MOSES SIHNA

A MITE tawh a kizopna ah Pasian in A migiitna leh A itna tawh na seem dena, tuate lak pan a theihhuai pen khat in, kua mah deihsak tuam a neihlohna ahi hi. Hih thu in Hebia mite taangthu panin kilangh mahmah hi. Pasian in Israelte tungah thupha tampi buak suk hi. A itna leh a migiitna pen hih bangin kigeenteh hi: “Muvanlai in a no tungah laamin, a kha tawh a note zaapin, a kha tungah a note tuangsak in, tua teh a leenpih hi. Tua mah bangin, Topa in Israelte makaih in, a paipih hi. Israelte’n thukhaam a palsat uh ciangin zongh daan a thuak pah zel sam uh hi.

Pasian itna tawpcin a neilo pen A tapa neihsun a mangthang mihingte gum khia dinga hong piakphongna ah kilangh mahmah hi. Khrist in hih leitungah a Pa gamtatzia hong laka, a nuntak hun sung pen migiitna leh mi hehpihna bek tawh kidim hi. Tua bang zahtak itna nei hi napi’n “Van leh lei a beimang zongin thukhaam sunga a neupen, laimal khat nangawn beimang lo ding hi,” ci veve hi. Matt. 5:18. Aw khum aw zolno tawh mawhmaaina ngah dinga a sampa mah in thukhen ni ciangin, a hehpihna a nialte kiangah, “Samsiatmi-a hite aw, Ka kiang pan pai khia un,” ci ding hi. Matt. 25:41. Laisiangtho buppi sungah Pasian pen a migi bang bekin kigeen lo-a, dik taka thukhenpa bangin zongh kigeen hi. Mawhna leh khialhnate mawhmaaina a piak nop mahmah hangin, a mawh mi pen mawk maai sak peuhmah lo hi. Exo.34:7.

Minam khempeuh a Ukpa in Moses in Israel mipite gam ciam ah luutpih loh ding hi a cihsa mah bangin, Moses in lungsim tawng thukpi pan a nget hangin, bangmah kikheelna om tuan lo hi. Moses in Khanaan gam luut kha lo-in a si ding hi cih a kithei hi. Ahih hangin, Israelte adingin hun tomno khat sung nangawn mawk beisak lo-in, gamciam a luah thei nadingun, kiphuahphatna a pia den hi. Pasian lamlahna bangin biakbuukah Moses leh Joshua a pai uh hi. Meei khuampi pen biakbuuk kongkhaak tungah a kitung hi. Hih mun ah, mipite pen Joshua ukna nuaiah a om ta uh hi cih a kigeen khia hi. Moses pen Makaai a hihna panin a tawpta hi. Israelte ading deih sak lua ahih manin, amah leh amah nangawn kimangngilh liangin, a zalaihpa kiangah, “Kithahaat sak inla, lung muang in, nang in Israel mipite Khanaan gamah na luutpih taktakding hi. Nang kong panpih den ding hi,” ci lailai hi. Tua ciangin, ulian makaai dangte kiangah, Pasian kiang pana thuhilhnate a neng a tawngin, limtaka a zuih kim ciat nadingun a hanthawn lailai hi.
Mite in Moses en uha, amah tawh hun sawtpi om khawm kha nawnlo ding cih a ngaihsut khaak uh ciangin, Moses migiitna, citna, lungduaina leh a kizennate phawkin, Moses tungah a lungdam saan pha mahmah uh hi. Moses palai nasepna, thungetna hangin, tamveipi, a mawhna daan uh tawh a kipelh uh hi. Naakpi takin kisikkik uha, a dah seemseem uh hi. Amaute giitlohna, thutang peekna hangin Moses heh kha mawka, tua hangin, Moses a si ding hi ta cih a theih uh ciangin a kisikkik mahmah uh hi.

A kipatciila kipan amaute a makaih toto, a it mahmah uh, Moses in Khanaan gam luah kha loh ding cih a muh uh ciangin, na a sa mahmah ciat uh hi. Hih saanga kithuhilhna nasia zaw om tuan nawn lo hi. A makaai thak uh a hi Joshua pen Moses banga a bawlsiat, a simmawh, a gentheih sak, a lungman sak nawnloh nadingin, Pasian in Israelte a thuhilh na in amaute lah pan Moses a lakhia hi.

