Makaihna Ah Haksat Hun

Zomi Sabbath School Lesson 10: ARTS LEH SCICENCES LAM PILSINNA, Tedim, Zolai, Zopau, Zokam, Thado, Paite

Lesson  2                                                        January 2-8

Makaihna Ah Haksat Hun

Sabbath Nitaklam                                                     Jan. 2

Tukalsung Simding: Isa. 6:1–4, Isa. 6:5–7, Isa. 6:8, Isa. 6:9–13.

Kamngah: “Kumpi Uzziah asih kumin, asang mahmah a lian Kumpi tokhom tungah Topa a tu ka mu hi. Ama kumpi puanpi pen biakinn sung a dim hi” Isaiah 6:1.

            Kumpite’ hoihna bangteng hiam ci in a kidot ciangin, Confucius in: “Nek leh dawn kicing, galhiam kicing, leh mipite khamuanna a piazo ding” nacihi.

            A nungzuite’n “tua a hihleh tuateng thum lakpan khatbek hong paikhiasak leh e, koipen na paikhia tam?” ci in a dot uh ciangin, Confucius in “galhiam e” naci hi.

            “A omlai tegel lakpan khat hong kipaikhia saklailai leh e” a cihkik uh ciangin, Confucius in “An e! Khangluite hunpan kipanin mikhempeuh gilkialtek lel uhhi. Ahih hangin, hong uk-kumpite tungah khamuanna a neilo mipite pen a mangthangsa a hihi” cihi.  Edited by Michael P. Green, 1500 Illustrations for Biblical Preaching (Grand Rapids, Mich.: Baker Books, 1989), laimai 215.

            Mipite in a thahat, a muanhuai kimakaihna deih uhhi. Galkapluikhat a nihveina galkapsung a ki aapkik ciangin, galkap kaikhawm pa in banghangin ki aapkik nuam nahiam ci in a dotleh “gammi maimai in ka omkhin a, kuamah in hong kemkhoi lo hi” ci hi.

            Tukalsung tengin, Judahte’ kimakaih haksat hun leh tuathu hangin a piang thute i sin ding hi.

Sunday                                                                               January 3

Kumpipa Si khin. Kumpipa Khansau Tahen!

            Isaiah 6:1 sungah Kumpi Uzziah sihnathu gen hi. 2 Khangtangthu 26 sim inla, hih dotna dawng dihin: Kumpi Uzziah sihna in banghangin kician phadeuh hiam?

            Hih kumpipa sihna huhau in muhdan tuamtuam omthei ding hi.

            1. Uzziah ma’an hun sau in hau mah taleh uh, “a siatna dingin akiphatsakna hong khang” (2Khang 26:16)a,Topa biakinn sungah paknamtui hal dingin hong kithawi hi. Aaron suan hi lo (2 Khang 26:18)a hihmanin paknamtui haltheilo ding ci in siampite in a khaam uh ciangin, amah a hehsuak hi. Tuabangin ki puahphatding a nialciangin, Topa in, amah, phaknatna tawh vat a, “a sihni dongmah in Uzziah a phak hi a, amah a phak ahih manin inntuam khatah a teng a, Topa’ biak innpanin amah kipua koih hi” (2 Khang 26:21). Tua misiangtholo Kumpipa sihkum mahin Isaiah in a siangtho, tawntung Kumpipa mang sungah mucitciat se hi.

            2.Uzziah leh Isaiah tegel kikalah kilamdanna lianpikhat omhi. Uzziah in lampi diklo kiphat sakna tawh siangtho na asawk ciangin, siantho ding genthadah in a siangthote lakpanin kipua koih zawsop hi. A langkhatah Isaiah pen, Pasian’ siangthona kibansak hi. Ama thanemna kiniamkhiat takin pulak in, lungsim siangtho ding anget ciangin, ngahkha hi (Isa. 6:5-7). Zeisu’  thugentehna sungah siahdongpa mahbangin, siangthona angah hi: “a kiliansakte pen kiniamkhiatsuk ding a, a kiniamkhiatte pen a lianin kibawl ding hi” (Luka 18:14).     

            3. Uzziah pumpi tungah phaknatna leh a mipite lungsim kisiatna in kibatna lianpikhat mah neizel leuleu hi. “A cidamna mun omnawnlo a, sanim gawpnate, meimapite leh siluang liammate a omhi.”(Isa. 1:6).  

