Lesson 9                                                    *November 21–27

PAWLPI LEH PILNA

SABBATH NITAKLAM                   November 21

Tukalsung Simding: Luke 10:30–37; Matt. 5:14–16; Luke 4:18–23; Jeremiah 29:13; Matt. 7:7; 1 Thess. 2:6–8.

Kamngah: “Khazih sawltakte ka hihna uh hangin phatna ka ngah dinguh kilawm hinapi-in note leh midangte,  a kuamapeuh’ hong phatding azong ka hikei uhhi. Note kiang ka hong omlai un, nupite in atate uh itna tawh abawl bangin note kahong bawl uhhi. Note hong it mahmah kahih manun Pasian’ kiangpan ahongpai Lungdamnathu bek hong genlo in, kote’ nuntakna mahmah zong note a dingin a pia-ngam in ka-om uhhi. Tua ahihmanin kote’ hon gmuhna-ah note amanpha mahmah n ahi uh hi.” (1 Thesssalonika 2:6–8).

            Thuman mite in Pasian biading in tang-biakinn, innah leh tulai biakinnte ah akikhopcil lai in, mite in Laisiangtho simna tawh Pasian zongin, ama’ deihna zong uhhi. Pawlpi mite in biakinn ah Laisiangtho nasiatakin kikum dinguh a, tua bang bekmah tawh Pasian thei in ama’ deihna telzo pan ding uhhi.

            Khatveivei dotna dotding khawng lau uhhi. Laisiangtho sungah bel dotnate in Pasian theih telna hong khangsak zaw cihi. Tuamah bangin tangthu khawng zong, mite’n Pasian kiang akamciam piakte uh lungngai phakik thei uhhi. Zeisu in anungzuite tungah hibangdan pilna piaknate zang hi.

            Pawlpi in pilsinna mun ahihleh, kikupkhopna a omtheih na’ng mun kicing vaihawmkul hi. Sanginn ah sangnaupangte ihilh ciangin “dotna manneilo omlo hi” i cihmah bangin, pawlpi mite khempeuh lungnuam takin omsak ding a, Pasian theihna khangtosak ding hi.

SUNDAY                                                                         November 22

Christian Pilna Taktak

          Rabbi khat in asangnaupangte lakah a lususu khat engige in: “Naupangte aw, zanhun bei in sunhun kipatlam koici kitheih ding hiam” ci in dong hi. Sangnaupang tampi takte’n dawngnuam in khutlam ngeingai uhhi. Khat in, “Rabbi aw, theikung leh nisuh kung khenteltheih hun hi lo hiam?” cihi. Adangkhat zong khutlamsa in “Hi lo, tuu leh keel nakhentheih ciang hi lo hiam?” ci leuleu hi.

            Tuateng a ngaihkhit the Rabbipa in, “Sangnaupangte aw, zanhun bei in sunhun a kipatna pen, muhngeiloh maitangkhat mu in ciapteh khit teh, tua mithakpen sanggam bangin saanna ahi hi.   Tuabangin saantheih masiah, Ni bangzahin tangmahleh, zan hilai veve hi” ci in tangkokhia hi.

            Luke 10:30–37 simin. Zeisu in hih tangthu bang adeihna hiding hiam? Christiante pilsinna ah bangtengpeuh kihel ding cinuam ahi diam?

________________________________________________________________________________________________________________________________________

            Ei SDA tepen, thuman khuavak tampi angahte (misithu, Sabbath, 1844 leh thukhenna, Kidona Lianpi cihbang) i hi a, tuate pen i Christianpihte nangawnin zong telzolo uhhi. Hihthute a thupi mahmah hang, eimah in midangte tungah dikna neilo hazatna tawh kidim leng, minam deidan lungsim khawng tawh simmawh tuamkhawng neileng bang phattuamna peuhmah omding hiam? 

            Christian pilna taktak icih in, mihing’ thanemna siatnate’ tungah hong gualzo sak a, midang zong Khazih’ muhbangin hong musak, amau’mawhnate zong puaksak dingin sihna thuaksak, gen zawhloh mantawh leikhin ci in muding uhhi. Singlamteh lamto leng, mikhempeuh’ manphatna i muhsak ding a, a kiphu a kilawmin hopihin, Pasian piaksa amau manphatna theihpih ding hihang. Christian pilna sungah hihthu a kihel keingal leh “Christian” min puadingin i kilawm kei hi.

            Christian khat nahihna tawh nazawhgawp dingin, naminam ngeina in a langtang ahi a, a simthamin a hizongin bang hazatna peuh hong neisak hiam?

