MISSIONARY DING A, PIANG NGIAT

7. MISSIONARY DING A, PIANG NGIAT

ARGENTINA | May 18
Marcelo Fernandez

Kum 14 sung vilvel ka nupa un ta ka ngen uh hi. “Topa aw, nangma’ deihna ahih leh ta khat hong neisak in la, aihkeh midangte’ ta khat hong kemsak in” ci-in thu ka ngen uh hi. Tam veipi tak hong etciansak khit ciangin ka siavuan pa un, ka taneih theihna ding uh lam-et na a tawm mahmah lam hong pulaak khia hi. Mite’ ta kepding cih zong pen ka gam uh Argentina ah a baihpak hi tuan lo zel hi.
Tua zawh a sawt lo-in ka gamveng khat vuah Pasian’ nasep theih nading hunhoih khat hong om a, “Pasian in gamdang ah i kepding ta khat hongpia nuam hin teh,” ka kici uh hi. Na khempeuh kithawi khin ta. Ko’phualpi ahi, America khanglam division zumpi pan in zong gamdang ah kum 5 ka va om ding uh hong phal uh hi. Ka paitheih nading un gamveng te’ pawlpi makai te leh kumpilam thunei te-in zong hong sang uh hi.
Tua zawh a sawt lo-in kazi Elisa in nau apaailam hong kithei hi. Elisa pen ciamnuih a hat mahmah khat ahih tawh kizui-in, zing an ka nek khit uh ciangin a naupaai lam hong gen sawm lua kisa-in, tua thu za leng koici om ding cih teng hong zaih lian dingin, video zaihna khat ka muh loh in meeksa in koih khinkhian hi. Singkuang neu kiukeu khat hong pia hi. Keizong tua singkuang hongg in ka-et leh a sungah nau paai leh paai loh sit telna na om hi. Ke’n zong lakhia pah bambam in ka et leh, positive! Ahoih lam!
Nuam lah nuambuang lamdang lah sa kawm si-in, ka om danding thei vetlo in, anbuuk sungteng ah ka manlah gawp hi. A video sungah ka ki muh kik ciangin ka ci bang votgawp liang hi.

Ka zi nangawn ka ang pomphei ding phawk lo-in tua nauneih-sittelna bekbek ka en gega kha hi. Ka lungsim kidang gawp in, “Tu panpan in, Topa” ci-in ka ngaihsun a, “Hun lem kei taktak mah ei maw. Tu-in kumpilam thunei te’n ‘piang thei lo’ hongci ding, gamveng pawlpi makai te’n zong ‘kingah lo’ hong ci ding, division makai te mahmah in zong tua mah hong ci ding. Naupang khat khankhiat na ding sum tam bei mahmah ban ah nasepna ah hong dongtang sak mahmah lai ding” cih teng ka ngaihsun dedu hi.

Pasian’ Geelna Hoih pen
Ahih hangin Pasian’ geelna hong hoihpen zel hi. Kua mah in ka zi’ naupaaina tawh kisai-in hong pau pih lo uh hi. Kumpi thuneite nangawn in kei’ lung hih mawh bang lo-in, “Bang mah buai huai kei ei. Ko naupangte it mahmah ung ei” hong ci bilbel hi. Ka gamveng uh ka tun khit zawh uh kha thum khit ciangin ka tapa uh, Ezekiel hong suak hi. Pasian a’ dingin ka teci pan theihna uh zaah sawmgiat bang ka tapa un hong honsak hi. Ka tunna uh gammite in naupang it thei mahmah ahih lam pen a sawt lo in ka phawk pah uh hi. Nang bang pen gamdang mi va hi le cin hoih zaw lai hi.
Na paina peuh ah mite in hong khawlsak in maan’ hong kizaih pih pahpah ding uh hi. Pilepu te in a
tute uh tawi kawm in hong pai ding uh a, tate kepdan khawng hong hilh hilh lai ding uh hi. Ka ki lametna uh sangin tampi tak in khaici ka tuh thei zaw uh hi.
Ka paina peuh vuah mite in Ezekiel pen uum’ ngeingai pahpah uh hi. Ka tapa uh tungtawnin ka veng ka paam teng uh tawh hitaleh, vanzuakna saite ah hitaleh, mawtaw khawlna khawngah hitaleh, mite tawh ka ki maingap baih tuam uh hi. Suahnite leh a dangdang pawite bawl zel in mite ka samzel uh hi. Nulepa tampite in a tate uh Ezekiel tawh a kikholh dinguh deih ahih man un naupang Sabbath school sang ah hong kah pih zel uh hi. Ko omna tawh kizom taih khan khat-a om nupate in zong ka tapa uh tawh kigual tanu khat nei-in hong hawhpih zel uh hi. Naupang Bible lesson te mangpau in ka na hilh zel uh a, nuam sa mahmah hi. Ka tapa uh tungtawnin ka lametna uh sangin azah tampi in lampi hong kihongg hi. Pasian in tapa hoih mahmah khat hong pia hi. Mite’ muhna ah ka nap, ka pom uh ciangin lungdam mahmah hi. Tua tungtawn in mite in Pasian’ hong itna tel semsem uh hi.

Alamdang Nihna
Ka tapa uh Ezekiel tungtawn mah in alamdang teci pan ding khat mah a sawt lo in hong piang hi. Ka zi-in nau hong paai leuleu a, numeino khat hong piang hi. Tua lai-a mite a’ dingin tapa khat neih khit teh, tanu khat neih pen a lamdang pi khat ahi hi. Lampai kimlai nangawn hong mukha peuh in khawl liangin hong dot, hong gen den uh thu in, tapa khat neih khit ciangin tanu khat neih pen a hoih mahmah hi-in a ki deih phadiak hi, hong ci tangtang uh hi. Ko bel vantung lam kawkto kawm in, nui hiuhiau sa-in, Pasian pen a hoih Pasian hi, ci-in lungdam ka ko pahpah uh hi. Teci panna hoih penpen!
Topa Jesu in Mate 24:14 sungah, “Tua ciangin mi khempeuh tungah teci ahi dingin Pasian hong ukna hangin a lungdamhuai thu, leitung khempeuhah kihilh ding hi. Tua khit ciangin beina hong tung ding hi” ci hi. Gamtatna tawh i teci panna in i kammalte sangin ngaihzaw hi. Pasian in a nungta teci te ahi dingin hong deih a, i ngaihsutna sangin a thuukzaw in hong kalsuan pih hi. Pasian in Mate 24:14 a tangtun nadingin ka tapa hong zatsak a, Hong kumkik nading lampi hong sialsak hi. Ka tapa Ezekiel in kei le ka zi sangin a kham lukhu tungah aksi taang hau zaw in ka um hi.
Pasian in eibang mawhnei mite’ tungah Ama geelnate hong lahkhiat manin thupha sang ka kisa mahmah hi. Topa in Isaiah 55:8 sungah, “Bang hang hiam cih leh keima ngaihsutnate nomau ngaihsutna bang hi lo a, keima paiziate nomau paizia bang hi lo hi,” ci hi. Pasian’ geelnate pen paubanna om lo in hoih khin hi.

By Marcelo Fernandez, as told to Andrew McChesney

See also  AGIM ATAWL MISSIONARYTE
Tags:

Admin

Admin

Top