ZSS 6: Piangsakpa Bia

Lesson 6      Piangsakpa Bia

August  3-9

 

 Sabbath  Nitaklam                         August 3

Tukaalsung sim ding: Late 115:1-8; Thuhilhkik 10:17-22; Late 101:1; Isa. 1:10-17;  Isa. 58;  Maku  12:38-40.

Kamngah:   “Kei deih antanna hibangpawl ahi hi. Gitlohna khaute phel in, hakkol savun-khaute phel a, a ki nengniam mite khahkhia in, thu manlohna hakkol khempeuh suktan ding ahi hi. Na an uh a gilkialte tawh ne-khawm unla, inn neilo a zawngte na inn uh ah paipih in, tangguak a omte puan silhsak in, na mipihte kiang panin bulo ding hilo na hi uh hiam? Isaiah  58 : 6, 7.

            Lai Siangtho lui kamsangte thu simsuk leng, mizawngte leh nenniamte a deihsakna thute hipen hi. Amau kimkot gamte’ gitloh ngongtat nate kamsangte in genuh hi (Amos 1,2). Pasian kiangpan thupha a sang, a mite’ gitlohna te hangin zong a hehna leh a dahna te zong omlai hi. A thu pulaakte lakah, thumaan na leh thumaan lohna cihte pen biakpiakna vai vive a hihthu lungluthuai takin om hi. Biakpiakna maan taktak pen biakna pawi sung tengbek hilo hi. Biakpiakna maan taktak pen, a ki sikcip leh a ki mangngilhsa, Pasian in midang ading a deihsakna te nuntakpihna ahi hi.

Sunday                                                    August 4  

Milim Biakna leh Nenniamna

            Pasian in Israel te Egypt gampan a paikhiatpih khit sawtlo in, Sinai mual ah hong tuaksuk in, thukham sawmte Pasian dang leh milim biakloh ding te gel zong a kihel in pia hi (Paikhiat 20:2-6).Mipite’n a dawnkikna vuah, Pasian cih bangbang mang dingleh, nuntakpih dingin kamciam pia uhhi (Paikhiat 24:1-13). Moses mualtung ah kaalguk sungbang a omtak ciangin, amah bangsuak cih mipite lung himawh mah mah uhhi. Mipite ngetna dungzui in, Aaron in kham bawngno khat bawl a, mipite’n tua mai ah biakna pia uh a, “pawi an ne in tu uh a, zukham in numei pasal kisawk ngeingai uhhi” (Paikhiat 32:6). Mipite paikhialh ciangin, Topa leh Moses te in heh mahmah uh a, Moses’ thumsakna hangbek mahin mipite a suakta a hi uhhi (Pai 32:30-34).

            Israel mite in milim biakna tawh puk tawntung uhhi. Israel kumpi leh Judah kumpi te tangthu pen milim biak vive tawh kidim a, kumpi pawlkhat te in mipite pen zawhthawh thu tawh milim biasak uhhi. Tuabang thumaanloh  nate panin a samkik dingin Pasianin kamsangte sawl zelzel hi. Khanlawhna ding sapna a bawlsimin, mi- zawngte hoihtak donding cih hanthawn tawntung hi.

            Late 115 : 1-8 simin. Laphuakpa in a thupi mahmah bang pulaak hiam?

…………………………………………………………………………………………………………………….

            Mihing peuhmah pen i biakbangbang a kisuun pahpah ahi hi.Thumaan thu tang Pasian biakna panin, galpasian peuh, anhoihna pasian peuh a biak uh ciangin, thumaan thutang a kiam dingmah ahi hi.Mipi te in pasian dang a teeluh ciangin, amau lungsimpuak te uh kikheel pahpah hi. Topa tungah thumaan hi peuhmah leh, Topa’ deihsakna te amau un tang teitei ding uhhi.

            I biak peuhpeuh tawh kibang cih lungngai in.  Hih thuh tawh kisai in a lim i lakpak theih ding a om diam?

Monday                                                   August 5

Biak Takcingna thu

            Lai Siangtho sung tawntungah, Pasian’ mite pen Pasian mah bia dingin kizol tawntung hi napi, eite’n bel tuabang ding mahin i gamta zelzel hi. Amah in kua hi a, bang hih a, bang lungsim nei cihte pen i biakna a hangthu ahi hi.Tuate lakah, a hoihna, thumaan na leh hehpihna cihte kihel hi. Pasian in bangci hi a, ei ading bang hongbawlsak cih(Singlamteh tungah) te leh bang hong kamciam cihte hangin, biakloh na’ng thu leh phatloh na’ng thu i nei peuhmah kei hi.

