Nu khat in Gu-pia

Nu khat in Gu-pia
Desi Natalia Ango, 21
Indonesia
December 1

Kum 18 a pha, Desi Natalia Ango in, a lawm sangnaupang thum teng tawh, Indonesia gam, Sulawesi tuikulh, Limbong khua ah, kumkhat, Pasian nasem dingin a kiseh ciangin, lamdang savat hi. Desi in, khuapi liankhat peuh hi in teh ci’n um hi.
A om na’ng mun, Local Conference zum pan, mawtaw tawh naithum bang pai khit ciangin, motorcycle tawh mualtung ah nai nga bang kahto leuleu uh hi. Lampi naal mahmah a, motorcycle tungpan kiatlohna ding, kikep luat kul hi.
Lammong a tun uh ciangin, nai 8 sung khe tawh pailai ding ci uh hi.
A masa in, kumpilam thunei te zum pan, mualtung kah theih na’ng phalna laphot uh hi. Limbong khua mite zong, tua zum nasem na om uh a, tua khua mite in, a pai na’ng khua ah thu na zasak khol uh hi.
Tua khua a tun uh ciangin, khua mite in, ngeina laam te tawh nasia takin na dawn uh hi. Akvom moi khat pen, em khit teh, huan in mipi te vakna in nei uh hi.
Khua mite’n bel, huan ngeina huan bekmah ne uh hi.
“Amau pau lah e’n theilo, bang hih ding cih lah theilo,” Desi in ci hi. A thupizaw in ah, Zeisu itna, mitung bangci hawmsawn ding cih thei tuanlo hi. Amah leh a lawmte’n, ninih bang antang in thungen uh hi.

Meihol leh Nunun

A ninih ni ciangin, khua nupi khatin, a cina a lum, a nu, Indo Reko kiang ah paipih a. A nu pen, Mark 5:25-34, sung a, Zeisu damsak nu mah bang a sibua natna vei a hihi. Sia te gelpen, zatui lam bangmah thei vetlo a, cih na’ng theilo uh hi.
Meihol tawm nei a, keu nih khawng tui tawh hel uh a, thungetna tawh Pasian ap uh hi.
“Topa aw, hih nu meihol tawh damsak thei dingin kong muang uh hi,’” ci in, Desi thungen hi. “I hih theih ding bang omlai hiam?’”cih ka kikum uh hi. 1000 Missionary Movement te zumpi phone set ni ci uh in, phone lut theih na’ngin mual dangkhat kahtoh kul hi. Phone lutpah daudau a, nurse khat in, ngaihsutna hong hawm hi. Nunun a mu leh a tak, nahtang huanciim dingin Indo nesak ding ci hi.
Indo te inn ah, Desi in, “Kopen Christian hi ung ey, Zeisu in nang hong huh ding hi. Hih ne lecin, dam ni ciai,” ci hi. Sia te’n, nunun leh nahtang huanciim, khakhat sung nesak kinken hi. Voksa leh, a dang, sa sianglo te peuhmah neekloh ding hilh hi. Kha bei ciangin, a sibua hong khawl pah a, a ngei hong bang pah hi.

See also  MSS 12: Thong Sungah Pasian

Khua pih te’n lamdang sa lua in, a tate damloh uh ciang zong, Sia te khoi dingin ap uh hi. Sia te zong meihol leh thungetna zang mahmah uh hi.

Gu tawh Kisai Hilhkholhna

Khua mite zong Sia te tungah nuam mahmah uh a, Sia te huhna’ng ngaihsutna pia zel uh hi. Khat khit khat hong pai uh a, hawikhat te inn nek hetkei un, ci in khaam uh hi. “Pai hetkei vo maw, gu hong pia ding hi,” ci uh hi. Sia te’n bel upna tawh kalsuan in, dawivai te lau lo a, innsim mah in hawh in thungetsak uh hi.
Kong a kiuh uh ciangin, kum 30 kiim a pha nupi khatin, maitai takin nektheih dawntheih tawh hong dawn seisai hi. Desi in, singkawlkai leh vaimim te en in, a lawm en hi. “Ne masa o,” ci hi. A lawm in, “nangmah’n ne masa zaw ve.” ci in kinil uh hi.
Desi in, innteeknu Mama Wandi kiangah, an nek ciang thunget leh ngetloh dong hi. Mama Wandi in “banghang thu ngen nuam na hiam?” ci’n dong hi.
“Christian hi ung a, na khempeuh ah, thunget um ung” Desi in ci kik hi. Thunget khitciang, tua an te a ne uh a, bangmah ci lo hi.
A zing ciangin, Mama Wandi in, Sia te samkik leuleu a, anvak leuleu hi.
Sia te’n zong thungen leuleu a, bangmah ci lo hi. Kaalnih sung tuabang hi den hi. A tawpna ah, Mama Wandi in khuapih te kiangah, “Hih sia te pen, mi mawk mawk hilo hi. Nipi kaalnih sung, an leh gu kapia a, bangmah ci lo uh hi!” ci hi. Khuazang ah, tua Siate gu kipia a silo cih minthang vangvang a, lamdang kisa thei mahmah in, Pasian thu thei nuamin hong pai ngeingai uh hi.
“Pasian in, a thu kizeelsak na dingin,Mama Wandi zang hi,”Desi in ci hi.
Tu in, Desi kum 21 pha ta a, Sulawesi tuikulh tung, Universitas Klabat ah, Education la in, English Major kah hi. Lukhu nelkai a ngah khit ciangin, khua ciahkik in, tan 4 sangkhat hon sawm hi. Tua khua ah va hawh zelzel a, Mama Wandi zong, district Pastor pa kiangpan, laisiangtho sinsin a muh ciang nuam lua hi.
“Laisiangtho sungpan,tha kangah mahmahna munkhat, Job 42:2, “Na khempeuh na hih thei a, Nang hihnop khat, kuamah’n hong khaktan zolo hi, Pasian in na khempeuh hih thei hi,’” Desi in ci hi.
Pasian nasep na ding a sumpi hong piakhia, leitung khempeuh a om pawlpi mite tungah lungdam ung.

See also  BANG HANG IN PIANG KA HIAM?

Laigelh Andrew McChesney

Tags:

Admin

Admin

Top