ZIRLÂI 8         November 16–22

 PATHIAN LEH THUTHLUNG

 

SABBATH CHAWHNÛ            November 16

CHHIAR TÛRTE: Neh. 10:1–29, Gen. 4:8–19, Heb. 13:20, Josua 24, Neh. 10:30–39, Heb. 8:1–7.

 

CHÂNGVAWN: “‘Tin, chûng zawng zawng avâng chuan thu nghet tak thlungin kan ziak bawk a; kan hotute, kan Levia-hote leh kan puithiam- ten min nemnghehsak a. . . .Kan Pathian in hi kan thlahthlam tûr a ni lo’ tiin dân kan siam bawk a” (Nehemia 9:38; 10:39b, NKJV).

 

BIBLE-in ‘thuthlung’ tia a sawi hi eng nge ni a awmzia? A hrilhfiah dân awlsam ber chu Pathian leh mihring inkâra inremna dân tih hi a ni ang. Amah Pathian ngeiin, “Ka mite in ni ang a, kei hi in Pathian ka ni ang” tiin a hrilh a. Hemi ni lo hi thuthlung dang, hmânlâi miten ziaka an lo dah pawh hmuh tûr a awm nual bawk a; mahse chûngte chu lalte leh a hnuâia mite inkâra inremna thuthlung a ni tlângpui.

Hêng thuthlungte hi chu a leh lam leh lam tân pawha tha ve ve a nih avânga siam a ni hlawm a. Lal chuan a hnuaia awm mipuite chu tha takin a enkawl ang a, chumi manah chuan mipuiten chhiah an châwi ve thung dâwn a ni. Mahse, Pathian leh mihring inkâra thuthlung erawh hi chu a danglam bîk khawp mai. He thuthlung atang hian Pathianin chan tûr eng mah a nei ve lo va; chuti chung chuan, mihringte chu thu an thlunah lo rinawm lo pawh ni se, ani erawh chu a rinawm tlat dâwn tho niin a sawi. Thuthlungin a ken tel malsâwmnate leh ânchhiate hian Israel mite chu an chunga thil tha lo a lo thlenin thuthlung an bawhchhiat vâng a ni tih a hriattîr dâwn a ni.

Tûn kârah hian Nehemia 10-a Israel miten Pathian nêna thu an thlun thar leh chungchâng hi kan thlîr ho ang a. Chu bâkah chuan, Bible-a thuthlung an siam dân chanchin leh a pawimawhna pawh a then a zâr kan sawi bawk dâwn a ni.

 

SUNDAY          November 17

THUTHLUNG AWMZIA

Nehemia 10:1–29 (Nehemia 9:36–38 pawh chhiar nawn leh la). He thu thuthlung hi tuten nge siam a, eng vânga thuthlunga lût ve nge an nih le?

An hnam hotute chauh khân thuthlungah hming ziak mah se, mi dang zawng zawngte pawh thuthlungah chuan rîn luh ve vek niin, Pathian Dân pawh an zawm ve theuh tûr thu an puang a (Neh. 10:28, 29). An zavâia tel theuh an duhna Pathian nêna thuthlung an siam chu eng nge maw a nih chiah rêng le? He zawhna hi chhâng tûr chuan a bûl rêt atanga sawi that leh a, Bible-in thuthlung a hman dân pawh kan hriatthiam hmasak phawt a tûl dâwn a ni.

Thuthlung chu suala tlu tawh mihringte Pathianin a rawn ngaihven zui lehna hmanrua pakhat leh Pathianin mihringte nêna inlaichînna neih a duhzia tilangtu a nih avângin a pawimawh hle a. Tin, mihringten Pathian hnaih an duhzia an tihlan pawh phalsak an ve ni tho bawk.

Genesis 1 leh 2-a thil siam chanchin kan hmuh hian mihring hmasa berte siam an nih thu min hrilh a ni ringawt lo va, mihring leh Pathian inkâra inlaichînna awm thu leh mihring leh mihring dang inkâra inlaichînna awm thu pawh a puang tel bawk a ni. Amaherawhchu, sual lo lût khân inlaichînna zawng zawng a tichhe zo ta vek a. Chuvângin sual chu thil siamte tichhetu, thihna thlentu a ni tihna a ni.

