PASIAN LUNGGULHNA

5. PASIAN LUNGGULHNA

URUGUAY | May 4
Maria Cecilia Freire, 60

Cecilia ahih leh a pasal in a maak khit ciangin pangpa kisa mahmah hi. Kum 30 a phak in zunbu cancer ngah a, nakpi takin naa sa den hi. Natna hoihlo, a dam zo nawnlo ding khat a ngah manin apasal in a maa ahi tam maw, ci-in ngaihsun hi. Ahi zongin a nu in ahih leh, a tanu Cecilia mawhsak zaw hi. Seventh-day Adventist suah ding a khentat man a, a pasal lungkim lo-in a maa hi, ci-in ngaihsun zaw hi. Cecilia ahih leh Uruguay gam Mercedes khuapi ahi, amau’ khua mah ah Adventist te’ effort bawl lai pek in, a ki tuiphum khin ahi hi. A ki tuiphum khit-a kipan in, a pasal tawh party paina leh zudawnna te ah zui nawn lo hi. “Na biakna hangin na pasal a taanta nei ve” a nu in ci hi.
Pasian’ hehpihna tawh Cecilia a cancer ki-at khia thei bilbel in hong dam kik hi. Ahizongin a biakinn pai pen hong khawl diidee hi. Vaak ding tate thum nei ahih manin na asep kul ta hi. Sabbath ni off ngah lo ahih manin Sabbath tan ding hong khawl ta hi.
Kum hong kivei-in, a tate zong hong picingta uh-a, zileta hong nei ciat uh hi. Himah leh Cecilia pen a pasal tawh akikhen vai-in alungtang na velval den lai hi. A nu hong sih khit ciangin a lungkim lohna hong khang semsem hi.

Khua Lalna
A nu’ nusiat khit ciangin Cecilia khua hong lal a, Uruguay gam i’ khuapilian ahi Montevideo ah a tanu u pen te nupu leh a tu thum te’ omna ah va beel hi. Pasian hong phawk kik a, a mau’ veng ah Adventist pawlpi om leh deih mahmah hi. Nuevo Tiempo radio pan in Pasian’ thu kigen te hong ngaingai hi. “Bang ka cih leh hih radio ngai kha thei ka hiam, cih zong gen thei ke’ng. Pasian mahmah in hong muh sak hi-in um ingh” Cecilia in ci hi.
Ni khat radio a ngaih laitak in Adventist pawlpite in amau inn pan in block 13 a gamlatna ah biakinn khat hongg ding cih thu hong za kha hi. Tua biakinn hon ni Jan 1, 2017 in, amah zong khe tawh va pai-a, biakinn honkhit lian valap hi. Tua biakinn min pen, “Goes Seventh-day Adventist Church” ahi hi. Pasian tawh kumthak kipan nuam hi. Tui kiphum kik pah nuam a, ahi zongin pastor pa in a laisiangtho thumaan theihsa te kuppih kik phot hi. Tua zawh kha nga cin, May 18, 2017 niin tui kiphum hi.
“Tua ni-a kipan in ka lung nop cihtak in nuam hi. Pasian in ka nuntakna hong bitkhel hi. Natna le lunggimna panin Pasian in hong dok khia hi” Cecilia in ci hi. Pasian in a lunggimna pan in a hotkhiat a kipan hong nuihmai zo ta hi. Pawlpi mite mahmah in zong bang ci uh hiam cih leh, “Nuihmai taktak cei lawm” ci ngeingai uh a, ama’n “Ka lung nuam ngiat” ci-in dawng kik hi.

Innkuan a’ ding Thu ngen
Biakinn pan in hong ciah ciangin, a tanu leh a maakpa in Jesu a san theih na dingun, Cecilia in thu hong ngen hi. A thu nget kawm in mangpau a siam mahmah Brazil te pawlpimi khat hong phawk kha vat hi. A maakpa pen innlam siamna nei hi-a, gamdang ah inn lam dingin ki sam hi. Ahi zongin ama’n mangpau malkhat zong thei lo ahih manin a hilh ding a zonzon laitak ahi hi. Tua Brazil mipa’ phalna tawh, Cecilia in a maakpa kiangah mangpau a hilh thei ding biakinn ah mi khat a muh lam gen hi.
“Tu-a dan in pawlpi tawh a kizop theih na dingin ka hanciam hi. Pastor pa leh a dang pawlpi mite tawh hong ki mai ngap uh a, kilawmtatna hong nei in, pawlpi sungah hong ki helhel thei hi” Cecilia in ci hi. A tanu bel haksa zawsop hi. Pasian thu a genpih simsim in a tanu in paulap zong den a, “Tua pawlpi sungah ong lutpih nuam zel maw” ci-in dawng pahpah hi. A tawpna ah Cecilia in, “Tua hipah khin sam kei ee. Kei ka sih khit a, ka thawhkik ciangin i innkuan in kong muhkik nopman hi zaw” ci-in a tanu kiang ah gen hi.
Tua kammal in a tanu’ lungtang sukha mahmah hi. Tua ahih manin amah leh a pasal zong tui kiphum ding lunggulh uh ahih man un laisiangtho sin hong kipan ta uh hi. “Pasian in na lamdang tuamtuam ka nuntakna sungah hong laklak hi” Cecilia in ci hi. Tu-in Cecilia pen 2016 sabbath 13 na sumpi khenkhat tawh a ki lam biakinn ahi, Goes Adventist Church pawlpi mi ahi hi.
Cecilia leh pawlpi mi tampite Jesu a musak dingin citak tak-a nong piak uh mission sumpi te hangin lungdam na lian mahmah hi. Topa’n thupha hongpia kim ciat ta hen. Amen.


By Andrew McChesney

See also  MSS 11: Khensatna Lianpi Bawlna
Tags:

Admin

Admin

Top