Zokam Lesson 1: PATMOS PAN LUNGDAMNA THU

PATMOS PAN LUNGDAMNA THUPATMOS PAN LUNGDAMNA THU

Dec 29- Jan 4

Sabbath   Nitaklam                                                                 Dec. 29

Tukaalsung sim ding: Mang 1:1-8; Johan 14:1-3; Thu-hilhkikna 29:29; Johan 14:29; Rom 1:7; Phil 3 : 20; Daniel 7:13,14.

KAMNGAH: “Hih laibu a sim mite mi hampha hi a, hih thu kigente ngai in, hih laibu sung a kigelh thute a zuite zong mihampha mah a hi uh hi. Banghanghiam cihleh, hihthu kigente a tunding hun naita hi a ci hi.” Mangmuhna 1:3.

Mangmuhna genkholhna thute pen, Aegean tuipi sung a, suangbek tawh a kidim Patmos a kici tuikulh neu tung a, John a thongkiat lai in, Pasian in mangsungah a piak a hihi. Mangmuhna 1:3,9 in zong, hih laibu sim, za a zui mi te thupha sang hi ci hi. Luke 4:47,48 tawh enkak in. Hih laisiangtho munin biakinn sungah thungai ding a kikhawmte a cihnopna hi. Sim leh zaakbek hilo-in, thu a mang mite hi lai hi (Mangmuhna 22:7).

Mangmuhna sung a genkholhna te pen, Pasian in a mite a kepdan lakna vive hi. Zeisu hong gupkhiatna thute tangko dingin, i lei nuntakna ginatloh dan hong lak hi.

Laisiangtho genkholhna te pen, khumial sungah a taang meivak tawh kibang hi (Peter Nihna1:19). Tuni i nuntakna hong makaih a, mailam, lametna hong guan hi.

Zeisu hong kumsukkik in, Pasian tawntung gam hong phuh nidong hih genkholhna te’n hong makaih ding hi.

SUNDAY                                                                                                          Dec. 30

A Laibu Min

Mangmuhna 1:1,2. A laibu min i gualtungtuan na bang hiam? Tua minin a sung a ompa thu hong bangci hilh hiam?

Mangmuhna 1:1 ah, Zeisu Khazih Thu Pulaakna ci hi. Thu Pulakna cih kammal in, Greek laimal apocalypse hi a, kisiinlo, kituamlo cihna hi. Zeisu in ama’ thu siin nawnlo, tuam nawnlo, cihna hi. Pasian kiangpan Zeisu tungtawn (Mang 22:16) hong kipia hi a, Zeisu thu bekmah kibulphuh a hihna a laibu in teci pang hi. Amah mahmah a mite hong kepna hong pulaak hi.

Mangmuhna laibu thu laigilpi in Zeisu hi a, Amah tawh kipan (Mang 1: 5 – 8) a, Amah kihel (Mang 22:12- 16) den hi. “Daniel leh Mangmuhna in thuman pulaaksak ni. Thu khempeuh a kipulaakna ah, David suan, a taang Zingsol Aksi “ ci hi. E G White, Testimonies to Ministers and Gospel Workers, p 118.

Apocalypes cih pulaakna ah Zeisu in Lungdamna gospel ah Zeisu mah hi. Lungdamna laibu te sungah a omsa Ama’ thu tengmah Mangmuhna sung ah pulaakkik hi. Mangmuhna laibu in bel, Zeisu nasepnate muhdan tuamtuam tawh lak hi. A diakdiakin, lungdamna laibu tawpna leh Zeisu thawhkikna leh vankahtohna pan Mangmuhna kipan to hi.

Hebrews laikhak tawh tonkhawmin Zeisu’ vantung nasepzia te thupisak phadiak hi. Vantung a tuntoh ciangin, vanbiakbuuk ah Siampi nasep kisemsak hi. Mangmuhna leh Hebrews lai lo peuhmah tawh, Khazih’ vanbiakbuk nasepna te ki telcian zolo hi. Tua banah, Hebrews lai lobuang, Mangmuhna lai bekin, eite a ding Zeisu hong nasepsak nate hong lak hi.

See also  ဘုရားရှင်၏ဖိတ်ခေါ်တော်မူခြင်း

John 14:1-3 simin. Zeisu in vantungah eite a dingin tu mahmah in na hong sepsak a hihna hih laisiangtho kamciamliapi in hong bangci lak hiam? Hih kamciamna pan in bang lametna i nei thei hiam?

MONDAY                                                                                          Dec. 31

Laibu I Deihna

Mangmuhna 1:1 in, tua hunpan kipan, mailam thupiang dingteng cipah hi. Tua laibu a simpha mi te’n, a genkholh thute a tamzaw tangtung takpi cihzong tel ding hi. Laisiangtho genkholhna te i et ciangin, bangthu bangla piang ta leh, Pasian in uk hi cih thu hi. Mangmuhna in bel, a lauhuai thupiangte lakmah ah Zeisu in hong kem, cih hong tellak hi.