Adama thlahte chu an lo inthen darh ta a, Kainan thil tha lo a thlang a (Gen. 4:8–19), Setha erawh chuan Pathian kawng zawh a thlang ve thung (Gen. 5:3–24). Kaina thlah kal zêl atangin Lameka a lo piang chhuak a (4:17– 19)—ani chu Adama atanga chhuan sarihna niin, nupui pakhat âia tam neih rawn chîng chhuaktu a ni nghe nghe. Kaina thlahte chu tharum thawhna leh phuba lâk hmang an nih lâiin, Setha thlahte erawh mi rinawm tak a ni hlawm

1. Setha thla kal zêl, a chhuan sarihna chu Enoka niin, ani phei kha chu Pathian nên an lêng dûn thîn a (Gen. 5:24), a nung chungin vânah lâk chhoh a ni ta nghe nghe a ni.

Vânduaithlâk takin khawvêl hian Pathian âiin thil sual leh tha lo a thlang zâwk tlat zêl a, mi rinawm thlahte pawh kha lo tlêm tial tialin mihringte chhandamtu tûra tiam Chî rawn pian chhuahna tûr chhûngkua pawh an mang mai hlauhthâwn awm khawp a ni ta hial mai. Chumi hunah chiah chuan tui lêt hmangin Pathian a rawn che ta a. Tui lêt kha thil siam tichhetu, nunna tihboralna chu ni tho mah se, mihringten an tihchingpen tawh chin zawng chauh kha a rawn tichhia a ni (Gen. 6:11–13).

Sual chu thil tichhetu a nihzia hi mi mal takin i lo tawng ve tawh em? Sual hneh theitu awm chhun chu eng nge ni a, chu thil chu eng tin nge kan lo chhawr tangkâi ve theih ang?

 

THAWHTANNI            November 18

BIBLE HUN LÂIA THUTHLUNG AN SIAMTE

Tui lêt hnu khân Pathian chuan Nova leh mi dangte hmangin chhandamna hna a thawk tan leh ta a. Anni nên hian inlaichînna tha neih leh tuma beiin, chu inlaichînna a laimu ber chu thuthlung bawk a ni leh a ni. Bible-ah hian Pathianin mihringte thu a thlunpui lian tham deuh deuh pasarih kan hmu a, chûngte chu:

 

Thuthlung Pakhatna—Adama (Genesis 1–3)

Thuthlung Pahnihna—Nova (Genesis 6–9)

Thuthlung Pathumna—Abrahama (Genesis 12:1–3)

Thuthlung Palina—     Mosia  leh  Israel hnamte (Sinai Thuthlung tiin emaw, Mosia Thuthlung tiin emaw pawha hriat a ni; Exodus 19–24)

Thuthlung Pangana—Phinehasa (Num. 25:10–13)

Thuthlung Parukna—Davida (2 Sam. 7:5–16)

Thuthlung Pasarihna—Thuthlung Thar (Jer. 31:31–34)

Hêng Bible chângte hi chhiar la. ‘Kumkhaw thuthlung,’ ‘chantuana thuthlung’ an tih hi eng nge ni a awmzia? Gen. 9:16, 17:7, Isa. 55:3, Heb. 13:20.

Bible-ah hian ‘kumkhaw thuthlung’ tih emaw, ‘chatuana thuthlung’ tih emaw tawngkam hi vawi 16 lâi sawi lan a ni a. Chûng zînga 13 chu Pathianin Abrahama a thlunpui te, Sinai tlânga Israel mite a thlunpui te leh Davida a thlunpui te nêna inzawm a ni. A chunga thuthlung chi hrang hrang kan han sawi lan tâkte khian danglamna bîk eng emaw chu nei theuh tho mah se, ‘kumkhaw thuthlung’ tiin emaw ‘chatuana thuthlung’ tiin emaw sawi a ni vek a. Chatuana chanchin tha chu a vawi khatna atân Genesis 3:15-ah hian puan tawh ni tho mah se, Bible pum   puiah hian a tahtawl tê-a rawn lan chiantîr chhoh leh zêl a ni ang chiahin chatuana thuthlung pawh hi a rawn lang fiah telh telh a ni. Thuthlung tin mai hian chatuana hmangaihna thuthlung, chhandamna ruahman kimchang taka puan chhuaha awm tawh chu a awmzia thûk zâwka kan hriatthiam theih nân min hrilhfiahsak zêl a. Thuthlung Hlui leh Thuthlung Thar te hi a hranga sawi ni thîn mah se, thil thuhmun pali ken tel an nei ve ve a, chûngte  chu:

1. Tihthianghlimna/Serhhranna: “An rilru-ah ka dân ka dah ang a, an thinlungah ka ziak bawk ang” (Jer. 31:33, NKJV; Heb. 8:10 pawh en bawk rawh).
2. Inremlehna: “Kei hi an Pathian ka ni ang a, anni chu ka mite an ni ang” (Jer. 31:33, NKJV; Heb. 8:10).
3. Chanchin tha hril: “Tu mahin, ‘LALPA chu hre rawh’ tiin mahni thenawm leh mahni unaute an zirtîr tawh lo ang a; a tê ber atanga a lian ber thlengin, an zâ-in mi hre theuh tawh dâwn si a” (Jer. 31:34, NKJV; Heb. 8:11).
4. Thiamchantîrna “An khawlohnate chu ka ngâidam ang a, an sualnate pawh ka hre reng tawh dâwn si lo va” (Jer. 31:34, NKJV; Heb. 8:12).

 

THAWHLEHNI            November 19

THUTHLUNG PIANHMANG

Bible zirna lama mi thiamte chuan Bible-a thuthlung kan hmuhte hi kalhmang fel tak neia duan ni hlawmin an hria a; chutiang chu hmânlâi Hit mite thuthlung siamah pawh khân hmuh theih a ni ve tho nghe nghe. A awmzia chu, Pathian chuan a thuthlung duan chu a lo dawngsawng tûr mihringten an lo hriatthiam theih nân an hnam nunphung nêna inrem tûr thei tûr ang berin a hriattîr thîn tihna a ni.

Hmânlâi Israel mite huna thuthlung an siam langsâr deuh deuhahte kha chuan hêngte hi a awm zêl tlângpui: thuhmahruai (Pathian chu tu nge nih sawifiahna); tûn hmâa Pathian leh mihringte inkâra thil thil lo thleng tawhte sawifiahna; intiamkamna emaw, dân emaw; thuhrehtute; thuthlungah an rinawm a ni tih tilangtu chhinchhiahna. Pathian pawhin hmânlâi huna a mite hnênah khân a thil hrilh duh sawi nân hetiang deuh a lo hmang ve thîn hi a mak kan ti tûr a ni lo va. An hriat than thil eng eng emaw hmangin a sawi duh chu a hrilh mai thîn a ni.

Entîr nân, Mosia khân Israel mite chu an Pathian nêna thuthlunga inlaichînna thar neihpui tûrin a sâwm a, chuvâng chuan Deuteronomi lehkhabu pum pui hi thuthlung ziarâng anga ziah a ni ta rêng a ni. He lehkhabu- ah hian thuthlung chu hetiang hian sawi chhuah a ni    a:

(1) thuhmahruai (Deut. 1:1–5); (2) chanchin kal tawh sawi chhuah lehna (Deut. 1:6–4:43); (3) intiamkamnate emaw, dânte emaw (Deut. 4:44–26:19); (4) malsâwmna leh ânchhia (Deuteronomi 27–30); (5) thuhrehtute (Deut. 30:19); a tâwp berah (6) a bîk taka an zawm tûr dânte (Deut. 31:9–13).

Josua 24 chhiar la. Hemi bungah pawh hian eng tin nge thuthlung kalphung chu puanchhuah a nih sawi rawh.

