ZSS 7: Mawh Maisakpa Pasian

Myanmar Sabbath School Lesson pdf

Lesson 7:                                 November 9 – 15

 

Mawh Maisakpa Pasian

 

Sabbath Nitaklam                                 November 9

 

Tukaalsung simding: Nehemiah 9: 1-3; Daniel 9: 4-19; Neh. 9: 4-8; Col. 1: 16, 17; Neh. 9: 9-38; Rom.  5: 6-8.

Kamngah:A khialhna a im mite adau pailo ding a, amawhna pulak in akikhel mite in hehpihna ngah ding uhhi.”  (Paunak 28:13).

          Bukpawi (Sukkot) khit ciangin, makai te’n mipite kaikhawm leuleu hi.Pawi kham khinzo lian a; Pasian kiangah kisikna tawh ciahkik ding hi ta uhhi. Amasa lam in, khialhna mawhnate hangin dahlo kaplo ding ci in makaite in hanthawn uh a, dah leh kap in kisik kullo cihna hi tuanlo hi. Pawi teng a venkhit teh, Pasian kiang ki aap hun hita hi.

         Hih tengah pawi kizom deudau teng in, mawh pulakna pen lungdamna pawi tawh zom tawntung ding cih zong hi tuanlo hi. Mawhna teng amaikhit teh lungdam pawi kizomsak zel hipeuh hi. Pasian sungah lungdamna in masa den ding hi. Paul in, Rom. 2: 4 sungah “Pasian’ migitna” in kisikkikna hongpia cihi. A “migitna” in phatna, lungdamna piangsak hi.

 

Sunday                                            November 10

Antang in Biakna Pia

           Nehemiah 9:1-3 simin. Mipite in, banghangin, minamdangte tawh kihello in omuhhiam?

……………………………………………………………………………………………………………………………………………………………………

           Nehemiah in, mipite gualnuamsak nuam mahmah hi napi, antang dingin makaih masa hi. Pasian mai ah ki niamkhiatna tawh, alu tungvuah leivuite lawnto uh a, puansiate silh uhhi. Mi namdangtein, Israelte mawhna vaite sungah kihello uh ahih manun, amau tawh kikhenkhia in omuhhi. Amau Hebrewte mawhna hangin a minam in saltangliang ahih manin, amau mawhna mah a ki maisak ding kul hi.

          Amau mawhna pulak in a thungetnate in, a mawhnate telcian mahmah ahih lam honglak hi. Apu/pate in, mawhna bawluh a, tute tate saltangsak ci in hehmahmah thei ding uhhi. Khang masa makaite in, Pasian theilo uh a, khentatna maanlote hang in, tu in, amaute in, migam milei pan a ciahkik pawltawmno khatbek in om cih mu tel uhhi. Hehna, phunnawina sangin, ki niamkhiatna leh mawhna pulakna tawh Pasian kiang zuanzaw uhhi.

          Nehemiah 9:3 sim lecin, nai thum sung Pasian thukham laibu a simkhit uh teh, nai thum sung mah, Pasian tungah zahtakna pulak uhhi cihi. Torah laibu a thumvei simna ahi uhhi.  Torah laibu a simna uh pen, Pasian’ thumaan bulphuh in, mawhna pulakna bawlna ahi hi. Eite’n zong Lai Siangtho i sim ciangin, Pasian hong nai a, Kha Siangtho in hong hopih in hong thuhilh hi. Ama thumaan in, eite lungsim hong lawngin, hong thahatsak in hong lamto hi. Van leh lei a bawlpa Pasian in, kilawmna a neilo eite tawh omkhop ding teel in, Ama hoihna migitna hong musak ahih manin, Israel te’n zong dahna kahna tawh hunte zangkhawm uhhi.

          Eite’n zong, Pasian tawhlo peuhmah, khalam pute pate tawh iki lamdang het kei ding hi. Pasian in, eisung ah na hong sepleh bekmah, mi i suak ding hi.

