Pasian Kammal Tawh Tehkakna

 Thumasa :: August 05-08 ni in 2019 Fort Worth/Dallas ah Leitung gam sawm le nih pan Langham Scholar consultation kanei uh a, sun anne kawmsa in gamtuamtuam a kizang van/tawi tehna kagen uhhi. Kawlgam ah vantehna tawi/viss kazang uhhi kacihleh kamkasa liangin hon gen uh a, kua man tello hi. Ka gentehna ah, Kawlgam tawi/viss khatteh British te’ 1.6 kg le US tezat 3.6 lbs tawh kikim hi kacih ciangin telthei pan uhhi. Ka Asia lawmte, China, Cambodia, Hong Kong, Japan, Malaysia, Thailand, le Taiwan te ngawnin, Kawlgam zat tawitehna Viss thei nailo uh hi. Ahi zongin Leitungah viss/tawi azang pen Kawlgam bek ahihman in kaki pak mahmah bilbel hi. Viss cihciangin, A Burmese unit of measure for weigh kici hi ka cih ciang in Kawlgam bekin aneih ahihman in dotna om nawnlo hi.

Ih gen ding thutam lo ahihleh, thukhat ihzak le ihgen ciangin thupi mahmah thum om a, tuate’ source [athubulpi] message [a thupuak] le receptor [athusangte] ahihi. Koipan hongpai thu hi a, bangacihnopna hiam? ci-a ih kan telkei-a, eitual theihna bektawh ihlak pahleh buaina omthei ahihman in hih anuai a method tetawh entak leng ih uthi.

Eugene A. Nida ii theory [ngaihsutnate]

Pasian nasem missionary te gamdang, paudang le ngeina kibanglo gamte ah apai uh ciangin ngeina, kampau, khua-muhna, upna le vanzatte kibanglo ahih manin tuate kum tampi sin phot uh hi. Martin Joos in laipilna le thukizakna ahoih mahmah gamte ah zong thu ih gen ciangin 80% ciang bek in telthei uh hi ci hi. Martin in research hoihtaka abawl ahihman in dikpen kha ding hi. Tua ahih manin ei Zomi te lakah laipilna le thukizakna aniampen lam cileng kikhial lo ding ahih ciangin Pasian thuhoih pipi ih zak khat ih gen ciang ihzakdan a ihgen theihloh ban ah ih gendan lianin kitello sawnsawn ahih manin atualniam lai’ ngeina dang amu ngeilo Zomi te lakah kitelkhialhna atam mahding ahi hi.

Eugene A. Nida pen Laisiangtho kammal letna ah, “dynamic equivalence Bible translation theory” makai khat hi a, pau namdang khat pan namkhat ah Pasian thu ih gen ciangin a muibunpen theory [ngaihsutna] mukhia a, tua in Source [Aphungpi] Message [a thupuak] le Receptor [thu kigen angah mi] cih bangin akilek kimding in Laibu Message and Mission cih agelhpen kinak zat mahmah hi.

Source [Athubulpi] thukipat khiatna

Source cih ciangin athu koipan hi-a, kua gen hiam, bang hun le koi gam a bang minamte gen hiam cih ahi hi. Thungai mikhat [receptor] in tua a Source theilo pi-in akhiatna le athu [message] 100% tel ngeilo ding cihna ahi hi. Banghang hiam cihleh tua athupuak [message] akipatkhiatna [source] le tua thupuak [message] angai azami te-omna kibanglo ahih manin decoding kul ding hi. Decoding cih ciangin gentehna in American te-in nakhat peuhpeuh khutmalte tawh akawk uh ciangin mekawk [index finger] tawh kawk uh a, ahi zongin Congo gam a American missionary khatin a khuttal [index finger] tawh akawk le mihai gamtat bangmah theilo te bek in azat uh ahihlam phawk kik a, tua ciangin amuk [lower lip] tawh akawk ciangin tua Congo mite’n telsiam theipan ci hi. Cihnopna-ah Source [aphungpi] gennop pen ahihleh thu ih gen ciangin ih thugen pen ngeina kibanglo pan a hong pai thupi khat ahihleh amau ngeina ah acihnopna le ih thugen angaite’ ngeina ah bang acihnopna hiam ci a etkakna ahi hi.

Message [Athu]

Message cihpen athupi mahmah thu ahi hi. Mi khatin abil tawh azak a hi-a laibu pan asimna ahizongin tua nu/pa lungsim sungah a omsa ngaihsutna [presupposition] a om ahi hi. Acihnopna-ah Dawibia mi, Buddhist mi, le biakna khatpeuh anei mi khat tungah Zeisu thu vagen bang hileng tua nu/pa in ahiciangkhat ama muhna a omsa ahi hi. Gentehna in England mi khat America apai ciangin British English a asungah a omsa ahihman in Harvard Square bang pen bil sungah Harvard circle in na tel thei hi. Ahi zongin American khat London va pai a, Britishte kiangah London Square acih ciangin kuamah in telpak lo hi. Thu/message azami te-in encode le decode lopi in kitel zolo hi. Tua [encode] acihnopna in agelhte ngeina [culture], kammal zatzia [terminology], symbol [lim] le image [mel], awkaih, gamtat luheek, akipan enphot a tua ciangin kuate adingin hih message/thu gen ding ka hiam cih atheih khit ciangin decode leuleu ding kisam hi. Gentehna in Mexico gam a minam, Tzeltal kicite’ pau in Pasian upna le muanna acih ciangun, “hanging onto God with the heart” ci uh a, ‘Pasian tungah lungtang khai” cihna ahi hi. Sudan a Uduks kici minamte leuleu ahihleh, Pasian upna le muanna’ acih ciangun,“putting oneself in God’s hand” “Pasian khutsungah koihna” ahi hi. English in color tampi tak omsak uha, ahizongin West Africa-te in color namthum beknei uhhi.

