MOSES’ TANGTHU PAN PILNA

 

 Lesson 2                                                October 2 – 8

 

MOSES’ TANGTHU PAN PILNA

 

 

SABBATH NITAKLAM                                           October 2

Tukalsung Simding:  Thuhilhkik. 1-3; Pai. 32:29–32; Gam. 14; Eph. 3:10; Pian. 15:1-16; John 14:9.

KAMNGAH: “A vekpi-un kha tawh kisai an-ne uh a, a vekpi mahun kha tawh kisai tui na dawn uh hi.  Kha tawh kisai Suangpi panin tui na dawnuh a, tua Suangpi in Khazih ahi hi.” (1 Cor. 10:3,4).

 

          “Hih thute pen Moses thugente ahi hi” (Thkna 1:1). Thuhilhkikna laibu tua bangin kipan hi. Hih laibu pen Moses in a kipatna panin Moab gamah a sih dong (Thkna. 34:5) mah gelh ngiatngiatin amah’n huzaap ngiat himah tase leh, Thuhilhkikna laibu buppi in Topa Zeisu’ thu ahi hi.  Amah in ei hong piangsakpa (Pian. 1,2; John 1:1-3) hi a, hong kipsakpa (Col. 1:15-17; Heb. 1:3), hong tankhiapa (Isa. 41:14; Titus 2:14) ahi hi.  A guallelpa lamah pang tawmin, Thuhilhkikna in, Topa hong bawlphatkikna, hong kipsakna, hong tatkhiatna tangthu ahihi.

          Israel mite in Canaan a lut taktak dinguh ciangin, Moses in, Laisiangtho sung tawntungah a omden tangthu pan pilna khat pia hi.  Tua in A beisa hun sungin Topa in note adingin hong hihsak sate phawkkik ta-un cihi.

          Hih vauna in, a hoihzaw Khapsa Gamgi a om gige eite zong hong vau hi a: “I dinmunlui i etkik ciangin, tu laitak i dinmun mahmah enleng, lamdang ka salua a, makaipa Khazih muanna hang bek ahi hi. Topa hong makaihna lampi zuih ding leh a beisa eite ading hong hihsaksa khempeuh i mangngilh kei nakleh, mailamah bangmah lauding omlo hi.”- Ellen G. White, Life Sketches, p. 196.

 

Sunday                                                        October 3

MOSES’ PASIAN NASEPNA

          Laisiangtho sungah Moses omna kingaipha mahmah hi. Paikhiatna 2:2 masiah hong kidawk hetlo ahihhang, Piancil laibu pen ama gelh hi a, Pasian in ukzawhna neipa, na khempeuh bulpi, eite kipatna, na khempeuh in bangci kisiat cihte leh, koibangin lametna kineithei cihte a gelhpa ahi hi. Piansakna, pukna, hotkhiatna’ng kamciam, tuiciin, Abraham leh lungdamthu cihte khempeuh in Piancil laibu sungah omkhin a, laikungpu in Moses ahi hi.  Hih mipa in hizahta in mi a huzaap theih nadingin genbaanglo zong hituanlo napi, Pasian it in, Ama’ na a sep nop mahmah man bekmah hi.

          Paikhiatna 32:29-32 sim lecin, bawngno milim biak mawhna abawlkhit vua Topa leh Moses kihona teng kiciaptehna ahi hi.  Hih tangthu in Moses pen mawh-baanglo hituanlo napi nasia takin Pasian in a zatnopna hang thu koibang in na thukmuhsak hiam?

. . . . . . . . . . . . . . . . . . .. .  . . . . .. . . . . .  . . . . .. .  . .. . . .  . . . ………………..

          Mipite’ mawhna Moses in cihna’ng a theih tuanloh hang, ama’ nuntakna kha suplawh zaw phial ding zahin, mipite mawhna thumsak ngeungau hi. Paikhiatna 32:32 ah Moses in Pasian kiang ah “amaute mawhna maisak hoh in” a cihna ah “thuakin” cihna zong ahi hi.  Moses in amaute’ mawhna gikna telpha mahmah a, a kimaisak theih nading zong thei ahih manin “thuak” kenkan dingin Pasian kiangah ngen hi. Amau mawhna akimaisak theih nading lampi in hih bekmah omlai hi.