Tua ni lian mah in Moses kiangah thu tunga, “Nebo mual tungah kahto inla, Israelte ka piak ding Khanaang gam gaalet in: tua ciangin, tua mual mah ah na si ding hi,” ci hi. Pasian tawh kiho dingin, a giah phualpi panun, Moses pai khia mun mahmah hi. Ahi zongin, tu tunga a kisap khiatna pen a tuam khat hi se hi. Amah a Piangsakpa kiangah a nuntaakna hu a aapkik dingin a pai kuul hi. Moses in amah guakin si ding hi cih a thei hi. Amah zui dingin kuamah kiphal lo hi. A mite tawh a kikhen ding pen na sa lua mahmah hi. Ahi zongin, Pasian muang ahih manin, bangmah thudot kik nei se lo-in, a om hi. Mipi kikhopna ki-om saka, a nunung pen thugeenna a nei hi. Tua laitakin Pasian Khasiangtho in a sungah luuta:

“Jeshurun aw, hih bang Pasian dang om lo hi. Amah in, nang hong huh dingin vantungah oma, A hoihna in vantungteng tuam hi.

Na maai panin na gaalte hong hawlkhiat sak dinga, Susia in ci ding hi.

Israel in mun muanhuai ah a teenga, Jakob bek neihsa ciktui khuukah, Vaaimim leh leenggah zu a pianna gamah; Hi hi, A vantungte in daaitui kia sak hi.

Israel aw, na nuamsa hi: Kua in note tawh kibang hiam, Jehovah hotkhiatte aw, Amah in na lum leh na Huhpa ahi hi,” ci hi. Deut. 33:26-29.

Tua zawh ciangin, mipite kiang pan pai khia-a, amahguakin mual lam a manawh hi. Nebo mual dawn Pisgah a kicihna munah a kahto hi. Tua mualdawnah amah guakin dinga, a khuadaak kawikawi hi. Nitumna lamah a dum diidia Tuipi Lian a mu-a; sak lamah van tawh kidonga saang Hermon Mual; nisuahna lamah Moab gam, a gaal ah Bashan; tua ciangin khang lamah a paina sa uh a hi sehneel gamkeu a mu hi.

See also  Qoute on Children 2

Amah guakin, gamdaai mahmah-a, a beisa hun sunga ama nuntaakna teng a ngaihsun kik hi. Izipt gam sunga a omnate, Jethro tuu cinga sehneel gam sunga a omnate, sawlbawk kaang luatluat a muhnate, a migiitnate, Israelte honkhia dinga Pasian’ sapnate a ngaihsun kikkik hi. Pasian’ na lamdangte, gamlaka a vaakthap sungua Pasian thuak zawhnate, a migiitnate a phawk kikkik hi. Izipt gam pana a paikhia, a picing khinte lak panin nih bekbek Khanaan gam a luut kha uh hi. Hih thute a nung ngaihsut kikkik ciangin, a kipiakna leh a hanciamnate a mawkna bangin a mu hi.

Ahih hangin, tua bang a gentheihna a kipumpiakna leh a hanciamnate hangin kisikkik peuhmah loh hi. A nasepna leh a gamtatnate Pasian vaaihawmna bang hi cih a thei hi. A haksatna leh a gentheihnate a tam mahmah hangin, Pasian deihna banga a sep hang hi ci-in a lung nuam mahmah hi. Gamlaka a vaakthaap sungun, thu tampi theih beh tuam hi. Pasian vaangliatna, migiitnate a mu khin hi. Tua hi-a, hun tomno khat sung leitung gual nopna saanga, Pasian mite tawh gentheihna leh haksatna thuak khawm dinga a teel pen khial kisa peuhmah lo hi. Teel siam kisa in, lungkim mahmah hi.

Pasian teeltuam makaai khat ahihna, a nuntaakna a etkik ciangin, khialhna khat in a nuntaakna niin sak hi cih a mu hi. Tua khialhna om lo hi leh, kibei maimang sak thei hi leh, hih munah si lo dingin a kingaihsun hi. Moses in Jesu min suangin a khialhna pulaak in, mawhmaai sakna a ngen hi.

