhtui sungah Amino acid nam (8) kihel ahih manin pumpi ah satak thak kilambeh na dingin a kisam pi pen ahi hi. Carbonhydrate zong tam ki hel ahih manin pumpi tha hong hat sak ngiat hi. Sungpai natna damsak thei ahih manin gilpi leh gilzang bawk natna neiten dawn ding kisam hi. Cancer tuamtuam pan zong dal thei hi. Tua ahih manin melhoih nading bek hilo cidam nading in a manpha mahmah buhtui nisim ih dawndet ding kong hanthawn hi.

Lia Vung Hau Lun (B. NSc), Mikim Cidam Nading, pp. 41,42.

NGAKLAH KEI IN

Ih thungetna leh ih lam-etnate hong tangtun pahpah loh ciang in ki ngaklah thei mahmah hi. LST sung en leng Pasian’ nasep zia pawlkhatte bang ngaklah huai peuhmah hi. Ahizong in hoihtak lungngai leng Pasian in deihna khat na nei kiukiau leh kilawm hi.

Enpak leng:

– Abraham kum 99 aphak dong Pasian in Abraham in akhantawn athunget alunggulhnate dawng tuan hetlo in ta pia hiaulo mawk hi. Abraham in ci leh sa tawh ahih theihna abei dong angak nahi mawk hi.

Abraham’ khanggui en leng apu apate tuadan a tanei theilo om hetlo uh hi. Ta neih huai mahmah hi. Ahi zong ataneih theih hun in nei himawk leh Pasian’ piak ahih lam kilangh nawnlo ding hi. Ama’ hih theih nawnloh dong Pasian in ngak hileh kilawm hi.

– Israelte’ kiang ah Pasian in “Lampi a na nek ding uh kiging khol un” cilo mawk hi. Sehnel gam tungin acihmawh peetmah tak uh ciang bek in Pasian in nasem pan a, tua hun tak teh bel an bang huan zong kulse lo in aminsa in khiat ziahziah lel hi.

– Daniel humpi khuk sung akiatsuk peetmah dong Pasian in khahzan mawk hi. Lam-et abei taktak ciang Pasian in nasem pan in humpite’ kam na humsak hi.

Tampi omlai in cia

Ih gennop bulpi bel ih thungetna khawng ih ngah pahpah loh teh Pasian in gennop hilhnop khat hong nei nahi gige thei hi. Lungduai tak a ngak ngiungeu akul hun om thei hi. Hong theihsak hong sinsak nop pawlkhat a om na hi thei hi.

“Ngak in thuak in thuumlo in ngak in” cih la mah khat veivei lungngaih zel ding nahi hi.

Habakkuk 2:3b “A tung hak tawh a kibang kha ahi zongin ngak keikai in. Ka seh hun a cin’ ciangin hong tung takpi ding a, hong zekai lua nawn lo ding hi”.

Lungdam,
Nong-it:

Mung Laan Thang

Zangkong

Zo Phualva Thupuak – Volume 09, Issue 01 by DavidLian on Scribd