          Laisiangtho sungah hun masalai in, aiawh thuaksakpa, Pasian mahmah in Zeisu sungah hong kipia ahih manin, mawhna daan picingtak in hong thuaksak hi.  Tua in, mihingte’n hotkhiatna ngahin Pasian ukna thukham sungah kiptakin om theihna lampi ahi hi.

          Kum zatampi khit ciangin Peter in Zeisu’ thu hih bangin “eite mawhna lamah misi bangin thuman lamah nungta in i gamtat theihna dingin Khazih mahmahin eite mawhna, ama’ pumpi tawh singlamteh tungah apua hi.  Ama’ liamna hangin note in damna nangah uhhi” (1 Peter 2:24) cihi.

          Tua hi a, hih tangthu sungah Moses in a puksa mawhnei minam a dingin a palai sakna in, Zeisu in eite a dingin hong hihsakte khempeuh adingin a maitaai madawk ahi hi (Heb. 7:25).

          A mipihte adingin ama’ kha sumh ngam maw? Hih kammalte tungpan eima adingin bang pilna ngah theih ding a om hiam?

 

Monday                                                             October 4

A tangtung Genkholhna

           Tulai leitung pilnate pen thuman thutak ding khawngin kingailhsun tamai (leitung in ama’ thuthu in piangkhia a, nuntakna neite zong amau’ thuthu in hong kikhelkhel cihte) khawngte, koih photlel leng, tua leitung pilnate in Pasian piansak theihna vangliatna tampi hong musak hi. A kipuksa leitung hisemah leh a kithutuakna, a kikhaikimna, a kiciat sitsetna khawngte in a sin mite lamdang sasak mahmah hi.

          Pasian in muhtheihte tungah kician sitset ahihleh kha lamah zong kician mahmah ding hi. Tua hi a, Thuhilhkikna a kipatna ah zong, Pasian kician mahmah ahihlam i mukhia ding uhhi.

          Thuhilhkikna 1:1-6 simin. Thuhilhkikna 1:3 ah “kum sawmli-na” tungtang a kician genkholhna  bang peuh na mu hiam?

 . . . .  . . . . . . . . . . . . . . . .. . . . . . . . . .. . . .  . . .. . . . . . . .  . ……………….. .

          A ngiimna tangtunloh khit, Kardesh Barnea panin Moses in, thukante tua gamah vapaisak himah taleh mipi in tua gam laak ding nial uhhi -bang thu hiam? Amau lamet bangin Khapsa gam sung lutkhalo dinguh hong kici hi.  Bang tanvei bang a ngaklai uh tammaw? “Na gamvaan sunguh ni phazah tawh kizui in, Ni sawmli, ni khat ciangin kum khat, note in na mawhna uh kum sawmli  sung na thuak ding uh a, Keima lungkimlohna na thei ding uhhi” (Gam. 14:34).

          Tua bangin, Gamlakvakna in kumsawmli-na ci in Pasian kammal genkhia lian hi. Pasian genkholh thute in Pasian zahmahin muanhuai a, hih Gamlakvakna kipatna kammalte zong muanhuai hi. Pasian in a gen bangin hih a, hih ding acih bangin hihtakpi hi.

          Pasian genkholsa a tangtung taktak pen hihtengbek hi lo hi.  Tulai ei hun panin nunglam enkik leng, Daniel 9:24-27 sungah, Zeisu’ hun zong kimu thei a, Topa genkholhna a tangtung ahi hi.  “Hunkhat, hunnih leh hunlang” a cihcihte (Dan. 7:25; Mang. 12:6, 14; 13:5) zong hong tangtung a, Daniel 8:14 a Ni 2300 genkholhna zong tangtung hi.  Daniel 2, 7, 8 sung tengah kician takin hun a genkholh khempeuh zong, Pasian in nakhempeuh theikhol a, ukzo in muanhuai hi cihna ahi hi.

