Nasemte Kipawlna
Lesson 13: Nasemte Kipawlna
September 21 – 27
Sabbath Nitaklam Sept. 21
Tukaalsung simding : 2 Cor.. 2:14-16; Pai. 32:114; 1 Peter 2 : 12; Phil 2:15; Eph. 2:19; Heb. 10:23-25.
Kamngah: “Pasian in piakding hongciam thu muang-ngam ihih manin, i lam-etna thu kiptakin len ni. Khat leh khat ki itin, a hoih nate sem dingin ki hanthawn ciat ni.” Hebrews 10 : 23, 24.
Khristian nasep i picingsak na dingin, i pawlpi thupitna pen neusehlo ding hi hang. Thu um mite kipawl khopna ahi hi. I kimkot a thumaanlohna te thu tampi i sin khinzo a, thu uppihte tawh nasepkhop na ah, mite’ tungah thupha ihih ding kisam hi.
Mawhzolna lianpi khat om a, pawlpikhat in idin ciangin, i pawlpi khantoh na’ng bek ngaihsun kha pahpah a, leitung a dondingin pawlpi hongteel ahihna ki mangngilh thei hi. Pawlpikhat in, thuaksia te leh siatna awlmawhlo in om kei hen. Khazih in awlmawh ahih leh eite’n zong awlmawh ding hihang. Lungdamna thuhilhna ah citak in, nenniamte, gilkialte leh huhna kisamte huhna tawh kithuah khawm dinghi.
Pawlpi kipawlna khat limlim i hih nungsang, Khazih Pumpi (1 Cor. 12:12-20) i hi a, Zeisu khekhap zui in, Ama’ khutte, khete, awte leh lungsimte ihi dinghi.
Sunday September 22
Kikhelna Ai-awhte
Actste’ tangthu a patna lamah, Christian thu um mite pen, kipawlna tuam vilvel khat hi in, mizawngte a panpih limlim kipawlna, pawlpua lamah zong mi ci-mawhte vapha, a kisap nate uh panpih in, amau tungah Pasian’ nasepna bangin a sem kik dingin, zol uhhi.
Zeisu in Ci leh Khuavak acih mahbangin, Paul in zong pawlpi minvawhna tampi na nei hi. Tuate lakpan, biakpiakna (Rom.12:1), Khazih’ pumpi (1 Cor. 12:12-20), Palaite (2 Cor. 5 : 18-20) leh Paknamtui (2 Cor. 2:14-16) cihte ahi hi. Hihte in Pasian’ kumpigam Ai-awh in tuni ciangdong mah a om hi.
A tung a “Aiawh” kammal te enpha inla, nang leh na vengsung vuah, Pasian’ Ai-awh khat na hihtheih na’ngin koi hoihpen nasa hiam, banghang hiam?
……………………………………………………………………………………………………………………
Hih Ai-awhte in mite tawh nasemkhawm uhhi. Pasian mai ah santakcing na ding hi nawnlo zaw a, Zeisu kipiakna hangin santak cingkhin zaw uhhi. Tua sangin a thukzaw in enleng: Pasian’ gampen itna leh hehpihna ahih manin, ei tuabangin i gamtat ciangin, mite tungah itna leh hehpihna a lengkiksak i hi a, tawntung kumpi gam limpua i hihi.
Leitungbup thukhunah, Palai pen, gamkhat aiawh in, mihing mahmah gamla pipi ah va omhi. Tua mahbangin, Pasian’ gam aiawh in, tawntung thute a lak leh, a nunungpen in siatna kisuksiatding a ciamkholsak a hihi. Khazih’ Aiawh leh Khazih’ Palai te i hi a, i nisim nun-takna leh pawlpi sungah, a itna leh thumaanna te ei leh amah azongte in i ciamkha ding uhhi.
2 Cor.. 2:16 simin. Bang gimnam nih om a, eite in koi gimnam hizaw cih i theithei diam?
Monday September 23
A Beibaang Sila
A beibaangte dinmun pen, Rev. 12:17 sungah: “Pasian thukham zui in, Zeisu teci panna a neite” ci hi. Lai Siangtho tangthu sungah, hihte in Pasian’ mite ading hun nunung omzia ding cihi. Lai Siangtho sungmah ah, a beibaang te in, midangte ading na asepna zong om veve hi.