            4. BC 740 lai in Uzziah sihna in, Pasian’ mite kimakaihna lam haksatna lianpi omsak cih kician hi. Tuabang makaipi khatpeuh a sih ciangin kumpi kilaih laitak khawngpen gam a thanem laitak hi gige hi. Tua madeuh BC 745 lai in Assyria kumpipa Tiglath-Pileser kumpi kahto lian a hihmanin, Judah a dingin lauhuai mahmah thamh hi. Amah hong kahtoh phetin galsim ding hong kithawipah a, gam thahatpen gam hong suakto a, a suakta nisuahna lamgamte khempeuh a dingin patauh huai mahmah sak hi. Tuabang haksat mahmah hunsung nangawnin, Pasianin, amah’n kem in khoi a hihna kamsangpa Isaiah tungtawnin hanthotna pia hi.

            2 Khangtangthu 26:16 deihtak simin. Tuabang dinmunte phukha thei dingin naki umhiam? Singlamteh tungah kingakna in, tua piallakpan koibangin hong kemthei ding hiam?

Monday                                                                   Janury 4

“Siangtho, Siangtho, Siangtho(Isa. 6:1–4)

            Isaiah 6 tangmasa 4 tengah thupiangte ngaihsunin. Kumpipa in gamsung buai bialbual laitak in si tadihdih (Assyria te’n gal hongsawm) hi. Acing akem omloh laitak, Isaiah a ding zong patauhhuai mahmah hi.

READ  Nehemiah

            Tualeh- bangthu piang? A mangmuhna sungah, Isaiah in, vangliatna tangzialzial in, Kumpi tokhom tungah Pasian tu a, a tang vanmi seraphim te’n, a kidawngin lasa uh a, “siangtho, siangtho, siangtho” ci in awnguh a hih manin, ama’ dinna sual nangawn zinling damhdamh bangin lingin, meikhu tezong kivial in biakinnpi sungah kidim  hi. Kamsangpa a dingin sihlang mah hi phial hi. Isaiah in, thupiang khempeuh Pasianin uk-hi ci in a theihna hongkhangta hi.

            Hih mangmuhna sungah Topa koiah omhiam? (Isa. 6:1).Hihbang langdona kidim lakah, banghangin Topa in Ama’ ommun Isaiah kiang lak tadihdih hiam? Paikhiatna 25:8; 40:34–38 enin.  

…………………………………………………………………………………

            Ezekiel, Daniel, leh John cihtengthum pen, gam hawlkhiata thuakna vuah mangmu uhhi Ez. 1; Daniel 7:9, 10; Mang. 4, 5.Isaiah mah bangin, leitung kisiat kawmkal ah, Pasianin nakhempeuh ukhi ci in thapiakna kisampha mahmah uhhi. (Daniel leh Ezekiel te pen milimbia te’n a gamuh suksiatsak in salmat uh a, John zong lunglen kha temna tuikulhneu khat tungah kumpi gilo khatin koih hi.) Tua bang hun haksat laitakin a mangmuhna uh in kipkho dingin thapia hihtuak hi.

            “Isaiah in Topa’ vangliatna a mangmuh kawm-kawmin, Pasian’ siangthona in amah tuamcip hi. Piangsakpa’ tehpih omlo picinna leh amahngiat a kipan, tanglai a teeltuam mite ahi Israel leh Judah te’ kihhuai mawhnate nakpi takin kikhailua mahmah hi” Ellen G. White, Prophets and Kings, p. 307.

            Ciangtan bei Pasian’ siangthona pen Isaiah’ mangmuhna thubulphuhpi leh a thupuak pipen ahi hi. Pasian siangtho a, a mite zong siangtho dingin sawl a hih manin; kisikkikna tawh gitlohna lamluite nusia in, upna leh muanna tawh Ama’kiang ki aappeuh le uh, A siangthona hong hawmsawn ding hi.

            Eite zong leitung omziate hangin i lungpeuh kiathei khamah ding hi. Isaiah mangmuhna tawh “Pasian’vangliatna” mu selo mah taleng, hih haksathun in Topa’n nang leh na-upna hong kipsak theihna lampite simkikkik in. Hih naphutkhak thute tungtawnin midangte tungah bangpeuh hopsawn ding nanei hiam?

