Santa Claus pianna thu 

Santa Claus piankhiatna Thu by Peter Suumpi |Zomi SDA

Santa Claus hong pianna thu 

Peter Suumpi


December 24 zan hong tun ciang naupang te in meikhu khahkhiatna pan athau mahmah Santa Claus inn sung ah hong lut ding aa letsong hong pia ding hi ci in um uh hi.

Bang hang in hibang upnate hong piang ahitam maw?

Europe gam te pan hih ngeina hong piang hi ci in mipawl khat in gen hi. Europe gam leilu lam pen phalbi ciang in vot cip, khuazing cip in lungzin huai mahmah hi. Kum khat sung ah December 21, 22 ni te hong tun ciang Norway le England leilu gam lamte in nai tawm no sung bek nitang mu kha uh hi.

Tua ahihman in acimtak huai mahmah tua khuazing khuadam hun sung anawk zawh nading un amau te aading mikhat peuh in letsong hong pia hi cih pawi bawl uh hi.

1. Mi tampi theih Sinterklaas (Holland pau in Bishop Nicolas)

Amasa pen khat in Catholic Pawlpi ii misiangtho khat ahi St. Nicolas ahi hi. Amah pen gawng ginggeng in mi tawh akithuah zuahzuah khawllo pawl hi kici in atangthu akigelh hang in aman’ naupangte aading December hong tunciang letsong ava pia zelzel khat ahi hi.

Amah pen Catholic bishop khat hi in puantual san silh hi. Ciangkhut kang asaupi khat tawi in Amerigo min anei sakol tung tuang hi. Duth (Holland) naupang no te in bishop Nicolas hong pai ciang atuanna ahi asakol Amerigo pen ankam pinei (carrot) piaksak pahpah uh hi. Duth (Holland) kam in St. Nicolas pen Sinterklaas in sam uh hi.

2. Mi tampi theih nihna Father Christmas (Siampi Christmas)

Amah pen England gam aa om Fr. Christmas ahi hi. Fr. Christmas pen mi thagol mahmah hi in puantualpi eng silh hi. Alu ah pak tawh akizem lukhu khu hi. Fr. Christmas in ahileh Christmas hun ciang in naupang te letsong piak ding sang in alim theithei nekledawn te nek ding thupi sak deuh hi.

Hih min nihte ii ki kai-awk zia

Hih Europe lam mi te thusanzia pen Europe gam sung ah atuamtek ahih hang in hih thusanzia tawh Colony akek Europe mite America hong tun uh ciang in Father Christmas le Sinterklaas nam nih hong hibialbual hi. Tua hang in American gam ah Santa Claus tawh kisai thu minthang tuamutam a om ahi hi.

American ah ahuanpi in Santa Claus min pen nam li bang in sam uh hi.

  • 1. Santa Claus
  • 2. St. Nick (St. Nicolas)
  • 3. Father Christmas
  • 4. Kris Kringle (German pau) cih bang in sam uh hi.

American gam ah Santa tawh kisai tangthu akikhelkhelna thu le hih Santa Claus tawh kisai tangthu pen amau nitumna gam lam te ii tangthu suaksak nuam in ahanciam uh hi cih thu akigen sawn ih hi hi.

See also  Laaitui Khua Lungdamna Thu Tangkona

American gam ah Santa Claus hong pianna thu

Santa Claus thu tawh kisai amasa pen laibu pen AD 1823 kum in New York khuapi ah “The Night Before Christmas” cih thulu tawh lakam laibu khat hong kibawl hi. Tua laibu sung ah Christmas hong tun ma in zan in mikhat hong pai in akikhai mawza sung ah naupang te aading letsong hong koih hi ci in kigelh hi.

Ahihang tua lakam sung aa kigelh mi pen Europe leilu lam aa om Nordic gam aa mitom Elf ahi hi. Amah pen neu lua mahmah in Sakhi in akaih leng tung tuang in meikhu khahna inn vang sung pan hong lutin milim tuamtuam te hong pia hi ci in kigelh hi.

