Francis Ndacha, 32
Kenya, October 12
Francis Ndacha in Kenya gamah mi 800 val tui kiphumna tawh Topa’ kiang tunpih hi. Seventh- day Adventist Pawlpi sungah khasum sangin nasem zong ahihloh banah kum 32 bek pha pan hi.
Koici bangin tua bangin piangthei mawk hiam?
Francis pen biakinn khawngah zongh kikhawm ngei khol lo-in, Kenya gam laizang aa Nyeri khuapi sungah khangkhia hi. Tuucing ahi, a pa pen Khristian pawlpi khat ah om in, a nu zongh pawlpi tuamdang khatah om hi. Tua hangin kua ma’ pawlpi ah a kikhawm nuam lo ahi hi.
Khangno khat ahihna tawh, khuadang khat ahi, Kitale khuapi-ah khedap puah nasep sem in, Khristian ahi lo, biakna dang thuhilhsiate tawh ki lawmta hi. Tuate’ biakna tawh kizom dingin a ngaihsut hangin koici kikhel ding cih ngaihsun thei lo hi.
Nikhat, tua leitung biakna tuamtuamte panin thuhilhsia thum leh Khristian pastor ngate kikhop khopna khat hong nei uh a, tua lai-ah Francis zongh vakikhawm hi. Tua kikhopna pen a makaite in, “dialogue—kiho tuahna” ci uh a, kumpi uliante’ phalna tawh khuapi laizang lam lianpi tungah bawl in, tua lai-a thugen siate in amau’ upna ciat kikhel in a pulaak uh ahi hi. Tua lai-a thugente ahi, leitung biakna tuamtuamte’ siate in, dawi (Arabia te tangthu sunga, a vanglian mahmah, akilemthei, thawl sung peuh, meikhuat sung khawng peuh ah a om thei, apualam a tun ciangin ngalkhawhangte sangin a golzawtham dawikilem) hoih leh dawi hoihlote’ thu hong gen uh ciangin Francis in lamdang sa mahmah in kilat phial hi. Amaute’ genna ah, tua Khristian ahilo, leitung biakna tuamtuamte tawh a kizom tua dawite pen dawi hoih hi-in, tuate tawh kizom lo dawite pen dawisia hi, ci in gen uh hi. Tua thu azak phet in Francis in tuate’ pawl suah a sawm pen khawlkik dingin khentat pah hi. Biakna tawh kisai in bangmah theihtelna a neih theih nailoh hangin tua agen uh dawite pen apuuk vantung mite aihkeh dawigilote ahihna pen kiptakin um hi. Tua ahihmanin dawi hoih om hi, ci-a upna pen sang thei lo hi.
Tua thukikupna a mankhit ciangin, bang pawlpi panin tua Khristian thuhilhsiate pai uh hiam, ci-in Francis in dongh pah hi.
“Seventh-day Adventist te hi ungh,” ci-in khatin dawngkik hi. Adventist te cih bang Francis in za ngei lo hi. A khedap saii-ah hong ciahkik in, tua gei nai-a khedap zuak papi khat kiangah Adventist pawlpite’ thu dongh pah hi.
“Tua pen Satan pawlpite hi,” papipa in na ci hi. “Tua pawlpite in, a lutang tungah kii a nei, sapi thu bekbek mite’ tungah gen den uh hi.” na ci hi.
Tua ahih ciangin Francis in Adventist suah loh ding khentat leuleu hi.
Kha giat hong beito ta-a, Francis zongh adang thukigentuahna khat ah hong kikhawm leuleu hi.
Nipikaal khat sung bangh nitak simin va kikhawm den hi. Adventist thuhilhsiate in Lai Siangtho tungtawnin hoihtakin thumaan a hilhna uh va zakha ahihmanin tua pawlpi pen thumaan gen pawlpi hi, ci- in thei hi. Amah le adang thumte ki tuiphum uh hi.