Tuesday                                                                  January 5

PIANZIA THAK (Isa. 6:5–7)

            Pasian omna biakbuuk sungah a siangthote lakpan a siangtho pente peuhmah, siampilianpa bekmah in naihthei ding a, mawh sawpsiangni in meikhu daalna puandal tawh a kidaal kei leh, amah zong silailai ding hi (Siampi 16:2, 12, 13). Isaiah in, siampilian zong hi lo, paknamtui hal zong hi lo napi, Topa mukha hi!Biakinnpi meikhu tawh kidim (Isa. 6:4) cihpen, mawh sawpsiang nani a Pasian’vangliatna meeipi hong phawksak hi (Siampi 16:2). Patau mahmah in gimngahpa hi ing (Pai. 33:20 leh Thukhen 6:22, 23 te tawh tehkak) ci in, Isaiah in, mawh sawpsiangni a siampilianpa mahbangin (Siampi. 16:21)amah leh a mipihte mawhnate pulak (Isa. 6:5) hi. “Biakinnpi sunglamah, Pasian’vangtang a dimin mu in ding a, cingtaakna themzong a nei mahmahlo amah tungah, hih Pasian nasep ding teng ki aap peuhmah lehpen, hihzo vetlo ding a hih lamtak hong kiphawksansan hi.”—Ellen G. White, Prophets and Kings, p.308.

            Vanmi seraph in, Isaiah’  muk siansuahna dingin banghangin meihaltau tungpan mei-aam zang sese hiam? Isa 6:6, 7.

            Seraph in Kamsangpa’muk a lawnsakna tawh amawhna teng kipaikhia cihi (Isa. 6:7).A mawhna minlawh selo, kampaukhial zong a cih sese tuanlohna pen, muk in paukhial bek hi lo in, a pumpi buppi mahtawh a paukhia ahi hi. Lungsim sawpsiangna a ngahkhit ciang, Isaiah in Pasian maiah a siangtho pahtawina luithei ta hi.        

            Mei in zong, a sianglo peuhmah kangtum thei ahih manin siansuahna namkhat ahi hi (Gam. 31:23). Ahihhang seraph in, Pasian ngiatin a tawhkuangsa, siangtho meihaltau tungpan, a kuang tawntung siangtho mei-aam mah zang ngiat hi (Siampi 6:12). Tua bangin seraph in Isaiah siansuah hi. Abanzom tampi omlai hi. Biakbukah biakpiak ciangin, meihal tau tungpan mei-aam lakzel pen paknamtui halna’ng ahi hi.Siampi lai 16:12, 13 sung a, siampilianpa in meihaltau tungpan mei-aam la in paknamtui halding hi a cihtawh saikak in.Isaiah 6 sungah bel, seraph in tua mei-aamtawh paknamtui hallo a, Isaiah tungah zangzaw hi. Aman takin cileng Uzziah in paknamtui halsawm a, Isaiah bel paknamtui suakzaw hi! Mei siangtho in paknamtui kuangin Pasian’ innpi a kidimh bangin a siangtho thupuak kizeelsak dingin kamsangpa tawhkuang hi. Pasianin mipite kiangah Isaiah a sawllai in upmawh lohpi sawlbak hi hetlo hi cih Isa. 6:8 pan a zom simlecin tel niteh.

READ  ZSS Lesson 5: Kamsangte Kahna

            Isaiah in Pasian a mangmuhna a dawnkikna, ki-aapna tawh simin(Isa. 6:5). A “siangtho, siangtho, siangtho” Pasianin a bawlsa vannuai ah, mawhnei mite teeng cihpen, a buaina bulpi a hihlam namu hiam? (Isa. 6:3). Singlamteh tungah Khazih bekmah pen hih thubuai ventheihna banghangin hithei ding hiam? Hih thubuai a vensakna in singlamteh ah bangthu piang hiam?

Wednesday                                                           January 6

Kumpi Thupiakna (Isa. 6:8)

            “Kua sawlding a, eite a dingin kua pai ding ahihiam?” Topa cihna aw kaza hi.  Tua ciangin ke’n, “hih lai ah kei om ing, kei hong sawl in” ka ci hi. (Isa. 6:8).

            Siansuahna ngah Isaiah in, Pasian sawltak dingin a sapna pen manlang takin sangpah hi. Laisiangthothak hunbang hileh pen “Sawltak” kici phial ding hi.