Hih amasa pen lakam sungah Santa Claus cih min kizang lo hi. Lakam nihna ii thulu pen “A Visit from St. Nick (St. Nicolas)” St. Nicolas hong hawhna cih ahi hi.

Ahizong in tunung lam ciang in American laigelh sia te in St. Nicolas (St. Nick) cih minte hong zang nawnlo in Santa Claus cih hong zang in Santa in milim abawl thei Elf mineu te nei cih thu, Santa in zi nei cih thu te hong gelh ta uh hi.

Santa Claus le Coca Cola company kizopna

Tuhun aa Santa Claus ii puan san pen Coca Cola company hang in hong kizang ahi hi. Coca Cola company hang in Santa Claus hong piang hi cihte pen thuman lo ahi hi. Ahizong in Coca Cola company in Santa Claus pen amau ii advertisement ding in nasia tak in hong zat ziakin Leitung mun tampi in Santa Claus hong theih lawh uh hi. Ahizong in Coca Cola company ii sumbawlna advertisement ahihman in Santa Claus pen Catholic bishop ahihlam themcik bek zong pulakna om lo hi.

Hih bang in American gam ah Santa Claus cih milim hong kibawl ciang in Europe mite hitaleh, Leitung bup in letsong apia pia Christmas putek pen hidan mel anei ding mah in aki ngaihsun pah ahi hi. Ahizong in leilu lam aa om Europe mite in amau ii ngeina Christmas pen American te ii bawltawm Santa Claus tawh aki ciapteh sak pen deih khollo uh hi.

Gentehna in England gam aa puantual eng asilh Father Christmas pen Santa Claus in kikhelsak hiau hi. Mangkang te in bel damdam in amau ii Father Christmas pen Santa Claus in akilaihsakna thu phawk kha hetlo uh hi.

Netharland (Holland) ah ahileh Santa Claus akici hih ngaihsutna pen nawlkhin phot in St. Nick (St. Nicolas) pen atuam vilvel Christmas ii ciaptehna khat in kiptak in nei gige lai uh hi.

Agam agam in Santa Claus nei kituh

Tuhun ciang in Santa Claus pen koi ah teng hiam cih gam khat le khat kinialna hong om hi.

See also  GC Presidents

AD 1800 kum in Santa Claus pen North pole ah teng in vantung lam a etciang in sik-hup hang aa piang aa eng dildial vangtung (Aurora Borrealis) mu hi ci in ki-um hi.

Ahihang in North pole cih pen tuipi laizang lian ahihman in leitang cih mel zong omlo hi. Naupang te aading milim bawlna setphual te zong a-om theih nading mun hilo hi. Tua hi aa Santa Claus ii milim bawlna setphual pen Canada gam nisuahna lam tawh akinai Nunavut akici khua ah om hi. Tua ahihman in Santa Claus pen Canada gammi hi cih atangko bek thamlo in Post Code na ngawng zong ciapteh sak uh hi. Santa Claus ii Canada post code postal post pen “HOH OHO” ahi hi.

USA American te in ahihleh Canada nisuahna lam hitaleh, North pole hitaleh mi om theih nading mun hilo ahihman in Santa Claus pen American gam nitumna lam Alaska khua mi hi ci in tangko uh hi.

Denmark gam te in bel Santa Claus pen amau ii nidang colony ahi ngei Greenland tuikulh tung pan hi ci in atangko uh pen Greenland gam mi te in zong thukim pih pah uh hi.

Europe leilu lam aa om Scandinavia le akim apam aa gam te zong Santa Claus pen amau gam aa om hi ci nuam tek in kituh uh hi.
Ahizong in Finland gam in bel Santa Claus a amau kiang ah a-omlam kician tak in alakzo pen hong suak hi.

Finland gam sung aa on Rovaniemi akici khuapi ah Santa Claus ii milim bawlna setphual om hi ci in atangko mah bang un tua mun vapai leteh Santa Claus na muh ding ban ah ama ii sakhi te, laikhakna post zum le milim bawlna setphual te zong na mu ding hi. Tua hi in Finland gam ah Santa Claus om cih tangko na pen akician penpen hong suak hi.

