MS1: A Kisam Mi Tuakkha

A Kisam Mi Tuakkha
Samuel Saw
Myanmar
October 6

Kawlgam ah Kizopna Thupii hi. Nang hihna leh neihna hi kei zaw. Asia nisuahna khanglam ah bel, kua in bang hihthei cih theihding thupii hi.
Kawlgam khuapi Yangon ah, Sangpi khat lamtheihna dingin, SDA makaipi te in, Kumpi lam tawh kizopna bangmah neithei lo uh hi. Sang naupang lah 650 phato ta a, 1975 kumpan a kipan a kizang sanginnlui nih sungah kahkah lai uh hi.
Sia te’n zong cih na’ng theilo a, sangnaupangte ciahkiksak lel uh hi.
Pawlpi makai te in, Sanginn thak sinsen khat lamtheih na’ngin, khua upa thunei te vaneek uh hinapi; kuamah’n letmat thuhsak theilo uh hi. Makai te’n amau mitheih tuamtuam te kizoppih mah taleh uh, bangmah lamdang tuanlo hi.
United States ah, General Conference zumpi a om, Adventist leitung makai pi te in, Asia Khanglam Pacific Division zumpi i kipsakna dungzui in; Kawlgam ah zong, sanginn thak kisampha cih thu theihpih in kipsak aih manin: 2012 kum, Sabbath 13 na sumpi leetkhia lakpanin tawmno hong khen hi. A sumbel ki kaikhawm khin napi, pawlpi makai te’n, khuapi thunei te tawh kizom thei lo in, kum thum hong mawk bei hi.
Tua laitak mah in Kawlgam pawlpi makai te hong kiteelthak hi. Tua makai thak te’n zong kumpi tawh kizopna neizo tuanlo uh aih manin, lungkhamna khut lamto lel uh hi. Ki lamdanna bawlzo tuanlo uh hi.
Samuel Saw a kici, Asia Khanglam-Pacific Division makai-pipa pen, Kawlgam mi mah hi a, kawlgam pawlpi makai te damtakin hanthawn hi.
“Mi tuaklo na hih manun, kizopna hoih nei theilo hi lel uh cia, Pasian om ngawn ey. I nget leh lam hong honsak ding hi,” amah’n ci hi. Nakpi takin thu ngen unla, khua thunei te tungah ngetna thak khat thunkik un ci hi.
Makai te’n thu ngetna tawh, khuapi zumah a pai uh leh, numei khat in, a mau te hong dawntuah hi. Tan 1 pan tan 12 dong a om Yangon Adventist Seminary, sang makai te cih a theih ciangin; tua numei nu maitai lua mahmah hi. “No tua sangpan maw!” ci hi. “Kei zong tua sang kah ngei hi veng. Na sang uh hoihsa mahmah ka hih ciang a, ka tate nih zong tu’n kahsak gige kai ve.” hong ci hi.
Sanginn lamdaan ding geelna teng a et khitteh, “A kisam laikung laidal teng, keimah’n hong vaihawm ning, keimah’n hong huh ning, hong semsak un,” ci hi. A cih mah bangin tawmvei no sungin hong bawlzo pah zangzangin, sanginn lam zong kipan theipah hi.
Dawl 6 a sang, sanginn thakpen 2017 kumin, Pasian tungah aapna kibawl a: Adventist leitungbup makaipipa, Ted N.C. Wilson leh sangsia, sang naupang leh makai tampi takte kihel thei uh hi.
Makai pipa’n, “mi awn 5 bang teenna Yangon khuapi laizangah om na hih manun, kihilhna kisinna khempeuh ah, Zeisu bulphuh tawntung un,” ci in hong hanthawn hi.
Sang sumkempipa Wesley Doe in zong 2012 kum quarter nihna pan a hong leetkhia sumpi te hong piakhia pawlpi mite khempeuh tungah lungdamna hong pulaak hi.
Sanginn thakpen Dollar Awn 1.3 bei a: Sabbath 13 na sumpi leetkhia $ 300,000; mimal kipiakkhiat na leh MYUM leitang zuakna pan $ 425,000; General Conference zumpi pan $ 400,000; Southern Asia-Pacific Division zumpan $ 200,000; leh ADRA pan $ 50,000; cih bang in hong ki piakhia hi.
Sang siapipa Saw Lay Wah in, “Mualdawn a kivaak mei bang a taang ding ngiimna ka nei uh hi,” ci hi. Tua sanginn thak ah, sang naupang 800 ta ding a, sanginnlui zong zanglai leng, tam tazaw semlai ding hi ci hi. Tu laitak, sang- naupang 648 pha a, 100 ah 28 bekmah Adventist innkuan pan hi.
Sang honpawi a hong kihel thei, division makai pipa Samuel Saw in, “hih sanginn pen a lamdang mahmah a i ngah a hihi; Kumpi ulian te tawh kizopna neikei mah leng zong, kizopna thupipen a hi Pasian tawh kizopna i nei hi,” ci hi.
“Ellen White in, ‘Pasian i aap nakleh, amah’n hong sepsak ding hi’” ci in, pawlpi thu lamlak Vol. 9, laimai 107 na hong simin, tha hong pia hi. “Ama’ nasep a hih manin; Amah muang in, zong leng, Amah’n hong makaih hi.”

Laigelh Andrew McChesney.