ZSL 12: Saklam le Khanglam pan Gamhoih ah

Zomi Sabbath School Lesson 12: Saklam le Khanglam pan Gamhoih ah

Lesson 12: Saklam le Khanglam pan Gamhoih ah

*March 14–20

Sabbath Nitaklam                                                  March 14

Tukalsung Simding:  Daniel 11; Dan. 8:3–8, 20–22; Isa. 46:9, 10; Dan. 8:9, 23; Matt. 27:33–50.

Kamngah: “Mi pawlkhat in thahna a thuakding uh hi. Tua bangin a pianna thupen beina a tun mateng siang-thosak le mipha le misia khentelna, Pasian sehsa hun a tunna ahi hi.” (Daniel 11:35).

            Hih chapter ih sin ding ciangin, a thupi pawlkhat sehkhiat phot kul hi. Amasa in, a lian 11 napen, a masiah a genkholhnate khempeuh tomlakna bang ahi hi. Alian 2, 7, 8, 9 te’ genkholhte pen, tualai hun pan hunbei dong huamsuk hi. A nihna ah, Pasian’ mite a bawlsia den leitung kumpite kilaih zelzel hi. A thumna, hih genkholhna khempeuh a tawpna hoihden hi. Daniel 2 sung a, milimpi a susia suangtum; Daniel 7 sung Mihing’ Tapa in kumpigam ngah; Daniel 8 le 9 sungah, vantung biakinnpi siansuah zong, Messiah’ nasep ci hi.

            Alian 11 in thubul thum nei hi. A masa, Persian kumpite’ beina ding a mailamthu, saklam kumpite in Pasian’ mualsiangtho asim ding hun cihte omhi. A nihna ah, saklam kumpite le khanglam kumpite kidona hangun, Pasian’mite thuakna cihte omhi. Athumna, Saklam kumpipa in, “minthang mualsiangtho” hangin (Daniel 11: 45), a sihna ding hun a tunmanin, lungdamna ahi hi. Gitlohna tawpsak a, Pasian’gam kiphut ding cih tawh thu a khupsuk hi.

Sunday                                                                     March 15

Persia le Greece-te Thu Genkholnate

            Daniel 11:1–4 simin. Daniel sung mahah ih muhsa bang genkholhna hong phawksak kik bangpeuh omhiam?

………………………………………………………………………………………………………

                       Gabriel in Daniel kiangah, Persia panin kumpi thum piang ding cih gen hi. Kumpi 4na in zong zui ding a, tua kumpi in hau penpen in, Greekte phin ding ci hi. Kumpi Cyrus khit ciangin, kumpi 3 mah in Persia uk nuam in hanciam ngei uh hi: Cambyses (530-522 BC), Smerdis taktak a hilote in (522 BC) le Darius I(522-486 BC). Kumpi 4na pen Xerxes hi a, Esther laibu sungah Ahasuerus ahi hi. Amah hau mahmah a (Esther 1:1-7) Greek a sim nadingin galkaphon lianpitak a nei hi. Tua zah galkap honlianpi pen zong, a hangsanzaw le a tawmzaw Greek galkap te’n zoziau uh hi.

            Daniel 11:3 na ah Kumpi hatmahmah a cihpen Alexander the Great ahihlam theihhak nawn hetlo hi. Ama’ hunin leitungbup a ukzopa ahi hi. Kum 32 a phak ciangin, ukzawhna aana kuamah nutsiat zolo in si leltak hi. A gampen a galkapmangte 4 in hawm uh: Seleucus in Syria le Mesopotamia, Ptolemy in Egypt, Lysimachus in Thrace le Asia gamneu te khenkhat, Cassander in Mecedonia le Greece cihbangin hawmsem uh hi.

            Daniel 11:2–4 le Daniel 8:3–8, 20–22 simkaak in. Hih munsante in, tua vanglian kumpipen Alexander a hihlam hong bangci lak hiam?

……………………………………………………………………………………………………………………………………………………………………………………………………………

            Hih minte, nimitte, munte le tangthute pan bang thuthak peuh ih sinthei hiam? Amasa, genkholhna peuhmahpen, Pasian gen a hihmanin, tangtung teitei hi. Pasian Kammal mawkkiatlo hi. Anihna, Pasian in tangthu’ Topa ahi hi. Leitung kumpite a kilaihna dingin, kumpite, aana lente le gamvai siamte in kumpiluite khia uh a, hong kahto zel uh hi. Pasian in na khempeuh makaih hi cih Laisiangtho sungah om ahih manin, Ama’ deihna ombangin tua tangthu peite, Ama’gam phuhtheihna dingin, hawl hi.