MONDAY                                                                        November 23

Khuavak bang Nungta dingin Hong Kisam

            Ei muhdan hileh, i leitung in ama’ zawl tungah kipeipei lelin, khuavak leh khuamial khekzel lelpeuh hi. Ahihhang haksatna kidim hih leitungah khuamial tawh i kitalsik tawntung hi. Lauhuaina tampitakte mutel sitsetsa in, natna satna i phu a, itleh ngaihte nutsiatna thuakin, innkuansung buai, kikhen kimakna leh vengsung behsung gitlohna tampitak mah i thuak hi.

Lungsimte hoihnawnlo, khalam khuamial, sunglam pualam pan gamlumna cihte kawmkal ah mimalsim a ding Zeisu’ kammal:

            “Note pen leitung mite adingin khuavak tawh nakibang uhhi. Mualdawn a om khua kiselcip theilo hi. Mei a vakkhit ciangin kuamahin lawh khuhlo hi. Meivakna munsangah koihzaw a, Innsung khempeuh a tangsak hi. Midangte in nagamtatna hoihte a muhuh ciangin, vantungah om na Pa uh min a phat theihna’ngun, mite’ maiah nangamtat hoihna uh khuavak bangin nakilang sakun” (Matt. 5:14–16). Hih munte in, Christian i hihna dungzui in koici nuntak ding a, ei’nuntakzia in midangte’n Pasian a muhdan dinguh bangzahin huzapzo hiam?

________________________________________________________________________________________________________________________________________

            Galilee bualtui gei, nisa nuai ah a tu mipite in Zeisu’ kammal koibangin telthei uhhiam? A thugen a za mi khempeuhin khuavak khuamial telpha mahmah uhhi. Rome khut nuaiah omuh a, tulai telephone, computer, leitung kizopna leh media vantuamtuam cihte, a lauhuai mahmah phialte khawng omhetlo in galkap kumpi ukcip in omuh hi. Rome tebel munkhempeuhah omkawikawi uh a, tua mualpang a tengte’n, langdona khawng a bawlvua leh – a tangguakun singlamgteh tungah khailum uhhi.

            Tualaitak mahin Zeisu in Khuavak dingin samzel hi.Itna dim ding, lungsim siangtho ding, kilemna bawlte hiding cihi. Christian pilna sungah, leitung a dingin khuavak bang hih ding, Pasian’ hoihna lamah teelsiam theihna ding khentatna neihding kihilh ngiat kul hi.

            Pasian’hoihna nakilatsak theihna ding bang lampi peuh natheikha hiam?

TUESDAY                                                           November 24

Nungzuite Bangin Omna

            Pawlpi in Christian pilna thupitakin a sepsawmleh, Zeisu tawh i kipatngiat kul hi. Zeisu in nungzuite sam masa hi. Amah’n kholhpihin mission’ na semsak phot hi. Amau itding don ding mite zongsak musak in hunhoih hunnuam bawlsak hi. Leitungah khatleh khat unau sanggam bangin kizopna neihkim ding tona nisim in pia hi.

            Luke 4:18–23 simin. Khazih in a nungzuite mah ahi eite bang thupuak hongpia hiam?

            Nungzuite’n kumthum sitset Zeisu, a Siapa uh limlakna mu uh a, Nazareth khua biakinnah a sermon masapen zong za uhhi. Mawhmaisakna, hehpihna leh itna cihte in kalsuankhawm uh a, nungzui hihna sungah a neuseh hetloh thute ahi hi.   Nungzuihnapen nikhatpeuh hi lo a, khantawn ahi hi. “Gumpa’n nungzuite a thupiakpen hunbei dong thu-um mite huamgai a, vantungin a humuapsa khempeuhin lungdamthu puakding uhhi. Khazih kiangpan nuntakna angah mite in, amau vengsungah hotkhiat nasem dingin mawhpuak kisuansa ahi uhhi. Tua a sem dingin pawlpi hong kiphut hi a, a sem dingin siangtho kamciam a pia mite in Khazih tawh nasemkhawm ahi uhhi.” —Ellen G. White, the Desire of Ages, p. 822.

            Zeisu’ nungzui i hi a, lawmleh gual kizopna leh biakpiakna cihte khempeuhah Zeisu in thu-laigil ding ahi hi.   Nungzui suahna a piangsak zong Zeisu mah ahi hi.   Ama’ hunlai a rabbi-te in nungzui ding mi khawng zolkeei uh ahihhang, numei pasal a samziauziau pen Zeisu mah hibek hi. Tua sapna i a bulpi in Zeisu hizaw a, amau’te thukham bawltawmte thupi zawlo ahihna rabbi-te in phawkkhalo uhhi.