Josuan a rawn thar thawh leh thuthlung pawh khân a hmâa thuthlung lo awm tawh sate kalphung tho kha a rawn zui ve leh a. A hmasa berin, thuhmahruai a awm phawt a, chutah chuan Pathianin ‘LALPA, Israel-te Pathian chu’ a nih thu a sawi a (Josua 24:2). Chumi hnu chuan Israel-te chanchin kal tawh chipchiar deuh taka sawi zui niin, chumi hmang chuan an tâna Pathianin thil a lo tih tawhte hriattîr an ni a (Josua 24:2–13). Chutia chanchin kal tawhte  sawi chhuah a nih hnu chuan intiamkamnate leh dânte (Josua. 24:14, 15, 23), malsâwmnate leh ânchhiate (Josua 24:19, 20), thuhretute (Josh.24:22, 27) sawi lan a ni ve leh a, a mite chauhin an zawm atâna Pathianin a pêk dân thenkhat sawi langin khâr a ni ta a ni (Josua 24:25, 26). Hetah pawh hian Israel mite hnêna Pathianin a lo hruai tawh dân leh thuthlunga anmahni tih ve tûr lamte hrilh hriat nân thuthlung kalphung tlângpui bawk kha a rawn hmang leh a ni.

Josua 24:15 chhiar la. Hetah hian keini tûnlâi huna mite pawhin kan zawm ve theih thu pawimawh tak eng nge awm?

 

NILÂINI           November 20

THUTIAMTE

Nehemia 10:30–39 chhiar la. Thu an thlun thar anga Israel miten thil pathum tih a tiam tâk chu engte nge ni?

Mipuite chuan hêngte hi tih an intiam  a:

1. Hnam dang mi chu nupui/pasalah an nei lo vang (milem biaknaa hruai lûttu tûr chu mi tu mah neih loh tûr a ni).
2. Tha takin Sabbath an serh ang (thianghlim taka Sabbath an serh theih loh phahna tûr thil chu eng mah an ti lo vang).
3. Leibâ-te an ngâidam ang a, mi retheite hamthatna tûr leh bâwihten zalênna an lo hmuh ve theih nân kum sarih kum zêl chu ram chawlhtîr kumah puangin kum sawm ngana zel chu jubilee kumah an puang bawk ang.
4. Tempul rawngbâwlna kalpui nân leh a thawkte châwm nân sum leh pâi an thawh ang a, an thlâi thar hmasa te, an fa piang hmasa ber te, an sâwma pakhat te an pe ang, chutia an tih chuan chhum lo chat lovin chibai bûkna dik tak kalpui reng theih a ni dâwn a ni.

An thutiam hmasa pathumte hi an mihringpuite nêna an inlaichîn kualna (inneihna leh leibâ inngaihdamna) leh Pathian nêna an inlaichînna tawnna (Sabbath serh) lam hawi a ni a, chutih lâiin, a hnuhnûng ber hi chu tempul nêna inkungkaih thil a ni ve thung (Neh. 10:32–39).

Juda-ten an tum ber chu thuthlungah an ding nghet tlat a ni tih lantîr a ni a, chuvâng chuan Pathian leh an mihringpuite nêna inlaichînna tha an neih theihna tûr thilte chu tih zêl an duh a ni. Duhthusâma thain thuthlung chu zâwm reng thei lo mah sela thil chîn than tha leh tih dân phung ngheta an neihte chuan a khalh ngîl hrâm hrâm tho dâwn a ni tih an hria a. Israel hnamte khân kawng dik an zawh dâwn a nih chuan an duh ang dinhmuna han dah theitu tûr thil chîn tha eng eng emaw an chher a ngâi a. Pathian nêna len dun an duh a nih chuan, Sabbath ngaih pawimawh leh tempul ngaihsak kha a rahbi pawimawh tak a ni bawk.

Vânduaithlâk takin, Nehemia lehkhabu tâwp lama kan hmuh ang hian an thutiamte an hlen tha lo hle mai a. Chutih rual chuan, mi zawng zawngin hlen vek lo mah se, a hlen tam tak an awm tho bawk. Pathianin min tanpui a, amah chu kan en tlat reng a nih chuan chîn than tha kan lo nei thei ang a, kawng dik kan zawh thei bawk ang.

