Lesson 9: Mansuah Hunte

Lesson 9                                                          May 25 – 31

Mansuah Hunte


 

Sabbath Nitaaklam                                               May 25

Tukaal sung sim ding:  Mark 5:22-24;  35-43;  1 Peter 5:6,7;  Gen.  37:17-28;   Luke 16:13; Rom. 6:16; 1 Cor.15:26.

Kamngah:  “Hihbang nate bek hilo in, ka Topa Zeisu Khazih ka theihna manpha zaw lua sa, ka hih manin, na dang khempeuh ka sum ngamzaw lai hi. Khazih hangin na khempeuh ka nusia khin a, Khazih tawh ka ki pawl theihna dingin, na dang khempeuh ninneng bangin ka ngaihsun lel hi”.  Philipians  3 : 8.

            Adam leh Eve in sia leh pha theihna singgah a neekhun lianin, mansuahna masa pen, sianthona a mansuah uh hi.  Tua sianthona pen, huaihamna, ki lemlohna, kimawhsakna leh liatnopna kituhna te in laihpah hi.

            A sawtlo in, nuntakna mansuahna hong tuak uh a, amau guaktang omna pen ganvun tawh kiseel sak hi.  Nuntakna singkung pan kihawlkhia kei leh, nuntakna singgah ne kik in, mawhnei pipi nungta tawntung ding hi. A hoih mahmah huan mansuah uh, a it mahmah tapa Abel zong a sanggampa Cain hangin mansuah leuleu uh hi.  A tawpna ah amau gel, khat si masa a ki mansuah, a nunung pen amah zong ki mansuah hi.   Khatvei khentatna khat in, a kizom diudeu in na tampi mansuah sak hi.

            Eite khempeuh in zong ki mansuahna a natzia tel thei a, innkuansung phadiak hong tun teh na kisa mahmah tek hi.  Innkuansung ah ki itna lian semsem leh, i ki mansuah ciangin zong na kisa semsem hi.

            *Tukaal sungtengin innkuan nuntakdante i sin ding a, kimansuahna tuamtuamte zong i mu ding uh hi.

 

SUNDAY                                                               May 26     

Cidamna Mansuah

            Nuntakna singkung tawh kum tul tampi i ki gamla khinzo hi:  Eima pumpi hong thanem ciangin i telzaw semlai hi. Khangno lai khawng sihsia in i sih kei nak leh, khangham ciangin cidamna hong thanem tektek hi.  Cidam lohna pen ei mah i hi lian kei phial zongin, innkuanpih khat hong thanem ciangin i lungkham hi. Nu/Pa te in,  i tate a cinat ciangin, naupang nat taangin eimah ki na nuamzaw hi mah taleh; tua zong ei teeltawm theih hi tuanlo hi.

            A nuai a tengin bangthu kibang neikim hiam?  Mark  5:22-24, 35 – 43; Matt. 15:22 – 28;  Luke 4:38, 39;   John  4:46-54.

………………………………………………………………………………………………………

            A vekpi mah in, innkuan pihkhat haksatna thuak laitak, Zeisu kiangah huhna a ngetna a hihi.  A puk leitung a om i hihteh, i thuak ding mah hi ci ni. Leitungah mawhna hong lut ciangin, natsau, ciluang nat, kilawh natna cihte i thuak a;  patauhna, lungkiatna te i thuak ciangin,  “ka Pasian, ka P asian aw, banghangin kei hong nusia na hiam?  Banghang kei kiangpan gamla na hiam? Ka thumna te hong za in la, kei hong gum in”  (Ps. 22:1) ci in i kiko kha ding hi. David mah bangin, Pasian tungah dotna te, hehna te leh natna te i ko dinguh hi.

            Natna leh thuakna te in i sih dong mah a om tawntung ding a, Zeisu hong paisuk kik ni teh, beipan ding hi. Lai Siangtho sungpan thu manpha tampi i zong zaw dinguh hi. Job zongin, gen zawhloh thuakna a neihna tungtawnin, a thukzaw Pasian tawh kizopna hong neihlawh zaw hi. “Nidangin mi gensawn bekin nang ka hong thei a,  tu in keima mit mahmah tawh nang ka hong mu ta hi” (Job 42:5) na ci hi. Paul in natsau nanei a, tua bang natna in midangte hehnep siamna pia zaw in, tuabang a thuakte hehpih theihna hong neisak bek thamlo in, midangte i hanthotna ding hong muibun sakzaw ding hi (2 Cor. 1:3-5).