Mangmuhna lai in deihna namnih nei hi: tuni bangci nuntak ding cih hong hilh khit teh mailam a ding kiginkholh theih ding zong, hong hilhlai hi.

Thuhilhkikna 29:29 simin. Hong kilaklo thu pawlkhat te i tel theih na’ngin, hih laisiangtho munin hong bangci huh hiam? Hih laisiangtho munbang hi leh, hong kilak thu te banghang in hong lak hiam? Mang 22:7 simbeh in.

_____________________________________________________

Mangmuhna sung a hun nunung genkholhna te pen, eima lawpna tawh ut thu peuh a, kaihgawp ding hi lo hi. A piang ding thute i theih ding thupi a hihna hong lak hi. A piang ding thute i theih ciangin, Pasian tungah i kingap ding leh a thu i man ding dan hong hilh hi.

Kum zalom tampi sungin, upmawhthu peuh tawh hun nunung thu ding gen mawkmawk uh hi. Hun nunung a piangding thute gen in sumbawlna in anei zong omphial mah ta leh, a tangtunloh ciangin, mi tampi lungkiatna piangsak hi. Pasian hong piaksa tua thupha te, mi tampite in zangkhial thei uh hi.

Johan 14 :19 simin. Hih laisiangtho mun panin, genkholhna deihna thukhun bang i mu hiam?

TUESDAY                                                                                                               Jan 1

Limla Kammal

Mangmuhna 13 : 1, Daniel 7 : 1 – 3, Ezekiel 1:1 – 14, simin. Hih mangmuhna khempeuh a kibat kiman bang hiam?

……………………………………………………………………………………………………………………

Mangmuhna 1 : 1 in zong, “Amahin, a vantungmite sawlin, a nasempa John kiangah hih thute kilangsak hi” ci hi. Tua laibu sungah a thupi mahmah kammal khat i mu hi. Kilangsak cih ciangin Greek kammal semaino, Lim tawh lak cihna hi. Daniel in, Kumpi Nebuchadnezzar mangmat, mailam thupiang ding a genkholhna ah, kham, ngun, tau leh siikte tawh kibawl milim ii khiatna a genlai in, hih laimal na zang hi (Daniel 2:45). Tua mah bang in, John kiangah mailam thupiang ding te, limtawh a lak ciangin hih kammal zang leuleu hi. John in zong, thuman takin, Khasiangtho makaihna tawh, tua limte hoihtakin ciamteh hi (Mang 1:1).

Mangmuhna sung a kammal te pen, a kammal bang linlian a khiat ding hilo hi. Laisiangtho i sim ciangin, lim tawh alak kei nakleh, akammal bang in kikhia a hihi. Himah ta leh, Mangmuhna laibu pen, laimal om bang a cih kei nak leh, limlakna tawh khiat ding a hihi. Thu piang dingte phadiak pen limlahna tawh khiat ding hi phadiak hi.

See also  Thuciamna Thukham

Hih Mangmuhna bu sung a lim leh genkholhna te pen, mikhatpeuh ngaihsutna bang in khiat ding hilo hi. Mangmuhna sung a kilak limte pen, laisiangtho luibu sung pan in kila tampi om a hih manin, a budangte sung a limte tawh saikaak dending kul hi. A beisa hun a, gupkhiatna nasepdan te mahbangin mailam hongpailai ding hunah gupkhiatna nasep te kibang ding cih Pasian in i theih ding deih hi. A beisa hun a, a hih bangin mailam ah zong hih lai ding hi. Mangmuhna sung aa limte teltheihna dingin, Laisiangtho lui etphat kul hi.

WEDNESDAY                                                                                     Jan 2

Lutang Pasian

Mangmuhna zong, Paul laikhak te mahbangin, muakna kammal tawh pan hi. Tua laibu pen, Asia gamneu te tungah laikhak, a kikhak a hihi (Mang 1 : 11). A hihhangin, amau a ding bek in kigelh hilo a, khang tawntung Tapidaw te a ding a hihi.

Mang 1 : 4,5 leh Rome 1 : 7 simin. A nih un bang muakna kammal neikhawm tuak uh hiam, kua’n muakna pia hiam?

……………………………………………………………………………………………………………………

A nih tuak un “Hehpihna leh kilemna hong tung tahen” cih muakna piatuak uh hi.Greekte kimuakna Charis (hehpihna) leh, Hebrew kimuakna Shalom (kilemna) cih kammal te zang hi. Tua hehpihna leh kilemna a pia pen Thumgawm Lutang Pasian ci hi.

Pa Pasian in, a omkhin, tu’n zong a om, leh a omlai ding pa ci hi (Mang 1:8; 4:8).A minpi pen Yahweh, “Keimah” (Paikhiatna 3:14) a hihi.

Khasiangtho pen, “Kha Sagih” (Mang 4:5; leh Mang 5:6) enkak in. Sagih cih zong picing nambat hi. “Kha Sagih” a cihteh Khasiangtho in pawlpi sagih te hunsung khem-peuh nasem cihna hi. Hih Kha lim in, Pasian mite lakah na sem, tawntung Khasiangtho a cihnopna hi pah hi.

