ZSS 8: Pasian leh A Thuciam

Zokam Sabbath School Lesson pdf

Lesson 8:                              November 16- 22

Pasian leh A Thuciam


 

 Sabbath Nitaklam                              November 16

Tukaalsung simding: Neh. 10: 1-29; Gen. 4: 8- 19; Heb. 13: 20; Joshua 24; Neh. 10: 30- 39; Heb. 8: 1- 17.

 

Kamngah: “Hih thute khempeuh hangin akip thuciam khat bawlin, lai in kagelh uh a, ka uliante uh, ka Levi mite uhleh ka siampite unzong, tualai tungah aminuh gelh uhhi; Pasian biakinn kinlo in I omkei ding uhhi.” (Neh.9:38; 10:39).

          Lai Siangtho in “thuciam” a cihcih bang aci nuam hiam? Abaih penpen in gen leng, Pasian in amite tawh kilemna thuciam bawl hi ziau hi. “Note in kamite nahi uh a, Keimah note Pasian ka hihi” hongci hi.Tanglai in mipite leh makaite kikaalah kilemna thuciamna bawl ngiatngiat uhhi. Hih thuciamte in langnih tuak adingin a manpha mahmah hi. Makai te’n mipi dawm mahmah ding, khit ciang in, mipi lampan zong makaite tungah phiangsiah pia ding hi.

          Pasian tawh thuciamna pen tuabang hizawlo leuleu hi. Pasian in bang mahmah ngen hetlo a, mihingte’n thumaan zokei phial mahleh zong, Amah thumaan denden tawntung hi. Thupha leh samsiatna bekmah koihsak a, haksatna khat peuhpeuh a tuakuh ciangin, thuciam palsat ahihlamuh kiphawk pan uhhi.

                   Tukaal sungtengin, Nehemiah 10 sunga om, Israelte leh Pasian ki thuciamna a bawlthak kikna leh tangthu sungah, thuciamna bawlna in bangzah thupi cihte sin ding hihang.

 

Sunday                                            November 17

Thuciamna Ngiimna

 

          Nehemiah 10:1-29 simin. Neh. 9:36-38 simna tawh nalungsim thaksuaksak in). Kua in hih thuciamna bawl a, banghangin amaute in thukimpih uh hiam?

……………………………………………………………………………………

          Makaite bekmah in lungkim letmatthuh hiphial mahleh, “mipi khempeuh” in “Topa thupiakna khempeuh, ama ngeinate leh athukhamte zuih dinguh thuciamna abawl uhhi (Neh. 10:28,29). Pasian tawh thuciam abawlnopna bang thupisa hi dinguh hiam? Tua thu theihtheih nadingin akipatcil in Lai Siangtho thuciam omzia theih kul ding hi.

          Pasianin, mawhnei mite tawh akizop theih nadingin, thuciam hongpia ahih manin thupi hi. Mipite’n zong Pasian tungah ki-aapnopna aneih leh neihloh hong lak hi. Gen. 1 leh 2 sung piansakna tangthu in, Pasian leh mimasa tegel, amau gel kikal kizopna kisia cih hong lak hi. Mawhna honglut ciangin kizopna khempeuh kitat mang hi. Mawhna in piansakna a suksiat banah sihna zong hong piangsak lai hi.

          Cain in siatna ateel ciangin (Gen. 4: 8-19), Adam khang simna pen, thumaan a teel Seth (Gen. 5: 3-24) tungah hong tu hi. Cain khangpen Adam pan khang sagihna Lamech hundong picing mahmah in, Lamech in zi tampi neih hongphuang (Gen. 4: 17- 19) hi. Cain suanleh khakte lak ah gitlohna leh langdona lian mahmah ahih manin, thumaan Seth suan leh khak adingin lauhuai mahmah hi. Seth suanleh khak Adam pan khang sagihna pen “Pasian tawh a tonkhawm” vantungah laktohpa Enoch (Gen. 5: 24) a hihi.

          Leitungin Pasian a pom sangin, siatna pomzawtham ahih manun, gumpa hong piantheih na’ng innkuan khat zong omlo dektak phialin, mite’n siatna teelzaw uh a, thumaanmi tawmpha mahmah hi. Tua ciangin Pasian in tuiciin tungsak in susia hi. Tuiciin zong piansak sate suksiatna mah ahih hang, Pasian bawlsa mihing suksiat teng a susiakik hibek hi (Gen. 6: 11- 13).