Moses tangthu in eite hong patau sak mahmah hi. Paikhiatna 32:1-14 sim lecin, tua takah Moses le Rev. 12:17 sungah a beibaangte na bangci saikaak ding hiam?
…………………………………………………………………………………………….
Israel te tungah Pasian heh ahih manin, Abraham tungah a piaksa thuciam a hi, a suan a khak te minamlian suaksak ding cihthu susia kikin – Moses leh a innkuan tungah tungsak ding ci in na lauhthawn hi (Pai. 32-10). Ahih hang, Moses in tua deihlo hi. Moses in Pasian nialngam ek hi. Tuabang na hihleh mite in hong siatmuh bek ding hi (Pai. 32:11-13) ci kik hi. Moses in ama tungah tusak dingin ngenzaw hi.
Moses in mipite gamlakah makaih gaigai hi. Amaute phunphun in, a neng no no te pan kipan nialnial uhhi. Amaute na maisak kei dingleh, “Na gelhsa laibu sung pan, keima min hong phiat mai in” (Paik. 32:32) ci hi. Moses in, mipite a gupnop zawkna in, ama’ tawntung nuntakna piakkhiat sawmzaw hi. Tua bang ki piakkhiatna te in bangzah in vangnei hiam?
“Moses in Israel te leh Pasian a leptuah kawmin, a it mahmah a minam te tung ah a lunglut luatna tawh, a khalau na teng beiliang in, tuabangin na hih hi. Topa’n ama thuumna te ngai a, angkhuallo in a thungetna sansak hi.A gilo, ithuailo, a khial minamte ading, lungsim picing takin Moses ngetna hangin, Pasian in a nasempa thumaan mahmah cih teci lakthei ta hi. Israelte tung alunglutna in angkhual hetlo hi. Pasian’ teelsa mite khantoh dingpen, ama’ minthan na ding sangin, phamawh sazaw a, minamlian khat i Pa a hih ding sangin teelzaw hi. A thumaanna, a lungsim hoihna, a dikna, kamciamgam dong Israel te makaih ding a kipiak na hangin Pasian lungdam hi, EGWhite, Patriarchs and Prophets, laimai 319.
I kimkot a om a khial a mawh te tawh kizop nading in, hih thute in, bang hong hilh nasa hiam?
Tuesday September 24
Khate Vapha
Pawlpisung kikupna te khawngah, gospel maw huhna piak, upna thu maw hoihna thu, teci panna maw effort cihbangin kikupna om thei zel hi. Zeisu’ nasep zia te tel semsem leng kilamdanna te puk in, lungdamthu hilh leh, huhna piak nate kizom mahmah ahi hi. EGWhite kammal minthang khat in: “Khazih’ sep ngeina bek in, zawhna thumaan taktak hongpia dinghi. Mite’ ading deihsakna tawh amau lakah kihel a, deihsakna lak in, amau muanna a ngahkhit ciangin, “hong zui un” ci in sam hi.
“Mizawngte noptuam pia ding, damlo te donding, adahte hehnem ding, a theilo te hilhcian ding hi. Akapte tawh kapkhawm in alungdamte tawh lungdam khawm ding” EGWhite, Ministry of Healing, laimai 143.
Hih kumpigam nih thumaanna leh Pasian’ thu genna te in a peeng unau hi uh a, Zeisu’n a nasepna bek hilo, nungzuite a sawlna ah zong: “Na paina peuhuh ah, ‘vantung ki ukna hong naita hi’ ci in thu vahilh un. Cinate damsakin, dawite va hawl khia un, Man piakloh in hih vangliatna na ngahuh mahbangin, na zatna uh zongah manngen kei un” (Matt. 10:7,8). Tom genleng, thupuak tawh mi i vaphak na’ngin, a kisapna te uh i panpih ding hi.
1 Peter 2:12 leh Phil. 2:15 simkhawm in. Peter leh Paul te in, teci panna leh gamtat hoihna te vangliatna bangci gen hiam?
