Lesson 5: Pawlpi Masa Sungah Kipumkhatna
LESSON 5
Pawlpi Masa Sungah Kipumkhatna
Oct 27 – Nov 2
Sabbath Nitak
Tu Kaal Sung Sim Ding: Sawl. 1: 12- 14; 2: 5 – 13; 42- 47; 4: 32 – 37; 5: 1-11; Mang. 14:12.
KAMNGAH: “ Amaute in sawltakte hilh upna le kikholhkhopna, anlum balkhapna le thungetnate-ah kuhkaltakin a omsuak uh hi (Sawl. 2:42).
Pawlpi kipumkhatna in Jesuh sungah nuntakna panin kingah nunna hi. Jesuh in thuman hi. “ Kei mah in lampi, thuman thutak le nuntakna ka hi hi. Kei tungtawn lo-in kuamah in Pa kiang a tung thei kei ding hi. Khatlekhat kizopna kip a om ciangin thuzuihna le upna thu-ah kipawlkhopna kip semsem hi. Adventist thu-um mi masate in tua bangin kizopna kip nei uh hi. 1844 kumin a thuak uh thu in amaute lungkiatna panin thuman kantelna-ah amaute kipumkhatsak hi. Amaute tuahkhak thu in SDA pawlpi hong piangkhia banah vantung thukhenna tangko kipatna hong suak hi.
Jesuh in van a kah khit nungzuite in Pasian’ kammal le thungetna tungtawnin vangliatna tawh kidim uh hi. Kibatlohna tuamtuam a neih uh hangin kipumkhatin nasem uh hi. Tuhunin zong tua bang piang thei hi. “ Mihon in biakpiaknate-ah mimal khatlekhat kizopna kisam hi. Thu-um mite in tua bangin khatlekhat kizopna nei-in kipumkhatna le Khrih tawh pumkhat hihna a kheng ding bangmah om lo hi. Jesuh Khrih in Amah pumkhat hi dingin hong sam masa-a, tua khit ciangin thu-um midangte tawh ama pumpi – pawlpi hong kipumkhatsak hi.” Robert G. Rayburn, O Come, Let us Worship (Grand Rapids: Baker House, 1980), 91.
Sunday Oct. 28
Kiginkholh Nite
Jesuh in a sihma-in a Nungzuite tawh tawlkhat hun zangkhawm hi. Jesuh in note kong nusia kei ding hi, ci-in kamciam hi. Amaute tawh nasem khawm dingin Huhpa Kha Siangtho hong pai ding hi, ci-in genkhol hi. Kha Siangtho in Jesuh’ gen thute le a nasep phawksak kik ding hi (Jn. 14: 26). Kha Siangtho in amaute thuman thutak theihtelna guan ding hi (Jn. 16:13). Van a kah ding ciangin Jesuh in Nungzuite a kamciam pulaak kik hi: “A sawt lo-in Pasian in Kha Siangtho tawh note hong kidimsak ding hi……. Ahi zongin note tungah Kha Siangtho hong tun ciangin vangliatna tawh na kidim ding uh a, Jerusalem khua sung, Judea gam sung, Samaria gam sung le leimong dongin note in keima thu na gen ding uh hi” (Sawl. 1: 5, 8). Nungzuite in Kha Siangtho’ vangliatna tawh kidim ding uh a, Jerusalem, Judea, Samaria le leitung mun khempeuhah teci hi ding uh hi (Sawl. 1:8)
Sawl. 1: 12- 14 sim in. Tua ni 10 sungin Nungzuite in bang hih uh hiam?
________________________________________________________________
_________________________________________________________________
Nungzuite in ni 10 sung kigingkhol uh hi. Jesuh nunzia, a nasep, a thuhilhte a kipan a nalamdang bawlte ngaihsun kik uh hi. Amaute in pumkhat suakin thungenkhawm uh hi (Sawl. 1:14).