See also  ZSL 4: Laisiangtho: Biaknathu Khempeuh Bulpi

          Mawhna in a suksiat zawhna thahatna naciamkha ngei hiam? Mawhna a zozo thahatna khatbek omhi; tua bang hi a, koici ngahtheih ding hiam?

 

Monday                                           November 18       

Tangthu Sungah Thuciamnate

          Tuiciin khitciangin, Pasianin, Noah leh asuan akhakte zangin leitung panpha kik hi.Thuciam mah zangin kizopna zongkik hi. Pasian leh mite kikaal thuciamna sagihvei bang Lai Siangtho in ciamteh hi.

          Thuciam Khatna    -Adam (Gen. 1- 3)

          Thuciam Nihna      -Noah (Gen. 6- 9)

          Thuciam Thumna   -Abraham (Gen.12:1-3)

          Thuciam Liina        -Sinai Thuciam (Ex.19 – 24)

          Thuciam Ngana      -Phinehas (Gam. 25:10-13)

          Thuciam Gukna      -David (2 Sam. 7:5- 16)

          Thuciam Sagihna   -Thuciam Thak (Jer. 31:31-34)     

          Gen. 9: 16; 17: 7; Isa. 55: 3; Heb. 13: 20 cihte simkaak in. Tawntung thuciam acihteh akhiatna bang hiam?

………………………………………………………………………………….

          Lai Siangtho sungah “tawntung thuciam” sawmleh gukvei omhi. Tuate lakpan sawmleh thumvei tepen, Abraham, Sinai ah Israelte leh David tawh kisai thuciamte ahi hi. Tua thuciamte khatsim in akiciam ngiatngiat ahihhang, tawntung thuciam ahi hi. Gen. 3: 15 sungah lungdamthu hong pulakkhia a, Lai Siangtho in zong pulak suksuk in, tawntung thuciam mah hong suak hi. Tua thuciamte khatsimin, ki itna thuciam hi a, gupkhiatna geelna sungah kitelphadiak mahmah hi. Thuciam lui leh a thakte gelsungah thuciamnate akibang ahi hi.

  1. Sianthona: “Amaute sungah ka thukham kakoih dinga, amaute’ lungtang tungah kagelh dinghi” (Jer. 31: 33; Heb. 8: 10 simkaak in).
  2. Leptuahna: “Amaute Pasian kahi ding a, amaute in keima mite ahi ding uhhi” (Jer. 31: 33 leh Heb. 8: 10).
  3. Mission nasep: “Kuamah in midangte leh a sanggamte kiangah ‘Topa thei un’ ci in akihilh nawnkei dinghi. Amaute a lianpen panin aneupen dongin kei hongthei ding uhhi” (Jer. 31: 34 leh Heb. 8: 11).
  4. Siansuahna: “Amau khialhna te ka maisak ding a, amawhnate zong phawkin kanei nawnkei dinghi” (Jer. 31: 34 leh Heb. 8: 12).

 

Tuesday                                          November 19

Thuciam Bawldaan

          Lai Siangtho siamte in, Hittites tetawh thuciam bawlna tungtawnin, thuciam bawldaan teltuak phadiak uhhi. Minam khat peuhpeuh amau’ ngeina tungtawnin a teltheih dingun Pasian in hopih hi ci uhhi.

          Israelte tawh abawl thuciamte sungah: thumasa (Pasian kua cih theihna), a khang tangthu (akizopna masate), thuciam ding thuteng; thupha leh samsiatna; teci te, theihpih na cihbangin kihelsuk diudeu hi. Mihingte’n atheihtel mahmah thute mah zangin, Pasian in kizopna hong bawl hi. Thuhilhkikna laibu in thuciamna vive hi a, Pasian in amite tawh kizopna thak a bawlpihnaahi hi.

          Tua thuciamna sungah:  1. Thu masa (Deut. 1: 1-5), 2. Khang Tangthu (Deut. 1:6 – 4:43); 3. Thuciam dingteng hilhcianna (Deut. 4: 44 – 26:19); 4. Thupha leh Samsiatna (Deut. 27-30); 5. Teci te (Deut. 30:19); 6. Vaihawmna tuam vilvel (Deut. 31: 9- 13).         

