ZSL 7: PILNA TAWH BIAKPIAKNA

Zomi Sabbath School Lesson 7: PILNA TAWH BIAKPIAKNA, Tedim, Zomi, Zokam, Zopau, Zolai, Thado, Paite

 

Lesson 7                                                        *November 7–13

PILNA TAWH BIAKPIAKNA

 

SABBATH NITAKLAM                   November 7

Tukalsung Simding: Daniel 3; Revelation 14:6–12; Psalms 78:1–17; John 4:7–26; 1 Chro.  16:1–36; Mark 7:1–13.

 

Kamngah: “Amah in angahding a kilawm minthanna Topa tungah pia un. Biakpiakna puak unla, ama’ maiah pai un! Biakna puan silhin Topa bia un.” (1 Khang tangthu 16:29).

            Biakpiakna i cihin mihing pianzia phellang hi a, a pukmite nangawn pianzia ahi hi.   Pasian in a suakta mahmahin hong bawl himahleh, biaktakcingpa ahihna leh amah itna tawh ibiakding ahi hi. Leitung apukma in, mawhna in hong suksiatna bangmah omlo, a puksa mi’ lungsim in zong a ngaihsut zawhloh hoihna tawh kidim ahihmanin, mihingin Pasian tawh maitang kimu in biakpiakna piathei in etlawm mahmah hi.

            Tuni in, eitepen biakna piakding ipianpih hilel hinapi, mawhna in na khempeuh  hong suksiat sak a, a biadingte in biaktakcinglo peuh kibia kha in, Topa abiate nangawnin zong Topa’ deihna tawh kizui in biakna piatheilo uhhi (Mark 7:1–13, Jer. 7:4 simbeh in).

        Christiante nuntakna in biakpiakna bulphuh a hih nungsang, Christian pilna zong pen, biak piakna mahtawh kizopsak ding ahi hi. 

           

SUNDAY                                                                           November 8

Nakhatpeuh I Bia hi

            I sungah Pasian in hong koihsak Nakhat omin, tua in biakpiak nopna hi a, mawhna in hong sukpoisak hi. A kipatcil in bel hong Piangsakpa biaktaakcing i Topa bekmah biakding ahi hi.   Ahih hang puknapan kipanin tuathu kikhelgawp hi.

            Himahtaleh Nakhat peuhpeuh i biapongpong hi. Tua thu hangin tanglai pan kipan tuni ciang dongmah biakna kipia tangtang hi. Tanglai Egypt mite pawlkhatin a kumpi pharaoh peuh bia-uh a; mundang khawngah ngasa lim peuh, lutampi nei pasian peuh, upmawh pasian peuh biamawkmawk uhhi. Pawlkhat leuleu in Ni, kha leh aksite peuhzong bia-uhhi.

            Tuni, mipil misiam tampitakin uiphuklim (Mary’ milimbeek hilo) peuh bia-uh a, tua zong nadangte bialo kineih uhhi: sum, vaang, cilehsa, amau mah, suangtum, kineihsiamte, gamthusiam mite cihkhawng bialo uhhi. I itpen, i lunggulhpen, i nuntakpihpen cihte i biakpiak hipahpah hi.

            Lai-atsiam David Foster Wallace in, “biaktaaklo khat na biak khakleh, hong hingneektum ding hi” ci hi.

            Daniel 3 sung athu in biaknamaan a thupitna bang gen hiam?

________________________________________________________________________________________________________________________________________

            Jew tangval thumte in (Paikhiat. 20:4-6) sung a Pasian’thukham nihna citaktakin zui uhhi. Tua in Thukhamsawm lakah kihel hi a, thatlo ding gulo ding cihte tawh kigualkhawm hi. Biakna maantaktak thupi mahmah a, hunnunung Zeisu’ kumkik naiciang adingin thulaigil hong hiding hi. Tua a hihmanin Christian pilna sungah biakpiaknapicing kihel kulding hi: bang hi a, bangcih ding a, banghangin thupi, kuabia ding hiam?