            Zeisu’ nungzui i hihnakleh, mite mikhempeuh huamzo dingbek hi lo, mikhempeuh a ding khantoh theihna’ng vaihawm sakding hilai hi.

            Tua ahihmanin, Christian pilna limlim pen mission nasep, mungtup, nuntakpih ciangbek hi lo in, Zeisu hongsapna bang a eima munsan a semding: cimawh gentheite a panpih mahbangin ama’ khekhap zui in, lungdamthu hawmsawn kawikawi ding i hihi.

WEDNESDAY                                                     November 25

Thumaan Zong

            Tuhun physics i Pa a kici Albert Einsteinin: “Thudotna khawlloh ding thupi hi. Pilzonna pen a omsa thute hang hi. Tawntung thuthukte ngaihsut ciangin, hihtheih dang omlo, dipkuat ding bek hipeuh hi. Hih thuthukpi nisimin tawmtawmta lungngaizo peuhleng kicinglel hi. Siangtho pilzonna mansuah ngeikei in” cihi.

Leitung in thuthuk tawh a kidim hi. Khangthak science pilna inmunkhempeuhah buaina lianmahmah vive kidim ahihna hong musak hi. Cilehsa thute ah tuazah kibuaileh kha lamah bang zah buaizaw kanlai ding hiam?

            Anuai a munte in dawnna ding thumaan zonvai bang hong gen hiam? Jeremiah 29:13; Matt. 7:7; Acts 17:26, 27; Psalms 25:5; John 16:13; John 17:17.

            Laisiangtho sungah eite mahbang mi kuhkal pilna zong tampi omhi – pasal numei, dotna, launa, lam-etna, lungnopna, amau tumtakin thuman a zongmi, nuntak haksatna kiamsak na’ng a zongte cihbang omziazua uhhi.

“Amahin na khempeuh  ama’ hunciat tawh akituak dingin abawl hi. Amahin mailamthu theihnopna lungsim eite tungah hong guan a, ahi zongin ama’ sepnate a cing a theihzawhna ding hong guanlo hi” (Eccl. 3:11). Solomon in bang acinuam ahi diam? Pawlkhatin Hebrew pau ‘olam’ pen “abeisahun leh mailamhun huam ngaihdan” ci uhhi. Mite’ lungsim sungah abeisa hun leh mailam hun a thupiangte ngaihsut theihna Pasian in hongpia ahihlam, hihmun panin kithei hi. Cihnopna ah leitung nuntak nading “dotna lianpi” pen a ngaihsunthei mihingte i hihna hong phawk sak hi.

            Hihsantakah, Laisiangtho in thubulpi ahi hi.   Nang kua hi a, banghangin hiah omthei a, koici nuntak ding a, i sihteh bang piang ding, siatna leh thuakna banghang omthei hiam? Hihteng pen lei piancilpan kipan tangthu sungah thumaanzong mite dotna lianpi teng ahi hi.   Tuabang thumaan a zong mite tungah thuhoih puak dingin bangzah hunhoih hunnuam leh mawhpuaklian hiding hiam? Tua dotna a neimite kiangah hih dawnnate piathei keileng, Christian pilna in bang himawk ding hiam?

            Tua dotna lianpi dawng dingin banghangin Laisiangtho in thubulpi hithei hiam?

THURSDAY                                                       November 26

Eima Nuntakzia Hawmsawn

            1 Thessaloni 2:6–8 simin. Paul in i sangte leh pawlpite ah banglim kidawksak hamtang ding ci hiam?

________________________________________________________________________________________________________________________________________

            Kipawlkhop theihna a omnawnloh manin, pawlpi nangawn zong khiatna neimello bangin ngaihsutna a kineihhun laitakin i omhi. Matt. 18:20 in: “Note nih leh thumbek nangawn a kikhopna peuhpeuhah Kei ka omhi” cihi. Laisiangtho thak in innkuan nuntakzia in, pawlpi leh veng omzia piangsak hi ci in mu hi. Kipawlkhawm in thungen, lasa, Topa’ nitak-an ne, Zeisu’ thu sinkhawm in kihawm cihte pan ahi hi.  