Nungzuite in kiniamkhiatna tawh a uplohnate uh mawhthumna nei-in, Topa’ kamciam tangtun ding ngak uh hi. Jesuh in a sih madeuhin a vaikhak kammalte amaute in phawk kik uh hi. Tu-in Jesuh gen thute telzaw uh hi. A zak ngei thuman thute phawk kik uh a, mite tungah gensawn uh hi. Honpa telkhialhnate uh hong phawk kik uh hi. Nungzuite in Khrih’ gamtatna, a thuak gimnate khat khit khat a banbanin hong ngaihsun kik uh hi. A siangtho Ama nunzia a ngaihsut uh ciangin a deihhuai Topa nunzia kilangsak dingin hamsa a sak uh khat zong om nawn lo hi. Topa tawh a beisa kum 3 sung ngah kik thei ding uh hileh a nunzia lui bangun nungta nawn lo ding uh hi. Topa maitang mu kik thei ding uh hileh Topa a itna uh lak nuam uh hi. Topa a upkhak lohna uh kisikin a itna uh pulaak khia nuam uh hi. Nungzuite in tua bangin a ngaihsutna uh tawh kihehnem uh hi. Tua thute hangin lau lo-in Topa a upna uh pulaak ngam uh hi. Khatlekhat kilamdannate, dinmun lian kituhnate nusia-in kipumkhatin nasem uh hi.” Ellen G. White, The Acts of the Apostles, 36, 37.
Monday Oct. 29
Babel Panin Pentecost Dongah
Jesuh van a kah khit thu-um kiginkholhna gah Pentecost Ni-in kimu thei hi. Ni masa ni, Kha Siangtho kibuah madeuhin thu-um mi khempeuh kipumkhat uh hi (Sawl. 2:1). Thuciam Lui hun lai-in Israel pasal khat pello a kihel hamtang ding pawi 3 lakah pawi thupi nihna in Pentecost pawi hi. Passover pawi khit ni 50 ciangin Pentecost pawi bawl uh hi.Greek kammal in pentekoste – a sawmnga-na cih khiatna nei hi. Pentecost pawi sungin Hebrew mite in lo panin khai gah masa, anpal tawh Topa tungah lungdamkohna nei uh hi. Jesuh hun ciangin Pentecost pawi in Sinai Mual tung pan kipia thukham phawkna pawi-in zang uh hi (Pai. 19:1). Tua hi-in Pasian’ thukham a manphatna kizomsuak hi. Khrih hong sihna hangin Pasian’ thukham palsatna hangin mawhna panin mawhmai-na kingah thei thu hong hilh hi. Leitung hun bei mateng thukham le hotkhiatna thu in mannei tawntung ding hi. “ Pasian’ thukham zui-in Jesuh tungah a citak Pasian’mite a’dingin thuakzawhna kisam hi” (Mang. 14: 12).
Pentecost Ni-in Pasian’ vangliatna a kimuh mah bangin Moses in Sinai Mual panin Thukham 10 a valak laitakin zong Pasian’vangliatna kilang hi (Heb. 12:18). “ Tua laitakin huihpi nung bangin hunging khat hong tungvat a, amaute’ kikhopna innsung khempeuh hong dim hi. Tua ciangin leii tawh a kibang meikuang bang pian amaute lakah hong kithehthang a, tuate in mi khempeuh sukha kim hi. Amaute khempeuh Kha Siangtho tawh kidim uh a, tua Kha in minam dangte’ pau tawh amaute a pau theisak hi” (Sawl. 2: 2-4).
Sawl. 2: 5 – 13 sim in. Tua thupiang in bang manphatna nei hiam?
____________________________________________________________
_____________________________________________________________
_____________________________________________________________
Pentecost pawi in thupha tampi-te hangin Topa tungah nuamna, lungdamkoh pawi hi. Tua hangin midangte muhna pan nungzuite zukham tawh kibang uh hi (Sawl. 2: 13 – 15). Pasian’ vangliatna hangin thu kigente namdang tuamtuamte in amau pau ciat tawh za uh hi. Roman Empire huam sung pan Jew mite in Jerusalemah hong pai uh a, Jesuh in Messiah hi, ci thu amau pau ciat tawh za uh hi.