“I duhthlanna kha dik taka i hman chuan i nun pum pui kha tihdanglamin a lo awm ang. Krista hnêna i duhthlanna i pêk chuan lalna leh thiltihtheihna zawng zawng chunga awma nên chuan in lo tang dûn dâwn a ni. Nghet taka i din theih nân chung lam ata chakna i dawng ang a, chutianga Pathian hnêna i inpumpêk chhunzawm reng a nih chuan nunna thar mai ni lovin, rinna thar pawh i lo nei bawk dâwn a ni.”—Ellen G. White, Krista Panna Kâilâwn, p. 33. Heta inziakte hi a taka i lo chan ve theihna tûr dâl thei eng thil nge awm le?

 

NINGANI         November 21

TEMPUL CHU

Nehemia 10:32–39 hi chhiar nawn leh la. Eng vângin nge Israel mite tân khan tempul rawngbâwlnate chu “kan Pathian in chu kan thlahthlam lo vang” (Neh. 10:39) tih thu an sawi phah hialna khawpa pawimawh a nih le? Eng vângin nge an sakhaw biaknaah khân tempul hi a pawimawh viau? Heb. 8:1–7 en bawk ang che.

Israel mite chuan tempul ngaihsak an intiam a. Mi tlêm tê, sum leh pâi thawh chhuah kawnga anmahni awpbettu lalten an khuahkhirh tlat ni mah se, an thil neih beitham tak atang pawha thawhlâwmte thawh a, tempul rawngbâwlna chu awm ve satliah mai ni lova a lo than zêl theih nân an chhâwmdâwl tlân a ngâi tih an hria a. Chutichuan, tempul rawngbâwlnaa hman atân dânin a phût anga chhiarpui an neih kumah chauh ni lovin, kum tin shekel hmun thuma then hmun khat pêk an remti ta a. A chhan pawh dânin a phût bâkah chêt a ngâi tih an hriat vâng a ni. Chu bâkah chuan, chhûngkaw thenkhat chu mâichâma tuah tûr thingfâk la khâwm tûrin an ruat bawk a, chutianga an tih loh chuan mâichâm mei chu a mit mai  ang.

An thlâi thar hmasak ber te, an fa hmuh hmasak ber te, sâwma pakhat te leh thawhlâwm te chu tempul rawngbâwlna chanpual niin, puithiamte leh    Levia-hote chhawmdâwl nana hman tûr a ni a. An thawhchhuah hmun sâwma then hmun khat chu Levia-hote hnênah an pe vek tûr a ni. Tin, an fa hmuh hmasak berte pawh pawisaa tlanin, chu pawisa chu Levia-hote bawk hian an dawng ang. Levia- hote chan hi hmun sâwmah then ve leh niin, chuta hmun khat chu puithiamte hnênah an pe chhâwng ve leh thîn a ni.

Temple kha Israel hnam tâna thil pawimawh tak a ni a. An sakhaw nuna a bulpui ber pakhat a nih avângin Nebukadnezzaran tempul a tihchhiat a, bungbêl thianghlim zawng zawng a hawn vek khân chhiatna râpthlâk ber rawn thleng ni-ah an ngâi hial a  ni.

Mumal taka tempul rawngbâwlna kalpui a nih lâi chuan an hnam sakhaw nun pawh a nung tha hle a, a chhan pawh Berâmno thihna kal tlanga lo thleng tûr sual harsatna chin felna chu mite a kawhhmuh vâng a ni. Krawsa Isua a thih khân chu thil chu a rawn thleng ta chiah a (Rome 5:5– 10). Chu bâkah chuan, kum tina an hman thin Tlanna Ni- ah khân Pathian chuan sual leh thil tha lo zawng zawng thil tha-in a la luahlan vek theih nân ruahmanna a siam a ni tih zirtîr an ni bawk a. Tawngkam danga sawi chuan, tempul kha mihringte hnêna chhandamna ruahman puanchhuahna hmanraw pawimawh tak a ni kan ti thei ang. Tempul rawngbâwlna kan thlîr atanga zirlâi kan zir chhuah theihte hi a ropui hlawm hle mai a, Pathian nungchang dik tak kan hriat theihna atân leh chhandamna ruahman chu kan lo man thiam theih nâna thil tûl tak a ni hlawm bawk.