            Hihbang a biakna piakhawm teng pawlpi sang masabel hong hipah a, Zeisu’ sungah nunna thak a kitheihcilna mun hipah hi. Rom. 12:2 ah Paul in, “Leitung mihingte gamtat bangin gamta kei unla, nalungsim uh kikhelin Pasian kipuahpha sakun” acihpen, pawlpi in pilsinna lampanin pansan lamahmah hi. Hih thu-um masatein kipawlkhopna sungah lungdamthu kinungtathei ahihna mukhia uhhi. Kipawlkhop ciangin la zong a gingzawdeuh in kisathei a, thunget zong deihna lianpi tawh kingenthei, khatleh khat zong kivei zawdeuh theilai hi. Midangte in, Pasian’ hoihna a pulak uhciangin, eitungah zong Pasian hong hoihna i phawksem hi. Mikhat’ thuaksiatna i zakciangin, Pasian in ei hong damsakna, Ama’ hehpihna leh damsakna tungtawnin ngaihsutna thak i neithei hi.

            Tuni sinna sungah, Paul in Pasian’ lungdamthu in bucing hi ci a: singlamteh’ vaang, Topa’ thawhkikna, kumkik ding hong kamciamte ahi hi.   Leitungah hih sang thuhoihzaw dang omlo ahih manin, Paul in, Zeisu’ tangthu mah amasapen leh a lianpen ki-aapna, hawmsawn ding leh nuntak pih in nanei tawntung hi. Hi napi Paul in, lungdamthu mah kitelpha pen, kihopsawnna tungtawnin kinuntakpih pen hi cihi. Mite in Laisiangtho sung a thupuak ombangin nungta maw nungtalo cihpen naitakin hong encik mahmah uhhi.

            Na nuntak haksatzia ngaihsun inla, nangleh nangmah kidong kik in: Ka vengte kiangah koibang teci kahi hiam?

FRIDAY                                             November 27

Ngaihsutbeh Ding: “Khazih in leitung liatnate thapia hetlo hi. Mualtung thuhilhna ah, pilna mantaklo tawh nasepna peuhmah siansuah nuam a, thungai mipite in Amagamleh deihna a teltaktak ding deihsak hi. Ahihhang mipite mawhna tangkawk tuanlo hi. Leitungin mawhna sungah kidiahcip hinapi, mite’siatna mawhnate amalmal in kawkselo hi. Amau theihsate sang a hoihzaw thampekte hilh hi. Pasian’gam tawh kisai amau upnasate langdo hetlo in, a luttheihna dinguh lampi hilhin, amau upnate amau mahin khentatsak uhhi. Amau sinsa thumaante in nungzui mipite tungah a kihilh thumaante mahbangin thupi hi. Eite in zong amau mahbangin Pasian’gamthu i sin ding kisampha mahmah hihang”—Ellen G. White, The Desire of Ages, p. 299.

 Kikupding Dotnate:

1. Robert Louis Stevenson in Edinburgh, Scotland ah 1850 kumin pianghi. Nitak khat ciangin naukemnu in, Stevenson ihmusak khin hinapi, amah damtakin thokhia simin tawlet pan khuadak hi. Lammeivakpa in lammei khatkhit khat vak a mu hi. Naupang vaimah hivencin, amah akemnu samin, “Hiapa endihve, khuamial vutvang kawikawi aive” cihi. Na vengsung ah khuavak leh itna puak dingin Pasian in bang dinmun hong pia hiam? Na tel melkei khakleh pawlpi mite pawlkhat sam inla kimtakin kikum un.
2. Leitungbup apha dingin pawlpi in Pasian tawh semkhawm ahihleh, Zeisu’kammalte i pom cinten ding hi. Pasian hong sunglutin a pianna, leitungah hong nuntakna, eimah bangin nuamna dahna hong thuakna in i kimkot a tuabang a thuak mite hong phawksak hi. Bangcih ding a, khangnote tuasungah nasem dingin koici cial ding hiam?
3. SDAte in midangte kiangah lungdamthu hilhsawn dingte i hihi. Khuatual pawlpi in hih thumaante hilhsawnna ah apangpipen i hizo thei diam? Tua kawmin, haksatna neite a dingin pawlpi in koibangin khamuanna mun hithei ding hiam? Tua haksatnate nahuhtheih nading bangkhawng nabawltawm kulthei ding hiam?
4. Na omna mun ngeina kibanglo tehang hongpiang thute kikum dihun. Laisiangtho sungpan hituanlo in, Napawlpi in bang lampithak sialtawmin midangte gualzawhna ngahsakthei diam?