……………………………………………………………………………………………………………………
Pasian’ lungdamna thu a zaizaw in telsiam in,thuhilhna pen huhna piakna omlo in kihilh theilo cih thei ni. 1 John 3:16-18 le James 2:16 ah nuntakpih lopi khawng a lungdamthu genpong na om hi. Pasian thugenna in – lametna hongtun, honkhia, kisikkik, kipuahpha in Pasian’ itna pom leng a thumaanna a lak i hihi. Thuhilh na leh thumaanna te gel in, a mangthang, a kisia, a damlo te Pasian in a itna in eite’ lungsim sungah hong pokhia ahi hi.Khat peuhpeuh i teel mawkmawk thei kei a; ei te’n Pasian tawh na semkhawmin, Pasian hong guatsa i siamna te zangin, kisapnei mite i huh dinghi.
Mitungah nahoih i sep kawmkawmin, lungdamthu zong hilh pahpah ding i mangngilhloh na’ng i bang cih ding hiam?
Wednesday September 25
Pawlpi sungah Hehpihna
Job laibu kipatna lamah, Pasian in Job’ thumaan na leh hoihna te, mawhnei te tawh a kizopna te pulaak hi (Job 1:8). Mite’n leitungah amau leh amau a omlel zong, Pasian in lunglut, thuthang in nei cih ciapteh huai hi. Tua pen Paul in, hibang upna nei “Misiangte” pawlpi sungah om ci hi : “Tuhun laitakin, vantung a uk van mite in, pawlpi hangin Pasian pilna a namtuamtuam in a muhtheih nadingun, na khempeuh a bawl Pasian in, a beisa hunah hihthu khempeuh imcip hi” (Eph. 3:10).
Ephet 2:19 simin. “Pasian’ innkuan” i hihna dingin bangteng a kihel thei tam maw? Tua te in i pawlpi bang huzaap hong pia thei tam maw?
…………………………………………………………………………………………………………………….
Kipawlna khat peuhpeuh ah, a pawlpi in, a mipite bangci kizoppih cih thupi mahmah hi. Pasian’ innkuan leh Khazih’ pumpi hihna hangin, a pawlpi in, “Pasian in eite a hi zelzul dingin hongsam hilo a, hoihtak nuamtakin omding a hong sam hi” (1 Corinth. 14:33). Thutanna, hehpihna leh itna te in, Pasian kiangpan hi a, tua te’n pawlpi uk ding hi. Khuatual pawlpipan kipan leitungbup pawlpi dongin, hih thukhun te in, pawlpi makai te leh a thu khensatna te “a neupen te” nangawn uk ding hi.I pawlpi sungpan hongpiang kinialna tuamtuamte zong, amau makaihna tawh, ki siansuah ding hi. Eimau lakah thumaan takin i hih zawh keileh, midang tungah bangci thumaan zawh ding ihi hiam?
Pawlpi in nasemmi i cial leh zong lungsim picingmi hi ding a, thumaanlo anasepna te do in, pawlpi mite manphasak mahmah ding hi. Pawlpipen, lungmuanna omna mun, pawlpi in, amite a kepcin na mun hi ding hi. Pawlpi masate i et ciangin, pawlpimi cimawh te don in panpih uhhi.
Zeisu in, thu hong piakna ah, upna khangto sakbek hilo in, upna nungta taktak laktheih dingin: “Note tungah ka hong piakthak thu in, note khat leh khat na ki it ding uh hi. Note ka hong it bangin note zong khat leh khat na ki itding uhhi. Note khat leh khat ki it le uh cin, keima nungzuite na hihna uh mi khempeuh in thei ding uh hi” (John 13:34, 35).
Thursday September 26
Khat leh Khat Gamtat Hoih Ki Hanthawn
Eite’n hihtheihtawp in hanciamin, Pasian adingin na isep ciangin, haksatna tampi takmah om ding hi. Leitungin lungsim natna ding vive ahi hi. Tua in pawlpi leh kipawlna khat peuhpeuh i kisapna thu ahi hi. Amau thu tawh mawk paisak ngeilo hi. A nasepna te pan ciahkik sak zel in, aphutkhakuh thute, kihawmsawn in, tha ki la ciat uhhi.
Hebrews 10:23-25 simin. A neu 25 na pen a kicianpen khat hi a, a masa khan neute gel in 25 na i telzawk theihna dingin bang hong huh uh hiam? “Itna leh gamtathoih” lamah i ki hanthot theih na’ng bang lampi teng na mu hiam?