            Revelation 14:6–12 simin. Hih munte in Khazih hongpaikikma in biakpiakna thupi mahmah ding cihthu bangteng hong hilh hiam?

 

MONDAY                                                              November 9

See also  SINNA 10: KIPUMKHATNA LEH AKISIA KIZOPNA

Tate Tungah Pulak 

          Laisiangtho lui sung a Late in Israel mite biakpiakzia teng ahi hi. Mihon biakpiakna sungah tumgingte tumin lasa in mipi in biakna apiak uhpen Laisiangtho lui hun ngeina dan ahi hi.   Israelte in kipawl khawmin biakna piakhawm zeluh hi.

          Late pen lagui dan vive hi a, la adingin la kammal vive ahi uhhi. Late pen Hebrew pau in Tehillim hi in “phatnala” cihna ahi hi.  Tuate sakawmin Pasian aphat uh ciangin, Amah abiabia ahi uhhi.

          Psalms 78:1–17 simin. Bang thupuak thupipen namu a, pilna leh biakpiakna tawh koibang in kizawitawn naci hiam?

__________________________________________________________________________________________________________________________________

          Psalms 78, tang 2na ah Asaph in “tanglai a thuthukte” kong gending hi cihi. Thuthukte a cih ciangin, tangthu peuhmahin, tangtawng peklai a thupiangte cihna ahi hi. Pawlkhatte in “thusim” cihkhawng “thumaanlui” cihkhawng in let uhhi. A cihnop bulpibel, Israel mite’pilna sinna sungah naupangte thuhilhna ah a minam adingin Topa’ nasepnate kihel cihthu ahi hi.

          Psalms 78:6–17 simkik in. Atate uh ahilhdingun bang sinna kician nei uhhiam? Hih pilna in bang ngiimna lianpi nei hiam?

__________________________________________________________________________________________________________________________________

           Naupangte’ laisimbu mungtuppi sungah, naupangte in Pasian muangin, a thukhamna kemcing ding cih omhi.

 

TUESDAY                                                           November 10

Kha Sung leh Thumaan Sungah

            Laisiangtho thak sungah Zeisu in lungsim tamkhamte adonnate lak panin a kicianpen khatin, tuikhukgei a numeinu tawh a kihona ahi hi.           

            John 4:7–26 simin. Tuanu kiangah Zeisu in biak-piakna tawh kisai bang gen hiam? Biaknavai kikuptheih nadingin koibangin kipan uhhiam?

____________________________________________________________________

            Tuanu in biaknavai tawh genkizomlo thulaih nuam taleh, Zeisu in bel tuanu hihdan pen biakna sungah thuman thutak pholak khiatna in zatsak zaw hi. Tu leh tu in zatpahtheih ding khatin John 4:24: “Pasian pen Kha ahihi; amah a biate in tua Kha’ lamlahna leh thuman thutaktawh abia ding uhhi” acihi.

            Topa biakpiakna mantaktak pen Pasian’ itna pan hong mengkhia, amah theihtel taktakna ahi “Kha” tawh piakding ahi hi. “Pasian’ kiangpan hongpai biakpiakna bekmah in Pasian’ kiangah hong tunkik thei hi. Ama’ na hoihtak iseptheih nadingin Kha tawh isuakthak ding hi. Tua in Pasian athei ding leh it dingin, lungtang sawpsiang thei a, lungsim thaksuaksak thei hi. Pasian’ hong nget bangbang thumang nuamsak hi. Tua in biakna maan ahi hi.   Khasiangtho’ nasepna gah ahi hi.”—Ellen G. White, the Desire of Ages, p. 189.

            Biakpiakna pen “thumaan” tawh piakding ahi hi. Pasian tawh kisai, amah kua hi a bang hong ngen hiam cihte, thumaan tawmbang zong theikha mahni. Thukhat ah upna thukhunte ahi hi. (Theihding a thupikhat ah, eite biakpa Pasian pen Hell sungah mite tawphun neilo in a halhalpa khawng hihetlo hi).