READ  HSS 2: NEHEMAIA

          Daniel 9: 4-19 simin. Daniel thungetna in, tu hun eite ading ahi thei diam? Ahi thei ding ahih leh zong a mimal in maw, aih kei leh pawlpi in maw?

 

Monday                                           November 11    

A  Thunget Kipatna

           Tua Lai Siangtho kisim mipite’n a dawnkikna in, amau’ uplahna tangthu leh Pasian migitna a saikaak thungetna saupikhat ahi hi. Lai Siangtho mundang tawh a kibatpih nei ahih manin, thungetna cihding sangin, thuhilhna sermon cihhuai zaw phial hi.

          Nehemiah 9: 4-8 simin. Hih munte ah thungetna in bang bulphuh hiam? Banghang hiam?

……………………………………………………………………………………………………………………………………………………………………..

          A thungetna uh kipatna ah, Pasian’ Min thupha pia uhhi. Hebrew ngeina ah, min limlim mikhat sapna mawkmawk hi beklo in, a thupitna tawh samngiat hi. Pasian’ min a phatna vuah, vannuai leitung abawlpa, biaktakcing, phat takcingpa ci uhhi. A thungetna uh zong, na khempeuh piangsakin, “kemcingpa” (Neh. 9:6 leh Col 1:16,17) ci in pan uhhi. Tua munsanpen Hebrew pau in “nungtasak” cihi.

          Na khempeuh a bawlpapen, mimah ahi lel Abraham, “lungsim thutangpa” cih tungsiah bangmah ahi tuanlopa a samkhiapa ahi hi.Abraham zong muntampi mahah upna neupa hilel napi, a tapa a kinget ciangin hazalo hi (Gen. 22).  Zankhat peuh thumaan bekhilo in, Pasian tawh a tonkhop sung tawntung thumaan hi. Hebrewte muhdaan ah “lungsim” in ngaihsutna ahi hi.Abraham in angaihsutna tungtawn in, Pasian tungah thumaan cihna ahi hi.

          A thungetna kipatna lamah, Pasian pen 1. Piangsak-pa 2. Kemcingpa leh 3. Kamciam Khopa ci in pan uhhi. Mipite’n Pasian pen kua hiam cih ngaihsun masa uh a: amaute a piangsakpa, a kemcingpa leh a kamciamnate a tangtun tawntungpa cih phawk uhhi. Amah eite kiangpan gamlapi pek aom himah leh, lungsim sungah amah i neihna in, haksatna lianpipite phutkhak ciangin amah muanna hong piangsak hi.

          Piangsakpa Pasian cihpen banghangin eite adingin upna laigil hithei limlim hiam? Hih thutawh a kilual thei, Pasian in eite hongpiak hun – sehsagih suah sehkhat tawh i phawk theih nading khawngtawh a kilual gawp thei thudangkhat bang ahi hiam?

 

Tuesday                                          November 12

A Beisa Thute pan Pilna

           Nehemiah 9:9-22 simin. Hih mun leh thunget kipatna lam koici kilamdang hiam?

………………………………………………………………………………………………………………………………………………………………..

          A thungetna uh pen, Pasian thumaanna a phatna uh panin, amau Egypt gam leh sehnel lakah a thumaan-lohna lamah paitoto hi. Pasian in amaute apiak thupha tuamtuamte leh, “apu/apa” te in tua silpiakte kiphatsakna, lungsim khauhna leh apia Pasian awlmawhlohna in zang uh ahihna pulak uhhi.

          Mihingte’ gitnatlohnaleh ki aapzawhlohna pulakna in, mawh pulakna leh kisikkikna kalsuankhat ahi hi. Mawhna pulakna in hong gum zolo a; Zeisu’ kipiak khiatna bekmah in hong gum hi. Mawhna pulak khit ciangin kisikkikna in zui a, Zeisu bekmah in hong siansuah thei hi. “Kisikkikna le upna tawh, Khazih Honpa in sangleng, mawhna hong maisak in, thukham palsatna daan pan hong khahkhia hi. Mawhneipa in Pa Pasian, Tapa Zeisu leh Kha Siangtho tungtawnin, Pasian maiah misiangtho in hong ding a; vantungin maipha pia hi” EGWhite, 3 Selected Messages, laimai 191.

