MSS 13: Roma Khua in Sabbath Muta

Roma Khua in Sabbath Muta

Peter Mižigar, 44

Slovakia; March 28

Slovakia gam sunga, Roma khua ah a teng mi 2,000 te in amau mahmah Khrisiante in ki ngaihsun pong uh hi. Ahi zong kuamah biakinn ah ki khawm ngei lo uh hi. Lai Siangtho zong kua mah’n sim ngei lo hi.

1993 kum a, Slovakia in suahtakna a ngah khit ciangin missionary tampitak hong lut ziah ziah uh hi. A masa pen in, nupa kopkhat lut masa in, Sunday ni simin khua sung kongzing lakah thu gen den uh hi. Mipite thu ngai dingin hong ki kaikhawm na pi, Lai Siangtho sim ngei lo uh ahih manun tawmcik bek tel uh hi.

Khua mite khat ahi, Peter Mižigar in thugen a ngaih sangin, a band ah lunglut zaw hi. Mopawi le sihvuina khawng ah, bass tum hi. A band uhah a kihel a naupa, Pavol zong, a dangte mah bangin a sum ngah teng zu in gai hi. Ahi zongin Peter in ahihleh tua bangin a tum laitak un zu dawn ngei lo hi. Amah pen a mawtaw hawlpa uh zong ahi hi.

Tua bangin music tawh mipi’ mai adin uh ciangin, mipite nam nih a phak lam uh phawk kha hi. Pawlkhat te, a omdan uh deih huai in, pil om vilvel  uh a, a dang pawlkhat te pen hai gamtat gawp uh hi. A lawm dangte in bel bangmah thei se lo uh hi. Ahangin amaute in zukham sa in tum uh hi.

Peter in ahihleh mipite’ lungsim puakzia encik den hi. Ahi zongin tua bangin Roma khua mite pawl nih in a omna uh pen zu a kham uh ciangin hong ki lamdang nawn lo hi. Mihingte in zu a kham uh ciangin, mihaute na ngawn mi zawngte mah bangin kilam danna bangmah om nawn lo hi. Tua bangin a bawl sim un, misi lak nangawn ah, zu kham-a buai gawpna, khuttum tawh kitup kilaina tawh a hun uh mansak den uh hi.

See also  MARXIST pan ADVENTIST ah

Tua bangin mipite, Peter leh alawmte’ lamah zu kham sa in hong ki hei uh amuh uh ciangin, Peter le a naupa in, khawl dingin khensat uh hi. “Leitung late tum nawn kei ning. Pasian’ late bek tum ta ning” Pavol in ci hi. Pavol in amaute’ kiangah hong pai missionary te’ la hon te ngai zelzel hi.

A sawt lo-in, Peter, Pavol, leh a lawm dang tengin Xmas late Pavol’ inn ah tum zel uh hi. Tua bangin a tum laitak uh, khat vei Peter in sabuai tungah Lai Siangtho bu khat mu kha hi. “Bang laibu hi peuh mah ahia?” ci-in tawito kawm in dongh hi. Pavol in sutkhia-in, “Koih suk peuh oh. Tua khawng te note a’ ding hi kei” cih san hi. Pavol in Lai Siangtho sim zel na pi, kua ma’ kiangah hilh sawn ngei lo hi.

Tua bangin Pavol in a lawmte tawh music a tumtum laitakun, Peter in tua Lai Siangtho bu, a lenuai-ah tepsim kawmsa in pusuak khia hi. A inn a tun ciangin kha khat sung tua laibu a sim hi. Mangmuhna dong tung suk ta a, tua khit ciangin Lungdamna laisiangtho bute sim kik hi. Tua ciangin, a sanggampa’ kiangah a pia kik hi. A sanggampa Pavol in zong, “khat vei nasim kik in la, na zawh ciang hong pia kik oh,” ci hi.

Ni khat, Peter a Lai Siangtho sim, Mark 16:16 hong tung hi. Tua lai-ah Jesu in, “Um in tui sungah a kiphum mite in hotkhiatna ngah ding hi” ci hi. A Lai Siangtho khup suk in, hongg kik leuleu hi. Tua mun mah en kik leuleu in, “Um in tui sungah a kiphum mite in hotkhiatna ngah ding hi” cih mah hong sim kik leuleu hi. Thum vei sitset Peter in a Lai Siangtho bu khup in, hongg zel a, sim kikkik hi. A Lai Siangtho sim tawi kawm sa-in Peter a sanggampa’ inn-ah taai veva hi. Pavol ahihleh a lawmte nih tawh na ngawi keei ta hi.