See also  Ama' Na Sepkhopna ah Lungnopna

            Eimah aih kei leh innkuanpih khat in natna a thuak ciangin, bang kamciam i nei hiam?  Tuabang hun laitakin, singlamteh tungah i Topa thuakna te in bangzah thupi hiam?  Innkuan natna satna tampi takte kawmkal ah, Zeisu in singlamteh tungpan in,  a beingeilo Pasian’ itna hong koici lak hiam?

MONDAY                                                              May 27

Muanna Mansuah

            Eite khempeuh mimawh i hihi.  I pumpi cidamlohna hangin i muanhuaina te i mansuah thei hi.  Kua in a muanhuaina mansuah ngeilo om hiam?  Tua bang i mansuah teh na i sa mahmah a, eimah’n mi muanhuaina i pelhsak khawng, innkuanpih khat in a pelhsak ciang a sia mahmah a hihi.

            Khat veivei ciangin, i mansuah sa te taisan lel in, ki puahphat kikloh lel khawng baihzaw phial hi.  Innkuanpih khat peuh, i zi i pasal khat hi mawk leh bang baih tuanlo hi.  Kitenna pen, a kisia sa muanhuai na te puahphat kik theih na’ng lampi hong hilh zong kici thei hi.

            Kipawlna khatpeuhah muanhuaina a genbang ciangin, tua kipawlna leh muan huaina i koici puahphatkik ding hiam?  1 Peter 5:6, 7; 1 John 4:18;  James 5:16; Matt.  6:14,15.

………………………………………………………………………………………………………

            Muanhuaina puahphat kik ding pen, khualzin lampi tawh kibang a, cialkhat ta in pat kul hi.  Khualzin lampi pen, natna pulak dingleh thumaan pulak ding, mawhna bang hi a, kua mawh hiam cih khawng pulak kul hi.  Zualzan na in nupa kikaal thu manlohna piangsak a hih leh, puahphat ding pen,  a mawh zawzaw in pan ding hi. A mawh zawzaw in, kicing takleh, seelsim omlo takin a mawhna pulak masa ding hi. Siit nei theilo ding a, siit a neih a hong kidawk leh, ki puahphat kikna a susia a hihi. A nihveina palsatna in, a masa palsatna bawlphat sangin haksa zaw kaanlai hi.

            Kipuahphat na in, hun tampi la a, thuakzawh kul hi. Kisiatna a liat semsem leh, bawlphat hun tam la semsem hi.  Khat veivei teh, mailam kalnih suan, nunglam kalthum leh suan cihzong phawk zel ding kisam hi. Khatvei ciang lah, zingciang lametna om a, thai ciang taikhiat bang hi cih zong phawk in. Mi tampi takte’n a kisiatsak sa kizopna te a thukzaw, a kinai zaw, a lungkimhuai zaw leh a nuamzaw kitenna in puahpha thei uh hi.

            A kisiasa kitenna puahphatna pen a dang kisiatna puahphat na’ng in a kizang thei diam?  Tua hun laitak mahin, maisakna om mah napi, ki muankikna om kei leh, bang a ci diam?

TUESDAY                                                             May 28

Muanna Mansuah, a zom

            Muanna mansuah theihna thu dangkhat in, innkuan sung kisiatna pan a hihi. Lam-et lohpi in, innkuan zong kisiatna lianpen khat hong suak hi. Innkuan kisiatna in, Khristian innkuan pan kipan innkuan tampi sukha hi.  Kisiatna cihteh, kampau, khutngak, gamtat, anglam leh kidon lohna cihte khawng innkuan sungah a omna cih nopna a hihi.

            Lai Siangtho in, innkuan kisiatna, Pasian’ mite lak nangawn a piangte, tampi ciamteh hi.  Tuate na sim teh bang na ngaihsun hiam?  Hihte banghangin Lai Siangtho sungah kiciamteh hi ding hiam?

Gen. 37: 17-28 …………………………………………………………………………………………………………………….

