Lesson 12: Na Inn sungah Bangteng Mu Hiam?
Lesson 12 June 15 – 21
Na Inn sungah Bangteng Mu Hiam?
SABBATH Nitaaklam June 15
Tukaal sung sim ding : Isai. 38; 39; 1 Cor. 7:12-15; 1 Peter 3:1, 2; Hebrew 6:12; 13:7; 3 John 11; Isai. 58:6, 7, 10, 12.
Kamngah: “A hi zongin note pen, Pasian in hong teelkhiat minam, kumpi siampi pawl, a siangtho minam, Pasian’ mite na hi uh a, khuamial sungpan a lamdang mahmah, ama khuavak sungah ahong samkhia pa nasepna a lamdangte agenkhia dingin, Pasian in ahong teelmi na hi uhhi.” 1 Peter 2 : 9.
Topa tungah lungdamh kohtheihna dingin, i nuntak hong nuamzaw, innkuan cidam zaw, nasep hoihlel, cidam lel: A hih kei leh, innkuan damlo, haksatna thuak cihbang omthei hi. Tuabang hun laitak in lengla hong pai thei hiam? Kumpipa Hezekiah kiangah Babylon uliante a pai bangin ee? Kamsang Isaiah in “Na innsungah bang teng mu hiam?” (Isai. 39 : 4) ci in dong hi.
Mite’n na innsungah bangteng a mu diam? Vantung mite’n bangteng a mu diam? I innsungah bang kha nam a kidim tam maw?Thunget gim, a nam beektam maw? Dikna, citna, itna, aih kei leh khauhpaina, hehna, dahna, kisiatna leh ki thutuaklohnacih te a om kha diam?
*Hihte pen eima innkuan sungah i ki dotding a thupi mahmah dotna te a hihi. Tukaal sungtengin, haksatna tampi te kawmkal ah, innkuan hoih neihtheih teitei na ding i sin ding hi.
SUNDAY June 16
Kumpi Khat Khialhna Pan Sinna
Kumpi Hezekiah damkikna leh, Babylon kamtai te tangthu simkik in. 2 Chro. 32:25,31; Isa. 38; 39. Kamtai te in, Kumpipa Hezekiah cidamkikna bekmah lunglut hi cih Lai Siangtho in pulaak hi. Hezekiah in bel a cidamkik vai, gamdai tak a omtuak lel hi. Pasian a ki theihtheih nadingin, hih kamtai te lungtang honsakna lampi piakna bangmah om lo hi. Isai. 38 sungah a cidamkik lai a, a lungdam daan leh, 39 sungah gamdaihna tawh a langdona te khaikhin in.
“Sin dingin Pasianin a phalna.”Hihbang Gam lengla neihna pen a thupi mah mah hi napi: Kamsangte, Siampi te kiangpan, ngaihsut lakna bangmah Hezekiah in na neilo hi. Pasian zong mawklut tuanlo hi. Mipi muhdan kihello, Khalam huhna ki hel hetlo in, Hezekiah in, ama tung le mipi te tungah Pasian nasepna tungsak lel hi. Tangthu ciamtehpa in (2 Chro. 32 : 31) sung a Pasian thupha sanding a baihlam dan leh Pasian’ hehpihna a sangkha te’n kicing kisa pahpah a hihna hong lak hi.
A nuai ah Hezekiah bangkua sungah thumaanna laktheihna’ng pawlkhat om hi. A dang na muhbeh a om hiam?
…………………………………………………………………………………………………………………….
Khristian bangkua sungah hong lengla te in, Zeisu’ nungzui te a muh theihna ding hun hoihpen a hihi. Lengla tawmno khatbek mah, Khalam thu kikuppih khabek hi. Khristian te in tuabang hun ciangin lungdamna thu hopsawn ding hunhoih laak siam kul hi. Khristian te’n neih leh lamh te Pasian thupha hi cih, thei napi in, lengla te tungah kiphatsakna tawh lakding hilo hi. Peter in “khuamial sungpanin a lamdang mahmah, Ama’ khuavak sungah a hong samkhiapa nasepna a lamdang te a genkhia ding a hongteel mite” (1 Peter 2:9) na ci hi, (Eph. 2:4-6).
Mi tungah teci panna dingin, na bangkua/ innkuan na zangthei hiam? Innah hong lengla te tungah, Khazih na upna thute na hawmsawn thei hiam?
MONDAY June 17
Innkuan Masak
I lungdamthu hopsawn a ngah masa pen i lengla te cihpen a ngeina hi lel hi. Tua sang a thupizaw nasepna zong omtuanlo hi.
John 1:40 – 42 sungah, innsung panin lungdamna thupha hopsawn na tawh kisai thukhupna bangteng i mu hiam? Thuhilkikna 6:6, 7; Ruth 1:14 -18.
