Pasian Umlo Khatin Jesu’ Thu Hawmsawn

Adventist Mission ZomiSDA

7.  Pasian Umlo Khatin Jesu’ Thu Hawmsawn

FINLAND | May 16

Riitta-Liisa Peltonen, 73

Finland gam nitumna-khanglam a om Piikkiö Seventh-day Adventist Pawlpi ah Esko, kum 63 cina sa-in hong tung hi. “Kei, an kisam ke’ng, hih te ka lawmte a’ ding hi,” acih kawmkawm in anteh, sa, le mohte tampi an lamsang makai Riitta-Liisa Peltonen kiang panin pusuah khiat pih hi. Riitta-Liisa in ahihleh pau loin tua mithaupa en gige hi. Puan nin le khua-ul gim nam ngemngam hi. Zu naak dawn lua ahih manin a sin hoih nawnlo hi. A mit-hah bel migit meel bilbel hi.

 “Nang Khrisian maw?” Riitta-Liisa in ci hi. Esko in a mit phaitam lam nga kawm in, “Emm,  Mmm. Kei pawllo pawl hi’ng ee” cih san hi. Gam mi awn nga leh alang lakah Adventist 4,800 khawng a om na, a leitung vai mahmah Finland gam mi a tamzawte’ ngeina ahi, pasian umlo mi khat ai ve maw, ci-in Riitta-Liisa in thei pah hi. Nipi kaal khat khit kaal khat Esko Piikkiö tua biakinn ah va pai pahpah in, a lawmte nupa Pasi le Krista te a’ dingin anneek ding va thoh zeel hi. Pasi pen Turku tembaw khawlna gei-ah inntung khuhna lamsang tawh kisai company khat nei-in, sipuazi kiat luatna hangin dongtuak a om ahihlam Riitta-Liisa in thei khia hi.

Tua hangin Pasi le Krista te nupa seihpiat gawp in zu a naak dawn mahmah uh na hi gige hi. Aciil lamin pen, Nupate in a vengpa uh Esko, nektheih tampi tawh a va tun ciangin a lungdamna uh na lak uh hi. “An koi pan va ngah na hia?” ci-in Krista in na dongh hi. “Ong pai unla, en vo” Esko in cizeel hi. Nupate’n va en nuam lo laideep uh hi. Kiphatsakna lungsim kiam tuan nailo lai hi. Ahizongin cimawh ta uh ahih manun ne zeel uh hi. Tua zawh a sawt loin, Esko’ lawm khat neihsunsunh ahi, a it mahmah a ui si ciitciat hi. Amah zong dah lua mahmah ahihmanin amah guak inn ah om zolo hi. Pasi le Krista te’ kiangah giak dingin va pai hi.

See also  Cidamna

Nitak an a neek ding uh ciangin thu a nget leh Krista in lamdang sa mahmah hi. “Pasian umlo khatin bangdia thu ngen thei mawk peuhmah na hiam?” ci-in Krista in dongh hi. Tua bang peuhmah nidangin khatvei zong mukha ngeinailo hi. Esko’ gamtatzia teng a muh ciangin lamdang samahmah ahihmanin ama’ kudai in tua Esko’  paipahpahna biakinn va-et ding khensat pah hi.

A paipih dingin a pasal zongh zawn hi. Ahizongin a hansan nading un, nasia takin zu dawn phitphet uh hi. Biakinn panin an thoh dingin a kigualh uh ciangin zu kham lua mahmah uh ahihmanun dingkip theilo phial uh hi. Nupate a maikaal ciangin zong vapai kik uh-a, a kaalkik ah zong pai kik uh hi. A sawtvei simkhit ciangin Krista in Khrisiante’ Pasian’ late, lungdamna thu ki gengente hong lunglut pianpian hi. Sabbath kikhopnate ah hong kisin hi. Esko in Krista lunglutna a muh ciangin nuihsan hiuhiau hi.

“Tu-in ka mission nasep lawhcing taktak ta ing ei,” ci-in damtakin Krista’ kiangah huausim khiankhian hi. Tuazawh asawt lo, 2017 kum bei lamin Esko si hi. Tua hun ciangin Krista a zudawn khawl in tui kiphum khin ta hi. Azi’ kikhelna amuh ciangin Pasi zong a lungtang Jesu khutah aap hi. “Tu peetpeet in upna kici ka muta hi” ci hi. 2018 kum-a Adventist Khaalsung Camp ah ki tuiphum dingin ki thawi ta hi. Tu-in nupate pawlpi sungah thalawp mahmah in, kikhop hun khempeuh ah tungbaih den uh hi. Pasi in biakinn ah, an thoh dingin hongpai mite nekding an huan in om hi. Genzawhloh kikhelna amaute nupa’ sungah om hi.

See also  Sabbath tawh kisai buaina

Nitaak khat, anhuan in a om laitakin a maitang lungnopna tawh taang ngiat hi. A zingsang ciangin a anbuuk sungvuah a sisa in a om, Krista in mu hi. A sih in kum 51 pha hi. Adventist biakinnpi sungah sihvui hunbawlna kinei pah-a, a innkuanpih thak ahi pawlpi mi khempeuh’ lungsim sukha mahmah hi. 

Tu-in kum 40 apha Krista in pawlpi sungah lawpmahmah a, ama’ nu mahmah zong biakinn ah hong kikhop pih den hi. Biakinn panin anhawm kipat zawh kum 5 sungin mi 10 hong kituiphum khin ta hi. Riitta-Liisa in tua bangin mite tui hong kiphumna hangin Pasian phat hi. Ahizongin Esko pen lamdang sa mahmah hi.

 “Amah’n Pasian umlo napi a lawmte Khris kiangah hong tunpih hi. Tua bangin a lawmte biakinn ah hong kikhop uh ciangin amah lungdam mahmah hi. Amah in mite nuntak tawntungna munah tun pih hi. Ahi zongin amah’n Pasian um lo hi” Riitta-Liisa in ci hi. Pasian umlo khat in mite Jesu’ kiangah tunpih thei ahihleh nanglekei in bang hangin tunpih thei lo ding i hi hiam?

By Andrew McChesney

Tags:

Admin

Admin

Top