See also  ZSS 4: Late le Paunak Sung a Hehpihna le Thumaanna

Monday                                                                   March 16

Syria le Egypt-te Thu Genkholhna

            Daniel 11:5–14 sungah bang hong lak hiam?

……………………………………………………………………………………………………………………………………………………………………………………………………………

            Alexander the Great sih ciangin, galkapmang 4 in a gam hawm uh hi. Nihte pen, Seleucus in Syria (saklam) le Ptolemy in Egypt (khanglam) la uh a, a khang tawntung in a kido ding gam nih pankhia uh hi.

            Mi tampite’n, Daniel 11:5-14 sung ah, saklam kumpi le khanglam kumpi kidona gal a cihcih pen hih kumpite gel hi ci uh hi. Genkholhna mah bangin, kiteenna tawh ki pawlna bawl napi’n, sawt kiplo hi (Daniel 11:6). Tangthu sungah, Antiochus II Theos (261-246 BC) Seleucus I tuupa in, Egypt kumpi Ptolemy II Philadelphustanu, Berenice teenpih hi. Tua kilemna zong sawt kiplo veve a hihmanin, a kidona hangin, Pasian’mite in mun hong ngahlawh zawsop uh hi. Daniel 11na in, ama’ hun sunga a thupi thupiang pawlkhat lak hi.

            Gam khat le khat mun kituh in kido ngeingai ding cihthu banghangin, Topa in hong lakkholzel hiding hiam cih dotnophuai hi. Ahang thu bel baih lamlel: hih gal kisimte in Pasian’mite sukha hi. Tua ahih manin, Pasian in amite’ phutkhak dingte a hilhkhol ahi hi. Pasian pen tangthu’ Topa a hih mah bangin, genkholhte le tangthu ihzopden kul a, genkholhte zong a genbangin tangtung hi. Greek kumpite hunlai a thukikheel zelte, a kidodo ding agenkholpa Pasian in mailamthu a theilua Pasian ahi hi. Muanhuai in uphuai hi. Alian Pasian hi a, mi’ lungsimtawh gel a bawltawm mawkmawk hihetlo hi. Tangthute a hawlbek thamlo in, ih phal nakleh ei nuntakna zong hong hawlsak hi.

            Isaiah 46:9, 10 simin. Christiante’ upna thukhun bangzah imu hiam? Bang lametna lian peuh a om hiam? Sawmna ih etciangin, Pasianpen itna nei mello, a ngongtatpi hipeuhmah leh bang aci diam, ngaihsun in.

Tuesday                                                          March 17

Rome le Thuciamna Kumpipa

Daniel 11:16–28 simin. Athu telhak phialmah leh, Daniel sungah bang lim tengteng om na mu hiam?

………………………………………………………………………………………………………………………………………………………………………………………………………………

            Greek kumpite khut sung pan Rome kumpite khut sungah ukzawhna aana a tunna pen Daniel 11:16; “Galdozo ding om nawnlo uh ahih manun a galte uh a utut in a gamta ding uh hi. Thuciam gamah zong lutin, a khutsungah tua gam a omding hi” a ci hi. Minthang gam cihpen Jerusalem hi a, tanglai Israelte omna, tua tungah ukzawhna ngahthakpen milimbia Rome ahi hi. Kii-neu a pheidian ciangin, a vaphak pheina in Minthang Gam (Dan. 8:9) ci hi. Tua laitak leitungbup a ukzo pen Rome kumpi mahzong hipahlel hi.

            A panpihthei dingin, Laisiangtho mun neng zong omlai hi. “Phiangsiah bawlpa” cih zong Caesar Augustus (Dan.11:20) hi. Ama’ uk sungin Zeisu suak a, mihing a kisim laitakin Mary le Joseph zong Bethlehem ah zin uh hi. Hih kumpipa pen “migilo” khat in laih ding hi cih genkhol hi (Dan. 11:21). Tangthu sungah, Augustus pen, a taseel Tiberius in laih hi. Tiberius pen midang tawh a kibanglo “mi gilo” mahmah ci hi.

