Pasian’ Ciaptehna

PASIAN’ CIAPTEHNA
________________________________________________

Thupatna: Lucifer in Pasian do-a Satan a suah akipan zuau le tak kikal, thumaan le thukhial kikalah kidona om den hi. Mihing pen a pan nopna lamlam pang thei-a, a tawpna ah ama panna tawh kizui-in thaman a sang ding ahi hi. Christ hong pai kik ciangin mi khempeuh in khensatna a nei khin hi ta ding hi. Mite koi lama a pang hi zaw cih tu-a ih sinna in hong tel sak ding hi.

1. Jesu hong pai madeuh, leitung bupah kidona a om ma-in Pasian’ mite’ a ding bang kisem ding hiam? ( Mangmuhna 7:1-3)

Tua khit ciangin leitung kiu li-ah vantungmi li, kiu khatah khat ciat dingin leitung, tuipi tung, le singkung khat peuhpeuh a mutkhak loh nadingin leitung huih lite lencipin a om uh ka mu hi. Tua ciangin a nungta Pasian’ ciaptehna a tawi vantungmi khat, nisuahna lam panin hong paito ka mu hi. Leitung le tuipi suksiat theih nading vangliatna a kipia vantungmi lite kiangah amah in nakpitakin gen a, “I Pasian’ nasemte, a taltang uhah ciaptehna i bawl khit matengin leitung, tuipi, le singkungte susia nai kei in,” a ci hi.

Theih ding: Pasian’ mite in Pasian’ lamah a pang uh a hih lam a kilatna ciaptehna khat ngah ding uh hi (Ezekiel 9:4).

2. Pasian’ ciaptehna koi-ah kimu ding hiam? (Isaiah 8:16; John 14:21,23)

Ka nungzuite aw, Pasian in kei tungah hong piak hih thute, limtakin kemin koihcing un.

Keima thupiakte sangin a zuite in keimah hong it ahi uh hi. Kei hong it mite pen ka Pa in zong it ding a, keimah in zong itin amaute tungah ka kilang ding hi,” a ci hi. Jesuh in, “Kei hong itte in ka thu zui ding uh hi. Ka Pa in zong it ding a, ka nihun tua mite kiangah pai-in amaute tawh ka omkhawm ding uh hi.

Theih ding: Thupiak Lina ah Pasian’ min gelna om hi. Tua sungah Pasian’ min, a zamin – Piangsakpa, A ukna gam – van leh lei, cihte kimu hi. Thupiak dang teng a hih leh pasian maan lote in zong bawl thei lel hi. Thukham Sawm pen Piangsakpa’a a hih lam Thupiak Lina in hong lak hi. Tua tham lo-in, thu-um lote in zong thupiak a dang kua teng zui thei lel uh hi. A hi zongin Thupiak Lina in Piangsakpa Pasian’ tungah a citak kua hiam cih kilang khia sak hi.

3. Sabbath ni pen bang hi kici hiam? (Paikhiatna 31:17; Ezekiel 20:12,20)

Topa ahi keimah in amaute pen mi siangtho-in ka bawlna thu a phawk nadingun kote’ kikalah thukimna limin Sabbath tan ding thu ka pia hi. Kei pen Topa ahi note’ Pasian ka hihna na phawkna ding uh le note tawh i bawlsa thukimna lim dingin Sabbath-te na siangthosak un,’ ka ci hi.
EZEKIEL 20:12, 20
Ni guk sung teng Topa in van le lei bawlin, a ni sagih ni-in amah tawlnga a, a tha dimsakkik hi. Keimah le Israel mite’ kikalah hih Sabbath ni pen lim khat hi tawntung ding hi, ci hi,’ ci in,” a ci hi.
Theih ding: Sabbath tanna in, Piangsakpa Pasian, a Topa-a a teel kua hiam cih ciaptehna lim leh melcikna a hihi. Mihing lam panin thumaan a hih lam ciaptehna, Pasian’ lam panin Ama neihsa a hih lam ciaptehna a hihi.

READ  Nipsey Hussle and Adventism | Adventist Today

4. Christ hong pai kik ma-in Pasian’ thukham leh thuneihna bang kicih ding hiam? (2 Thessalonian 2:2-4)

Topa’ hong pai ding ni hong tung khinta hi, ci-a thu kigenna hangin lunghimawhin lungmangin om kei un. Thuhilh khat peuhpeuh in hih bang thu hong genkha thei ding a, tua thu pen kote’ gen leh gelh hi, ci-in zong genkha ding uh hi. Ahi zongin kuama khemsa-in ta kei un. Bang hang hiam cih leh nakpitakin Pasian langpanna lianpi le hell khuksung a tung ding ahi A Gilopa hong kilat matengin tua Ni hong tung lo ding hi. Tua A Gilopa in mite’ biak pasian a kici khempeuh le na khempeuh nialgawp ding hi. Tuate khempeuh sangin a lianzaw-in a kingaihsut banah, Pasian ka hi hi, ci-in Pasian’ biakinn sung mahmahah pai-in va tu ding hi.