Santa Claus pen Finland gam ah om cih bang zah ciang in kician sak ahiam cih leh amau phalbi hun bek hilo in khuakhal hun le ahun khempeuh in Santa Claus om lam na mu thei ding hi.

Thu khup ding hileng…

Santa Claus pen koi mun koi mun ah aom zong in Naungek Jesu hong suahma zan in Leitung mun khempeuh aa om naupang te kiang ah pai in letsong apiak ding ama vaipuak ahi hi.

Tua hi in Christmas hong tun ciang in bishop Nicolas ahizong Santa Claus tung pan ahzong in Pasian hong pia letsong i ngah theih nading in ih lungtang te kipuah pha in gamtatna hoih gamtat pha te tawh nungta ciat ni.

Christmas Santa Claus ahi St. Nicolas thu atom

Amah pen Myra diocese ii bishop ahi hi. Upna paikhial bishop Arius akhuttum tawh tum in thu ahilh pa hi hi. Ama feastday ni pen

See also  NUTE’ NI (MOTHER’S DAY)

December 6 ni in pawlpi in ciamteh hi.

St. Nicolas pen anuntak hun sung in vangliatna alak thei mi, tua vangliatna te tawh mitam pi te ahuh thei mi, Santa Claus bang in naupang te letsong apia thei mi in tangthu te ah kigelh hi.

Huihpi guahpi daisak thei, misi te zong thokik sak thei bek thamlo in adang na lamdang tampi zong bawl hi ci in tangthu in kigen hi.

St. Nicolas ih cih lian leh akisam mite ahuh thei mi in muh theih ding ban ah Topa Jesu thu amanlo a ahilh ahi bishop Arius a khuttum tawh atumpa in zong ih mitkha ah ih ciamteh ding hi.

AD 325 kum inCatholic le adang ngeina azui Christian pawlpi te ii upna laigil ahi Apostle Creed sung aa akihel thu sawmlenih te kikup masakna Pawlpi khawmpi pen Nicene (Nicene Council) ah akibawl hi. Tua lai ah Arian akici bishop pa in Topa Jesu pen Pasian hilo hi, Pa Pasian ii bawlsa hi ci in hilh hi.

Hih thu hang in St. Nicolas le Arian hong kinial in atawpna ah St. Nicolas in Arian ii maitang akhuttum tawh tum in kinial na hong khawl uh hi.

Santa Claus ahi St. Nicolas pen adang hilo in, Christian ngeina zialetong te um in akemcing mi ahi hi. Tuni dong ciang Christian pawlpi tuamtuam te akigawm kik theih nading tha apia den pa ahi hi.

St. Nicolas pen Catholic hitaleh Orthodox pawlpi te in sang uh in Orthodox – Catholic akigawm theih nading in St. Nicolas pen akidawh gunlei no khat tawh kibang hi.

2016 kum in Catholic le Orthodox (Russia) Pawlpi makai te pen St. Nicolas ii guhte kihawm ding in Rome lampan thukimna nei uh hi. Italy gam, Bari muh ah kum 930 apha khin tua guh te pen 2017 kum Russia gam Moscow ah kipuak ding hi.

AD 1054 kum in nisuahna lam Orthodox Pawlpi le nitumna lam Catholic Pawlpi te ii kikal ah kikhenna hong piang hi aa AD 2017 kum hong tun ciangin hih Pawlpi nih ii makai te hong kimu kik uh ahi hi. Hipen AD 1054 kum khit Russia Orthodox Pawlpi ii makai pi ahi Patriach Kirill le Catholic alianbel siampi Pope Francis te ii amasa pen kimuh kikna zong ahi hi.

St. Nicolas pen piakkhiatna ahat mi, Pawlpi ii upna akembit mi ahihlam thei in Santa Claus ii misiangtho taktak hi cih theih nading in atom in kong hawm sawn hi.

Tangkona

Lawrence Jangma Mung Song in Burmese lai in agelh “ခရစ္စမတ် Santa Claus ဖြစ်ပေါ်လာပုံ” zolai in ka letkik ahi hi.

Lailet: Peter Suumpi

Tags: ,

Admin

Admin

Top