……………………………………………………………………………………………………………………
Nasepna khat peupeuh ah, a mimal nasepna sangin, pawl tawh asepna vuah, gualzawhna ngah zaw uhhi. Tua thu in, Khazih’ pumpi (Rom 12:3-6) ihihna hong phawksak a, tua lai ah, eimau munciat ah na i sep ding cizaw hi. Eimau panmun ciat pan i sepna ah sepkhopna a hoihna i lakding a, ei sepnate leh nuntakzia te’n tawntung ading a lamdang mahmah in na hong sepsak ding hi.
Sep thaman te thupi mahmah a, nahoih khat nasep ciangin na sep thaman pen, mite’ nuntakna hi a, tuabang ahi dingin Pasian muangin nasem dinghi. Zawnna kiam sakding nasepna ah, a nangh te dawmding, pautheilo te ading pausakleng noptuamna om veve ding hi. “Tua ahih manin na hoih sepding cimtak kei ni. Lungkia lo in i sep nakleh a hun ciangin thaman i ngah ding hi. Tua ahih ciangin hunhoih ingah simin midangte tungah ahoihin i gamta ding a, a diakdiakin thu upna sungah innkuanpih te khempeuh tungah a hoih gamtat ding i phawkding hi” (Gal. 6:9,10 leh Heb.13:6).
Khat leh khat tha kipia khawm dingin eite hong sam hi. Thumaan tak a omna pen nopmahmah leh haksa hi. A thutang i Pasian leh i pawlpi adingin midangte i zol ding hi.
Mi thuaksiatna te noptuam piakding nasep a sem na theih kua a om hiam? Tua te nahoihsep te ading bang thapiakna na neithei ding hiam?
Friday September 27
Ngaihsutbeh Ding
EGWhite laibu The Acts of the Apostles, laimai 546-556 sung pan “Thumaan Teci” le, Welfare Ministry, laimai 81-86 sungpan “Hoihna, Lungsim Tawhtang” cihte simin.
“Nungzuite’ nasepte eite’n zong i sepding ahi hi. Christian khat ihih nakleh, Pasian’ nasem khat ihi pahpah hi. Hehpihna leh itna tawh mizawng cimawhte i huh ding a, vangikpuate vani zangsak ding hi. Gilkialte anvak, tangguak te puansilhsak, thuaksiate zong hehnep noptuam pia in, lam-etbei te zong lam-et i guan ding hi.
Khazih’ itna, angkhuallo itna in, migilote puahphat nadingin, namsaute, thukhen zumpi te sangin muibunzaw dinghi. A khauh mahmah lungtangte zong Khazih’ itna sungah tuisuak ding hi.” (The Ministry of Healing laimai 104, 106).
“Sal khawina, minam deidanna, minam kihuatna, mizawngte nenniamna, leh kaamsia tedonlohna, – hihte pen, Christian taktak hilo a, mihingte hoihna ding a dalte, leh Khazih phuhsa pawlpi a phuk nuamte hizaw uhhi” EGWhite sihvuina ah, General Conference President, AG Daniells thugenna, Life Sketches of EGWhite, lai 473.
Kikup Ding Dotnate
- Leitung haksatna te kiamsak ding a hanciam mimal, mipawl, tampi takmah om hi. Adventist te in, pawlpi, tha, khuamuhna leh sumnak koici bangin i neithei ding hiam?
- Na pawlpi in hong hanthot leh hong thapiakna na phawklai a om hiam? Tuate mah bangin midang tungah zong nasem thei ding hiam?
- Pawlpi khat i thapiakna tawh, “nahoih sepna cimtakna” pan na suakta thei diam?
- Adventist pawlpi in, mizawngte tungah thutang dingin a nasepna leh a kalsuanna te natheih a om hiam? Hih pawlpi nasepna ah nang kiukhat pan na koici kihel thei diam?
Tomlaakna : Eite Khristiante pen, midangte ading nasem dingin hong kisam hi a, a diakdiak in, liam leh bai te, thuaksiate leh nenniam te a hi uhhi. Hih tengah ei te’n zong panmun khattek i nei a, midangte huhna piak ding bulphuh i hi a, i pawlpi innkuan khat in na sepna in muibun hi.