          Topa in a genkholhsa peuhmah pen pelmawh in tangtungsak teitei cih i muhsa ahi hi.  Tua hi a, mailam adingin hong tunglai ding a genkholsa peuhmah hong tangtung teitei ding hi ci in banghangin namuang thei hiam?

 

Tuesday                                                                October 5

tul tamveipi sangin tamzaw

          Gamlakah sawtveipi a vakthap khit uh ciangin, Moses in Topa adingin pulaak a, “En-un, note’ maiah leitang ka koihzo hi.  Pai unla, na pate uh Abraham, Isaac leh Jacob leh amau nunga a suan a khakte tungah a piak dingin a ciam leitang luah-un” (Thuhilhkikna 1:8) a ci hi.

          Tua khitteh bangin zui hiam cih phawkin.

          Thuhilhkikna 1:9-11 sim in. Kadesh Barnea ah langdona hangin, amaute Pasian in daan pia zawsop ahih manin, hih Laisiangtho munah bang a thupi kammal khatpeuh na mukha hiam?

. . . . . . . ..  . .. . .  . . . . . . . . . . . . . . . . . . .. . . . . . .  . . . . .. .  . .

          Hihtengah zong Pasian hehpihna lim dang khat mah ki mu hi.  Gamlakah vakvai uh hinapi, amaute’n thupha sang veve uh a: “kum sawmli tawntung gamlakah amaute na vaak a, amaute in bangmah tangsapna neilo uhhi.  A puante uh zong sialo in, a khe uh zong bawk beeklo hi” (Neh. 9:21). Moses in zong, a mipihte itna a lahna in, Pasian hihnasa sangin a tul simin a tamzaw khangsak lai dingin Pasian kiangah ngen hi.

          Thuhilhkikna 1:12-17 simin. Tuate pen Pasian thupha sanna vive ahih manin, bang thupiang a, tua thu Moses in koici hih hiam?

. . . . . . ..  . . . . . . . . . . . ..  .. . . . . . . . . . . . . .. . . . . . . . . .. .  . .

          Topa in a vangliatna tawh hong kilang zelzel mah taleh, kipawlkhopna kisam veve lai a, nasepkhop nading leh tavuan neihtheih nading ahi hi.  Israel pen qahal khat hi a, kipawlna khat (Thkna 31:30), Laisiangtho thak sunga ekklesia  hong pianna, Greek pau hi a, “pawlpi” cihna (Mate 16:18) ahi hi.  Thu tuamtuam tawh nasem ahih tei hangin Paul in Jews ahihna pan pialkhia ngeilo a, 1 Cor. 12 sungah, kipawlna khat sungah hoih takin nasem thei ding mi a kisapna teltakin gen a, Thuhilhkikna leh gamlak a qahal sungah i muhsate mahbang ahi hi.  Tanglai qahal mah bangin tulai pawlpi in zong, pilna tuamtuam tawh a kidim mipilte a kisam veve hi.

          Mite in biakna ahi a, kipawlna khat peuhpeuh gensiasia mah taleh, Pasian’ kammal Laisiangthothak phadiakin kipawlna dang peuhmah hi lo ding a, khatbek mah hi ding cihi.

 

Wednesday                                                                  October 6

KADESH BARNEA

          Thukanpa khat in Thuhilhkikna laibu kipatna lam, Kadesh Barnea thupiangteng enpha diak hi. A deihhuailo thupiang ahihtei hang, Thuhilhkikna laibu i sintheih nadingin tua lai hoih takin simphat kul masa hi.

          Gamlakvakna 14 sim in. Thukante thupuak pen mipite in koibangin dawng uh a, bangteng piangsak uhhiam? (Thkna. 1:20-46).

. . . . . . . . . . . . . . .. . . . . . . . . . . . . . . . . . . . . .. . . . . . . .. . . . .

          Hih tangthu pan pilna tampi kingahthei himah leh, a thupipen khat in, Gam. 14 ah hong kidawkkik thupiang pen hizaw hi.