            Biakpiakna ah thunih omhi: Pasian thei in a thumang a, Pasian’ thuman thutakte hong kilak. Thumaan neilo kha in upmawh thute tungah kiphut puatham thute lamah hong makaih thei hi.Kha neilo thumaan inlah nuntakna neilo ngeina bawlna hong tunthei hi. Tua a hihmanin a nihmahin i kisamkhawm hi.

See also  MSL 5: မာနထောင်လွှားခြင်းမှနှိမ့်ချင်းသို့

            “Kha leh thumaan” tawh biakpiak theih nading koici zon ding na hiam? Koibang munte ah khat sangin a dangkhat bulphuhzaw kulthei ding hiam?

 

WEDNESDAY                                                     November 11

 Sianthona’ Hoihna (Biakna Puan)

            1 Khang. 16:1–36 simin. Na mitkha in mudih in. Thupi, lauhuai, lawphuai ahihkeh lungnophuai naci hiam? A kikop a hihna koibang hiam? Biakpiakna tawh kisai bang pilna khang a, mite koici hilhsawn thei ding a, koibangin theitel thei ding hiam?

________________________________________________________________________________________________________________________________________

            Biakpiakna munin biakbuk akici, tanglai Israelte sungah Pasian teng a, hotkhiatna ngiimna a lahkhiatna mun ahi hi. Biakpiakna leh biakna vai pilna in Zeisu leh hotkhiatna ngiimna’ thulaigil hi a, biakbuksung nasepzia khempeuh in ahilhkholna limlak ahi hi. Eite a ding Pasian in hongsep saksa khempeuhin phat leh biaktak acinna hi a, singlamteh tungah kipia in eite’aiawh hong sihna leh tawntung nuntakna omlo hileh bangmah manneilo hi. I nasep ding thupiakkhat phawkdingin: leitung buppi in Israelte Pasian’thu thei ta uhhen.

            1 Khang. 16:29 etbeh in: “Amahin angahding a kilawm minthanna Topa tungah pia un; biakna puak unla ama’maiah pai un! Biakna puansilhin Topa bia un.”Biakna puan? Bang a cihnopna hiam?

________________________________________________________________________________________________________________________________________

            Mawhna in bangzahin melsia, kisia leh hong nengniam cih ngaihsun in. Israelte kiim leh pam mite in naungek biakpiakna a kipan ngeinate bangzah hoihlo, lipkhaphuai cih i ngaihsun banzo kei hi. Tuabang a gamta mite in bangteng limlak cih dotdot zong kullo lel hi.  

            Tuate langkhatah tanglai Israelte pen minam siangtho hiding a, amau kiimah ngeina hoihlo tetawh kihelzauh loh ding ahi hi.   Lungtang lungsim siangtho ding uh a; tua in Pasian’mai ah amau biaknapuan hiding hi. Laisiangtho lui kamsangte in a gengenthu khatpen, Topa abiabia mite in a lungsimuh Topa tawh kigamla cihi.

 

THURSDAY                                                       November 12

Pilna Milim

            Tangalai Israelte pen biakna ummahmah, a tate nangawn a pasian biakpiakna in a hallum ngam mite in a kiimkot vuah om uh hi. Tuapen kipiakkhiatna himaw/ hi lo? Pasian maan taktak biakna in Hebrew mite amau kiimkot a milim biakpiakna in amatciploh nadingin kemcing hi. Hilhkholhna tampitak tawh tuazah ta a kikhaam lakmahah, milim biakpiakna sungmahah puk veve lai uh hi. Tuni eite e leh? Pasian maan biakpiakna leh, ama hong sepsaksa khempeuh phawk kikna bangzahta in thupi poimawh a, a diakin tuhun milimthakte e leh?

            Mark 7:1–13 simin. Aneu 7–9 sungah Christian pilna leh thumaanlo kihilhnate, eite upna hong lehkaihthei leitungpilna langkhatah, bang thukhun peuh i muthei hiam?