2 Samuel 13:1-22  …………………………………………………………………………………………………………………….

2 Kings  16:3, 17:17,  21: 6

…………………………………………………………………………………………………………………….

            Ki zawhthawhna cih pen, ki tungnun tuhna ahi hi.  Zu dawnna hang hilo, lunggimna hang hilo, angvai zong hilo, lungduai kisapna hang zong hilo, a thuakte thanemna hangzong hilo hi. A thuakte mawhna bangmah omlo hi. Mi simmawh te pen, itna neilo hi “itna in siatna bawllo hi” (Rom. 13:10). Tua bang gitlohna neite a dam kik na’ng baihlo hi. Amah’n a damnop leh bek mah ki huh thei hi. Pasian mai ah ki ap in kisik peuh leh bel, Pasian in amau huh thei a, kikhelsak in, midangte itna neikik sak thei hi (Eph.  3:20).

See also  Sinna 11: BIAKPIAKNA AH KIPUMKHATNA

            Patauh launa thuak khat i dinmun ah nangmah kikoih dihin. Bang cidan hehnepna, lametna leh, saanna cihte na za nuam hiam?  Sumpi khawng ki hanthot sangin, lauhuaina te pan kidaalsak zaw in, khat leh khat kisaang zaw leng thupi zaw lo hiam?

WEDNESDAY                                                               May  29

Suahtakna Mansuah

            Mi, sim zawhloh te’n zawngsatna tuamtuam nei tek uhhi. Mipil te’n zong a hang thu bangmah theizo tuanlo uh a, i khuaksung ah, lunggulh theihna munsan bel mu saam uhhi. Tua lunggulh theihna munte theihna sangin, zawngsatna pan suahtak ding thupi zaw hi.  A zawngsangte bek hilo kiimlehpam zongin buaisak zo tham hi. Suahtak zawhloh ding zawngsatna khat a om teh, Nu/Pa, tate leh innkuan bup mah in ki thuak hi.

            Zu, za, laungkasa, ninnoi lim, angvai leh anneek te nangawn zawngsatna tawh kizang theigai hi. Hong nasak cih thei gige napi, na paai theikei hi.  Suakta tak a teel sa hi napi, a sila kisuak a, suahtakna ki mansuah zaw hi. Peter in  “Amau te in, siatna a piangsak thei zawngsatna lel in sila hi napi un mite tungah suahtakna thu a gen uh hi. Banghang hiam cih leh, mite pen, hong zo peuhpeuh i sila i hihi”  (2Peter  2 : 19).

            Zawngsatna ah hong makaih thei bangteng om hiam?  Luke 16 : 13;  Rom. 6 : 16;  James  1 : 13, 15;   1John  2 : 16.

………………………………………………………………………………………………………

            Mawhna leh zongsatna pen kibang lian lo hi. Na zawngsat hetloh khat tawh zong mawhna na bawl thei a, tua pan zongsatna suak thei hi. Zongsatna a suakma in, Pasian vangliatna tawh, khawl thei leng hoihzaw thamlo ding hiam? Tua mawhna leh zongsatna te pan suahtakna ding pen, lungsim thak kisam hi.  Paul in “Zeisu Khazih a zui mite in, a leitung lungsim paizia uh leh a leitung lungsim deihna khem peuh uh a phiat khitsa a hi uh hi” (Gal.  5:24) ci hi. Paul mahin Rome te tungah tua mawhna te leh zawngsatna pan si a, Khazih ading nungta (Rom. 6:8-13), a kizom in, “Kidalna dingin, Topa Zeisu Khazih hong piak galhiamte zang unla, na pumpi uh deihna bangin gamtat na ding hun omsak kei un”(Rom. 13:14) ci hi.

            Innkuan sungah, zongsatna haksatna a thei khalo khatpeuh  a om hiam? Kha lam puukna hipah nailo a, Christian te a ding huhna omthei lai cih na koici hilh thei diam?

THURSDAY                                                         May  30

Nuntakna Mansuah

            Mihing i hihna tawh sihna thu i tel mahmah hi.  I simkha, i mukha a, ei innkuan sungah zong hong tung thei hi.

            1 Cor.  15 : 26 simin. Sihna koici’n  ki gen a,  banghang hi ding hiam?

…………………………………………………………………………………………………………………….