            “Thuciamna Kumpipa” susia ding hi (Dan. 11:22) ci hi. Topa Zeisu “Messiah Kumpipa” (Dan. 11:25; Matt. 27:33-50) pen Tiberius hun sungin kikhailum hi. Zeisu in “Thuciamna Kumpipa” cihpen, Pasianin na khempeuh theikhol khinzo cih thu hong tellahna bulpipen ahi hi. Hih a genkholh khempeuh tangtung takpi ahih manin, Amah bekmah mailamthu agen dingin muanhuai bek hi.

See also  Thuhilhkikna sungah Tulai Thuman

            Leitungthu tampite lakah, Nazareth mi Zeisu, “thuciamna kumpipa” hong kilak sese hi. Leitungvai gamvai buaihuai tampite lakpimah ah banghangin Zeisu in, tuate khempeuh ii thulaigilpi hithei sese hiam?

Wednesday                                                     March 18

Azom Vangliatna

            Daniel 11:29–39 simin. Milimbia Rome khit ciangin bang hong khang hiam?

………………………………………………………………………………………………………………………………………………………………………………………………………………

            Daniel 11:29-39 sungah kumpithak khat omhi. Milimbia Rome tawh kizomtosuak a amau gamtatna tampi sun himah leh, a kibatlohna ciangkhat zong omveve hi. Laisiangtho in, “amasa tawh kibanglo le a zomte tawh zong kibanglo” (Dan. 11:29) ding ci hi. Etpak in biakna vangliatna hi. Pasian le amite simding ngiimphadiak hi. Hih kumpipa’ gamtatnate enpak leng:

            A masa, amah in “Pasian’mite biakna suksiatding a hanciam ding hi” (Dan. 11: 30). Hih kumpipa in a do ding pen, Pasian’ gupkhiatna kamciamte ahi hi.

            A nihna, hih kumpipa in “biakinnpi a ninsak ding” tha le ngal piangsak ding a, amaute in “nisim biakpiakna” susia ding uhhi (Dan. 11:31). Daniel 8 sungah, Kiineu in, “Pasian’ biakinn” tawphah le “nisim biakpiakna” a susia hi (Dan. 8:11) ci hi. Hi peuhmah pen, Zeisu vantungah a nasepna khempeuh tawh kha kidona ahi hi.

            A thumna, biakinnpi a langdo manin, Pasian’ biakinnpi sungah “a muhdahhuai siatna” om hi ci hi. Tua pen Dan. 8:13 sung a “muhdahhuai mawhna” a cih kiineu’ langdona (Dan. 8:13) tawh akibang ahi hi.

            A lina, hih kumpi in Pasian’ mite langdo hi: “Mi pawlkhatin thahna athuak ding uh hi. Tua bangin a pianna thupen beina a tun mateng sianthosakna le mipha le misia khentelna, Pasian’ sehsa hun a tunna ahi hi” (Dan. 11:35). Hih in kiineu, vantung galkapte do a, aksite a lawnkhia hi (Dan. 8:10 le Dan. 7:25) acihpen hong phawksak hi.

            Angana, hih kumpipa in “pasiante sangin ka lianzaw a, a Lianpen Pasian sangin ka thupizawlai hi” (Dan. 11:36) ci ding hi. Tua kiineu mah in, “kiphatsakna kam” pau ding hi (Dan. 7:8) Pasian langdo ding hi (Dan. 7:25) ci hi.

            Kibatna dangdangte genhak khollo napi, Daniel 7, 8 sung tua kumpipa kua hi a, kim le pam langdona tampite lakah, eite ih kipkho theihna ding banghangin thupi hiam?

Thursday                                                                March 19

Thupiang Nunung

            Daniel 11:40–45 simin. Bang thu piang hiam?

………………………………………………………………………………………………………………………………………………………………………………………………………………

            Anuai a laigual in hihthu hong telsak ding hi:

Hun Beina: “Hun beina” cih pen Daniel sung bekah om hi (Dan. 8:17; 11:35, 40; 12:4, 9). Daniel genkhol thute tel-et ciangin, hun beina ih cihin, papacy kiat kum 1798 AD pan kipan, misiangthote thawhkik ciang dong huam hi (Dan. 12:2).