            A lungluthuai thamtham khat, Isaiah laibu kipatna in, kamsang dangte, kamsang dingin a kisapna tangthu tetawh kibanglo sese hi (Jer. 1:4–10, Ezekiel 1–3)tetawh saikak in. Thukhat panin a lian 6na thupiangte masiah in amah kamsang dingin kisam khinzo hihtuakzaw hi. Laisiangtho sungah bel kamsang khat a sapkhit a nasep kipatkhit khawngciang Pasian tawh kitalsikna khawng omkikpan zawsop hi (Moses: Pai. 34; Elijah: 1Kumpi 19). Midangdangte enleng zong, Pasian in kamsang ding peuhmahpen, Isaiah 6na sungbang hileh, munkhat peuhah sawltuam thei zel hi. Isaiah 1 pan 5 sungah Isaiah a kisaphun lai a omzia teng pulak a, Pasian in biakinnpi sungah, amah hanthotna pia in tawsawn gawpin nasep kipansak a, mailam thupiang dingte tangko dingin genkhiattheihna thuneihna pia hi.

            Pasian in biakinnpi sungah Isaiah thapia hi. Laisiangtho mundangah Pasian biakinnpi pen hatthot thapiakna mun a hihna a omkha hiam? Late 73 (aneu 17enin), Heb. 4:14–16, Heb. 10:19–23, Mang. 5. Hih munte’n bang gen uhhiam?

…………………………………………………………………………

            Pasian’ biakinnpi pen vangliatna kilatna bekzong hisamlo; thanem mawhnei eite zongin khawlmun bukmun in i neithei hi. Khazih eite’ Siampi-lianpa tungtawn in zong hong hotkhiatna dingin nasem gige cihzong theitek i hih manin a kipzawsem ahi hi.                    

            John in zong Khazih pen, a kigolumsa a gawlah liammaa a nei biakpiakna tuuno in namu hi (Mang. 5:6). Muhnophuai lualo hi. A deihna bulpi in Khazih pen sihnapan kithokiksak a, vantungah kahto khinzo, Amahin tua Singlamteh hong puaksak cihna ahi hi. Ama kipiakkhiatna biaknatau tungah kilamto in mi khempeuh Ama’ lamah huupthei hi.

            Thungetna leh upna tawh vantung biakinnpi sung nalut ciangin bang thapiakna nangah hiam? Hebrews 4:16 sungah hangsan takin “a kisap hunin eite honghuh dingin hehpihna leh dikna thupha i ngahtheihna dingin” Pasian’tokhom naih dingin hongsam hi. Mikhatpeuh in a kisap hunin hehpihna leh dikna koici ngahtheih nahiam ci’n hong dongleh nakoici dawn ding hiam?

Thursday                                                             January 7

Lungkia takin Hongzol (Isa. 6:9–13)

            Pasianin Isaiah a sawlkiklai in, banghangin hihbang thupuak lamdang mahmah a mite tungah puaksak hiam? (Isa. 6:9, 10)

            Isaiah in a zakhial maw, a hihkeileh hih thupuak thupi keilua peuh i cikha ding hi. Zeisu in thugentehna tawh a thuhilhna sungah genphakik lai hi (Mate 13:13-15).

            Pasian in mi khat zong, kisiat ding deihlo hi(2 Pet. 3:9). Tua manin Judah te kiangah Isaiah sawl a, leitungah Zeisu sawl hi. Pasian lungulhna in suksiat ding hilo a, hotkhiat ding hizaw hi. Mi pawlkhatin hoihtakin a zuih uhhang, pawlkhatin a langdona uh kipsak semsem uhhi. Tua bang pipi mah Pasian in zolzol in a kisikkik theihna dinguh hun piapia mai hi. A langdo kawmkawmun hong khauh semsemlai uhhi. Tua bang hun ciangin Pasian zolna pen amau lungsim nemsak ding sangsik in lungkhauhna in nei zawsop uhhi. Pasian’ hong itna bel kikhel tuan hetlo a; Hong itna mimalkim in i dawnkikzia thupi hibek hi.