“Krista Isua chu khawvêlah hian mi sualte (kei hi an zînga sual ber ka ni nghe nghe a) chhandam tûrin a lo kal tih thu hi a rinawmin a va pawm tlâk êm!” (1 Tim. 1:15, NKJV). Paula thil beisei chu eng nge ni a, eng tin nge keini pawhin beisei berah kan lo neih ve theih ang?

 

ZIRTÂWPNI     November 22

ZIR BELHNA: Ellen G. White-i lehkhabu, Krista Panna Kâilâwn phêk 29–33-a, ‘Pathian Hnêna Indah Hranna’ tih kha chhiar ni se.

“Lei biak bûka rawngbâwlna kha chi hniha then a ni a: puithiamte khân hmun thianghlimah ni tin rawng an bâwl thîn a, chutih lâiin, puithiam lalber khân hmun thianghlim berah kum khata vawi khat lûtin tlanna hna pawimawh bîk, biak bûk tlenfâi nân a thawk thîn bawk. Ni tin mi sual, an sualte sim chu biak bûk kawngkâah an thilhlan tûr nên an rawn kal thîn a, an sualte thâwi nâna hlan tûr ran lu chungah chuan kut nghatin an sualte an puang a, chutianga an tih chhan chu sualna eng mah nei lo ran hnênah an sualte an nghat ta tih entîr nân a ni. “Chutichuan, ran chu an talh ta a. Tirhkoh Paula chuan, ‘Thisen chhuak lovin sual ngaihdamna a awm lo’ tiin a lo sawi a. Leviticus 17:11-ah pawh, ‘Tisa nunna chu thisenah a awm si a’ tih thu kan hmu bawk. Pathian dân bawhchhiata awm ta chuan a bawhchhetu nunna a ngiat tlat mai a. Thil tisualtuin a chân tâk nunna, a sual man phurtu thisen chu puithiamin hmun thianghlimah keng lûtin mi sualin  a bawhchhiat dân inziahna lungphêk an dahna Pathian bâwm zâr hliahtu puanah chuan a theh a.

“Hetianga a tih hian thisen hmangin sual chu biak bûkah suan luh a ni ta tih a entîr a. Thil thenkhatah chuan, thisen chu hmun thianghlimah ken luh a ni ve lo tlat thung; Mosian Arona thlahte hnêna, ‘Pathianin mipuiho khawlohna phur tûra a pêk che u a ni’ (Leviticus 10:17) tia a lo hrilh ang khân a sa chu puithiamte ei atân an dah thîn

419. Hêng rawngbâwlna uhrsûn tak tak pahnihte hian sual chu thil tisualtu hnên ata biak bûkah suan luh a ni ta tih an entîr ve ve a ni.”—Ellen G. White, The Great Controversy (Indona Ropui), pp. 418, 419.

 

SAWI HO TÛRTE:

1. Thu in lo tiam tawh, hlen chhuah ngei pawh in tum, mahse, in bawhchhiat leh tâk site kha han ngaihtuah lêt leh ula. Chu in thil lo tawn tawh atang chuan in thil tihsual ngâi ang chiah kha chu in tihsual nawn tawh lohna turin eng nge in zir chhuah le?
2. Thuthlung chu inlaichînna tha siamtu a ni. Pathian nêna thu kan thlun kha kan lo bawhchhe tawh a; keimahni’n kan tih ve tûr kan tih loh châng pawhin ani chuan a tih tûr a hlen zêl tho a ni. Hetianga Pathian thatzia leh rinawmzia kan hriatna hian eng tin nge amah nên inlaichînna thûk zâwk min neihtîr theih ang a, kan nun dân tûr ang taka kan nun phah theih bawk ang le?
3. Pathian laka i lo rinawm loh tawh dânte leh ‘thuthlang thar’ hnuaia thutiam kan neihte (Luka 22:20; Heb. 8:13, 9:15) hi ngaihtuah la. Chuti a nih chuan, eng vângin nge chhandamna ruahman leh a thisen hmanga kan tâna ‘thuthlung thar’ nemnghettu Isua inhlanna azâra sual ngaihdamna thutiam kan neihte hi hriatthiam a pawimawh êm êm?