See also  Sabbath tawh kisai buaina

“Hong pai in la, hong tuiphum pak in,” Peter in ci hi. Tuiphumna thu pen ama’n thei ngei lo hi. Jesu’ thu mangin tui a kiphum nuam hi lel hi.

“Kei’ tuiphum ding nang ut maw?” Pavol in ci hi.

“Ut ee, hih lai-ah, ‘a ki tuiphum peuhpeuh in hotkhiatna ngah ding,’ ci-in a ki gelh si-aa,” Peter in ci hi.

Pavol in a cih nading thei loin, ki uaikai sak mahmah a, Peter ahih leh kinawh mahmah hi. Unau tegel leh a lawm nih te uh, pi thum khawng ding a thuuk, a inn nung vua lui-ah pai-in a ki tuiphum khel ngei ngai uh hi. A mawhnate uh Pasian’ tungah pulaak in mawhmaina ngen uh hi. Tua khit ciangin amaute in a lamdang takin lungnopna ngah uh a, amaute’ ki tuiphumna hangin vantung mite a lungdamna thute a gen khia uh hi.

Tua ni-a kipan in, a li un, haamsiatna kammalte, zateepte, zu dawnnate zangh nawn lo uh hi. A vengte un lamdang sa mahmah uh hi. Nidangin tua mite in zu a kham uh ciangin mite lau in a taii keek den ahi hi.

Tua mi li te in, nisim in Lai Siangtho sin khop dingin khensat uh hi. Khat veivei nitak lamin sin in, zingsang dong zanhak in sin thei uh hi. Midang tampi in zong tua Lai Siangtho sinna ah va pawlpih uh hi. Mihing 50 pan 100 bang Pavol lengla khan sung le a anbuuk sung dongin dim zihziah den hi.

Zan kim dong khat vei a sin khop laitak un, Peter lungsim pen Mark 16:9 ah hong om gega mawk hi. “Tu-in nipi kaal khat sungah ni masa pen ni in a thawh khit ciangin….” Cihna mun a muh ciangin Peter in, Jesu le a nungzuite ni sagihni ahi, Saturday ni-in a tawl ngakna uh hong phawk kha hi. Amaute’ kiangah hong pai missionary te lah Sunday ni-in tawlnga in a kikhop uh tawh a ngaihsut khop ciangin lamdang sa in tel zo lo hi.

See also  ‘Hi, Hope Channel’

Missionary te kua mah in Peter’ dotna dawng thei lo uh hi. Lai Siangtho sin te pawl in ahih uh leh khawl lo in, zom suak uh hi. Thupiak nambat li na hong tung uh hi. Sabbath ni tanding hong kipan ta uh hi.

Ni khat, Peter in Roma khua ah a va hawh a sanggamte khat kiangah Sunday vai a buaina thu na kup pih hi. Tua pa pen a min Josif hi-a, Seventh-day Adventist khat na hi citciat ahih manin, Peter’ kiangah, Sabbath ni in biakna a pia pawlpi a om lam hilh hi. Peter’ sapna dung zui-in, Josif in Lai Siangtho sin pawlte’ kiangah thu va hilh hi. A nung lam ciangin Josif in Peter leh a pawlteng tua kiim a om Adventist pawlpite’ kiangah a hawh pih hi. Tua Adventists te biakpiakna pen pawldang te a’ tawh ki lamdangin daai khipkhep in, lipkhap huai tak in a om, a muh ciangin a lungsim sukha mahmah hi.

Peter’ inn khan sungpen Adventist te kikhopna leh a dang pawlpi program tuamtuam bawlna biakinn-inn hong suak ta hi. Peter tawh a sanggampa tawh, a dang laisiangtho a sin khop pih uh mi 24 te Adventist pawlpi ah, 2015 kum in ki tuiphum uh hi. Kum nih khit ciangin adang mi 10 te zong hong ki phum beh uh hi. 2018 kum ciangin Adventist biakinn khat ki lam a, sabbath sim in mi 100 ta bang tawh ki dim phitphet den hi. Tua pen Peter’ inn sung panin hong khangkhia Pasian’ pawlpi ahi hi.

Tu kuata sabbath 13 na mission sumpi khenkhat tawh Slovakia gam, Rakúsy khua a om Adventist pawlpi ah naupang te kikhop nading inn khat ki lamsak ding hi. Hih bek tham loh in, Bulgaria, Germany leh Spain gam a i pawlpite zong ki huh lai ding hi.

By Andrew McChesney

Tags:

Admin

Admin

Top