READ  Lesson 9: SATAN LEH A PAWLTE

            Makai hoih ahi, Moses, Isaiah, Jeremiah, Ezekiel leh Khazih mahmah in, thupuak anial thapai mite zol ngitnget uhhi. Pasianin Ezekiel kiangah: “Amaute in nangma’thu hong mang a hong mangkei zongin, amau sungah kamsangkhat a omkhit lamtak thei ding uhhi” (Eze. 2:5). Pasian leh a nasemte in mipite tungah deihteel theihna pia ding a, a kicing vauna zong a piak ding uh ahi hi (Ezek. 3:16–21 tawh enkak in),amau deihna bangin kisiatna leh saltanna peuh teelzaw khaphial ding uhhi (Isa. 6:11–13).

            Hihteng lungngai inla, Pasian in Pharoah’lungsim a khauhsakna nakoici tel hiam?

            Paikhiatna 4:21 ah, Pasianin “Keimah in ama’ lungsim kakhauhsak ding hi” cihi. Pharoah lungsim a khauhsak ding kuavei a genna lakpan a gen masakpenna ahi hi. Pharoah in zong a lungsim kuavei mah nakhauhsak hi (Paikhiatna 8:15, 32; Paikhiatna 9:34 en lecin).

            Pharoah in zong suakta takin teeltheihna nei veve hi keileh a lunsim khauhsak theilo ding hi. Pasian in Pharoah lungsim khauhsak cihna munah, Pasian piak limte nial ding Pharoah in teel zaw a hihmanin, ama teelna bangin Pasianin makaih cihna ahi hi. Pharoah in tua limte sangthei hi leh, a lungsim nemzaw ding a, tua limte hangin khauhsaklo ding hi.

            Topa tawh naki sukkhakna munah, Khasiangtho tungah nalungsim nakhauhsak ngei hiam? Bangin tuabang hong suaksak hiam ngaihsun in. 1 Cor. 10:13 simin.

Friday                                                                                January 8

Simbeh Ding: ”Thumanlo gamtatna in mi namkim sungah kizeelpha mahmah a hih manin, Pasian tungah a thuman nuam mite a dingin a lungkiathuai mahmah hun tam mahmah hi. Israel a dingin Pasian deihna pen lelhna leh a lehdothei gam a dingin Sodom leh Gomorrah bangin kamsiatna thuak ding bangtawh kibang liang hi.”

            “Tuabang dinmun i tunleh zong a lamdanglua hi tuanlo hi. Uzziah sihding kumin, Pasianin Judah thuhilh ding leh taai dingin Isaiah a sapciangin, amah a lungsimneu mahmah in kingaplo hi. A lungkhauh mite tawh kitalsik ding cih theikhinzo hi. Ama’kicinlohna leh a mipihte lungsim khauhna uplohna teng a ngaihsut ciangin, ama adingin lam-et omsamello hi.Tua a hihciangin a nasep nusia in Judah mite milim biakna buaisak selo in nusiacip lel ding hiam? Nineveh mite pasian in vantung Pasian simmawhna tawh leitung uksak lel ding hiam?”—EGWhite, Prophets and Kings, pp. 306, 307.

Kikupding Dotnate:

1.     Pasian um mello khatpeuh in, “Na Pasian in hong kemmah hi cih hong lakin” hong cileh, Pasian hong kepna koici lak ding nahiam?

2.     Pasianin hongkem a hih leh, mawhneilote thuakna banghanghiam? Isaiah 1:19, 20 in Pasian um mite tungbekah a hoih piangin; a lehdothei tetungah a sia piang cihna hiding hiam?  Job 1, 2; Late 37; Late 73 cihte simkak in. Pasian nasepzia i teldaan leh mite tungah a piang thusiate koibangin khuikhawm theiding i hihiam? Kisam naci hiam?

3.     Isaiah 6 in, bang hangin mawh sawpsiangni tawh a kizopna tamthei hiam? Hih kumsikin mawh siansuahni in Pasian in a dik a thumante’ mawhna sawpsiangsak tawntung a (Siampi 16:30), a khialhnate uh paihkhiatsak lai hi  (Siampi 23:29, 30). 

THUKHUPNA: Lungmuan omloh laitak, ki makaihna a thanem mahmah laitak in, Isaiah tungah mangmuhna lianmahmah vannuai ukpipa Sangpenpa kimusak hi. Kicinlohmanin dipkua mahleh hehpihna in amah siansuah a hihmanin, galbek a sawm leitungah a kuankhia dingin Isaiah kiging sitset hi.

Tags: ,

Admin

Admin

One thought on “Makaihna Ah Haksat Hun

Comments are closed.

Top