________________________________________________________________________________________________________________________________________

            Leitung mipil misiam tampitakte ngaihsutna pen leitung muhdan vive in paimang gaita hi. Sangte ah a kisin thukhunte pen leitung ngaihsutdan vive hi a, Laisiangtho tawh kilehbulh zawsop hi. Mite kikuptawm ngaihsutna khawngpeuh thukhun suaksakin biakding peuh hongzol ding uhhi. Thungaihsun siamte, mipilte leh math siamte pilna khawngpeuh hong biaksak sawm mikmek ding uhhi. Hihbangte pen tulai mihingte’n amaan dingbangin Christian pilna lamah kihelthei zah dongin ki ngaihsun hinapi, Laisiangtho tawh kitukalh thei hi.Hih theih ding lampi khatbek omlai a, upna lampan khiam dingin, Laisiangtho thute pen tulai ngaihsutdante tawh a kituakthei dingin vaihawm ding hilel bek hi.

See also  Sinna 3: Kikheel ding Kiging

            Laisiangtho tawh a kitukalh tulai upnalaang bangteng peuh hi a, pawlpi khat i hihna dungzui in tuate tawh koibangini kipelhthei ding hiam?

FRIDAY                                                November 13

Ngaihsutbeh Ding: “Lungtang limlim khemna leh siatna tawh kidim hi. Biaknalam mipilte in upna leh, mi tampite in lam-etna manlo a neihuh lauhuainate a neihleh neihloh ki sittel nuamlo uhhi. Pawlkhatte’n kum tampilai a phutkhakte peuh muangmawkmawk uh a; ahihhang lungsim taktak kidawkna hihbang hunciangin, mikhempeuh in nisim phutkhakthu nei khin uh ahihmanin, amau a bangmah hinawnlo pah hi. A thumaan theihna in amau honkhiazo dingin uptuak uhhi. Pasian in a muhdah tuabang mawhnate tungah nagualzawh ciangbek in, Zeisu honglutin amahtawh nekhawm dawnkhawmin na omthei ding hi.

            Zeisu kiangpan vantung thahatna nangah ding a, ama’ sungah khangto in, a siangtho gualzawhna ngahin, Topa Zeisu sungah zawhna hongpia Pasian in thupha ngah tahen naci thei ding hi. A lumbek biaknalam mipilte in Topa’ min lo ngeikei leh Topa hoh nuamzawsop ding hi. Zeisu’ nung thumantak a zuidingte kai-awk tawntung uhhi. Thu umlo mite a ding paltukna hi tawntung uh a, vanmigilote lungdamsak mahmah uhhi. Pasian’ vanmite in tua bang gamtatna lipkhap in munuamlo uhhi. Tuabangte in innsung innpua ah samsiatna vive ahi uhhi. “Amaute’ lungsim Pasian kiangpan gamla mahmah napi, a kampi uhtawh Pasian’ kiang hong naih uhhi.”—Ellen G. White, Spiritual Gifts, vol. 2, p. 227.

Kikupding Dotnate:

  1. Mark 7:1–13 sungah, biakna maanlo pen lungsim sungtawngpanmahin hong piang cihi. I biakpiakna pen lungsimtawngpan hi lo a, kampibek tawh ahihleh Pasian in donlo hi. Zeisu in eite a ding hong sihna tangthu in, banghangin Pasian ittakpi theihna ding lungsim kongkhak honna hithei hiam?
  2. “Kha leh thumaan” tawh Pasian biakna lam lungngai in. Khat hih in a dangkhat hih dah leng ahithei diam, ahih keileh biakpiakna maantaktakin a nihmahin hong ngen hiam?
  3. Biakpiakna mantaktak tawh biakpiak kultakpi a, tua in bang a cihnopna hiam? Biakna piakma in nanuntakna picing takin Pasian tawh kizopphot kul hiam? Thukhat panin biakpiakna mantaktak in, lungsim Pasian tawh kizopna mantaktak hong neisak thei hiam?

 

 

Tags: ,

Admin

Admin

Top