Sabbath Biakinn Khat Mu

January 26 Mozambique
Sabbath Biakinn Khat Mu
Agen: Ivaldo da Conceicao Nazare, Kum 23
High school sangnaupang Ivaldo in phungzi khat suah ding ngim den hi. Pasian’ thubu (Catechism) te hanciam takin sin den in, Nampula khuapi a biakinnpi sungah hilhkik den hi. Nampula khuapi pen Mozambique (Mozambik) gam ah khuapi lian thumna hi-a, mi 500,000 bang teeng hi. Maputo khuapi ah phungzi sin dingin kiging khol hi.
Sunday ni khat biakinn pi sungah a hilh dingin, Thupiak 10 te sin khol in kigingkhol a, Pasian thubu (Catechism) le Lai Siangtho hong saaikaak in, hong en khawm suksuk hi. “Lai Siangtho sung a, thupiak 10 pen ei’ Pasian’ thubu sunga tawh ki lamdang lua,” ci hi. Phungzi khat kiangah a hilhcian dingin huhna a nget hangin na dawngcian thei lo hi. A sanginn ah, Ivaldo in mi 30 kihel kipawlna khat hong phuan in Lai Siangtho le Pawlpi’ thu hilhnate a kilamdanna saaikaak suksuk sak hi. Sangnaupangte’ dotnate in bishopte nangawn patau sak mahmah hi. Bishopte-in, “Tua na zonkhiat uh nasep pen—hoih lo hi, mawhna hi, kisikkik aa, na thuum kei uh leh na vek un hong ki hawlkhia ding hi,” ci-in vau uh hi.
“Mawhna pen Pasian’ kiang bek ah ka phel ding uh hi,” ci-in sangnaupangte in dawng uh hi. Bishop pa in tua sangnaupang teng avekpi un pawlpi pan hawlkhia hi. Pawlpi masate in nipikaal sungah a ni sagih ni-in biakpiakna a bawl lam uh Lai Siangtho a sim uh ciangin mukhia uh a, ahi zongin Nampula khuapi sungah Sabbath tangg pawlpi khatzong mulo uh hi. Tua sangnaupang kihawlkhiate’ lak ah, pawlkhat in Evangelical pawlpite beel in, pawl khat pen Islam biakna ah ki-ap uh hi. Ivaldo’ nulepate pen a pawlpi sung uah huzaap a nei mahmah innkuan hi-uh ahih manun amah bel kisangkik aa, ahih hangin phungzi suak khanawn lo hi.
Sunday ni khat, Ivaldo in biakinn sungah Sabbath thu hong gen ciangin, nupi khat in, “Nampula khuapi sungah Sabbath tangg pawl a om lam na thei hiam” hong ci hi.Tua thu azak ciangin Ivaldo in alawm 30 te sam in tua Sabbath tangg om ahihna thu a pulaak hi. Tampi takte bel lunglut nawn mel lo ta uh hi. Ivaldo leh adang thumte bek Sabbath kik ciangin Seventh-day Adventist biakinn ah va kikhawm uh hi.
Tua zawh kha 5 khit ciangin Ivaldo tui kiphum hi. A khentatna khempeuh zong a nulepate’ kiangah gen hi. A nu’n bel na thei khin hi.
“Na gamtat luheek dan nakpi takin ki khel in, Lai Siangtho thu bekbek gengen mai nahih manin, nong gen lohsa in kong thei hi,” anu in ci hi.
A pa bel heh mahmah in, inn panin hawlkhiat dingin lauphawn hi. “Mai Sabbath ciangin Adventist biakinn ah na kikhop lai ngeeingeei leh na puanteng le nang’ mahmah inn pualam ah hong lawn khia taktak ding hi’ng,” ci hi.
Ivaldo ahih leh mai Sabbath ciangin Adventist biakinn mah ah ki khawm ahih manin a pa in hawlkhia takpi hi. Ahi tazongin a nu in zolkik a, ciahkik sam hi. Himah taleh a pa in Ivaldo’ sangsumte a kipan bangmah piaksak nuam nawnlo in, kizoppih nawn lo hi. “Nang tawh kisai in, ‘na hankuang ding ka lei nading’ cih simloh, sum peek khat nangawn, ka zangh nawn kei ding hi,” ci hi. An pen anu tungpan ngah in, sang sum ding leh a dang tuamtuam dingteng pen a pawlpi mite’ in sikh uh hi. Ivaldo pen genthei tuan lo-in, nuam hongsa zawsop ahihna, a pa in amuh ciangin a hehna khang semsem hi. “Ka tapa in HIV leh adang virus tuamtuam zong nei hi,” ci-in a vengte’ kiang khawngah zuak kawikawi hi.
“Kei bel hong ki mudah ta hi, ka vengte bangun a tate uh kei tawh kiho ding nangawn khaam ta uh hi”, ci hi. A pi’ kiangah kum khat sung bang va om hi. Tua khit ciangin a pa’ kiang panin, mawhna maisak nading le sapkikna lai khat hong tung hi. A pa in Ivaldo pen university khat ah kahsak dingin hanciam pih taleh, tua sangpi ah Sabbath ni zong lai kisin ahih manin Ivaldo kah nuam lo hi. Tua ciangin a pa in kumpi nasep khat zonsak leuleu a, tua nangawn Sabbath ni-in interview ding hi leuleu ahih manin nial leuleu hi.
A pa hong heh kik ta hi. “A bangci mi mahmah hi mawk ding na hiam, hong thei zo nawn ke’ng ei. Kong huh theih tawp in ka hanciam hangin na Sabbath neihtaak hangin na masuan bing’ sa mawk ing ei. Kei’ kiangpan bel huhna lamen nawn dah mai oh,” ci hi. Ivaldo in ahih leh freelance journalist hong sem in a sum ngah sunsun tawh journal tawh kisai sang kah beh hi. Kum tampi sung mah Radio le Television companyte ah sem in, ahi zongin a Sabbath hang mah in hunbit nasem dingin kuamah in cial nuam lo hi.
“Nung kaal sung mahmah in zong ka Sabbath hang mahin ka nasep ka taan leuleu hi,” ci hi. Tu-in Ivaldo kum 23 phata hi. Lungkia tuan lo hi. Ama’ huzaapna tawh khangno 10 bang Adventist pawlpi ah kai zo hi. Tua banah, a nau pasal thumte zong hong kikhawm pianpian ta uh hi. A nu zong lunglut mahmah hi. A pa-in bel ‘kikhen ding’ cih vive tawh tawng’den hi.
“Ka nu a’ dingin thu kangen den a, Adventist hongsuak dingin zong ka lamen hi. Tua ban ah ka pa in zong, amah lo buang tengbeek kikhop ong phal nading in zong thu ka ngenngen hi,” Ivaldo in ci hi.
Tu kuata Sabbath 13 na sumpi khenkhat tawh Ivaldo te’ khua Nampula khuapi sungah HIV/AIDS hang a hong nusia nulepate’ tate kepnading innpi khat kilam ding ahih manin, Mission sumpi hong khia mimal khempeuh tungah lungdam kong ko uh hi.
&&&&&

See also  Nuntak Kikna
Tags:

Admin

Admin

Top