READ  Lesson 4: Kipumkhat Nading Tawhtang

          Ama migitna in, mawhna hong kisiksak in hong nusiasak hi. Israelte lungsim khauh uh hi napi, Pasian in it veve hi. Abeisa hunsung amau ading abawlsaksa khem peuh enleng, Amah’n zomsuak lel dingcih theihsa ahi hi. Tua ahih manin a mau tang thu sungah Pasian’ huhna teng khempeuh phawkkik kul hi. Amangngilh nini gimna a thuak pahpah uhhi.

          Pasian in nasungah na hongsem takpi cih phawkin la, haksatna na thuakkik ciangin bang lungnopna hong ngahsak tuam hiam? Mailamthu ding patau khalau in naom laitak in, Pasian’ migitna leh a hoihna na koici phawktheih hiam?

 

Wednesday                                     November 13

Thukham leh Kamsangte

         Neh. 9: 23-31 simin. “Pasian’ hoihna” tawh tehkaak dingin, Israel mite koici bangin omuh hiam?

…………………………………………………………………………………………………………………………………………………………………….

          Hih thunget/sermonna ah, Canaan gam aluahcil lai vua anuntak daante kihel hi. Leitang, khuapi, lenggahhuan leh leilette zattheihpah lianlian in ngah uhhi.” Tuate ne in gilvah in thau” uh hi (Neh.9:25). Lai Siangtho sungah thau cih limlim tawm gen mahmah hi (Deut. 32: 15 le Jer. 5: 28) cihte sim leng a hoihllo lam vive hizaw uhhi.

          Mipite in, “Pasian’ hoihna” hang a, nuamsa mahmah ding sangsik in, amau neihsa lamhsa hangun nuamsazaw uhhi.Neih leh lamhte in, Pasian kiang hong tunlo hi. “Hih nei peuhmah leng, nuamsa ning” cih khawng ngaihsunden hihang. Pasianin Israelte neihleh lamh guan mah taleh, Pasian kiang ki aapzolo zaw uhhi. Thupha hong piapa mangngilh in, athuphate bulphuhzaw den uhhi. Tua in khemna lianpi hi. Thupha nopsakpih loding cih hi tuanlo a, a thuphate tungtawnin, Pasian tawh kiptak in kizopna neihding hong deihsak hi. Tua bang ahih keileh thaangsuak hi.

          Nehemiah laibu sungah, makaite in, Pasian tungah amawhnate uh pulak uhhi. 1. Pasian’ thukhamnate nuaisiah in, 2. A Kamsangte bawlsia uh cihi. Amau khantoh theihna ding Pasian’ thukhamte leh kamsangte thupi ahihna phawk uhhi.A thunget na vuah, Pasian in a thukham “azuimi nuntakna pia” (Neh. 9: 29; Lev.18: 5) ci uhhi. Kha Siangtho in kamsangte tungtawnin gen ahihlam zong phawk uhhi.

         Pasian in, nuntaknuam neihtheihna ding leh thuman thutak teltheihna dingin a thukhamte hong pia hi. Hihte zuihna in dotna khempeuh vengsak hi.

 

Thursday                                        November 14

Phatna lehThuumna

          Neh. 9: 32-38 simin.  Mawh pulakna atawpna lamah bang bulphuh pen uh hiam?

…………………………………………………………………………………………………………………………………………………………………

          Tu’n, Pasian phat leuleu uhhi. Aliatna, ahatna, alamdanna leh acihtaknate phat uhhi. Pasian’ hoihna teltaktak hihtuak uhhi. Alian 10 sungah, Pasian tungah thuumna leh kiciamna bawl uhhi. Bang thuum uh hiam? “Tu in alian, a vanglian, a kihtakhuai, thuciamna kiptakin alen kote Pasian aw, kote tungah hongtung gimnate hong neu ngaihsutsak kei in” (Neh. 9: 32).