Receptor [thungai mi/angah mi]

Laisiangtho akigelh laitakin agelhte in a ngimna le a tupna-te tua thute [message] leitungah aki thehthang ciangin minam tuamtuam te-in za/ngai uh a, tua azate le angai te-in agelhte cihnop tawh kituak in atel mah uh hiam ahih keileh ama cihnop tawh kilehbulh gawpin ana sanguh hiam cih thupi mahmah hi. Banghang hiam cihleh tua aza/angai [receptor] te in azakna tungtawn un thuk kik or akhiatna let [response] uh ahih manin athubulpi tawh akituaklo le agelhte’ ngimna lopi bang hileh tua a response te le agelhte kitukalh in kilemlohna piangsak thei hi. Pasian thu le leitung thu kigen angai khempeuh in agente cihnop bang lianlian in atel le asangzo pahpah tamlo hi. Gentehna in Sermon angaimi khatin ama lungsim sungah tua thu te gawmtuah in ama hihtheihzah in telsawm hi. Tua pen decoding kici hi. Tua ih decode ciangin a thubulpi le thu kipatkhiatna ii gennopna tawh akituah theih nadingin pilna le theihna kisam hi.

Pasian kammal tawh kiteh na

“Tua ciangin thuman na thei ding uh a, tua thuman in note hong suaktasak ding hi aci hi” Johan 8:32.

Tu in ih gennop bulpi ih tung ta hi. Tua in Pasian thu-ummi Zomite in thuman thutak [the Truth] pen Pasian Kammal tehna [ruler] in zanga ih teh ding ahi hi. Pasian thuman thutak ih teh nading pen ama Kammal bek om hi. British te khat Kawlgam hong pai in van aleiciang Kg tawh kitehsak lo dinga ‘Tawi’ Viss mah tawh kitehsak ding hi. USA te khat Kawlgamah van alei ciangin agikna ‘Tawi’ Viss mah tawh aleikul dinga pound [lbs] tawh kilei theilo ding hi. Ei lungsim sungaa omsa theihna, upna le muhna tawh na kitehkak hamtang hi. Tua ngaihsutna [theory] ih laih masiah pen akibuai den ahi hi. Atunga model thumte, Source, Message le Receptor [S.M.R] te hoih takin ih tel ciangin ih muhna, ih upnate banghangin kibanglo hiam cih ihtel ding hi. Topa Zeisu in “Thuman na thei ding uh a, tua thuman in note hong suakta-sak ding hi” acih mahbangin tua thuman [Pasian kammal] tawh ih tehkak ding tampi omhi.

Tulai takin Zomi sungah ih zahtak le mipilte in ih kammal zat khat ahi, ‘Idol’ cih tawh kikupna tampi a omlam ih thei hi. Muhna kibang hetlo ahih manin kikupna tampi tak om hi. Tua ih muhna kibanglote banghang hiam ih ci kha ding a, pawlkhatte in ‘Idol’ English hi-a, eipau in, ‘Milim’ hiven cih tawh akhiatna kilet ziauziau in tua muhna zong namkhat cih theih hi veve hi. Ih buaina pen “Idol” khiatna atheilo ki hi zenzen loin ihmuh theihpakloh akitukalhna omhi. Tua in ih dinmun [situation] kibanglo ahih manin upna lam hitaleh pilna lam hitaleh ih dinmun kibanglo ahih cianga kibuai ahi hi. Pawlkhatin Idol ih zat hang phamawh lodinghi; banghang hiamcih le hong makaihte Pasian siampi vive hi’ acizong om hi. Pawlkhat in laihding ahi hi, Zomi Lasiam kidemnaci lel un acizong omhi.

Idol zatding asangthei te in bang tawh teh [measure] uh hiam? asanglo te in bang tawh teh [measure] uh hiam? Lai Siangtho sungah munza valbang ah Idol kigelh ahih manin Pasian deihloh ahihteh zangkei ni acite pen, Laisiangtho Pasian kammal tawh teh [measure] uh ahih manin bangzahtan’ agensiam pente’n agen zongin letkhan loding hi. Ih zat hang in mawhna hi tuankei, kipawlkhopna le kipumkhat nadinga ihzat ahih manin ahoihlam in laleng hithei lelhi acizong om ahih manin tuate zong amau muhna [view] le atehna [measure] tawh agen uh ahih manin akhiatna tello hilo a a pomdan ciat uh agen hizaw hi.

Thukhupna

Laisiangtho Pasian kammal hi’ ci-a asang Zomi Christian te adingin ih khua muhna uh [worldview] pen Pasian kammal bektawh kiteh [measure] theiding hi. “Pasian kammal bekin hong suaktasak” ahihleh tua thuman thei-a, ih zatpah ding thupi ding hi. Laisiangtho ii source pen Pasian hi-a, athupuak [message] pen Zeisu Khazih ahih mahbangin ei a sangte[receptor] in zong tua method zangin hoihtak enkik leng Pasian kammal lobuang ih tehkak nading akicing zaw omlo ding hi.

Pau D. Lian., D.Min., (Ph.D)