Lungsim Zatui

Lungsim Zatui Lungsim limlangh
===============

Hunkhat lai in lokhomipa khat, a lo pan-a piang vaimimte midangte aa sangin hoih zaw tham ahih manin minthang mahmah hi. Kum simin lokho-mi khempeuhte vaimim zuak kidemna mun ah vaimim quality hoih pen cih pahtawina ngah den hi.

Gambup ah tua lokhomipa vaimim hoihzia minthang vangvang hi. Tua vaimim thu a telkan nuam journalist (thuthak kanmi) khat tua lokhomipa thu dong dingin hong pai hi. Lokhomipa lokhawhzia, vaimim ciinna, leh a sepzia khempeuh a kanna panin tua lokhomipa in a vaimim cii hoih penpen te a lo vengte zong hawm ahihna mukhia hi.

“Banghangin na vaimim cii hoih penpen na lo vengte hawm thei na hiam? Lokhawhna tawh kisai kidemna ah amaute in na kidempihte uh hilo hiam?” ci-in thukanpa in a dot ciangin,

“Banghangin hawmlo ding ka hiam? Vaimimte hong paak ciangin a paakvui-te (pollen) lo khat pan a dang khat ah huih in len hi. Tua ban ah khuaite in paakvui-te bawm in leng kawikawi uh aa lo khat pan a dang khat ah bawm kawikawi uh hi. A zenzen in, ka lo vengte in vaimim cii hoihlo namte ciing uh hileh paakvui-kikawmna (pollination) hangin ka vaimimte zong ahoih pen hong suak theilo ding hi. Ahoih vaimim nam hong pian ding ka deih aa leh ka lo vengte in zong ahoih vaimim a ciin theihna dingun ka panpih ding kisam hi” ci-in dawngkik hi.

Lokhomipa dawnkikna in nuntakna ahoih pen suahtheihna dingin khat le khat kizopna a thupina thukanpa in hong tel semsem hi.

Eimau nuntakna zong tuamah bang ahi hi. Lungmuang tawldam takin a nungta nuam mite in kiim le paam tawh kilem aa lungmuanna a bawl ding uh kisam hi. Itna a ngah nuam mite in midangte a it masak ding uh kisam hi. Midangte in hong thupi bawl ding a ut mi in midangte thupi bawl masa ding ahi hi. Kiim le paam hoih ding ka deih leh keimah ka hoih masak kul aa, keima hoihna tawh midang tungah hoihna ka bawlna in hoihna kizel thei pan ding ahi hi.

See also  Kanglai (Geese)Tungpan lesson tawm cik khat

Luke 6:31 [ZIV] Nang tunga hong kibawl ding na deih bangin midangte tungah na bawl in.

Paunak 11:24-25 [ZIV] Mi khat in pia ziahziah napi, a tamzaw ngah a, adang khat cil tentan napi zawng semsem zaw hi. A cingh mipa a daupai dinga, midang a thamalhsakte amau kithamalhsak ahi hi.

Tangthu: Author Unknown

Tags: ,

Admin

Admin

Top