Theih ding: Daniel phung sagihna sunga a kigen kholsa thu Pau in hong pulak kik a hihi.

5. Pasian a langpangpa bang zah ciang kalsuan ding hiam?( Daniel 7:25)
“Amah in a Lianpen Pasian langpangin thu gen ding a, Pasian’ mite a bawlsia ding hi. Amah in amaute’ biakna tawh kipawl thukhamte le pawi bawlna hunte kheelsak ding hanciam ding a, ama khut sungah kum thum le alang sung Pasian’ mite a om ding uh hi.

Theih ding: Langpangpa in Pasian’ mun bek tuh sawm lo-in, Pasian’ thukham laih sawm lai hi. Tua pen Pasian mahmah in zong a hih theih loh thu a hihi. Tua thu Daniel 7:1-23 sungah kimu thei hi. Daniel in sapi li mu hi. Leitunga a kiluah suksuk ding kumpi gam lite hi ci-in vantung mi in gen hi. Daniel’ huna kipan Pasian’ mite a khel bawl Babylon gam, Medo Persia gam, Greek gam leh Rome gam hi ding hi. A sapi lina in ki sawm a neih mah bangin, gam lina a hi Rome gam khen sawmin kikhen ding hi, ci-in vantung mi in gen hi. Tua pen AD kum 300, 400 leh 500 lai pawlin piang hi. Tua gam neuneute sung panin Pasian kosiatna kam leh mit a nei ki neu a hi gam sawm leh gam khatna hong ding ding hi.

6. Tua ki neu pen Pasian kosia-a, A thukham zong laih ding a hanciam kumpi khat hi ding a hihna bang in hong lak hiam?( Daniel 7:24,25)
“Ki sawmte pen tua kumpi gam sung panin a hong piang ding kumpi sawmte ahi uh hi. Tua ciangin kumpi dang khat hong piang leuleu ding a, amah in a omsate tawh a kilamdang mahmahin kumpi thum a nuaisiah ding hi. “Amah in a Lianpen Pasian langpangin thu gen ding a, Pasian’ mite a bawlsia ding hi. Amah in amaute’ biakna tawh kipawl thukhamte le pawi bawlna hunte kheelsak ding hanciam ding a, ama khut sungah kum thum le alang sung Pasian’ mite a om ding uh hi.

READ  Lametna Kicing (More Hope)

Theih ding: (1) Rome gam sung panin hong ding khia ding hi. (2) Rome gampi a kitap khap khit ciangin hong ding ding hi. (3) Ama mai-a om-sa gam thum hong susia ding hi. (4) A om sa gam dangte tawh a dan uh kibang lo ding hi. (5) Pasian’ mite bawlsia ding hi. (6) Pasian’ thukham laih ding hanciam ding hi.

Leitung ah hih bang vangliatna a nei khat bek oma, tua in Roman Catholic Pawlpi a hihi. Thukham laih ding a hanciamna zong hih bangin gen hi: “Catholic pawlpi in a khial thei lo ama thuneihna tawh thukham lina sunga Sabbath ni taangin Sunday ni pen ni siangtho dingin bawl hi.” Kansas City Catholic, February 9, 1893. Catholic laibu khempeuh ah hih thu a genna uh kibang khin hi.

7. Mangmuhna bu in Daniel’ gen mah tawh a kibang bang thu hong gen hiam? (Mangmuhna 13:1,2,5,6)

Tua laitakin tuipi sung panin ganhing khat a hong pusuak ka mu hi. Tua ganhing in ki sawm le lutang sagih nei a, a ki sawmte tungah lukhu khat ciat om a, a lutang sagihte tungah min hoih lo khat ciat a kigelh hi. Tua ka muh ganhing pen kamkei tawh kibang a, a khete vom khe tawh kibang a, a kam pen humpinelkai kam tawh a kibang hi. Gulpi in tua ganhing tungah ama vangliatna, ama tokhom, le aana lianpi a pia hi. Tua ganhing, kiphatsakna le kam khel nono a pautheih nading le kha sawm le nih sung aana a zattheih nadingin thu kipia hi. Tua ahih manin Pasian, ama min, a omna mun, le vantungah a omte khempeuh samsia-in a ko gawpgawp hi.

Theih ding: Daniel in sapi li-a a muh pen John in khatin na mu hi. A hi zongin a lim a lai kibang linlian uh hi.

