Pasian Umlo Missionary

Jan Haugg, 30

Germany; February 22

 Jan Haugg a’ dingin kiim le paam hotkhiatna nasep sangin nuam asakzawk bangmah dang om lo hi. Kum 18 apha, high school sangnaupang khat ahihna tawh German nainganzi party khat ah ‘khuavannuai buaina vensakna’ cih kipawlna khatah amah zong va kihel hi.

University ah, a lawmte pawlkhat kiimlepaam puahna tawh kisai video film te enkhawm dingin zawn hi. Ama’ nuntakna mahmah tawh cidamna lam zui-in annek tuidawn, zinsuk zintohna, sianthona cihte-ah hanciam takin mite’ etteh hih ding hanciam hi. Alawmte’ khaansungte ah valutin akisam khol lo-a kivaak meite va mitsak hi, tua bangin ahih ciangin pawlkhatte-in nawngkai nasa mahmah uh hi.

Amah pen Jesu kihel lo-a missionary sem ahi hi. Ama’ biakna pen kiimlepaam puah ding ahi hi. International business Sangnaupang khat ahihna tawh Jan in Norway khuapi Oslo a, bank ah nakpitakin lungmuanna a om theih nadingin sem hi. Ahi zongin Oslo ah om suak ding lemlohna khat om hi. Tua khit ciangin abeisa kum nih lai-a, aki theihpih, khuakhal sung a-omna Norway mite innkuan khat’ lo-ah a-omlai hong phawk kik hi. Tua innkuante email khakin huhna ngen-a, ni bangzah hiam khat khitciangin, amaute in Oslo ah om-nading munkhat amuh khitna thu zasak kik hi.

Oslo ah Jan atunzawh asawt loin, avenglepaamte Seventh-day Adventist vive ahihna athei hi. Ama’ khaanpih thak pa, David Mikkelsen zong Adventist mah nahi-a, biakinn huang sung-a inn-awng khatah aom ahihlam thei hi. Jan ahihleh Germany nisuahna lam gam-a, Pasian a-um vetlote’ pawl pan hi-a, Pasian om vet lo hi, aci mite’ lakah akhauhpai phadeuh laite ahi uh hi. Germany nisuahna lam gamah, mimal bup i’ 60% bang pen pasian omlo aci (atheist) vive ahi uh hi.

Tua lai-ah a-om theih alungdam hangin, Jan in, “Amaute-in kei hong zolzol ding uh hi, ahi zongin hong ngah ngei kei un teh. Kei zong ka up bang hiam cih ka thei hi,” ci-in ngaihsun hi.

Kha thum sungbang, bangmah thu ging lo hi. Jan in Adventist sangnaupangte paak ta hi, ahangin, khat veivei zu simdawn in sang thukhun a palsat khak zel hangin, amaute in amah hoih takin kikholh pih veve uh hi. Ama’ kisapnate hoihtakin vaihawmsak uh ahih manun amaute’ tungah lungkim mahmah hi.

Ni khat, Norway khanglam ah gunkuang tawh khualzin dingin khangno sawmnga bang akisehna-ah Jan zong, apai dingin kizol hi. Tua bangin apualamah pai ding Jan in lawp mahmah hi. Banghanghiam cihleh a lawmte in ama’ lunglut ahi, kiimlepaam kepna pen lunglut pih mahmah uh hi.

Tua khit ciangin khangno makai, Joakim Hjortland in Lai Siangtho sin dingin Jan zawn hi. Jan lunglut khol lo hi. Ahizongin Joakim pen nial nuam lo, dahsak nuam lo hi. A pailoh theih nading paulap zong pah hi. “tuni hun ngah pha kei veng aw. Zing ciang i ci zaw dia?” ci hi.

A zingciang zingsangin Joakim in, “Hey, zanni-a, i kiho naphawk lai hia? I Lai Siangtho sinding bang ci, a lem dia?” va ci hi. Jan in adang paulap khat zongg leuleu hi. “Ke’n Lai Siangtho sin thei kei ning, banghanghiam cihleh ke’n Lai Siangtho bu nei lo” ci leuleu hi. Ataktakin tua a paulap ahaihuai taktak ahihlam nung phawk hi. Ahangin, a veenglepaam khempeuh Lai Siangtho tawh kidim vive ahi uh hi. Tawmvei sung mahin Lai Siangtho khat kipia pahlian hi.

Lai Siangtho a uptheih nadingin, mi khatpeuhin tua pen Pasian’ Kammal ahihna a-up phot ding kisam hi. Jan in Pasian, cih photphot nangawn a um kei hi. Joakim in a Lai Siangtho hong leem in, Daniel alian 2 hong lak hi. Daniel’ gen kholhna ahi, Babylon, Medo-Persia, Greece, le Rome kumpi gamte hong khangin a kiatsuk nading thute amuh ciangin Jan in lamdang sa mahmah hi. Tulaitaka Europe gam pen genkholhna sunga tungman le sik kihel pan-a khenkhat ahihna thute hong thei hi.

Lai Siangtho sungah nalamdang pawlkhat om ahihna atheih ciangin hoihtakin sinbeh nuam ahih manin khat lei pah hi. Olso a, i pawlpi mi, a lawmte-in, a theihnop Lai Siangtho thuthukpite leh mawhna kipatcilna cihte na hilh uh hi. Tua banah banghangin Pasian in Satan thatsuk pah lo, cihte banah nate ama’ thu-a piang toto cih sangin Pasian in piangsak hi, cih thute Lai Siangtho sungah aom lam hilh toto uh hi. Tua bang danin hun hong pai toto a, alungtang Pasian’ khut sungah akipiak nadingin a khensat ni hong tung ta hi.

“Khrisian suah ding ka ut ngei het kei hi, aih hangin a maan ahihna ka theih thute hong gik luamahmah ahihmanin ka thuakzo nawn kei hi. Pasian om taktak ding hi. Pasian a om takpi leh a omna thu hong theisak ding a, paulap zonding om nawn loin zuih ding bek hi ta hi” Jan in ci hi. “Kua in a guallel pawlte pawm nuam nahi uh hiam? Na pawlpih nop veve leh tua sangin hai zawkna om nawn lo ding hi. Ke’n ka hih leh a gualzo lam bek ka pawlpih ding hi” Jan in ci hi.

Tu-in Jan kum 30 pha ta-a, pastor sem dingin Austria gam sung Bogenhofen Seminary ah pil sin hi. Buaih a lak khit ciangin ama’ gam ahi Germany nitumna lamah Pasian umlo mite’ kiangah thu gen ding ngimna nei hi. “Amau’ thatang suangin leitung a honkhia nuam (green movement people) kici mipawl te’ lakah nasep ding ka lunggulh phadiak hi. amaute in Jesu thei khin photphot le uh, amaute’ hanciamna pen lampi maan ah heizo lengin nakpi takin amaute muibun ding uh hi” Jan in ci hi. Amaute pen missionaryte hi uh-a, ahi zongin Jesu um lo uh hi. Amaute’ nasepna in tawntung nuntakna ngah sak het lo ding hi” Jan in ci hi.

Tu kuata Sabbath 13 na mission sumpi khenkhat tawh Germany gam, Darmstadt khuapi sunga om Marienhohe Academy Sangpi building te puahna in kizangh ding hi. Phal tak in nong piak khiat manun lungdam mahmah hi. Topa’n thupha hong pia hen.

By Andrew McChesney