          Joshua 24 simin. Tualai a thuciamna koici bang daan hiam? 

See also  ZSS 4: Meikhuk Pan Kumpi Inn-ah

……………………………………………………………………………………………………………………………………………………………………

          Thuciamna thaksuaksakna mah ahi hi.Thumasa in “Keimah Israelte’Topa Pasian” (Joshua 24: 2) cihi.Tua teh, Joshua in, khangtangthu suutsuk in, abeisa a gamtatna teng phawkkiksak hi (Joshua 24: 2-13).Tua khitteh kam kiciam dingteng suut hi (Josh. 24: 14, 15, 23); azom thupha leh samsiatna teng suut (Josh. 24: 19, 20); Teci teng laksuk (Josh. 24: 22, 27); atawpna ah atuam vilvel vaihawmsakna (Josh. 24: 25, 26) cih bangin bawl uhhi.

          Joshua 24: 15 simin. Eite zatpah theihding bang thukhun namu hiam?

 

Wednesday                                                  November 20

Kamciamte

          Nehemiah 10: 30- 39simin.  Thuciam a bawlphat lai in Israel mite’n bangthu 4 teng kamciam uhhiam?

…………………………………………………………………………………….

Mipite in a nuai a bangin kamciam pia uhhi:

  1. Mi namdang tawh kitengzau lo ding (milim biakna lam hongtun thei)
  2. Sabbath ni hoihtak siangthosak ding (inn nasep semlo ding)
  3. Mizawng cimawhte khualna in leiba maisak kum leh Sabbath kum hoihtak zang ding.
  4. Sum leh paai, tha leh ngal, anpal, ta masa, gah masa leh sawm a khat tawh Biakinnpi panpih ding.

          Khatna pan thumna dongpen, innkuanvai, leibavai, Pasian leh Sabbath tawh kisai thute hi a, anunungpen bel (Neh. 10: 32- 39) Biakinn leh anasep vaite ahi hi. Mipite a dingin bel, thuciam kiplet ding bek hi a, mimal khatleh khat ahi a, Pasian tawh ahi zongin kizopsiam ding deihna ahi hi. Thuciamna kiplet tawntung zokei phial mahleh zong, thumaan thutak in amaute huzaap tawntung ding cih deihna ahi hi. Israel mipite in thumaan lampi zui uh hileh, amau tun nopna mun ading akigingsa hipah uhhi. Pasian tawh tonkhawm in, Sabbath thupi bawl in, biakinnpi kemcing peuhmah le uh, a tunnopna munlam maingat hipah uhhi.

          Mi tampi takte in, a kamciamnate uh lenkip khalo uhhi. Pawlkhat te’n bel lenkip saam uhhi. Pasian huhna leh, amah bulphuhna in, lampi maan tungah hong paikipsak ding hi.

          “Khentatna diktak naneih nakleh, nanuntak buppi hong kikhel ding hi. Na lungsim Khazih pumpiak lecin, a sangzaw vangliatna nang a hiding hi. Tua vangliatna in nang hong dingkipsak ding a, Pasian tungah a tawntung ki aap lecin nuntakna thak, upna nungta nanei ding hiEGWhite, Steps to Christ, laimai 48.

          Hihte nangah theihna ding panin, bangin, Nang, hong kaiton hiam?

 

Thursday                                        November 21

Biakinnpi

           Nehemiah 10: 32- 39 enkikin.Biakbuk zehte in Israelte adingin banghangin thupi hiam? “Pasian’ biakinnpi awlmawhlo in ka omkei ding uhhi ciliang uhhi” (Neh. 10: 39). I upna khempeuh khuikhopna dingin banghangin tua biakbuk phamawh hiam? (Hebrew 8: 1- 7 enlai in).

…………………………………………………………………………………….

          Biakinnpi awlmawh dingin Israelte’n kamciam pia uhhi. Mitawmno khat hi uha, siahpiak zong han mahmah kawmkal ah, a neih zahzah sungpan, thum a khat peuhmah biakinnpi nasepna dingin piak ding thukim uhhi. Kidon man hilozaw, thukham ombang in, akisam zah sang tamzaw piaktuak cih mu uhhi. Kipawlkhop nalo tawh tua biakinnpi nasepna tangtung zolo ding cih thei uh a, biaknatau tungah meikuang sak tawntung dingin, innkuanzui in kiseh uhhi.