          Gam. 14:11-20 simin. Moses pen Topa leh mipi kikalah palaipi in kimu himahleh, Topa in mipite a suksiatlohna thubulpi kician mahmah khatin bang hihtuak hiam?

. . . . . . . . . . . . . . . .. . . . . . . . .. . . . . . . . . . . .. . . .. . . . . . . . ..

          Moses in Pasian tungah a kammal lungngai in. Tua bangin hih lecin, Egypt mite leh hih kiimtenga minamdangte in hong bangci muhding hiam? Hih munsan pen thupi mahmah hi. Israel tungah Topa’ hih nop thute in amaute tungbek hi lo a, mihing khempeuh a huam thu ahihman hizaw hi. Israel minamin leitung khuavak hiding a, tua hunlai in mite’ biakpiak milim mawkmawkte in Pasian maan a hihlohna leh Pasian hong itna, hong hotkhiatna a vangliatna teci apang ding minam ahi hi.

          Moses in, hih mipite hemkhia ziau lecin, minamdangte in: “Amaute tungah piak dingin a kiciam leitangah, Topa in hih mite paipih zolo ahih manin Amah in gamlakah amaute that hi ci ding uhhi” (Gam. 14:16).

          Thudangkhat, Laisiangtho sungah i muhthu khat panin: Pasian in Amite sungah minthang ding -tua minthanna, hoihna, itna leh vangliatna cihte pen Amite tungtawnin a nasepna hangin, a pawlpi sungah hong kilangh ding ahi hi. A mite’n bel Amah nuam takin nasemsak thei mello himah taleh, vanglian Pasian in leitungah Ama’ hihnate hangin minthang vanglian veve ding hi.

          Ephet 3:10 Paul in bang gen nuam a, bang thu piang omhiam? Pasian in hih vannuai leitungah “pilna nam tuamtuam” a cih pen koibang hiam? Eite’n zong seppih theih khatpeuh i neikha hiam?

 

Thursday                                                           October  7

Amorite mite’ mawhna

          Thuhilhkikna 2 leh 3 sungah, Pasian in Israel mite a thupha piakna, a galsimna cihte sutkik a: a cihtak uh ciangin galzosak, migolpi ngalkhuahang pipi zong zo uhhi (Thuhilhkikna 2:11; 3:13).

          Bangbang hileh, thu haksapi hong suak khat; tua mite a kisuksiat ding vaipi khat sin ding hi hang. Israel mite in minam khat kiangah kilemna kam vapau masa (Thu. 20:10,11) a, tua mite’n a saanloh uh ciangin, Israel mite vapai in, numei naupang dingin susia uhhi. “Topa Pasian in amah hongpia a, amah leh a tapate leh a mi khempeuh i zo hi.  Tua hunin a khuapi khempeuh i la a, papi, nupi leh naupangte i susia mang a, bangmah i siitkei hi” (Thuhilhkikna 2:33,34).

          Pawlkhatte in hih tangthute pen maan taktak lo hi ci nuam uhhi. Bangbang hitaleh, eite’n “Laisiangtho pen Pasian humopna tawh hong kipia hi a, thuman thutak hilh nading, a khialte taii nading, a manlote amanin puah nading” (2 Tim. 3:16) ci in i um a, eite in upding uploh ding teel theihna neituanlo hi hang. Hihbang lianin eite a dingin hong kipiasa ahihi.

          Piancil 15:1-16 simin,  Pian. 15:16 ah, Pasian in Abram kiangah bang gen a, tua thu in hih ahaksa dotna a ding bang khuavak hong pia hiam?

. . . . . . . . ..  . . . . . . . .. . . . . . .. . . . .. . . . .. . . . .. . . .. . . . .. . ..

          Tua lai a milimbia minamte pen ngongtat theilua mahmah uh ahih manun, amaute’n Pasian’ thukhenna a thuak ding uh pen sawtpi pek panin kilawmkhin zawsop hi. Pasian in lungduai takin amaute kikhel hun ding ngakngak mahleh, amaute kikhel lo banah -amau leh amau zong naupangte nangawn kithatkeei mawk uhhi. (Israel mite thahlup naupangte sangin, tuiciin in a thahlup naupang mimal tamzaw tham ding hi).