                  Kumpi tungah mipi in siah piak kul hi. Tawmno cikbek hi napi un, bawlsiatna tuamtuam thuaklailai uhhi. Kumpi gilo khat khit khat thuak toto ding ut nawnlo uh a, noptuam ngah nuamta uhhi. Amau leh amau zong “sila” kici mai uhhi. Sila in a Topa’thu mankul hi.Hih kammal azatna uh pen, Pasian’thukhamna mangnuamta uh cihna hihi.Pasian’sila ahih manun, amau’thu khempeuh Pasian mahin lensak nuam pah uhhi.

READ  ZSS Lesson 5: Kamsangte Kahna

                  Ezra, Nehemiah leh mipte in Egypt gamah a thuakngei uh lungkhamna (Neh. 9: 9) mah bangin “lungkham mahmah” uhhi (Neh. 9:37). A thungetna uhleh aphatna vuah Egypt a thuaknate Pasian in neusehlo a hihna kilangh hi. Tualai mahbangin tu in zong Pasian mahin a mabaan hong zoptoh nadingin ngen uhhi. Amau kumpite, siampite, kamsangte kuamah thumaan zolo uh a, Pasian hoihna leh hehpihna bekmah muang uh ahihna pulak uhhi.

                   Rom. 5:6-8 simin. Israelte in Pasian tungpan bangpeuh ngen uhhiam. Amau ngetthu leh Paul thugente in eite adding bang tha hongpia naci hiam?

 

Friday                                             November 15

Ngaihsutbeh ding: EGWhite, Steps to Christ laibu laimai 37-41, “mawh pulakna” cihthu simin.

 

          Nehemiah 9: 25 ah, Hebrew pute pate in “Pasian hoihna” sungah anopsakna uh honglakhi. “Eden huan” (Gen. 2:15) sungah teng kisa phialin nuamsa mahmah uhhi. Lungdamna thu icih in, Eden puahphat kikna hi a, leitung mite mai ah Edenlui tawh a kinaipenpen lim lakdingin, Israel mite samhi. Salpan hong ciahkik ciangin zong tua thumah piakik veve hi. “Tu in Zion ka hehnem dinghi. A kisia ama mun khempeuh puahpha in, ama gamlakte Eden huansung kabangsak ding a, ama sehnel gamte, Topa’ huan ka bangsak dinghi” (Isa. 51: 3) ci hi.

          Pasian in a kamciamsa bang apiak thuphate tawh nuamsa mahmah uhhi.T uate khempeuh in abeisa Eden huan phawkkikna vive ahi hi. Pasian in, leitungpen, mite’ nopsakna ding mahin a bawl hi a, thupha a piak Israelte’n zong tuateng mah nuamsa uhhi. “Eden ah ombang akisakna” in mawhna hilozaw a, Pasian a mangngilhna uh mawhna hizaw hi (Eze. 23:35). Tua thuphate hangin, akimkot mite’n Pasian amuh nading uh hi napi, a muhloh-na uh hisakzaw hi.

 

Kikup ding Dotnate

 

  1. Zeisu in, “lingbulsum omna lei lak atu khaicite pen, Pasian’thu za napi in, amau nuntakna sung uhah leitung lung hihmawhna leh hauhnopna in, Pasian thu vuknelh ahih manin, bangmah a suakkhia zolo te a cihnopna ahi hi” (Mate 13: 22). “Leitung hauhnopna” in bang acihnopna hiam? Tutung sinna sung ah mawh pulaknate tawh bangci kinaih nasa hiam?

 

  1. Piansaknathu lungngai kikun. Nehemiah 9 sungahPasian pen piangsakpa leh kemcingpa ahihnate phawk kikun.Hih doctrine te in eite upna bulpi ahihna hong bangci lak hiam?

 

  1. Mawhnei ihihnate phawksa in, Satan in zong mawhna lampi ah, I upnate hong thanemsak lohna dingin, koici kidaltheih ding ihi hiam?

Download (PDF, 87KB)

 

Tags: ,

Admin

Admin

Top