Zeisu zongpen, min thum kivawh hi : A citak teci, sihnalakpan gah masa, Kumpi te Kumpipa (Mang 1:5) kici hi. A sihna, a thawhkikna leh vantungah a maanna te a cihnopna hi. Ei hong it a, a sisan tawh hong tan, Pa Pasian mai ah kumpi leh siampi hong suaksak hi (Mang 1:5,6).

Ephet 2:6 leh Philippi 3: te’n, gupngah te pen, vantung ah hong hawhto sak hi. Mawhna kidim leimi i hih laimah in, kumpi leh siampi te hong suaksak cihpen hi t hei ding hiam?

THURSDAY                                                                                                            Jan 3

Mangmuhna Thu Laigil

Mangmuhna laibu thupatna tawpna lamah, laibu buppi thu laigilpi : Vangletna minthanna tawh Zeisu hong paikik ding thu om hi. A thukhupna lamah zong thumvei stset om hi (Mang 22:7,12, 20).

Mang. 1:7,8 simin. A kammal pawlkhat te, Daniel (7:13,14); Zechariah (12:10); Matthew (24 : 30) cihte pan a zatpih zong om hi. Hihte in, Zeisu hong paikik ding bangci bangin kipsak hiam?

……………………………………………………………………………………………………………………

Mangmuhna lai sungah, Zeisu hong kumsuk ciangin leitung tangthu tawpding hi. Kumkik ni ciangin, leitung tangthu tawpin, Pasian tawntung gamnuam kipanta ding a, siatna, launa, natna, sihna cihte khempeuh pan i suakta ding hi.

See also  Lesson 9: AKICIAN PENPEN LAHTELNA

Mang 1:7 in zong, Zeisu a pumpi teekmah tawh hong paikik teek ding cizaw hi. A pang a dawt mite tektek in zong mu ding ci hi. Amah a that mite mitmuh mahin, Amah a ngak mite tungah gupna pi ding a, A hehpihna a nial mite tungah thukhen ding hi.

Khazih hong pai ding a kiciatdan John in, “Hong piang takpi ding hi, Amen” na ci hi (Mang 1:7). Hong piang takpi ding” cih kammal pen, Greek lai in ‘nai’ hi a, ‘Amen’ bel Hebrew te thu kipsakna hi.

A beisa kum 1800 lai peklai in, hong paikik ding thu hong kamciam zo hi. Tua pan kipan, kum zalom tampi sungteng, thu um mite’n tua kammal te tawh lungmuang uh hi. Tua kamciamte tungkim nailo hi. Misi te a photna aw ging nailo hi. I upna tha kiamsak keini. A sawtlo in Kumpipa i mu ding a, mittang khempeuh pan khituite hong kinulsak ding hi. A ma mai ah thuman in, lungdamin om ni. EGWhite, The Advent Review and Sabbath Herald, Nov. 13, 1013.

Kamciam khat pen, a piapa thupitna tawh kizui in, kipin tangtung hi. Kumkikna vai, Pasian in, hong bangci kamciam hiam? A beisa hhunsungah, a kamciamte bangci tangtun a, Khazih kumkikna kamciam zong, bangzah kip ding ci hiam?

 FRIDAY Jan 4

Ngaihsut Beh Ding : Testimonies to Ministers and Gospel Workers laibu sungah “Daniel leh Mangmuhna Laibu Sinna” laimai 112 -119 dong simin.

Tapidaw te hunsung khempeuh ah, Mangnuhna in, hong makaih toto hi. Topa’n a thuthuk te, i theihkim na dingin, hong lakkhiatna a hihi. John hunlai a mite pan kipan, tulai mite khempeuh aa ding a hihi. Pawlkhat tungkhin, pawlkhat tungsaan, pawlkhat hong tunbeh lai ding hi.

“Tua limte’ khiatna gentel thei ke’ng, phattuamna bangmah omkei, ci in kuamah’n ngaihsun kei tahen. Lungsim takpi tawh na zon leh, Topa’n, vantung nate hong lak ding hi. Lungsim takpi tawh na zon leh, ‘tua thute za a, a zui mite’ sanding thuphate nasang ding hi” E G White. The Acts of Apostles, 583-585.

KIKUP DING DOTNA TE:

  1. Mangmuhna in Zeisu hong lak a hih leh, banghang in leitung beihun ding a lum a let in ki um hiam? Tapidaw te’n, mangmuhna bang ci muh uh hiam? Banghangin mangmuhna in kihta cih kammal zang den hiam?
  2. A beisa kum 20 pan kipan , leitung hun nunung thu, mi pawlkhat genkholh, a tangtung lote ngaihsun kik in. Tua a tangtung lote hangin, bang thuteng a lum a let in piangzaw hiam? Tua a tangtung lote, a thei a mu Tapidaw te, bang ci daan suaksak haim?
Tags: ,

Admin

Admin

Top