          Hih thupiangte khempeuh a kicing dildel in hong ki pulak khin zolo a, ciangtan bekmah tawh hong kipulak ahih manin, eite ading pen, Pasian in Ama’ hoihna lampi tampi tak tawh hong muhsaknate leh a muanhuainate sangsiam theileng hipeuhlel hi. Upna i cih in, khuahun hoih ni khat peuh in ganlak singkungte enin vasahaamte zakna lelpeuh hi lo hi.  I telzawhloh hunlai nangawn ciangin muanteiteina ahi hi.

          1 Cor. 10:1-4 leh John 14:9 simin. Hih munte in, a mundangte mahbangin, bangmah i tehzawhloh laitakin, Pasian hong itna, thumaanna leh hoihna i muanzawhna dingin hong huhthei ding hiam?

 

Friday                                                                           October 8

ngaihsutbeh ding: Hih tengah Israel mite in, tua minamte tungah a bawlnate tawh kisai dotna haksate a dawn nading hong kipia hi: “Na khempeuh leh mihing khempeuh a piangsakpa ahih manin, Pasian in a zatnop mi peuhmah zangthei a, a sepna thumaan ahi hi.

          “Pasian lampite pen thu thukpi ahi hi. Eite’n Pasian telcian zotuanlo ihih mahbangin, tua dotnate pan tawldam hithiat lelleng maw. Isa. 55:8, 9  in zong hong lungmuan suah hi.

          “Laisiangtho in, Canaan mite pen nakgitloh, naksiat mahmah ahih manun, amaute a kisuk maimangna zong pen, amawhna uh hangin Pasian’ thukhenna thuak cihding  hi. Pasian in tua Canaan mite a sukmaina pen a kipatna zong hi lo, a tawpna zong hituanlo hi. Canaan mite masuan leh mihingte masuan a kilamdanna pen (Noah innkuan kihello) Piancil 6 pan 9 sungah a cialcial in kipulak hi.

          Pasian in minamdangte a suksiat ciangin a zatngei herem acih sumai cihpen, Israel tungah zang ngeilo hi.  Thkna. 7:1 in, a sukmai ding minamte ciangtan in pia hi.  Israel mite in Aramaean mite, Edom mite leh Egypt mite nung khawng mawkzuilo ding uh cihi (Thkna. 20:10-18).

          Canaan mite thuaknate pen, migilote’ thuak ding Pasian’ thukhennate vive ahi hi. Pasian in Canaan mite a sukmaimangna pen tatkhiatna tangthu adingin a kisam mahmah khat ahi hi.

          Canaan mite pen a minambup mahun Pasian’ thukhenna thuak dingte a hihteei uhhang, amau adingin kum sawmli sungbang thuhilhna omkhinzo hizaw hi (Rahab pulakna teng Joshua 2:8-11 enin).” – Daniel 1, Bock, The NIV Application Commentary: Deuteronomy (Grand Rapids, Mich.: Zondervan, 2012), pp. 98,99.

 

KIKUPDING DOTNATE:

1. Kum tulkhat i maan hun sungin tua dotna teng hong kidawng ta ding cih ngaihsun in. Tua thute telcianna in, tua in telzawhloh tampi i neihsam hang, Pasian i muanzawhna dingin bangzah hong huhthei ding hiam?

2. Maialmah Pasian na muan semsem zawk nadingin abeisa hun sungah Ama hong huhna bangteng om hiam? Pasian in ei sung ah hong sepnate mangngilh lohding banghangin thupi na ci thei hiam?

3. Sunday sinna a dotna pen kikumkik unla, Moses in a mipihte adingin ama’ kha nangawn suplawh ngamliang ahihna thu kikum un. Tua bang pen ngaihsutna hoihmah i cithei ding hiam? Kha mangthang tatkik ding haksat kawmkalah mansuah zawsop ngam ding hiam?