8. Tua vangliatna in bang hih ding hanciam ding hiam? ( Mangmuhna 13:16,17)

Tua ganhing in a lian a neu, a hau a zawng, sila le sila ahi lo, mi khempeuh in a taklam khut tung uh ahih kei leh a taltang uhah ciaptehna a neih nadingun thu a pia hi. Tua ahih manin tua ganhing min ahih kei leh a min tangin a nambat ciaptehna a tungah a nei lo mi peuhmah, vanlei vanzuakin paikhia thei lo uh hi.

Theih ding: Roman Catholic Pawlpi in leitung ah Pasian’ taanga a ding hi ung, a cih mah bangin Pasian’ ciaptehna a zil dingin ciaptehna dang khat hong bawl hi.
Pasian’ ciaptehna in Sabbath tanna a hihi. Roman Catholic Pawlpi tunga cihtakna ciaptehna in Sunday tanna a hihi. Catholic Pawlpi in Sabbath laih takpi mah hiam ci-a dotna, Cardinal Gibbons-i thuzeekpipa Mr. H. F. Thomas in 1895 kum November kha-a a dawnna ah, “Catholic Pawlpi in ama laih mah a hih lam a gen mah bangin, . . . tua banga a laihna in biakna vaite ah pawlpi in thu a neihna ciaptehna khat a hihi.” ci hi.

READ  The Law of the Spirit of Life

9. Tua ciaptehna sanna tawh kisai-in Pasian in bang hong hilh hiam? ( Mangmuhna 14:9,10)

Tua ciangin vantungmi a thumna in a masa tegel hong zui leuleu-in nakpitakin, “Tua ganhing le a lim bia-in a taltang ahih kei leh a khut tungah ciaptehna a ngah mi peuhmah in, Pasian’ leenggahzu zong dawn ding uh hi. Pasian in ama hehna ahi leenggahzu khauh pen ama hehna hai sungah a dimtakin sung khinzo ta hi. Tua bang mite pen a siangtho vantung mite le Tuuno mai-ah meikuang le kat khu tawh gimna kipia ding hi.

Theih ding: Pasian’ “ciaptehna” tawh a kilehbulh a hih lam thei napi-a “sapi’ ciaptehna” a sang teiteite in Pasian’ hehna bekmah lemlawh ding uh hi.

10. Sapa’ ciaptehna a sangte leh Pasian’ mi siangthote a kilamdanna bang hiam? (Mangmuhna 14:12)

Pasian’ thupiakna zui-in Jesuh tungah a citak Pasian’ mite adingin thuakzawhna kisam hi.

Theih ding: Pawl khatte in Pasian do-in, A thukham nialin, A Sabbath awlmawh lo uh hi. Pawl khat in a hih leh Pasian leh A Tapa itin, Ama thukham tawh kituakin nungta uh hi. Tuate Khawpi Siangtho sungah kilut sak dinga Pasian tawh om khawm ding uh hi (Mangmuhna 22:14,15).

11. Sabbath maan a pahtawite’ tungah Pasian in bang kamciam pia hiam? (Isaiah 58:12-14)

Tanglai-in a kisia na munte uh na lamkik ding uh a, khang tampi sung a kisia bulpite na dingtosakkik ding uh hi. Note pen a sia a puahkik, ten nadingin mun siate a ngei a bangsakkikte hong kici ding hi. Note in Sabbath siangtho sakin, keima ni siangtho ni-in na nasepna panun khawlin Sabbath ni pen deihhuai sa-in, Topa’ ni siangtho pen pahtawihuai na cih uh a, note in pahtawi-in note’ deih bang zui loin, note’ ut bang hi loin motpau loin na om uhleh, keimah biakna hangin lungdamna na ngah ding uh a, leitung khempeuhah pahtawina kong ngahsak ding hi. Na pu uh Jakob tungah ka piak leitang luahin nuam na sa ding uh hi. Topa ahi keimah in hih thu ka gen khin hi, a ci hi.

Theih ding: Hong Piangsakpa a hih manin Ama tungah ih thumaan ding Pasian in hong kal thei hi. Tua dinmun pen Satan in do-in, a kipiang sak nate a hi ni khawng, ganhing khawng, mite a biak sak zawhna dingin hanciam hi. Piangsakpa kiang pan mihing’ lungsim a hei khiat zawhna dingin milim biakna khawng zong zang hi. Sabbath ni in Pasian’ tunga thumaanna ciaptehna lim hi-a, tua penmah Satan in a khekna ding hanciam hi. Khrist hong pai ma-a a piang ding kidona ah Sabbath thu a pangpi hi ding hi. Koi lamah na pang diam? Kua’ ciaptehna na sang hiam?

By Billy mang
& Pr. Langh Sawm Mang

Tags: ,

Admin

Admin

Top