Tu in Gam Ciam ii omzia, a taangpi in kimu sak hi. Khanaan gam mun tuamtuamte, a khawk a khawkin ama muh dingin kilak hi. A kilak bangbang a tel muh sitset hi. A mit mang deksuai naai lo hi. Hih a muhna ah tua hun lai liana Khanaan gam bangin kilak lo-a, Israelte’n a luah khit uh cianga, a nop tuak ding bangin kilak hi. Eden nihna a en bangin kingaihsun hi. Lebanon cedar singkungte tawh a kituam phingphengh mual dungte, olive leh sing namtui kungte po zihziahna mual neute, leenggui zaam ziilzialte, paak tuamtuamte, nisuh kungte, maangbuhte leh miim kiciinna lozaangte, tui ciim silsel luanna luite, luitui gingte, vasa haamte, khuapi hoihte, huan etlawmte, bualte, mual pang khawnga lopa ne-a om ganhingte, leh suang lianpipite laka khuaipi a pheng a pheng a kaaite a mu hi.

Israelte amau nam ciat uh tawh limtaka a khawsaknate uh leh a neih a lamte uh zongh a mu hi. Khanaan gam sunga Israelte khantohna baanah Pasian kiang pana a lampialnate uh leh a thuak uh thukhennate zongh a mu hi. Amaute mawhna hanga, lawki mite laka, a kikhenthaangna zongh a mu hi. A gam uh a luahkikna uh leh a tawpna-ah Romete khut sung a tunna dongin a mu hi.

Hun dangte zongh ki-en saka, a masa in Honpa hong pai masakna a mu hi. Bethlehem khua-a, naungeeka a om Jesu a mu hi. Vantung mite’n, Pasian min thang ta henla, leitungah nopna om ta hen,” ci-a, a lasak nate uh zongh a za hi. Jesu mu nuam a pai Mipite a makaih aaksi zongh a mu hi, tua laitakin,” Jakob suante lak panin, Aksi khat hong pian dinga, Israel sung pan kumpi Ciangkhut khat hong om ding hi” cih geenkholhna a phawk vat hi. Numb. 24:17. Nazareth khua-a Jesu nuntaaknate, Jesu in itna tawh cinate dam sakin, thupha a bawl laitaka kiphasak mite nialnate, a mu hi. Jesu um thei lo-a a saang nuam lo Israel minamte a mu hi. Pasian thukhaamte a pahtawi bangin kineih napi-un, tua thukhaamte a piapa a nialnate uh lamdang sakna tawh a ngai dedu hi. Olive mualtungah Jesu in Jerusalem khuapi a it luat mana a khitui luannate a mu hi. Vantung ii thupha lian pen ahi, Jesu, a kinialnate leh a kideih lohnate mu-a, Jesu in, “En un, na innte uh kihawm suak sak ding hi,” ci-a a geen a zaak ciangin, lungkham lua in, dah lua ahih manin, a mit pan khitui taak keuhkeuh-a, Pasian tapa in Israelte a dah pih bangin Moses in zongh a dahpih hi.

See also  Achan tungpan ka ngah lesson pawl khat

A mangmuhna ah Gethsemane huan dongin Honpa zui-a, huan sunga a gentheihna, kilehheekna, a kisaatna, a kiciamnuih bawlnate leh a kikhailupnate a mu hi. Zuau thu leh muhdahna tawh Judahte in Gumpa a bawlsiatna uh a muh ciangin, Moses in thuak hak sa in, dahna leh hehna tawh a kidim hi. “Ka Pasian, Ka Pasian aw, bang hangin hong nusia na hiam?” ci-a Khrist kikona aw a za hi. Mark.15:34. Mihaupa Joseph ii han thak sunga a kivuina zongh a mu hi. Khuamial lungmanna in leitung buppi a tuamcip tawh kibang hi. A etkik leh Gualzopa hihna tawh tho kik a, vsntung mite leh misiangtho pawl khat tawh vantung ah a kahtoh lam a mu hi. Vantung kongkhaakpi kihongin vantung mite’n a Makaaipa uh a dawnna zongh a mu hi. Gumpa naseem dingin Moses zongh khat a hi ding hi ci-in a ma kiangah kigeen hi.

Vantung khuapi a muh ciangin, a meel hong taang hi. Ama thuakna leh Pasian Tapa thuaknate a etkaak ciangin, ama thuaknate bangmah geen tham cing a hih loh lam a mu hi. A luah nading vantung gam ii manphatna tawh a tehkaak ciangin, tawmno khat a thuaknate hangin kipaak zaw hi.