See also  ZSS 5: Kiphatsakna Pan Kiniamkhiatna ah

            Thuhilhkikna 10:17-22 leh Late 101:1; 146:5-10;  Isa. 5:16, 61:11 simin. Hih mun te ah biakpiak na’ng hanthotna bang om hiam?

…………………………………………………………………………………………………………………..

            Tuate pen Pasian’ mite’ adingin thuthak hi tuanlo hi. Salpan a suakta thak te a hih manun, Pasian in amau ading a bawlsak sa te hangin, Pasian biak ding lawp mahmah uhhi. Egypt panin a paikhiat uh ciangin, Santuipi kan a, Moses leh Miriam in, mipite Pasian’ hotkhiatna la te sakpih hi (Paikhiat 15). Pasian’ thutanna le hehpih na te kilang mahmah hi. Mite in tute tate tungah gen sawnsawn uh ahih manin, a khang a khang in a biakpiakna’ng uh hangthu ahi hi. Tua tungtang thu Thuhilhkikna 10:17-22 sungah et-theih ding om hi.

                        Pasian thutanna in, a masa in Amah kua hi a, Ama omzia teng hipah hi. “A taktak in cileng, Pasian a manlo in gamta ngeilo a,  thutang kimlai a khial in heisak ngeilo hi” (Job 34 : 12).  Pasian in thuman a, thuman zong deih a hih manin, Amah a biaktakcing ahi hi.A nihna ah, Pasian thutanna pen a zawng a cimawh te ki nenniam nate tungtang a Pasian sepzia te tungah kilang hi. A thutanna pen Ama omzia mawkmawk hi lo hi. Lai Siangtho in “mizawngte kahna aw Pasian in za hi” (Job 34 : 28) ci hi. Thu maanlohna khempeuh zong thumaanna suaksak nuam mahmah hi. Tua teng khempeuh in a nunung thukhenna leh leitungthak a bawl ni ciangin picing ding hi.

                       Tanglai Israel te in Pasian phat na’ng a hangthu nei uh ahihleh:  eite’n zong, singlamteh khit ciangin, bangzah in i phat zawsem ding hiam?   

Tuesday                                       August 6  

A Nengniam Biakna

           Israel leh Judah te’ hunhoih laitakin, mipite in biakinnpi ah Pasian biadingin hong pai samuh hinapi, a kimkot a om minamdangte milim biaknate tawh helzau in bia uhhi. Kamsangte’n hanciamtawp in a nuntak uh kheelding leh Pasian kiang ciahkik dingin a zolna te uh kicing zolo hi. Amau in nakpi takin hanciam in sem mah taleh uh, a biakpiak ngeina te a lasakna te in mizawngte kahna te khimzolo hi.

            Amos in ama hunsung mite “mi cimawhte tuancil gawpin, gamsung mizawng te a susiagawp mite” (Amos 8 : 4) na cilel hi. Mipite in biakna lamte thuzawh in, amau sumzuakna te ah zong thumaanlo a zuak nuamuh hi. Tua ahih manin Amos in “khe- dap bukhat man dingin mizawngte i zuaknuam a, i mangbuh hoihlote sum tampi i khawngnuam hi” na ci hi (Amos 8 : 6).

            Isaiah 1:10-17;  Amos 5:21-24 leh Mikah 6:6,8  simin. Topa’n, tua biakna makai te biakpiak dan koici gen nuam hiam?

…………………………………………………………………………………………………………………..

            Kamsangte tungtawn in Pasian in, biakna leh biakpiakna tawh a kizomlo amau kimkot a mizawngte simmawhna te tungtang in kammal khauhmahmah te zang hi. Amos 5:21-24 sungah, amau biakpiakna te pen Pasianin, “mudah” in “deihlo” a “kihhuai” sa hi ci hi. Amau kikhopna te pen “namsia” a, amau sumpi leh tumgingte pen manneilo sang in manneilo zaw hi. Mikah 6 sungah, amau te Pasian a biak theihdan dinguh uangliang in ngaihsutna a piakna khawngzong om hi. Meihal biakna zong uang genzaw a, biakpiakna zong “Topa kiangah tuu a tultulin vapuak in guntui bangin sathau valuangsak leng, tuate tawh Amah lungdam ding ahi hiam?” (Micah 6 : 7). Pawlkhat te in, Pasian’ maipha a ngahtheih na’ng un a tapa upa khawng meihal biakna in na pia uhhi. A nunungpen in Topa’ deihna taktak pen “thumaan thutang sem ding a, itna kip nei tawntungin, kiniamkhiatna tawh Pasian’ thu manding a hihi” (Mikah 6 : 8).

