PAWLPI SAGIH TE TUNGAH THUPUAKTE

Lesson 3 January 12 – 18

PAWLPI SAGIH TE TUNGAH THUPUAKTE

Sabbath Nitaklam Jan 12

Tukaalsung sim ding : Mang 2: 8-11; 2:12-7; 2 : 18 -29; Mang 3:1-16; 3:7-13; 3:14-22; Isa 61:10

KAMNGAH: “Keimah zong gualzo in, ka Pa tokhom ah ka tutkhawm uh mah bang in, a gualzote khempeuh keimah tawh ka tutkhawm theih na ding in, thu ka pia hi.” (Mangmuhna 3:21).

Patmos tuikulh tungpanin, Zeisu in, John tungtawnin, thu nam sagih eite a dingin hong khak hi. John hunlai a, Asia gam pawlpi te a kawk mahbangin, tukhang tawntung pawlpi te zong hong kawk hi. Tua thupuak te, in kibatna nam guk nei uh hi. A masa in, Zeisu in, pawlpi khatkhat in minlo masa hi. A nihna ah, “hih bangin ci hi” cih in zui hi. A zomin, a hunzui a om pawlpi kisapna dandanin, Zeisu in, Amah kua cih kigen leuleu hi. Tua khit teh pawlpi khat i thuakna te, Zeisu in bangci gualzawhpih cih in zuisak hi. A nga na ah tua pawlpi phatna leh, haksatna pan suahtak na’ng lampi hilh hi. A tawpna ah, Khasiangtho hilhkholhna leh, a zote thupha san ding kamciam tawh thukhup hi.

Nung kaalsung a pawlpi masa Ephesus pawlpi thu i sinsa mahbangin, tu kaal sungin zong, pawlpi sim i kisapna leh, tulai eihun kisapna te i mu suksuk ding hi.

SUNDAY Jan 13
Smyrna leh Pergamum a ding Khazih’ Thupuak

Smyrna khuapi pen hoihna leh hauhna tawh a kidim kumpipa tung biakpiakna bulpi khua hi a, tua a nial mite thuakna leh sihna dong tung thei hi.

Mang 2 : 8 : 11 sim lecin, tua hun pawlpi dinmun zui in, Zeisu in, Amah bangci kigen hiam? Pawlpi bang dinmun a om hiam? Zeisu in hong tungding thu bangci genkholh hiam?

Smyrna pawlpi tung a thupuak pen, nungzuite beikhit, Rome kumpi in, Christian te nasia tak a bawlsiat vai a hihi. Mang 2:10 sung a “ni sawm” cih zong, AD 303 pan 313 dong, Diocletian i bawlsiatna hunteng hi a, Constantine in Christiante, suahtakna a piak dong a hihi.

Pergamum khuapi in, gulpi lim a nei, Greekte taang biakna Asclepius a ki ci, cidamna leh gumpa pasian biakna bulpi khua a hihi. Asclepius tattung omna ah, mun khempeuh pan cidam ngah dingin Pergamum ah hong pai uh hi. Smyrna khua mah bangin, kumpipa biakpiakna zong khauhpai hi. Tua lai thu umte in “Satan’ tokhom” ah teeng a cih zong thumaan hipah lel hi.

Mang 2 : 12 – 15 simin. Zeisu in, Amah bangci kigen hiam? Pawlpi, kha lamah bangci phat hiam?

Pergamum hunsung Tapidaw te citak uh hi mahleh, “Nicolaitans” a kici mi pawlkhatin, bawlsiatna omloh na’ngin milim biate tawh kilemna bawl uh hi. Balaam in Israel te mawhna ah a zol mahbangin, Nicolaitans te in zong, ‘milim a kipia na te’ leh ‘zualzanna” te panpih uh hi. Tua a hih manin, Pergamum a ding thupuak in “Kisik in” (Mang 2:16) cih hiziau hi. Pergamum pawlpi hun pen, AD 313 pan 538 hunsung a hihi. Mi pawlkhat kip mahmah napi, pawlkhat nungtolh uh hi.

See also  Lesson 6: SEAL TUPSA PASIAN MITE

MONDAY Jan 14
Thyatira A Ding Khazih’ Thupuak

Khuapi dangte tawh i etkaak ciangin, Thyatira khua in thupiitna lua neilo hi. Gam buppi sumbawl kipawlna om a, sumbawl nuamte’n, tua kipawlna sungah lut kul hi. Tua ki pawlna lut te’n, pawi tuamtuam leh paktatna te zang uh a, Thyatira zong tua lamah kidawk veve hi.

Mang 2:18-29 sim in. Zeisu in, hih pawlpi tungah, Amah bangci ki pulaak hiam? (Daniel 10:6 zong enin) Zeisu in bang thu hilh a, bangin buaina pia hiam?

