SC 10: Pasian Theihtelna

Steps to Christ by Ellen G White in Zokam, Zolai, Zopau, Tedim, Chin, Myanmar.
Christ Kiang Zuatna Chapter 10 PASIAN THEIHTELNA Ellen G White Zokam
Eite’ kiangah Amah hong kihil theihna ding le, amah tawh eite ih kikholh theihna dingin, lam tampi tak Pasian in zong hi. Nate in zong tatsat lo-in ih lungsim ah thu hong gen hi. A kihong lungtang in, Pasian’ khutma pan a hong kilang Ama hong itna le vangliatnate phawk ding hi. Thu a ngai bil in, nate pan a Pasian’ hopihnate za-in thei thei hi. Gamlakte, singkungte, paakte, meiikaite, guahzute, tuiluangte, ni kha aksite in ih lung sungah thu genin, amaute khempeuh abawl Pa tawh a kimel theih dingin eite hong sam hi.
 
Hong Honpa in, piansak nate panin thu manpha tampi hong hilh hi. Mihing’ nuntak buaina le haksatna sung nangawn ah hong hilh thute ih lungsim in aphawk zel theihna dingin, singkungte, vasate, kuam sunga paakte, mualte, bualte, le ahoih vantungte ban-ah ih ni sim nuntakna a thupiang tuamtuamte khempeuh tawh Ama thumaan thute kizom gai hi.
 
A tate in Ama nasepte paakta-a, ih leitung innte zong a hong zep sakna a et lawm nonote ah ih lungkim ding Pasian’ in deih hi. Amah in a etlawmte pakta-a, puatham a adeihhuai nadang khempeuh sangin zia-le-tong a et lawmnate pakta zaw lai hi; paakte’ et lawmna ahi sianthona le deihhuaina ih neih ding Ama’n hong deih hi.
 
Eite in ih ngaih nop nak leh, Pasian’ piansak nate in thumanna le nuamna thuphate hong hilh ding hi. Van kawhawm a sul le khap nei keei lo-a kum tawn kha tawn a (86) amau’ lampi ciat tawn a alengleng aksite a kipan aneu bel atom vui them neng dongin, nate in Piangsakpa’ thu mang uh hi. Pasian in, apiansak na khempeuh te donin khoi hi. A zai mahmah kawhawmpi sung tenga a om, sim zawh loh leitungte alen pa in, lungmuang taka la asa kiaukiau kawlgitnote zong tua hun sung mahin donin khoi hi. Mite in thu anget laitak mah bangin, a nasepna uah a kuan khiat uh ciangin zong; zan a alup uh ciang le, zingsang a athawh uh ciangin zong; mihaupa in a innpi sungah annek pawi abawl ciang le, mizawngpa in a tate tawh ankuang tawmno khat a um khop ciangin zong, vantung a aom Pa Pasian in tuate khat ciat lim takin vil gige hi. Pasian’ phawk khak loh a luang khia khitui om lo hi. Ama theih khak loh a maitaina zong om lo hi.
 
Eite in hih thu ih up takpi leh, akul lo pi-a lungkhamna khempeuh hong bei ding hi. Ih nuntakna zong tu-a banga lung kiatna tawh a kidim hi lo ding hi; lian taleh neu taleh na khempeuh pen, lung hihmawh huai tampi phamawh a sa lo, tua-te vangik a anei lo Pasian’ khut sungah ih koih ding hi. Tua hileh mi tampi in a ngah khak loh uh kha tawldamna eite’n ih ngah ding hi.
 
Na lungsim ah leitung a etlawmna na phawk ciangin, ahong tung ding leitung thak ngaihsun leuleu in. Tua leitung ah mawhna neng kha zong om lo dinga, sihna zong om lo ding hi; nate in samsiatna meel neu kha zong pua lo ding uh hi. Gupna a ngah mite’ inn ding zong na lungsim ah geel in. Lungsim a na geel theih zah sanga ahoih zaw tham pek ding ahih lam zong phawk in. Nate’ sunga Pasian’ hong piak thupha atuamtuamte sung panin eite in, A vanglian (87) tawm kha amu milmial bek ihhi hi. “Pasian in amah a itte’ a dinga abawl sak nate, mit in amu ngei kei-a, bil in zong za ngei lo in, mihing’ lung sungah zong alut kei hi,” ci-in kigelh hi (1 Corin 2:9).
 
Laphuak siamte le nate’ thu akante in, thu tampi mah gen thei uh hi. Christiante in ahih leh, leitung a etlawmna paakta-in nuamsa mahmah uh hi. Banghang hiam cihleh, amaute in a Pa uh’ khutma ahih lam thei-in, paak le, sawlbawk le, singkungte panin Ama itna mu uh hi. Pasian in mihing ahong itna ahong lahna hi, ci-a a ngaihsunte lo buang in, mual le guam, gun le tuipite a om pen pahtakna taktak nei lo uh hi.
 