See also  A Tawldamlo Kamsangpa

            Na kimkot a om mi cimawhte donding sangin, biakna vaitekhawng na thupiit sakzawk hun a omngei hiam?  Na ngaihsutna bang hong khangtosak nasa hiam?

 

Wednesday                                     August   7

Biakpiak Na’ng Lampi Khat

            Biakpiakna leh thutanna a khiatnakamsangte in kizomsak a; mizawngte leh nenniamte suaktak sakna in, biakpiakna i khenlianpi khatmah ahi hi. Isaiah 58 in a kizopna honglak hi.

            Isaiah 58 simin. Hih Lai Siangtho khan a patna lamah Pasian leh mihing kizopna a khial bang om hiam?

……………………………………………………………………………………………………………………

            Hih mawhzonna in, biakna sungah kibual taktak te mah a cihna ahi hi.Amau, Pasian nak zontuak mahmah napi hilo deuhse hi. Tua aih manin, Pasianin, a biakpiak danuh alaih uh kul ding ci hi. A biakpiakdan ding uh Pasian in teel ding hi leh, “gitlohna khaute phelin, hakkol savunkhau te phel a, a kinengniam mite khahkhia in, thumanlohna hakkol khempeuh suktanna a hihi” (Isa. 58:6). Gilkialte zong anvak ding a, inn neilo te zong innah samin, ki tasam te huh ding hi.

            Hihbang danbek in Pasian bia ding cih hi tuanlo a, ngeina neih biakpiakdan pawlkhat te khawng sangin, deihhuai zawlai a cihna ahi hi.Biakpiakna in sunglam bekzong hi khinlo zaw ding a, Pasian a bia mite’ kimkot a om mite in zong thupha sanlawh  zawding cizaw hi. “Biakpiakna’ deihna bulpi taktak pen mite a mawhnapan suaktasak, a ki nengniamte khahkhia, thutanna, suaktakna leh kilemna lamto ding hi” The SDA Bible Commentary vol. 4, p. 306.

            Isaiah 58 : 8-12 sungah, hihbang biakpiakna tungtawnin, Pasian in thupha kam ciam hi.  Mite in amau leh amau ki bulphuhzaw kei peuhleh, Pasian in amau tungtawnin, damsakna leh puahphatna bawl ding hi.

            A lungluthuai thukhat ah, hihbang biakpiakna pen, Sabbath tan “nuamsa” cih tawh kizom sese hi. EGWhite in zong, “Topa’ Sabbath a tang mite tungah, hehpihna leh deihsakna nasepte sem dingin mawhpuak pia hi”  (Welfare Ministry, lai 121) ci hi.

 

Thursday                                   August 8

Hehpihna leh Cihtakna

            Zeisu zong biakna makaipi te in a langdodo lai in, “mawhneite” tawh anne khawm ci uhhi. Kamsangpa Hosea kammal kawmin, laibu te enkik ding sawl a, “ganhingtawh biakding kadeih kei a, migitna ka deihzaw hi” (Mate 9:13; Hosea 6:6) a cihteh Pasianin bang cinuam taktak cihthu kansak hi. Zeisu in mite don in, mitawh a kizopna, na lamdang bawlna, a thu gentehna tampi takte in, Pasian kiangah ki aap na lampi hoihpen honglak hi.Biakna makaipite in Zeisu mawhzong lianpen te hi a, a mawhzon danuh  zong cikziathuai mahmah hi. Isaiah hunlai mah bangin, amau biakna zuihdan in Pasian tawh kizopna hoihmahmah ci in a up laitak mah un, mizawng mi cimawh te simmawh donlo uhhi. Amau biakpiakna leh amau gamtatna kituaklo uh hi.

            Maku 12 : 38-40 sim le cin, Zeisu’n, “meigongte’ inn sut” a cihpen kihello bang a hihiam? Aih keileh Zeisu gennop thu a hi beek hiam? “Hihte’n thuakna lianzaw ding” a cih koici’n i gentel thei diam?