          Gahmasa, tamasa, sawm a khat leh sumpite pen, biakinn vai a nasemte, siampi teleh Levi mite ading hingiat hi. Sawm a khat khempeuh Levi mite kipia ding hi. Tamasa peuhmah sumtawh kitanh ding a, tua sum Levi mite ading hi.Levi mite’ sawm a khat zong siampite kipia leuleu ding hi. Biakinnpi in Israel mipite’ laigilpi ahi hi. Nebuchadnezer in zong, Israel a suksiatlai in, amau upna laigilpi ahi tua biakinnpi mah susia in a sianthona khempeuh puakhia pah hi.

See also  Zokam Sabbath School Sinna 1st Quarter 2020

          Biakinnpi hoihtakin na asep ciangin, tuuno khat gawhna tawh aminam buppi’ mawhnakhempeuh sawp-siangna in, khalam thathak ngahsak den uhhi. Singlam-tehtungah Zeisu hong sihna zong tuamah ahihi (Rom. 5:5-10). Kumkhat in khatvei ta Mawh Thoih Ni omzel ahih manin, Pasianin, siatnapan suahtak na’ng lampi gelsak ahihlam phawkthei uhhi. Biakinnpi zeh leh nasep khempeuhin, gupkhiatna geelna khempeuh limpua hi a, zaikhialua mahmah ahih manin, Pasianin gupkhiat nading a geeldaante khempeuh a zaizaw in hong musak hi.

          “Zeisu in mawhneite a honkhia dingin leitungah hongpai hi cih thumaan hi a, a uphuai a sanhuai thumaan ahi hi. Keimah zong tua mawhnei te lakah a mawhphabel ka hihi” (1Tim. 1: 15). Paul in bang lametna nei naci a, eite’n zong bang lametna inei thei ding hiam?

 

Friday                                                 November 22

Ngaihsut Beh Ding: EGWhite. Steps to Christlaimai 43-48, “Consecration” cih thulusimin.

          “Biakinnpi sung nasepna khempeuh khennih in kikhen a: siampite in siangtho munah nisimin nasem uh; siampilianpa in, siangthobel munah kumkhat khatveibek mawhthoihna bawlin biakinn siansuah hi. Nisimin mawhnei peuhpeuh hongpai in, gangawh sano lutungah akhut ngaa in, amawhna teng suutsukin, mawh neilopa tungah suanh hi. Tua gan tualai ah kigo hi. Paul in ‘sisan luanglo in mawh maisakna omtheilo’cihi (Hebrew 9: 22). ‘Pumpi nuntakna pen sisungah om hi’ (Lev.17: 11). Pasian’ thukham a palsat peuhmah a nuntakna in sawng hi. Ama’ aiawh akigo gansi in amawhnate puaksak in, siampipa in siangtho munah paipih a, siangthomun leh siangthobel mun kidaalna puankhai tungah theh hi. Tuabangin mawhna khempeuh biakinn sungah kikhol hi. Munkhatkhat ah tua sisan, siangtho munah ki paipihlo lel in, siampite’n tua gangawhsa a neksak lelhun zong omhi. ‘Pasian in mipite mawhna hang akigo sapen note nek dingin hong piaksa hi’ (Lev.10: 17) cihi.” (EGWhite, The Great Controversy laimai 418).

 

Kikup Ding Dotnate

 

  1. Na kamciamsa napicin saknop mahmah khat apalsat in ki ngaihsun in. Tuabang nakhialh kikloh nadingin bangin hong huhthei dingin na umhiam?

 

  1. Thuciamna icih in kizopna a kipsakna hi. Pasian tawh ki thuciamna palsat mahleng, Amah hong thumaan vevelai hi. Pasian’ hoihna leh thumaanna teltheihna in, Amah tawh akinaizaw kizopna neihtheih nadingin hong bangci huhthei ding hiam?

 

  1. Thuciamthak sungah bangtanvei thuciam ipalsat hiam cih simkik in (Luke 22:20; Heb.8:13;9:15). Gupkhiat-na’ng ngiimnate theitel a, Zeisu’ sisan in “thuciam-thak” sungah mawh maisak nading hong kamciamte theihtel ding bangzah in thupi nasa hiam?

Download (PDF, 105KB)

 

 

Tags: ,

Admin

Admin

Top