Pasian in, ama nasepnate panin ahi zongin, lungsim sunga Ama Kha in na asepna panin ahi zongin, eite hong hopih hi. Eima omzia le ih kim ih pam omziate panin ahi zongin, ih kimkot a nisim a thupiangte panin ahi zongin, ih lungsim in tuate a khentel nop nak leh, thu manpha tampi kimu thei hi. Pasian’ nasepnate ngaihsun in, laphuak siampa in, “Leitung pen Topa’ hoihna tawh kidim hi.” “Ciimna aneite in hih thute ngaihsun in, Topa’ hong itna thu athei ding uh hi,” ci hi (Late 33:5; 107:43).
 
Pasian in Lai Siangtho panin eite hong hopih hi. Tua sungah Ama zia-le-tong, mite tawh hong kizopna le, tatkhiatna nasep lianpi, a kician zaw in kimu thei hi. Tang lai-a tulpite, kamsangte le misiangthote’ thu, a kicingin hong lak hi. Amaute zong “eite mah banga mihing mawkmawk mah hilel uh hi (James 5:17). Eite’ thuak ngei lungkiatnate bangmah pan a amaute zong a kitom khiat dan uh leh, eite mah bangin zia-etna sungah amaute zong tuuk uh a, ahi zongin hanciam kik a Pasian’ hehpihna tawh zawhna a ngah dante uh ih mu thei hi; hih thute (88) ih muh ciangin, dikna ih ngahna dinga ih hanciamna ah eite tha hong ngah sak hi. Amaute’ tungah thupiangte, nuam a sak pih uh khuavak le, itna le thuphate, amaute’ tunga kipia hehpihna tawh na a sepnate uh ih sim ciangin, amaute a han thawn kha in eite’ lung sungah zong, amaute bat nopna mei siangtho hong tawh kuangin, amaute banga Pasian tawh kithuah nopna ahi – amau’ zia-le-tong bangbang hong deih sak hi.
 
Thukham Lui thu a genna ah Jesu in, “Tuate in keima thu a gen uh ahi hi,” acih ciangin, tua in Thuciam Thak zong huam pha saan lai hi (John 5:39). Tuate in nuntak tawntungna ih lametna mungpi ahi Tanpa’ thu agen ahi hi. Lai Siangtho buppi in Christ’ thu gen hi. “Amah lo-a a kipiangsak na khat beek” om lo ahih mah bangin, piansakna thu a kigelh cilna a kipan, “En un, a manlangin ka hong pai ding hi,” cih kam khupna dongin, eite in Ama nasepna thute sim a, Ama awging a ngai ihi hi (John 1:3; Lahkhiatna 22:12). Topa tawh na kimeel theih nop leh Lai Siangtho sim in.
 
Na lung sung khempeuh ah Pasian’ kammalte dim sak in. Tuate in nuntakna tui hi-a, na dang taak hong pha sak ding hi. Vantung pana hong pai nuntakna an zong hilai hi. Jesu in, “Note in Mihing Tapa’ sa na nek kei uh a, A sisan na dawn kei uh leh, na sung uah nuntakna na nei kei ding uh hi,” ci hi. “Note’ kiangah ka hong gen kammalte in kha le nuntakna ahi uh hi,” ci-in Ama thu na tel gen lai hi (John 6:53, 63). Ih pumpi pen ih nek ih dawnte panin khang hi; ih pumpi tunga apiang mah bangin kha lam thu ah zong piang hi; ih kha lam pianzia a hoih sak ding le ahat sak ding pen, ngaihsut bel a ih neih thu tawh hong kisai hi.
 
Tatkhiatna nasep pen vantung mite in a et nop bel khat ahi hi; tua thu tatkhiat mite in akum kivei a tawntung a asin ding uh le la-a asak ding uh ahi hi. Tu-in zong limtak a, (89) ngaihsut ding le sin dingin kilawm hi lo hiam? Jesu’ hong hehpihna le itnate, eite’ tanga ahong kipiaknate, lim takin ngaihsut phat kik zel huai hi. Hong Tanpa le hong thuumsakpa’ zia-le-tong bekmah ngaihsut a ih neih ding kilawm hi. A mite a mawhna uh pan a hon khia dinga hong pai pa’ hong paina thu ngaihsutsut huai hi. Hih bangin vantung thute ih lung ngaihngaih ciangin, ih upna le itnate hong thahat zaw dinga, ih thungetnate zong Pasian’ mai-ah saan thamcing semsem ding hi; banghang hiam cihleh tuate pen upna le itna tawh kihel zaw sem ding hi. Tuate hong kidawk khia-in, hong thanop huai ding hi. Jesu muanna akip zaw leh, Ama tungtawn a Pasian’ kiang azuan khempeuh, mawh nei pente donga ahonkhiazo pa’ sungah nisim a nuntakna hong omzaw ding hi.
 
Honpa’ kicinnate ih lung ngaihngaih ciangin, Ama sianthona lim abang dinga abit a kikheelnopna le thaksuahnopna ih nei ding hi. Pahtawina ih piak Pa tawh kibat ding, an le tui banga lunggulhna hong om ding hi. Christ ih ngaihsut semsem ciangin, midangte’ kiangah Ama thu gen nuam semsem in, leitung mite’ kiangah Amah ih kilangsak nuam semsem ding hi.
 