Kum 20 apha, Francis in Jesu thu tangko khiat ding hong lawp mahmah pah hi. Koi bangin thug ending cih a sin nadingin laibute, DVDte hong lei pah hi. Kum khat khit ciangin, a khedap saii zuakin khua khat khit khua khat zin kawikawi in, lamkabomte ah thu gen a, Khristian ahi lo, leitung biakna dang tuamtuamte tawh thu kikuptuahna, nei kawikawi hi. Tua bangin a genna ah mite tui hong kiphumnop uh ciangin Adventist pawlpi-ah puak zel hi.
“Tua bangin thu kahilhna vuah Khris in kote’ tungtawnin nalamdang tampitak hong piangsak hi.
Nung khasung bekbek in mi sawmnga in tui kiphum nuamin hong kunh uh hi,” Francis in ci hi.
Munkhat bangah, Khristian ahi lo biakna makaipi khat in, Kenya khuapi Nairobi panin a siapite uh sam in, Francis tawh upna thu kikuptuahna nei dingin sam hi. Tua a sap siapite hong tung ta, Francis zongh tuate tawh ni li sitset thu kikum uh hi. A ni ngani ciangin tua kakaipipa in a pawlpi mite tua thu kinialna ah a pai hetloh nadingun khaamcip hi. Tua khit ciangin palikte in tua khua panin Francis a paikhiat nadingin sawlkhia uh hi.
“Ko bel kuamah tui ka phum kei uh hi, aih hangin khuatual Adventist Pawlpite in ka nasepna uh hong paakta mahmah in, khuasung lamkabomte ah hoih takin thu ka gen theih nadingun hong vaihawm sak uh hi,” Francis in ci hi.
2018 kum July kha sungin Khristian ahilo mitampite a tenna khuapi khat ah tua bangin upna thu kikuptuahna khat bawl leuleu hi. Amaute’ laibu siangtho’ hilhnate leh Pasian kammal Lai Siangtho thumaante Francis in a genkaakna tua khua mite in a zak uh ciangin mi tampitakte in Jesu’ kiangah ciahkik dingin khentat uh hi. Tua in Khristian ahilo Kumpi Ulian khat nakpi takin hehsak ahihmanin Francis a kimat nadingin thu a pia hi.
Palik len ah Francis a tut laitakin, mihonpite hong kikaikhawmin Francis a kikhakkik nadingin a ngen uh hi. “A thugen a zopsuak theih nadingin khah khia un, tu-in eite in thumaan i thei ta hi,” ci-in mipite hong awng ziahziah uh hi.
Nai nga bangh khit ciangin shilling 10,000 (U.S.$ 100) a liausak khit uh ciangin, Francis khahkhia kik uh a, tua khit ciangin mipite zong kikhen uh hi.
Lamkabom ah hong paikikin Francis in Lai Siangtho Genkholhnate bantakin hilhcian kik a, mi sawmnih le sagihte ki tuiphum in, Khristian ahilo pasal khat zongh tui kiphum nadingin Lai Siangtho sinnate mankhinta hi. Tua pa in, palikte in Francis a upna hangin a gimsakna un Khris kiangah kei hong kai hi, ci hi.
“Tua Khristian ahilo thu um kicite’ gamtatna khempeuh ka mu khin hi. Amaute lungsim siangtho lo uh hi. Tua bang a, ngalnawh thu tawh hencipna peuhmah lungsim siangtho kici thei peuhmah ding hiam? amaute thumaan lo uh hi,” tua pa in ci hi.
Francis ahihleh a zi tawh, kum li a pha a tanu tawh, kaal thum apha a tapa leh a Adventist lawmte tampitak tawh tawlngak hun nei lo-in thugen in zin khia den uh hi. “Jesu hong paibaih nading thugenna ah kuamah pastor suahphot kul sese lo hi” Francis in ci hi.
“Thumaan tangko nadingin pawlpi nasem suah teekteek zongh kul tuan lo hi. Jesu hong paibaih theih nadingin mi khempeuh in hawmsawn thei hi,” ci hi.
By Andrew McChesney