………………………………………………………………………………………………………
Lawpna tawh thupuak :Andrew in bel thu zasak bek hilo a: a sanggampa, Simon in Zeisu a muhtheihna ding geelsak hi. Lawpmahmah na tawh thu a puak ban ah, innkuanpih te lungdamna thupha hawmsawn hipah hi. A kitheihsak khit teh, Andrew a nungah om khinkhian hi. Tua laipan kipan, Zeisu leh Peter te zong hong kizom thei uh hi.
Naupangte Upna Phual Hisak :
Innkuan sung a naupangte pen, lungdamthu hongzui lel inteh ci in ki awlmawhlo kha thei hi. Naupangte’n Khalam ah innkuanpihte hong zom lel inteh ci in umkhial thei uh hi. Tuabang hilo zaw hi. Naupang peuhmah in a muhna bangbang vua a zui pahpah hi a, awlmawhna tawh kempha mahmah ding hi hang. Deut. 6 sunga bangin, biakna lamah khoi theih tawpin khoi ding hihang. Khalam nasepna te, innkuan biakpiakna te zong naupangte khualna mahmah in bawlpih tangtang ding hihang.
Naomi i Pasian nasepdaan te pan bang pilna i ngah tam? Ruth 1 : 8-22.
………………………………………………………………………………………………………
Ruth in Naomi a niampen laitak in mu :
a monu a ciahkiksak noplai in, dahna leh hehna tawh, Pasian in daan hongpia, hong sumhsak ci in na phun hi (Ruth 1:15,20,21). Khangnote, Pasian tungah ki apna lamsangah, Ruth teci sang a hoihzaw tangthu dang om nawnlo hi.
Innkuan in mission nasepna a thupipen mun hi cih upna in, na vengte tungah na muhdan bang lamdang sak hiam?
TUESDAY June 18
Kilemna in Zo
Biakna kibanglo kitengte Lai Siangtho thakin bang ngaihsutna hongpia hiam? 1 Cor. 7:12-15; 1 Peter 3:1, 2.
………………………………………………………………………………………………………
Khristian innkuanpih te’ thupha :Thu umlo mi khat tawh kitenna in, Pasian’ thu palsat bek thamlo, amau pumpi leh a ta a tuu te na-ngawn ninsak cih taang upna, Paul in a hilhcianna, 1Cor. sungah gen hi. Tuabang hilianglo Paul in ci hi. Nupa kiten siangthona pen kemcing ding hizaw hi. A langkhat Christian lamin, a lawm leh a tate “siansuah” zaw na ci hi. “Siansuah” cih ciang, thu umlo zaw lam zong, thu um zaw tungtawnin, Pasian hehpihna leh thupha sangthei cihna hizaw hi.
Lungzuang pipi mahin, thu umlo zaw in, kitenna nusia ding hi leh, thusia mah mah a hi tei ta zongin, hong it Pasian in, suakta tak a teel theihna hong thapia Pasian in, “kikhen ta uh hen; thu ummi zong a awkna ding thu omlo hi” (1 Cor. 7:15) ci hi.
Kilem Dimdiam dingin Hongsam: Khalam a ki thutuaklo innkuan sungah, Zeisu’ lungnopna hong tentheihna ding lampi zon ding ahihi. Kitenna a ki siatlohna ding leh haksatna te tungah a gualzawhna ding, khat in thu umlo mi hiphial mah leh, sakhat a hi ding uh hi.
Thu umlo innkuanpih a dingin, bang ciangtanh mawhpuak peuh a om hiam?
………………………………………………………………………………………………………
Ki itna, ki thu maanna, ki niamkhiatna leh lungsim hongla zo thu umte teci panna te in, thu umlo zaw tungah huzaap lianpen hi ding hi. Pasian tungah thuman masa ding hang a, tua thuman na hangin, innkuanpih gitlohna pumthuak kullo hi.
Na pawlpi sungah thu umlo innkuanpih a buaipih a om hiam? Na koici huh thei ding hiam?
WEDNESDAY June 19
Innkuan Nuntakna in Ki Hopsawn na
A nuai a te lakah, Lai Siangthothak kammal “zui” leh “ciing” cihte entel in. Christian hihna leh khantohna bang teng gen hiam? Etteh taakna leh teci panna koi telsiam ding i hi hiam? 1 Cor. 4:16; Eph. 5:1; 1 Thess 1:6; Hebrew 6:12, 13:7; 3 John 11.
………………………………………………………………………………………………………
Lai Siangtho thak in, mi omdaan thak te kiciing pahpah a hihna gentelzo hi. Mi te’n a muh bangbang un ciingin gamta uh hi. Innkuan sungah hi phadiak hi. Nau- pangte in Nu leh Pa ciinguh hi. A kiteng nupate zong khat leh khat kiciing uh hi. Hihteng hangin, Khristian nupate in, Khristian lo nupate tungah hoihtak teci pang thei uh hi.