Lai Siangtho pen mipilte’ a ding bek a kigelh hilo hi; mi nautangte’ a ding zong ahi hi. Gupna ngahna dinga kisam thumaante, sun kim lai banga a kitel dingin kibawl hi; Pasian’ deihna siang tak kilang napi-a amau’ ut thu a zui mite lo buang in, lampi khial lo-in, haih lo ding uh hi.
Mi khat peuh’ thugenna pen Lai Siangtho banga ih saan ding ahi kei-a, ei mahmah in Pasian’ kammalte ih sim ding ahi hi. Eima ngaihsut ding pen midangte ih ngaihsut sak mawk leh, ih hatnate baai dinga, ih siamnate mawl ding hi. Lungsim in a ngaihsutsut dinga kilawm (90) thute, a ngaihsut lohna hangin a hatna kiamin, Pasian’ kammal’ deihna bulpite zong mat theihna hong nei nawn lo ding hi. Lungsim in, Lai Siangtho sunga om thute sulzuih in, mun khat le mun khat saikak a, kha lam thute kha lam thu mah tawh a saikak ciangin, hong taanzau ding hi.
 
Lai Siangtho simna lo-ngal bangmah dang in lungsim ngaihsutna thahatsak zolo hi. Lai Siangtho sunga a taanzau thumaan thutakte zahin, ngaihsutnate asangkhai thei, lungsim hatna akhangsakthei, laibu dang omlo hi. Pasian’ thu a kisim ding zahin kisim hileh, mite in lungsim taanzau nei-in, zia-le-tong hoih nei ding uh a, tuhun a muh ding a haksa tupna akip akho nei ding uh hi.
 
Ahi zongin nawhsa tak a Lai Siangtho simna panin phat tuamna tam khol lo hi. Tua bangin Lai Siangtho buppi a kisim khit hangin, a hoihna kimu zo lo-in, a deihna bulpite zong kithei zo lo thei hi. Lungsim sungah a deihna a kitel mateng, mun khat sim a, hotkhiatna thu tawh a kizopna phawkkhiatna pen, deihna a kician le theihna siangtho om ngap lo pi-a khawk tampi sim zulzulna sangin manpha zaw hi. Na Lai Siangtho tawh om khawm in. Hun na ngah sialin sim in; na lungsim sungah ciamteh in. Lampi ah na pai kawm nangawn in gual khat bang simin ngaihsun in; tua bangin na lungsim sungah guang in.
 
Thungetna tawh sim a lungsim tak tawh ngaihna a om kei leh ciimna kingah zo lo hi. Lai Siangtho mun kimkhatte theih khialhna ding om het lo ahih hangin, et pak a adeihna a kithei zo lo mun zong om thei hi. Lai Siangtho thu pen a Lai Siangtho mah tawh saikak kul hi. Limtak in (91) kantel a thungetna tawh ngaihsut kul hi. Tua banga simna pen manpha mahmah hi. Leisung sumpiang a to pa in, lei nuai-a kiliah cip suangmanphate amuh khiat mah bangin, lungduai tak a, suangmanpha banga kiseel Pasian’ thu a kankhia mi in, limtak a azong lo mite’ muh khiat zawh loh a manpha bel thumaante hong mu khia ding hi. Kha Siangtho’ humop thute, lung sunga ngaihsutna in, nuntakna tuinak pan a hong luang khia luitui tawh kibang ding hi.
 
Thungetna lo tawh Lai Siangtho sim ding hilo hi. A laidalte ih lem ma-in Kha Siangtho’ makaihna ih ngen phot dinga, hong kipia ding hi. A kiangah Nathaniel ahong pai ciangin Jesu in, “Khialhna a nei lo Isreal mi taktak hi,” ci hi. Nathaniel in, “Cik a kei hong thei na hiam?” acih ciangin Jesu in, “Philip in ahong sap ma, theikung nuai-a na om lai-in kong thei zo hi,” ci hi (John 1:47,48). Thumaan bang hiam cih ih theih theihna dingin, Ama kiangah khuavak ih nget nak leh, ih thungetna munbute nangawn ah zong Jesu in eite hong mu ding hi. Lungsim kiniam khiat a Pasian’ makaihna a zong mite tawh khuavakna vantung pan a vantung mite om khawm ding hi.
 
Kha Siangtho in Honpa pahtawi-in minthangsak hi. Christ le Ama dikna siangtho lah khiat ding, Ama tungtawn a ih ngah hotkhiatna lianpi lah khiat ding pen Ama nasep ahi hi. Jesu in, “Keima kiang panin amah in la-in note’ kiangah ahong lak ding hi,” ci hi (John 16:14). Thumaan Kha Siangtho bek mah in, Pasian’ thumaan siang takin hong hilh thei hi. Pasian in, mihingte’ tanga asi dinga A Tapa hong piakna le, mihingte’ Sia ding le makai dinga A Kha ahong sawlna panin bang zahta-in mihingte hong khual hiam?
 
xxXxx
 
READ  Pasian' Thukhennate
Tags: ,

Admin

Admin

Top