            It leh ngaih khat in hong sihsan hang, sihna gal in bangzah a lian cih eima pumpi tungah i thei tuankei hi.  Topa sung a si mite  “hoih”  i ci lel hi. Mitsi pak in tawlkhat sung ihmu in, si kik nawnlo dingin hong thokik ding hi.  “Thu um mi, Khristian te a dingin,  tawlkhat sung ihmutna, khuamial sungah gamdaihna hi lel hi. Nuntakna aih leh bel Khazih hangin, Pasian khutsungah om khinkhian a,  ‘Khazih eite nuntakna,  in hong paisuk kik ciangin, Amah tawh vangliatna sungah i kilangh ding uh hi”, EGWhite, The Desire of Ages,  lai  787.

See also  Nasemte Kipawlna

            Dahdaan te zong kibang kimlo a, a cialcial in omhi. A masa in, si ding cih theih teh patau leh nial phot hi. Patau cih bel,  a thu hong omvat ciang a ki patau hi a, kha nih kha thum bang hi thei hi.  It leh ngaih khat na phawkna in zong kha guk kum khat bang sawt thei lai hi.

            Ki sihsuahna tawh lungkiatna in hun saupi la hi.  Tua hunsung in, hehna, mawh kisakna, kisikna, dahna leh khalau nacihte kithuak hi.  Tuabang a dahna te in i mansuahsa te hong mangngilh sak zolo hi. A nunung pen cial ah, ki puahphat hun hi a, nisim nasep te lam kipan kik in sep ngei in sem kik ding hi.

            A nuai a te lakpan hehnepna tha hong pia bangpeuh a om hiam?  Rom. 8:31-39;   Rev. 21:4; 1 Cor. 15:52-57.

 

FRIDAY                                                                May  31

Ngaihsut Beh Ding:

Zongsatna tawh a thuaklawh mi tampi tak om uh hi.  A lunggulhna te i sila suak uh a, a sum, a nasep, a cidamna leh a suahtakna te uh mansuah uh hi. Zeisu in tua mawhnate leh i zongsatna te khempeuh panin hong suakta sak ding a hong pai hi. “Tapa in hong suakta sak leh, na suakta takpi ding uh hi” (John 8 : 36).  Zeisu’n ei te tawh omkhawm tawntung ding cih kamciam hong pia hi (Matt. 28:20,  Isa. 43:2); Galdo lel bekding i hi kei a, galdona in Topa aa hi zaw (1Samuel  17:47), galzawhna zong hong kamciamlai (1Peter 1:3-9) hi. Tuni mahmah in, zongsatna te tungah Pasian deihna bangin gualzawhna lampi tung i tawnthei hi. Galdo kipeek kullo cihna hilo, lelhpah ding cihna zong hipahlo hi. A lungdamhuai thu khat ah, Topa tungah na ki ap masiah, Topa’n zong hong kipia lo ding hi.  Topa’n na cidam na’ng zato siamte a zat theih mahbangin, zongsatna te pan in mipil misiamte zangin hong suakta sak thei veve hi.

            “Haksatna te leh zia-etna te’n hong kimkot ciangin, Pasian i zuan ding a, eite hong gumzo dingin, Amah thahat hi. Thungetna pen i tavuanpi himah taleh;  phatna zong i mangngilh ding hi samlo hi. Thuphate khempeuh hongpiapa phat kiklo ding i hi hiam? Ama tungah i lungdam mahmah ding hi. Pasian hong thuphapiak te i sim kikkik ding a, haksatna tampi te kawmkaal ah a min siangtho i phat ding hi”  EGWhite, Selected Messages, book 2, p. 268.

Kikup ding Dotna te.

  1. Mawh maisakna in muanhuaina a mansuah laitak in, bang hong huh thei hiam? Matt.  6:12-15; 18; 21,22; “Itna in, midangte’ mawhna te ciamteh in kemcing lianglo hi.”  (1 Cor.  13 : 5).
  1. Dahna leh thuaksiatna lampi tungah, Pasian’ hong hehpihna te sim kikkik na in, bang phat tuamna hong pia hiam?
  1. Mansuahna khat peuhpeuh a nei na pawlpi mi khat peuh na koici huh thei ding hiam?
Tags: ,

Admin

Admin

Top