Pergamumpawlpi mah bangin, Ahab’ zi, “Jezebel” in, Israel te, mawhna lam a paipih bangin (Kumpi masa 16;31-33) Thyatira in zong paipih ci hi. Zeisu in, “khalam ah zualzang uh hi” na ci hi. Thyatira pawlpi in AD 538 pan 1565 hunsung Tapidaw te cihna hi. Lauhuaina in, pawlpi pualampan hong lutlo a, pawlpi sungpan hong kipan hi. Laisiangtho’ mun ah, ngeinate kikoih in, Khazih Siampi dinmunah, mihing siampi kikoih in, gupngah na’ng na semsak hi. A sangtheilo te bawlsiat leh sih thalawh uh hi. Thu ummi tampite, gamlak ah buu uh hi (Mang 12:6,13,14). Zeisu in, Thyatira pawlpi te’ upna, ki itna leh laisiangtho lam ah hong ciahkik a, puahphatna a kipat nate phat mahmah hi.

Mang 2:25 simin. “Na saansa thu lenkipin” cih sawlna, eite a dingin bang khiatna nei hiam? I letkip dingin, Zeisu kiangpan bang i sang hiam?

TUESDAY Jan 15
Sardis A Ding Khazih’ Thupuak

Sardis in, a minthang mahmah tangthu khat nei mah taleh, Rome kumpite khut sungah a minthanna mansuah hi. Hau mahmah in, a khua pen, mualdawn keendang ah kilam a, kuamah’n sim theilo ahih manin, khuapi cingte’n gina cinlo uh hi.

Mang 3:1-6 leh, Matt 24: 42-44, Thessalonian 5:1-8 cihte simkhawmin. Zeisu in, Sardis hunsung Christian te khalam cidam na’ngin, bang hilh hiam? Khuapi tangthu tawh kisai in bang “vil” ding ci hiam?

Sardis pawlpi ah, Tapidaw tawmno te’n citak mahleh, a tamzaw khalam ah sikhin uh hi. Pergamum leh Thyatira te bangin, minlawh ding mawhna bel nei samlo napi un, khalam thaneem mahmah uh hi.

Sardis tung a thupuakte in, pawlpi kipuahphat khit AD 1565 pan 1740 sung hun a Tapidaw te i khalam thakiam a nuntakna neilo taang ngeina te a zuihna te pulaak hi. Pawlpi in, leitung tawh kizom a, leitung paidaan te zawpsiam mahmah a hih manin, nungta ding bang napi’n, khalam si gige hi.

A khang a khang a Tapidaw te a dingin, a beisa a thumaanna te gen kikkik mah ta leh, tutatak a thumaanna a gen ding omlo hi. Amau biakpiakna in ngeina hi lel a, lungsim takpi hilo hi.

Gupkhiatna pen Khazih upna tungtawnbek cih theihkawm in, i nasepna te Pasian mai ah, picing zolo cih i tel hiam? Pasian mai ah bangci leng i picing thei ding hiam? Mate 5:44-48.

See also  A Cingtaak Tawlngakna

WEDNESDAY Jan 16
Philadelphia A Ding Khazih’ Thupuak

Philadelphia in, pawlpi gukna hi a, “unau ki itna” cihna hi. A khuapi pen, sumbawlna lampi dungah om a, mualdawn zaangtampi tung a hihi. Tanglai khua to-kik te muhna ah, cidam na dingin mi hong pai uh ci hi. Zinling nasia a hih manin, khuamite gamlakah buk nono te tawh teenguh hi.

Mang 3:7-9 simin. Zeisu in, hih pawlpi tawh a kizopna bangci gen hiam? “Tha tawmbek na nei hi” a cihna (Mang 3:8) in, pawlpi dinmun bangci lak hiam?

Hih pawlpi in, Britain gam leh America gam a protestant te khanlawh hunsung AD 1740-1844 ciangdong Tapidaw te huam hi. Tua hun a Pasian’ mite in “Pasian Kammalte” kemcing (Mang 3:8) ding hi. Pasian thuhkham kemcing a, siangtho nuntakna a nei te hong khang a, “kong kihong” cihin, “Pasian biakinnpi” lut na lampi hi (Mang 3:12; 4:1,2).

Mang 3:10-13 simin. Hun tomta, Zeisu hong pai ding naita cih bangin hong lak hiam? Pasian min, amite’ tungah bangci kigelh hiam? (2 Tim. 2:19). Min in mikhat’ gamtatna limla a hih leh, Pasian’min a pua te bang a cih nopna hiam? (Paikhiatna 34:6).

Atlantic tuipi langnih tuakah, biakna khanlawhna nakpi takin om hi. 1844 kum kiim khawngin, Zeisu hong kumsuk dingthu, leitung mun khempeuhah ki tangko hi. A zo mite’ tungah Pasian min kigelh cih ciangin, Pasian nuntakdaan lak cihna hi. Zeisu hong paikik ding a thupit zah mahin, a mite mawhna maisak in, tua ni a ding kigingsak, leh, a lungsim sung vuah, a thukhamna te gelhsak ding hi, (Phil 1:6; Hebrew 10:16,17).

Zeisu hong paibaih ding thu, nang a dingin bang khiatna a nei hiam? Zeisu in, Ama’ nasep picingsak ding cih kamciamin, nang, bang tha hongpia hiam?