Jesu nungzuite lungdam thu taangko dinga kuankhia Moses in a mu hi. Ci leh sa Israelte in a up lohna uh tawh Pasian a nial uh hangin, Abraham tunga kipia ngimna leh kamciamte a taangtun theih nadingin, Khrist a um mite Abraham suante bangin kisim ding hi. Jesu nungzuite tungtawna taang khuavaak in khuamial sunga om mite taangin, amaute’n khuavaak lam manawh-a a paina uh zongh Moses in a mu hi. Israel in khangto in pung hi cih a muh ciangin a lungdam mahmah hi.
Tu-in na tuam dang khat kilak leuleu hi. Judah mite’n Khrist a nial nading ua Satan nasepna a mu hi. Siampi leh upate in “Pai khiatpih unla, singlamteh tungah khai lum un” ci-a, a kikona aw uh zongh a za hi. Khristian hing a kici thuhilh siate’n “Pasian thukhaam kisam lo hi” ci a a thuhilhnate uh zongh a za hi. Sabbath ni a kiniam koihna zongh a mu hi. Lamdang sa-in, a patau hi. Bang dingin mual siangtho tung pan a Khrist thuhilhna a zate’n a thukhaam bangci paih khiat theih ding uh hiam? Mi tawmno khatte in Pasian thukhaam keema, a zuih tentan lam uh a muh ciangin a nuam mahmah hi. Hun nunung cianga Pasian thukhaam a kipaam paih nading zongh mu hi. Pasian thukhaam zuui mite tung a kigeen hehnepna kammalte leh pahtawinate zongh a za hi. Khrist nihvei hong paia misiangthote thawhkikna leh a nungta lai misiangthote kikheelnate zongh a mu hi. Lungnuam taka Pasian khuapi lam manawha, a lasakte uh zongh a za hi.

Na dang khat mu leu leu hi. Gam Ciam saanga hoih zaw, samsiatna leh mawhna om lohna gam a mu hi. Mawhna om lo-a, sihna zongh om nawn lo hi. Gupna a ngah mite teenna khua a mu hi. Moses in a muh ciangin ama lamet ngei khempeuh leh a upmawh ngeisa khempeuh saangin thupi zaw-a, deihhuai mahmah hi. Tua gam nuamah Pasian Israel mite teeng uh-a, sehneel gamah a zin nawn kei ding uh hi.

Hih mangmuhna teng a muh khit ciangin, Moses in Moab gamah a si hi. Pasian in Moab gamah Moses vuui hi. Ahih hangin kuamah in Moses kiphuumna a mun thei lo uh hi.” Moses thuhilhna a ngai nuamlo tampite’n Moses kivuuina mun lian thei leh uh bia nuam ding uh hi. Tua ahih manin, kuama theih loh dingin, kiseel cip hi. Pasian vantung mite’n a vuui khit uh ciangin, tua haankhuuk a cing gige pah uh hi.

“Moses sih khit nungsang amah banga Pasian tawh a kimaaitang ho thei kamsaang dang a om nawn kei hi. Kadesh muna suangpi a saatkikna mawhna khat bek hang hi kei leh Moses zongh Gam Ciam ah luut thei dinga, sihna Ciam kha lo-in, Vantungah laaktohna ngah ding hi. Ahi zongin, tu-in zongh haankhuuk sungah sauveipi a ki-om sak kei hi. Khrist mahmah, Moses a phuum vantung mite tawh, Moses phongh dingin, vantung pana a kum suk hi. Moses in mawhna a bawl manin sihna thuak ahih manin, Satanin gualzo kisa mahmah hi. Tua hi-a, Satan in Moses pen ama ukna nuai-ah om ta hi ci in a nuam mahmah hi. Leivui pana piang leivuui-ah ciahkik hi-a a sisa khempeuh ama gaal matsa bangin a seh hi.