Pentecost in a lamdangin minam tuamtuamte Babel Tausang hun lai bangin innkuan khat bangsak hi. A lamdang hehpihna in minamte pumkhat suaksak hi. Leitung mun tuamtuam a om pawlpi in, Babel Tausang ma-a mite bangin, pumkhat hong suaksak hi.
Tuesday Oct. 30
Biakpiakna-ah Kipumkhat
Peter’ sermon a za mite in Thuciam Lui kamciamte a tangtunna Jesuh in Messia hi, ci-in mawhna kisikin hotkhiatna ngah mi 3000 val pha hi. Pasian in mite sungah nasem hi. Mi tampi in Jesuh min za uh a, a mi mahmah mu nuamin Jerusalemah hong pai uh hi. Mi pawl khat in Jesuh mu ngei khin, a thugente zong za ngei hi napi, a nungzui dingin khentat lo uh hi. Pentecost Ni ciangin nungzuite sungah nalamdang hong tungin sihna pan a thokik Jesuh thu teci pang uh hi. Tu-in Jesuh min tawh mawhmai-na kingah hi, cih thu hong thei uh hi (Sawl. 2: 38)
Sawl. 2: 42 – 47 sim in. Jesuh nungzui mi masate in bang sem uh hiam? Bang in amaute pumkhat suaksak hiam?
_________________________________________________________________
_________________________________________________________________
Thu-um mi masate in sawltakte’ thuhilhna ngai uh hi. Thu-um thak mite in upna sung a khantoh nadingun Lai Siangtho sinna nei uh hi. Jesuh in Nungzuite a vaikhakna-ah ‘kong thupiak khempeuh na hilh un,” ci hi (Matt. 28: 20). Hih thu-um mi thakte in sawltakte tung panin Jesuh’ thu, a nunzia, a thuhilh, thugentehnate, a nalamdang bawlte banah kamsangte genkholh bangin a tangtunna thute za uh hi. Thu-um mite in thungen khawmin anne khawm uh hi. A annekkhop un Khomun nekna maw, ahih kei leh nisim annek ngei-na maw, cih pen kitelcian lo hi (Sawl. 2: 46). Thu-um mi thakte in innkuan khat bangin, Jerusalem biakinn banah innte-ah biakpiakna nei khawmin, thungen khawm cih bangin a hun uh zangkhawm uh hi. Khatlekhat kilawmtatna nei uh hi. Anne khawm, thungen khawm uh hi.
Thungetna in thu zuihna-ah picingin khantoh nadingin a kisam mahmah khat hi. Thu-um mi thakte in Pasian bia khawm uh hi. Tatsat lo-in tua bangin nungta uh hi. Tua bangin thadah lo-in thu-um mite in kizopna a neih manun Jerusalem khua-a om midangte tawh zong kizopna hoih nei uh hi. Thu-um mite in mite maipha ngah uh hi (Sawl. 2: 47). Kha Siangtho in amaute sungah nasem ahih manin amau nunzia in teci hoih hong suakin mi tampi in Jesuh in Messiah hi, ci-in um uh hi.
Na pawlpi in kipumkhatna, biakpiak khopna le teci hoih hih nadingin pawlpi masate ettehin bangci kalsuan ding hiam?
Wednesday Oct. 31
Citpiakna le Huaihamna
Pentecost khit Jesuh nungzuite a khantohna khat uh in khatlekhat kihuhna hat mahmah uh hi. “ Thu-um khempeuh kikhawlin omkhawm uh a, a neihsate uh zong a neikhawm uh hi. Amaute in a neih a lamteng uh zuak uh a, a sumte pen amau kisapna tawh kizui-in amaute lakah a hawm uh hi” (Sawl. 2: 44, 45).