THURSDAY Jan 17
Laodicea A Tapidawte

Laodicea pawlpi in a nunungpen hi a, sumbawlna lamdung tung mahah omin hau mahmah hi. Tuu-mul puan bawlna khuapi hi a, sumkholna ah kham tampi khol uh a, zatui zatang sangpi om a, mitza ki bawlna khua zong a hihi. Hau kisa in bangmah awlmawhlo uh hi. AD 60 kiim in zinling nasia in a suksiat gawpkhit nungsang, na kisam te Rome khuapan vive a ki vaihawmsak hi. Tui haksa a hih manin, Hierapolis kici tuisa cik panin tui la uh a, gamla pian a hih manin Laodicea a tun hunin, a tui sazo nawnlo in lumbek ta hi.

Mang 3 : 14 – 17 leh Hosea 12 : 8 simkhawm in. Laodicean khuapi hauhna in, Tapidaw te sung bang lutsak hiam?

Laodicea pawlpi mite’ mawhna, Zeisu in taai khollo hi. Amau buaina pen, khalam thanemna hi. A tuinek in, a khua a phakma in, vot manlo, sa nawnlo, lumlai bek hi. Amau hau kisa mahmah ta leh zawng uh a, pil a kisak mahmah hangun kha mittaw uh ci hi. Tua Laodicea pawlpi in, hun nunung a Tapidaw te limla hi. Khalam tangguak omna ah, “Khazih puanpaak”(Mang 16:15), Zeisu’ puanpaak a silh uh kul hi,(Mang 3:18).

See also  Lesson 1: Piansakna Leh Mawhna Kipatna

Mikhat in Armageddon khagalpi a dozawhna dingin, tangguak hilo in, Khazih puanpaak a silh kul hi. Tua puanpaak kingah zawh tuaklo hi. Hehpihna kong zong kikhak ta hi. Puanpaak kepcin ding zongpen, gimna gukna leh Armageddon a ding kigin theih ding, Laodicea pawlpi a kiginkholh theihna ding, Zeisu hong pai ni ciangin, tangguak om a zumloh na’ng cihte hilhkhol hi, (Mang 3:17,18; 1 John 2:28 – 3:3).

Zeisu in, Laodicea pawlpi a itna pulaak hi. Kisikkik ding hanthawn hi( Mang 3:19). Solomon la 5:2-6 sung a, itna neipa leh, Mang 3:20 sung a ‘kongbiang a ding a kiupa’ a hihi. Kong ahon mi peuhmah, lut ding a, Amah tawh nekhawmin Amah tawh maangkhawm ding hi, (Mang 20:4).

Mang 3 : 18 – 22 simin. Zeisu in Laodicea te bang ngaihsutna pia hiam? Kham, puanpaak leh mitzaa te in bang acih nopna hiam? (1 Peter 1 : 7; Isa 61 : 10; Eph 1 : 17,18). SDA te’n, Laodicea in i ki muh leh, hihte in bang khiatna nei hiam?

FRIDAY Jan 18

Ngaihsut Ding: E G White gelh Sawltakte Nasep sungpan “Mangmuhna” laimai 578 – 592 dong simin.

Pawlpi sagih a ding thupuak sagih te in, khalam kiamsuk na vive lak uh hi. Ephesus pawlpi in citaklai napi, a itna masa khahsuah hi. Smyrna leh Philadelphia te in thumaan citak uh hi. Pergamum leh Thyatira te in, mipi nung zuihna tawh upna siangtho nusia uh hi. Sardis pawlpi a hih leh, a tamzaw upna pan lampial uh a, Philadelphia te bel a citak tawmbek om hi. Laodicea pawlpi bel, hoih cihna ding khat zong omlo hi.

Ephesus in, kamciam sang masa a, pawlpi te hong tun tohtoh ciangin kamciam dang san behbeh uh hi. Laodicea in kamciam sang nunungpen hi napi’n, Kamciam Lianpen Zeisu Tokhom luah ding ci hi.

KIKUP DING DOTNA TE

1. Khalam kiasuksuk hi napi, mawhna a tamciangin hehpihna khang (Rom 5 : 20) a cih mahbangin, banghang in, kamciam khangkhang hiam? Pawlpi in thanem,in kisia ta leh, Khazih in vannuai khempauh, a awlmawh penpen a hih lam phawk ni, EGWhite Selected Messages bu nihna, Liamai 396.

2. Christian te in, vanbawlna munpite, sumbawlna munpi te leh khuapilian te ah Christian hih ding haksa hi, ci uh hi. Asia gam khuapi haumahmah te a om Christian te kimkot ah milimbiate tampi om mah taleh, amau thumaan mahmah leh na muhuh ciangin, bang thuthak na muhbeh hiam? Zeisu thungetna (John 17:15-19) sungah, “leitungah ka om uh hangin, leitung a ka hi kei uh hi a cihna kammal in khuapi sung teng mite a ding a hithei diam?

3. Ei SDA te in, Laodicea tungtawn a hong kipia kammal te, bangci awlmawh thei ding i hi hiam?

Tags: ,

Admin

Admin

Top