11. MARXIST pan ADVENTIST ah
BRAZIL | June 15
Maria Palmeira, 70

Maria kum 12 a phak in Brazil ah tui kiphum hi. khangno hamgual a phak ciangin pawlpi nusia-a, kum 38 a phak in Marxism kici, Karl Marx upna lam ah hong khauh pai mahmah hi. “Ka nuntakna buppi khazih mun ah Marx upna hong kidim hi,” Maria in ci hi. Adventist nuhoih khat i kepna sungpan in a khang khia ahih manin Maria in Sabbath School khawngah kum sawmnih a phak ma ciangciang lesson hilh in makai semden hi. Ahi zongin kum 22 aphak ciangin pawlpi mi thunei pian simsim khat in lungnuamlo sak ahih manin biakinn zuan nuam nawnlo hi. Tua-a kipan in Maria in Germany mipil Karl Marx upna lamah hong thuk lut ta hi. Tua zawh kum 25 hong sawt to ta-a, Maria in pasal nei in, ta pa khat a neih khit teh meigong in om to hi.
Canada gam Montreal ah Doctorate sin dingin kituah hi. Tua lai-ah lamet loh pi-in a lawm lui Brazil Pastor Luis Santana leh azi US ah mopawi siim, hong baang bilbel in a lensuak madeuh uh ni 8 sung Maria om na khua ah va taam uh hi. Tua Pastor pa te leh Maria pen biakinn khat ah a kikhawm khawm ngei ahi uh hi. Ni sim in Maria kiangah a nupa un va hawh den uh hi. Lai Siangtho kuppih in Jesu in a itnaa thute kuppihpih uh hi. Khazih kiangah ciahkik dingin sam uh hi.
Maria in hoihtak in ngai sam napi liing zo vet vet lo hi.
Tua zawh kum nih khit ciangin Brazil ah University sangsia dingin hong ciahkik hi. Pastor Luis zi-in Lai Siangtho sinpih dingin kum thum sung sitset va zawn den hi. Maria in ahih leh paulap zong den in pai ngei mahmah lo hi. Ni khat Maria in laihilh dingin a kipat laitak in tua ahilh ding lai pen Marx in 1844 kum in a gelh ahih lam hong phawk thak vat hi. Adventist kalsuan kipat kum pen 1844 kum ahih lam a nu in gen ngei ahih manin a lungsim sungah, ‘dawimangpa in Adventist te kalsuanna a nawngkai sak dingin Marxism a piang ahi mai diam’ cih khat a lungsim sungah hong om vat hi. Tua ahih manin Marxism le Adventism hong saaikaak ta hi. Marx hilhna ah ‘mihingte in amau’ power tawh leitung khel zo ding’ ci-in hilh a, Adventist te in ahih leh ‘kikhelna a piangsak ding in Khazih kisam’ ci hi.
Tua zawh asawt lo-in, Maria in a sangnaupang buaih la ding te kiangah, “Tu-in ahih leh Khazih pen tawlanzi makai pipa taktak hi, ci-in um ing ei, Pasian tapa hi vet lo hi” ci-in pulaak khia hi. Tua nitak Maria ihmu thei lo hi. A zing ciangin a sangnaupang numei Dinalva ki ci nu in khitui luangkawm in agei hong nai-a, “Khazih in Pasian’ tapa hi lo hi, na ci hi. Nitak thapai ka ihmu thei kei hi. Pasian in hih thu kong gen dingin deih hi ci in ka ngaihsun hi. Tua na thugen pen na lungtang tawng panin hongpai khia hi lo in Marxist khat na hihna tawh na gen khiat mawkmawk ahi hi” acih leh Maria in dawngkik theilo hi. Nipikaal nih khit ciangin Maria in ansai khat ah sun-an a nek laitak in la kisa khat Sunday biakinn khat pan in a galzak hi. “Lamdang Jesu Hehpihna” cih la hi. Kum 19 a phak kiim khawngin tua la pen Adventist biakinn ah asaksak ngei khat ahi hi. Thakhat in Maria tua biakinn sung tutna nunggual penpen ah tua la ngai dingin hong tumvat hi. Tawmveikhit ciangin Dinalva tua biakinn sungah hong lut in Maria tutna ah tangtak in hong pai hi. A professor nu pomphei a, kapkawm in, “Hih lai-ah hong mu dingin ka ki-upmawh mah hi. Ka ta nawi ka piak laitak in hih mun ah paiding bekbek ka lungsim sungah hong om veva hi” ci hi. Tua thu a zak ciangin Maria hong kilatvat hi. Dinalva pen tua kiim nai ah a teng hi het lo hi. Tua ban ah Maria in zong University Campus panin a gamla simsim khat ah an a ne ahi hi. Tua la kisa aman khit ciangin tua numeite gel zong kikhen uh hi. Tua thu in Maria lungsim omkhong sak theilo hi.
Tua a kipan in Pastor Luis zi’ sapna ah zui-in Lai Siangtho hong sin khawm uh hi. Maria in Pastor Luis leh a zi tawh Lai Siangtho kum 10 sungbang hong sin khawm uh hi. Hi mah taleh Lai Siangtho pen Pasian’ kammal taktak dingin sang zo mahmah lo hi. Atawpna ah pastor pa’ zi in, “Pasian’ kiangah upna nanget ding kisam sa ingh. Na upna na mansuah khinta hi. Kei man thu hong ngetsak ning” ci hi.
Sianu in thu angetsak ciangin Maria lungsim sungah Lai Siangtho a inn ah simnopna lungsim hong khang hi. Tua bangin khanih sung Lai Siangtho hong sin to lai-a, tua khit ciangin tui hong kiphum kik hi. Ahizongin buaina khat hong nei hi. Biakinn ah pai nuam tuan lo hi. “Bangdia inn ah kikhawm lel lo i hiam?” ci-in Pastor luis dongh hi. Anih un thungetna mun khat vaihawm ding hong kikum uh hi. Lai Siangtho deih in um mahmah napi biakinn a pai nuamlo te kikhopna ding ahi hi. Tua bang dan (house-church) inn-biakinn khat a geel dingin siapa in Maria tavuan pia hi. Pawlpi makai te-in tua ngetna enkik uh a, tua a kipan in “Sharing Jesus House Church” ki ci biakinn hong kipan khia ahi hi. ‘Jesu hawmsawn pawlpi’ kipat cil 2004 kum in pawlpi mi 13 pha uh hi. Tu in mi 200 val bang tuiphum khin ta uh hi. “Hih mun pan in mite in ‘Adventist pawlpi koici-it ding’ cih sin thei uh hi. Amaute hong kikhel in a ki tuiphum khit uh ciangin Salvador kiim teng a, Adventist pawlpi te-ah khazel in tua bangin mi ka behlap uh hi,” ci-in kum 70 a pha ta, makai huh ahi Maria in gen hi.
Tu kuata sabat 13 na mission sumpi khenkhat tawh ko pawlpi’ biakinn lam nading hong kihuh ding hi. Mission sumpi nong piak man un lungdam mahmah hi.

By Andrew McChesney