Kiimleh Paam pan Huzaap : Innsung bangkua omdaan, mi hong muh ciang hong et- teh theih dingin teci a pangden i hihi. Etteh huai limhoih nei omlua khollo uh hi. Ei bangkua ah Zeisu in mitawh kibanglo a na hong sepna te i nei hi. EGWhite in, “Kiim leh paam huzap pen vanglian lamdang hi a, midangte i huhnop nakleh, i huhthei hi” (The Ministry of Healing, lai 354).
Nupa kitengsa te in, nupa dangte pen, annek khopna, Lai Siangtho sinna, innkuan thusinna cih kahciangin, samleh, lengla te’n thuthak muhlawh dinguh hi. A ki itna, kizopna, thusia damsakna leh amau lengla dona te in Zeisu omna bangkua teci pang hi ding hi.
I kidop mahmah den ding thukhat, bang a hi tam? Jere. 17:9; John 2:25; Rom. 3:23.
…………………………………………………………………………………………………………………….
Khazih’ Nungzui Thu umte Zui un :Mi gamtat daan cianglel bel mawhbang lel a, picing zolo hi. Lai Siangtho thak in, Zeisu’ nung a zuite nung zui ding cibek hi. Khristian te zong a puuksa mite mah hicih theih kul hi.
THURSDAY June 20
Lawmtaat Kilawhna Phual
Lai Siangtho innkuante lakah gualhuaina leh, lungsimsuah takna teh kaak in. Isai. 58:6, 7, 10-12; Rom. 12:13; 1Peter 4:9. A gualhuai te omdaan pulaak dih in.
Abraham leh Sarah (Gen. 18:1-8) …………………………………..
Rebecca leh a innkuan (Gen. 24 : 15-20; 31-33) ………….
……………………………………………………………………………………
Zacchaeus (Luke 19:1 – 9) …………………………………………..
Gualhuaina in, mi kisapna khawlmun, annek tuidawn cihte vaihawm hi. Ki piakkhiat ngiat itna a hihi. Zeisu in gualhuaina pen, Pasian thulam ah kai in, gilkial te anvaakna leh dangtakte tuipiakna pen, Amah zin i dona ci hi (Matt. 25 : 34-40). Pasian nasepna in, innzang ding bang hi leng, vengte anne ding sam cihbang, mi simmawh khat inn kawm ding cihkhawng, sepdaan ki banglo ding hi. Pawlbawlna, thungetpih na, Lai Siangtho sinpihna cihte peuh hilel hi. Gualhuaina diktak pen, Pasian itna tung tawn a, lungsim sungtawng pan a suak a hihi.
Innkuan te in, a gualhuai theihlohna paulam dingin, hun omlo, thanem peuh ki ci uh hi. Pawlkhat te in, buaihuai sa, siam kisa lo, thu umlo te tawh kizopna kician salo cihbang paulam uh hi. Pawlkhat te in Midang tawh kizopna buaina te thuak zolo uh hi. Tampi takte’n gualhuaina leh lengla dona khentel zolo hi.
Na innkuan bangkua nuntak daan in, nangma kha nuntakna koici sukkhak hiam?
FRIDAY June 21
Ngaihsut Beh Ding :
EGWhite in, “A Vanglian Christian Teci” lai 35 – 39; “Thu umlo Lawm tung a Lungsim Puakzia” laimai 348 – 352; The Adventist Home laibu sung “Bangkua Pasian Nasep” cih thulu, Prophets and Kings laibu pan “The Ambassador from Babylon” laimai 340-348.
Pasian Thupuak nasepna ah Innkuan’ Vaang : “Innkuan diktak i huzaap in, a kigenkhia sermon khempeuh sang vangnei zaw hi.”
Eite’ huzaap toi samah taleng, i siamna neu mah leh, i hun tawmmah taleh, i sinna ciangtanh tawmlua ma leh : thumaan takin innkuan mapang leng lamdang takin thu piang ding hi.
Kikup ding Dotna te :
- Khazih a ding a khentatna a neihtheihna in innkuan khat peuh a hi kha hiam? Tuabang thu a piangsak bang a hiam? Khanpih te’n bang muhthak i nei hiam?
- Thu umlo tawh kiteng kha khat tungah na huhtheih ding daan kikum un.
- Na bangkua sungvuah upna hong langdo bangpeuh a om hiam? Gualsuk inla, a siansuah zia ding zong un.
- Khristian mimal in, tate tungah, thu umlo innkuanpih tungah, unau te tungah, lengla te tungah teci a hi uhhi. Upna i hawpsawn ciangin, a kicingtaakzo kuamah omlo a, a kicing gumpa bekmah i kawk kul hi. Gualhuai takin, Topa min tawh, a ki muhpih khempeuh tungah hehpihna lakuh hi. Na inn vuah hong lengla te bangzah na huzaap zo uh hiam? Na kongpi sung hong lut lengla te tungah na upna na koici lak hiam?