Saklam Kumpipa: Lei maitang omdan tawh kizui in Seleucid kumpi khanggui hi phot a, tua khitteh milimbia Rome, a tawpna ah papal Rome ahi hi. Lei maitang omdan pen a thupipen hilo zaw in, kha lamah Pasian’ mite langdona hang hizaw hi. Tua banah, saklam kumpipa in, Pasian bangin omding a, tuapen laisiangtho in Saklam(Isa. 14:13) naci hi.

See also  ZSL 10: ARTS LEH SCICENCES LAM PILSINNA

Khanglam Kumpipa: Hih min pen, Gam siangtho khanglam ah Egypt kumpi Ptolemy kumpi khanggui tungah kivawh masa hi. Genkholhna a phenkhia laisiam pawlkhat in, hih pen Pasian omlo cih upna hizaw ci uh hi. EGWhite in zong, Mangmuhna 11:8na a tellahna ah “Pasian umlote” mah na ci hi—The Great Controversy, p. 269.

Minthang Mualsiangtho: Laisiangtho Lui hunlai in hih min pen Zion hi a, khapsa gamah Israelte teenna khuapi ahi hi. Singlamteh khit ciangin, Pasian’ mite pen, a minam le leitang tawh ki ciamteh nawnlo in, Mualsiangtho cih kammal tawh, leitung khempeuh a kizeel hi. Tua ahih manin thupiangte anuai a bangin kikhia thei hi:

(1)        Khanglam kumpipa in Saklam kumpipa do: French in papacy le biakna suksiat sawm hi napi zolo hi.

(2)        Saklam kumpipa in Khanglam kumpipa simin zo: Biakna tawh a kimakaih papacy in a pawlte tawh Pasian omlo cih upna zogawp in, tuate zong amah tawh pumkhat suak hi.

(3)        Edom, Moab le Ammon suakta ding: hun tawpna lamah Pasian’ mi lakah a kisimlo pawlkhat in honglut ding uh hi.

(4)        Saklam kumpipa in Mualsiangtho doding hong kithawi mah taleh, amah si ding a, avangliatna kisuk-siatsak in, Pasian gam hong kiphut ding hi.

            Pasian le Amite in, a tawpna ah gualzo teitei ding cihthu tawh, koici bangin ih ki hehnem thei ding hiam?

Friday                                                                      March 20

Ngaihsutbeh Ding: Daniel 11:29-39 sungthu tawh kisai in Martin Luther in, a muhdah huai mawhna (Dan. 11:31) pen, papacy, a thukhun le a gamtatna hi ci hi. Daniel 11, 7, 8 teng kizopna pen, Luther le a dang biakna puahphate khiatdan ah, papacy le ama ukzawhna in hih genkholhna picingsak ci uh hi. Tua tawh kizom in EGWhite in zong “Rome khut nuai pan pawlpite peuhmah suakta takin sawt ki omsaklo hi. Vangliatna a ngahphet leh, a khut zanpah in, ama’ hihna a nial peuhmah susia pah lianlian a, pawlpi khatkhit khat ama’ ukzawhna khutnuai ah lutsak hi” The Great Controversy, p. 62.

Kikup Ding Dotnate:

  1. Laisiangtho gensa hun nunung Rome gamtatna, mite ngaihdan telpih mahmah napi zawp khollo in koici omtheih ding hiam?
  2. Daniel 11:33 sim lecin: “Pilna a neite in a pilna uh midang tampite tawh a neikhawm ding uh hi. A hih hangin tawlkhat sung mi pawlkhat in gal sung a sihna le meikuang sung a thahna a thuak ding uh hi.” Hih thu in, Pasian’ thumaan mite mailam thu bang pulak hiam? Mi hangsante a ki thahlupma in bang hihding cih zong bang hong pulak hiam? Tuni eite a ding bang thupuak om naci hiam?
  3. Daniel 11:36 simin: “a utbangbangin a gamta ding hi. Pasiante sangin ka lianzaw a, a Lianpen Pasian sangin ka thupizaw lai hi ci in a kisathei ding hi. Pasian in amah gim a piak mateng tua bangin om ding hi” Kua hong phawksak hiam? Isa. 14:12–17; le 2 Thess. 2:1–4 simbeh lai in.
  4. Daniel 11:27, 29 le 35 tengah kammal lammo‘ed le “sehsahun” cih omhi. Pasian in tangthu hawl a hihna bangciang hong gen hiam?

Tags: ,

Admin

Admin

Top