See also  DA 1: Eite Tawh Pasian Om Khawm

A sisa tunga nuntaakna a piak masak penna bawl dingin Khrist a kithawi ta hi. Tua hi-a, nuntaakna Maangpa (Khrist) leh a vantung mite’n Moses haankhuuk naih-a a pai uh ciangin, Satan in na nial hi. A dawi gilohte tawh tua haan khuuk pia khia lo dingin a om uh hi. Moses pen ka thong sungah kia ta hi ci-in kiphat sakpih mahmah hi. Moses nangawn in zongh Pasian thukhaam keem zo lo hi ci-in Satan in a geen hi. Moses in Pasian bek ii neih theih Vaangliatna a nei banga a kigeen manin, mimawh suak-a, ka khut sungah om ta hi ci hi. Khrist in Satan tawh kinial sawm vetlo hi. Khrist in Satan giit loh nasepteng hanga a piang siatnateng mu sakin, amah hanga mihingte’n mawhna bawlin sihna thuak uh hi cih lak thei hi. Ama nasepna, ama kheemna hanga Israelte’n Pasian phunsan uh-a, tua panin Moses lungduaina kiam kha hi ci thei hi. Ahih hangin Khrist in na khempeuh a Pa’ khut sungah aap in, “Topa in nang hong taai hi” ci ziau lel hi. Jube 9. Gumpa in A gaalpa tawh bangmah kaam kiseelna nei se lo-in, tua mun mah-ah a tuuksa mimawhte gaal lian pen a hi sihna gu botsatin, sihna panin hinna a piang sak hi. Hih munah Satan in Pasian Tapa tungah bang mah cih thei loh hi cih kilangh ta hi. Misiangthote thawhkikna tawh Satan ngahsate kilaak sak ding hi.

Mawhna thaman hangin Moses pen Satan khut sungah a tung hi. Ama tha bek muang ding hi leh sihna gu in leencip dinga, ahih hangin Gumpa min tawh sih theih nawn lohna-ah kithokik sak hi. A vaangliansa-in sihna haankhuuk sung pan thoto-a, amah Gumpa tawh Pasian khuapi-ah a kahto uh hi.
Moses tungtaanga Pasian thudikna leh itna a kilatna mun dang om ngei nailo hi. Pasian in Moses pen Khanaan gam a luut sak lohna tawh Ama deih bang bek zuih ding deih hi cih kilangh sak hi. Mihing in Piangsakpa dinmunah a kikoih ngei ding hi lo hi cih zongh kilangh sak hi. Khanaan gam a luut sak teeiteei nadinga Moses thungetna pen saang loh hi. Ahih hangin Pasian in Moses pen mawk nutsiat lo hi. Vantung Kumpipa in Moses thuaknateng thei-a; a gim a tawlna leh a gentheihna teng ciamteh ciuteu hi. Pisgah mual tungah, hih leitung Khanaan gam saanga manpha zaw, vaanglian zaw gamciam mu dingin leh a ngah dingin Pasian in Moses a sam hi.

Meel kilamdangna mualah Moses leh Elijah zongh kihel uh hi. Elijah pen sihna ciam lo-a vantunga laaktohna ngah ahi hi. A nih un, Pa kiang pana Tapa kianga Pa’ khuavaak leh vaangliatna kengte ahi uh hi. Tua ma kum za tampi lai-a Moses thungetna kitaangtung sak ta hi. Gam Ciam sungah mual tungah a ding ta hi. Van tung ii pahtaak mahmah Moses thu pen tu-a ciang bek hih mangmuhna ah a kingah hi.
Moses in Khrist lim cing ahi hi. Amah mah in Israelte kiangah “Topa na Pasian un note lak panin, Keimah tawh a kibangh Kamsaang khat hong piang sak dinga, Ama thu na mang ding uh hi,” ci hi. Deut. 18:15. Pasian in, Moses in Israel mipite Khanaan gam luah dinga a paisak ma-in, gentheih thuaksiatna, gilkial dangtaakna saangah kisinna ngah sak masa phot hi. Tua lai-a Pasian Israel mite’n vantung Khanaan gam lam manawh-a a paina uah, Makaaipa uh a hi Jesu in mihingte hilhna kisam hi lo napi-in, Amah nangawn in thuaksiatna hong thuak suka; Ama thuak banga thuak mite a huh zo pha mahmah pah hi.” Heb. 2:10-18. Eite hong Gumpa in kawk baanna leh siangtho lohna nei lo hi; ahih hangin, eite’n Gam Ciam ih ngah theih nadingin sihna a hong thuak hi.

“Moses in a gamtatna khempeuh ah sila a hihna bangin a diktat hi. Jesu Khrist ahih leh innpi sung Tapa a hihna bangin a diktat hi. Tua innpi in eite ih hi-a, launa om lo takin, lungdam kipaakna tawh a tawp dongin tua lametna ih len cinten ding hi. Heb. 3:5-6.

Tags:

Admin

Admin

Top