Khuapih tuipih khatin tengkhawm uh ahihteh tua bangin a neihsate uh hawm hamtang ding cihna hi lo hi. Khatlekhat ki-itna hang le amaute kipumkhatna in tua bangin kihuh uh hi. Pumkhat ahihna uh kilang hi. Tua bangin tawlkhat sung khatlekhat kihuh kipanpih uh hi (Sawl. 4, 5). Thuciam Thak in tua bangin khatlekhat kihuhna lim gen mahmah hi.
Barnabas in mici thei, leitang nei khat hi. A leitang zuakin mite phattuam nadingin zang hi. A sum neihte sawlte ap hi (Sawl. 4: 36, 37). Barnabas in eite etteh takcing hi.
Sawl. 4: 32 – 37; 5: 1-11 sim in. Barnabas nunzia le Ananias-te nupa enkak in. Ananias-te nupa in bang khialhna nei hiam?
________________________________________________________________
________________________________________________________________
Kha Siangtho khem uh hi bek lo-in hihte nupa in huaihamna, zahatna tawh kidim uh hi. Huaihamna, angsung zonna bangin kipumkhatna susia om lo hi. Barnabas in thu-um mite etteh takcing hi-in, Annanias-te nupa nunzia pelh ding kisam hi. Luke in hih bang mite nunzia ahi bangin pulaak hi.
Thukham 10 lakah a thukham nunung pen deihgawh lo ding hong hilh hi (Pai. 20: 1-17). A dang thupiak 9 i palsat leh kimukhia thei pah hi. Thukham sawmna – deihgawhna in ahih leh i sungah om a kimu khia lo siatna hi. Hazatna in gamtatkhiatna tawh sepna hi lo-in, lungsim sung, ngaihsutna sia-sak hi. Hazatna le huai-hamna in tonkhawm hi. A kimu thei lo mihing siatna piangsak hi. Huaihamna tawh i gamtat ciangin Ananias-te nupa bangin tua mawhna hong kilang khia ding hi. Thukham 1-9 dong palsat mawhna khempeuh ii kipat khiatna in thukham 10-na, deihgawhna lungsim hi. Deihgawhna in Satan’ huzaapna kong hon suak hi. Ananias-te nupa bangin Pasian tungah zuau genna, Judah bangin huaihamna piangsak hi.
Koi bangin deihgawhna zunglotkhia thei ding i hiam? Bang hangin Pasian minphatna le lungdamkohna in deihgawhna, hazatna pan hong dal thei ding hiam?
Thursday Nov. 1
Cimawhte Huh in
Khatlekhat kihuhna pawlpi pumkhatna pulaak hi. Pawlpi masate in tatsat lo-in piakkhiatna citak uh ahih manun, Paul in Macedonia le Achaia ah a phut pawlpite in zong Jerusalem pawlpi sunga om cimawhte huh dingin hanthawn hi (Sawl. 11: 27 – 30; Gal. 2;10; Rom. 15: 26; 1Kor. 16: 1-7). Hih pawlpi mite in Gentile mi vive hi-in Jerusalem a om Jew thu-um mite sanggam bangin ngaihsutna tawh huhna pia uh hi. Ngei-na kibang lo, minam kibang lo hi mah taleh amaute in Khrih sungah pumkhat hi; hotkhiatna thu hangin kipawlkhopna nuamsa uh hi. Tua bangin khatlekhat kihuhna in pumkhat ahihna uh pulaak banah pumkhat hihna kipsak hi.
2Kor. 9: 8 – 15 sim in. Korin pawlpi in piakkhiatna hangin thupha bang ngah ding uh hiam?
_______________________________________________________________
&nnbsp; _______________________________________________________________
Pawlpi masa-te kipumkhat bangin tu-in zong pawlpi in kipumkhat thei hi. Thu-um mimal hanciamna om lo-in kipumkhatna piang thei lo hi. Pawlpi makai mi masate in zong Khrih sungah kipumkhat nadingin nasem uh hi. Nisimin zi le pasal, innkuan sung kizopna a kip ding kisam mah bangin thu-um mite in zong kipumkhat ding kisam hi. Mite in Khrih sungah pumkhatna hong mu thei a, pumkhat hihna kip ding hanciam kul hi.