See also  ZSS 6: Kammalte Sim

…………………………………………………………………………………………………………………..

            A patauhhuai penpen Zeisu’ thugenna Mate 23 na ah omhi. Mizawngte simmawh bek hilo in, amau vangik a behlaplap hizaw cihi. Amau gamtatdan leh a seplohna te hangin, Zeisu in “vantung ki ukna sungah mi luttheihloh nadingin kong nakhakcip uhhi. Note lah na lutnuamkei uh a, a lutnuamte lah na lutsakkei uhhi” (Mate 23:13) a ci hi.

            Kamsangte tawh kisai in, Zeisu in, a biakpiakna thuk mahmah te leh thumaan lohna tungtawn a meetna te tangtakin pulaak-sak hi. “Mi hoih a kineihkhem no Thu khamhilh sia te leh Farisai mite in, gimna na thuak dinguh hi. Note in Pasian tungah lengmasel, masala leh kummin sing namtui a kipan mehnamtui nam khempeuh, sawm a khat pia napi in, thukham sang a thupizaw ahi thutang hehpihna leh thumante na donkei uhhi. A dangte nusia tuanlo in, hihthute na zuih dinguh ahi hi” (Mate 23:23). Zeisu in, biakna ngeina zuihte khialci tuanlo napi, midangte liangko kim a don ding mangngilh uh ci zaw hi.

            Ka thumaan neihna leh theihna kicinglua ta cih thaangpen i koici pelhtheih ding hiam?

 

Friday                                          August  9

Ngaihsut beh ding

            EG White lai Welfare Ministry laimai 29-34 sung ah, “Pasian hong lahna” leh Desire of Ages bu laimai610-620 sungah “Pharisee tetungah Gimna” cih thulu sim in.

            “Pasian tawh kibat taktakna ding hanthotna pen, kum tampi peklai a Israel te tungah a kigengensa a hihi.Khangsimin Pasian’ nasemte’n a tangko zelzel a lauhuai thu in, ngeina te zuilua zaw a, hehpihna, hoihna lakding mangngilh zaw” ci hi (EGWhite, Prophets and Kings lai 326,327).

            “Mipite kiangah Isaiah 58 na hoihtak lakdingin kei hong kisawl hi. Limsim inla pawlpi sungah i nuntakpih theih dingin panpih in. Lungdamthu tangkona pen, eite hoihna tungtawn a kisem ding ahi hi. Thuakgim mi na muhleh huh in. Gilkialmi na muh leh an pia in. Tuabang nahih leh Christ tawh nasemkhawm nahi hi. I Topa’ siangtho nasepna ah phattuamna omsak hi. I mite in hihbang munah maa pangkhawm ta hen” (EGWhite, Welfare Ministry laimai 29).

Kikup ding Dotna te

  1. Biakpiakna in, thuman thutang leh itna hehpihna na zangngei hiam? Midangte na naihtheihna dingin hong bangci huhthei ding hiam? Na biakpiakna hong koici kheelsak zo thei ding hiam?
  2. “Thukham sangin a thupizaw” (Mate 23 : 23) thute donlohna pan, a mimal a hi a, pawlpi huam a hi zongin, koici kikeptheih ding i hihiam? “Thovai khaih napi, kalaoh i nawmvalh” (Mate 23:24) na munkhawng na genthei ding hiam?
  3. Kineihkhemna pen banghangin mawhna hithei hiam? Ahoih ding i kisinna beekin kimuhsak theilo ding maw leh?
  4. Mizawng cimawhte tungah Pasian’ muhdan kamsangte tungtawnin na theih khitciangin, leitung na muhdan a kikheelzo hiam? Kamsangte’ kampanza, mitpan na muh khit teh, leitung thuthangte na sim ciangin, na lungsim a kidang hiam?

Tomlakna: Kamsangte in gamsung siatna thu a gen ciangin, mipite in Pasian pen amau aituam neihsa in bia uh ci hi. Kamsangte le Zeisu in, biakpiakna le thuman thutang letlohna pen kituakthei lo a, tuabang thuah-khawmte in a kineih hilel hi ci hi. Pasian a bia taktakte in, nenniamte khahkhia a, mizawngte don hi.

Download (PDF, Unknown)

Tags: ,

Admin

Admin

Top