Sabbath pen Zeisu ahi hiam?

Dotna: Zeisu in Sabbath’ Topa ka hi hi ci a hih man in, tua Topa Zeisu ih neih khit ciang ama bawlsa Sabbath ni pen tan/ siangtho sak sese kisam lai ding a hiam? Eite tua Sabbath To Zeisu ah tawlnga khin hang a, Sabbath ni a tawlngak se se kisam ding a hi hiam? Zeisu pen eite Sabbath hi lo ahi hiam?

Dawnna: Tu a na gen pen a thumaan mahmah tawh kibang in, mi tampite in zong Zeisu ka neih nak leh, ka up nak leh cih kammal kizangh thei hi. A hih hangin Zeisu nei, Zeisu sung ah om cih kammal deihnate, Zeisu ah tawlnga, Zeisu sang cih kammal a deihna te ih theih tel ding kisam samah mah ingh. ]

1 Peter 3:6 ah, “Sarah in Abraham pen “Topa” ci in a thu na mang hi.” na ci hi. Tua mah bangin, eite in zong Zeisu pen Topa in ih san leh athu ih man ding kisam hi.

Tua ban ah Zeisu in Luke 6:46 ah, “Bang hang in Topa Topa hong ci napi in ka thu hong mang lo na hi uh hiam” ci a, Matthew 7:21 ah, “Topa Topa hong ci khempeuh vantung gam ah a lut kei ding hi. A hih hangin vantung a om ka Pa deihna bang a gamtate bek a lut ding uh hi” na ci hi.

Dotna: Tua a hih manin Pasian deihna leh alungkimna in bang hiam?

John 14:15 ah, “Kei hongit uh leh ka thupiak te na zui ding uh hi”

Dotna: A thupiak pen bang hi ding hiam?

Pasian Thupiak/Thukhamte pen, Matthew 19: 17-19 ah, Pasian thukham sawm cih a hihna thu kilangh hi.

Tua hi a, Pasian a um mite in a thupiak zui ding ih hih leh, a thukham sawm lak ah Sabbath sianghto sak ding zong na kihel hi. Tua thukham a dang kuate ih zuih mah bangin Sabbath siangtho sakna ding thupiak zong ih zuih a kisam a hi hi.

Tua ban ah Zeisu in zong “Sabbath Topa ka hi hi” ci a hih ciang in, ‘Topa’ a hihna ciaptehna hi a, tua Zeisu pen ‘Topa’ in ih san leh Topa a hihna ciaptehna a hi Sabbath zong siangtho sak lo ding ih hiam? Topa Zeisu teekteek in zong siangtho sak a hih leh eite in zong ih siangtho sakding kisam hi.

Tua ban ah “Zeisu sung ah om” cih a deihna zong gen leng, Nungzui John in, 1 John 2:6 ah, “Ama sung ah ka nungta hi a ci peuhmah Zeisu gamtat bangin a gamta pelmawh ding hi” na ci hi.

“ZEISU SUNG AH OM” ih cih leh Zeisu omdan bang in ih nuntak ding kisam hi. Zeisu in Pasian thupiak leh a thukhamte apalsatna thu ih thei ngei nai kei a, Pharisete in thukham palsatin ngawh niloh mah leh amah in palsat ngei lo hi. Luke 4:16 ah Zeisu in a ngeina abang in Sabbath ni in biakinn a pai hi’, na ci hi.

Zeisu sung a om Sawltak Paul in, ( 1 Corin 4:16, 1:11, Philipians 3:17) ah.. ka nuntakna hong etteh un, kei zong Khazih nunzia ka etteh bangin na ci hi. Zeisu a etteh pa ahih mah bangin, Zeisu in ahih ngei bangin Paulin zong Sabbath ni sim in na kikhawm hi. Sawltakte (Acts) 13:42,17:2, Lai Siangtho sung ah Paul in Sabbath asiangtho sakna 84 vei kimu) Sabbath siangtho sakna pen Paul ngeina a hih mah bangin eite zong Zeisu sung ah om ih hih leh Zeisu omzia mah bangin Sabbath ni pen ih siangtho sak ding kisam hi cih kilangh mah mah hi.

“ZEUSU AH TAWLNGA” cih kammal zong ih theihtel ding kisam mah mah hi. Hebrews 4:9-10 ah, “Tua a hih ciangin Pasian mite adingin Sabbath khawlna khat om lai hi. A hangin Pasian khawlna sung ah a lutte khempeuh in, Pasian Ama nasep pan a khawl bang tek tek in amau nasepna pankhawl ciat ding uh hi” na cih hi.

Lai Siangtho in cikmah hun in, ‘Zesu pen Sabbath hi’ ci lo hi, Zeisu pen tawlngakna ni (Sabbath ) hilo in, a thu-um a nungzuite ading in “Tawlngakna” a hi hi. Tua a hih manin, Zeisu nungzui leh a thu-um mite ih hih leh Zeisu sung ah ih khawl ding a, tua Zeisu sung a tawlnga khin te in Zeisu tawlngak mah bangin a tawlngakni (Sabbath ni) ah eite ih tawlnga ding hi.

Tua hileh, ‘Khazih Honpa leh gumpa in sang’, , ‘Khazih sung om’ , ‘Khazih sung ah tawlnga’ cih thu ih tel ding ka lam en hi.

Lungdam..Topa Thupha