Pawlpi masa-te kipumkhat theihna bulpi in thungetna, biakpiakna, kipawlkhopna, ngimna kikhatin Lai Siangtho sinkhawm uh hi. Minam khempeuh tungah hotkhiatna thu gen dingin ngimna kikhat nei uh hi. Amaute khatlekhat kihuh diamdiam uh hi. Omna kibang lo, mun tuamtuamah om uh hi mah taleh khatlekhat ki-itin, khatlekhat kihuh uh hi. Tua bangin a nuntakzia un Pasian’ hehpihna a ngah uh mawkna hi lo-in manpha ahihna kilangsak uh hi. Mi huhin Kha Siangtho’ siansuahna tawh nungta uh hi. Amaute hi taleh thu-um lo mite in zong a lamdang Pasian’hehpihna mu thei uh hi.” Ellen G. White, The Acts of the Apostles, 344.
Bangci bangin pawl sungah khatlekhat tungah citpiakna hangin hoihna na mu hiam? Na piakna hangin thupha bang na ngah hiam?
Friday Nov. 2
Ngaihsutbeh Ding: Ellen G. White, ‘ Pentecost,” 35 – 46, in The Acts of the Apostles.
Thu-um mite Kha Siangtho tawh kidim uh ahih manin amaute khaklekhat tungah itsik lo-in pia khia uh hi (Sawl. 2: 44; 4: 32 – 35). Thu-um mite in lungsim kikhat, sepna kipumkhat uh hi. Hotkhiatna thugen a nasep uh lawhcinna a muh uh ciangin kithuhualin nasep lawp semsem uh hi. Hazatna cihte amaute lakah om lo hi. Sumlepaai, vanlenate sangin khatlekhat ki-itna thupi ngaihsut zaw uh hi. Leitung nate sangin mihing nuntakna mannei ahihlam phawk uh hi.
“ Kha Siangtho tawh kidim mite in tua bangin nungta ding uh hi. Khrih in eite aa dingin zawnna, gimna a hong thuak mah bangin Amah a zui mite in zong Khrih mah bangin mite aa ding a kipiak kul hi. Pasian in a hong piakkhong hun, sumlepaai, huzaap neihna cihte in hotkhiat nasepna dingin a kizat ciangin mannei hi. Tua hi-in pawlpi masate in tuhun mah bangin Kha Siangtho in thu-um mite hong makaihin hotkhiatna thu kizelh nading, siatna sunga nungta mi in suahtakna a ngah nadingin nungta uh hi.” Ellen G. White, The Acts of the Apostles, 70, 71.
Kikup Ding Dotnate
1. Pawlpi masa thu-um mite a kipumkhatsak thute ngaihsun in. Tu-in zong koi bangin tua bangin kipumkhatna ding hiam? Pawpi masate i bat nadingin tuhun i pawlpi in bang kisam hiam?
2. Jerusalem pawl sunga cimawhte huh nading thu-um mite piakna ettehin tuhun pawlpi in koi bangin kalsuan hiam?Koi bangin pawlpi in cimawh, genthei mite panpih hiam?
3. Ananias le Sapphira tungtawnin bang thu manpha na mu hiam? Sawl. 5: 5, 11 in bang thu hong hilh hiam?
Tomkaihna:
Pawlpi masate in khangto mahmah hi. Bang hang hiam cihleh thu-um mite in Kha Siangtho kibua dingin kigingkhol uh hi. Upna, thuzuihna-ah kipumkhat ahih manun Kha Siangtho tawh kidim uh hi. Pentecost nungah mi tampi kikhel uh hi. Khatlekhat tungah itna nei uh a, thu-um mi kibehlap tawntung hi.