PAWLPI TAANGTHU

Ih Pawlpi tangthu bel hi dan hi lawmte aw nasimsak un…. Kinial na lamtawh thugen lo zaw in Discussion dan tawh kikum leng ut mahmah ing.

OT hun ah pawlpi cih pen Pasian cih bang a zui, Pasian thumang te pen Pasian pawlpi na hi pahpah uh hi. Adam leh eve zong Pasian pawl pi ahih na uh panin thumang lo in Satan pawl pi na hi a, ahih hangin a kisik tak uh teh Zeisu sisan HEHPIHNA lim cing tuu si tawh amawhna te kisawp siang sak in Pasian pawlpi suak kik uh hi.

Cain ii suan pan in Pasian thumanlohna milim biakna hong kipan in tuiciin hong tun khit teh Noah ii ta Ham Suan pan in Pasian thuman noplohna langpan na ahi milim biakna pen Babel tausang ah hong om to in Tua khit teh Babylon ten leitung bup ah milim biakna dawi biakna pen hong thehthang uh hi.

Tua te lak pan Pasian in Ama thumang Abraham na sam khia in nang pen minam khat in kong bawl ding hi a cih mah bangin Israel minam hong piang hi Hih Israel Pasian pawlpi te kiangah Pasian in a ma Thukham 10 te a phawk na dingin na pia kik hi. Ahih hangin Israel gam pen khen nih in hong kisuah in a tung lam pen Israel nam 10 te hi in Pasian thukham te palsat in milim hong biak tak uh teh. Assyria te in sim in vat mai mang uh in a hing sun lai te zi leh pasal in tenpih uh a, ci mang uh hi. Anuai lam a Israel Judah leh Benjamin suan te zong Pasian thukham te pasat in hong om tak uh teh Babylon ah kum 70 sung saltang in tua pan in Jerusalem lam kik ding in hong ciah kik uh hi. Tua nam nih te in Zeisu messiah hi ci in na sanglo in hih pa sisan in ka tu ka ta te tungah tu ta hen a cih mah bang un. AD 70 teh Rome galkap Titus makai in OT sunga Pasian pawlpi a hi Israel minam te bei mang in ahing lai sun te leitung mun ci teng ah ki thehthang uh hi.

NT hun ah Nungzui te in Hih na khai lup pa uh hong pai ding a kigen khol messiah taktak hi ci in hangsan tak in hong tangko tak teh mi tampi hong ki khel in in Christian hong suak uh hi. hih Thu pen biakna makai te in deih vet lo ahih man in Rome kumpi zang in Christian suak peuhpeuh bawlsia ngek ngek uh hi. AD 313 pawl in Rome milim bia kumpi pa zong Christian hong suak ahih manin bawlsiatna om nawn lo hi. nuam tak in christian te om in kumpi pa in biakinn te lam sak hi.

Tua kawm leh tua kumpi pa Constantine tungtawn in satan in nasem a, Pasian thukham te laih in Ni khenna te bawl in, Pasian thukham namber 3 na milim bia ken cih khawng la khia in, Christian te biakinn sungah milim hong koih hi. ki awi sam lo ahih manin tua milim min ding in Zeisu peuh ci in min vawh in, Mary peuh min vawh in Peter min peuh vawh uh hi. Tua banah tua milim bia kumpi pa in Babylon pan a a zat suk suk uh Sunday ni sim a Ni biakna pen Christian sungah hong zang in AD 321 March ni 7 ni in thu khaut mahmah khat thoh in “Eite in Pasian bia ding hi hang Ahih hangin Sunday ni in bia ding hi hang” ci in thu khattak in thoh hi. Tua pen pawlpi sung pan in Lai Siangtho tawh kituak lo hi. ci a aphun a langpan hong om tak uh teh a dawn na ding un. Zeisu thawh kikni a kizang hi. cih tawh mipi tampi tak hong khem uh hi.

Tua teng pan in milim bia te upna ahi sikha thu. mihing a sih teh mun khat tungin tua teng pan thunget sak leng vangam tung cih te milim bia te upna gina lo teng Lai Siangtho tawh aki tuak thei thei ding in bulh tawm uh in, Christian tampi tak lampial sak uh hi. Tua Rome pawl pi sungpan Pawlpi pai dan maan a sa lo LST tawh kituak a salo te in hong langpan uh in tua pawlpi pai dan maan sa lo a a langpan te pen Pawlpi in Langpangte Protestant te ci in min vawh uh hi. Tua tak teh kua man Sabbath khong tang thei nawnlo ding Sunday ni bek tang ding. aut lo tei tei te bawlsia ding ci in AD 538 kum panin AD 1798 dong Pawlpi in bawl sia in that ngekngek uh hi. hih hun sung pen leitung tangthu history te ah ki record in Dark Ages hun kici in mihing bekbek million 50 val bang that uh hi. Nungdeuh in Pope Francis in protestant te tungah zong tua tawh kisai thumna nei uh hi. Hih mun ah Rome Pawlpi in tanglai Babylon te milim biakna upna guipi a lang zang in, a lang Pasian biakpiakna in zang in khangthak Babylon hong suak uh hi.

Tu hun ciangin Tua Protestant te mah in Tua a lampial Rome pawlpi thuhilhna maanlo te mah uppih uh in zui uh in, Amau tawh kipawl khop ding ut in kipawl khopna ding cih bek bek lunggulh in vaihawm pi in nei ta uh hi.

mai lam hun ah Hih Rome Pawlpi alangpan Protestant te leh Pawlpi khempeuh ii NU ahi Roman Catholic te hong ki gawm kik ding uh a, Mi khempeuh in Sunday ni bek in Pasian bia ding hi cih thukham hong thoh leuleu ding uh a, Pasian thukham a zui a len kip te hong bawl sia leuleu ding uh hi. Hih bang in Aaana hong ki thoh tak ciangin a tawp na hi dinga Sapi ciaptehna leh Pasian ciaptehna hong om ding hi. Sapi ciaptehna pen Aana tawh hong ki sawl ding hi. Sapi ciaptehna anei khempeuh Mangmuhna 16 sunga gimna nam 7 te thuak ding uh a, a tawpna ah kat leh mei kuang tawh ki hal tum ding uh hi. mi tawmno bek in vangam tunna ding kong kawcik tawn uh a, mi tampi in hell kong tanzau tawn uh hi. mitamna khempeuh Pasian a hi khin lo hi.

Laigelh: Khaipi