SC5: Ki-Apna

Steps to Christ written by Ellen G White in Tedim kam, Zomi, Zopau, Zolai, Zo ham, Thado, Kuki, Adventist, Chin, Myanmar,
Christ Kiang Zuatna Chapter 5 KI-APNA
Zolia Nua Nuam
Pasian in, “Kei nong zon uh ciangin, na lungsim khempeuh uh tawh nong zon uh leh
nong mu ding uh hi,” ci-in kamciam hong pia hi (Jeremiah 29:13).
 
Lungsim khempeuh Pasian ap kul hi; tua lo-in Amah ih sut kik theihna dingin ih sungah kikhelna om thei ngei lo ding hi. Ih pian limin Pasian tawh ih kikhen zo hi. Kha Siangtho in ih omzia hih bangin hong gen hi: “Khialhna le mawhna sunga misi” “Na lutang bup uh cina in na lutang bup uh zawngkhal a” “ginatna mahmah om lo hi.” Eite pen “Satan’ thang sungah ih awkcip a, ama deih banga ahong bawl galmat ihi hi (Ephesians 2:1; Isaiah 1:5, 6; 2 Timothy 2:26). Pasian in hong damsak nuamin, hong khahkhia nuam hi. Tua bang ahih theihna dingin a buppi kikhelna, ih pianzia vekpi thaksuah sakna kisam ahih manin, Pasian’ tungah ei mahmah ih kipumpiak kul hi.
 
Gal khempeuh lakah ang sung galdona a nasia bel ahi hi. Angsung-khualna paai khia-a, Pasian’ deihna lam a na khempeuh ih piak ding pen hanciam kisam hi; ahi zongin sianthona ih ngah theihna dingin Pasian ki-ap masak kul hi.
 
Pasian’ ukna pen Satan’ gen banga kihai-pumpiakna, thu tel lo pi-a ki-uk cipna tungah kinga lo hi. Ngaihsutna le theih theihna hong ngen hi. “Hong pai un, kikum khawm ni,” ci-in Piangsakpa in a bawlsa mite hong sam hi (Isaiah 1:18). Pasian in a mite’ utna hong zawhthawh bawl lo hi. Utna le theih theihna om lopi-a kipia zaktakna sang nuam lo hi. Zawh thawh thu-a ki-ap sakna in lungsim le zia-le-tong khantohna khempeuh khak hi. Tua bang hileh (44) mihing pen set bang lel hiding hi. Piangsakpa’ deihna tua bang hi lo hi. Piansak nasep khempeuh a mahialna ahi mihing, khantohna a sangbel dong atung dingin Ama’n deih hi. Hehpihna tawh Amah in eite A hong tun sak nopna thupha a sangbel mun ih mai-ah Ama’n koih hi. Ei’ sungah na asep theihna dingin ei mahmah Ama tungah ih kipiak ding hong deih hi. Mawhna kol pan suakta-a, Pasian’ tate’ nopsakna sungah ih tum theih nading pen ei’ teelna tawh hong kizom ta hi.
 
Pasian’ tungah ei mah ih kipiakna ah Amah tawh hong kikhen sak ding khempeuh ih paih khiat kul hi. Tua ahih manin Jesu in, “Kua kua hi taleh ama neihsa khempeuh a nusia lo peuhmah Ka nungzui ahi thei kei ding hi,” ci hi (Luke 14:33). Pasian’ kiang pan a lungsim hong hei khia ding peuhmah ih nusiat kul hi. Mi tampi in sum-le-pai bia uh hi. Sum iplahna, hauh nopna lungsimte in Satan tawh hong hen khawm thei kham khau ahi hi. Kim khatte in min thanna le leitung za-liatna bia uh hi. Kim khatte in amau’ ut thu-a omna le tavuan nei lo-a omna bia uh hi. Hih kol khaute suktat kul hi. Ih phel khat Topa’ a, ih phel khat leitung’ a hi thei lo hi. Ih phel khat bek tawh Pasian’ ta kihi thei lo hi.
 
Pasian bia-a, amau’ tha tawh thukham zui-a, zia-le-tong kipuah phat ding hanciam a, gupna a ngahsawm mi pawlkhat om leuleu hi. Christ hong itna phawk taktak lo-in, a lungsim uh sukha taktak khol lo napi-in, Christian nuntak pen vantung tunna dinga Pasian’ ngetna bangin ngaihsunin gamtat ding hanciam uh hi. Hih bang biakna in kimanna nei lo hi. Lungsim sungah Christ ahong ten ciangin, a sungah Ama itna hong dim in, Amah tawh kikholhna nuam (45) hong sa-in, Amah ngaihna hong om ding hi; Amah bek ngaihsut in nei tading ahih manin, ama aituam zong hong mangngilh tading hi. Christ a itna pen asep khiat kipatna nak hong suak ding hi. Pasian’ hong itna aphawk mite in, Pasian’ deihna banga gamtat ding atawm theithei hong ngaihsun lo ding hi; Christian dinmun aniam theithei kan zaw lo-in, a Tanpa uh’ deihna tawh a kituak theithei ding hanciam uh hi. Lungsim taktak tawh kipumpiak in, azon pen uh’ manphatna tawh kituak ding mahin lawpna zong nei ding uh hi. Itna taktak nei lo pi-a Christ ka um hi, a cite in, acih mawkmawk, a kineih khem hi uh a, van gikpi apua uh ahi hi.
 
Christ’ tunga kipum piak khit kikeuh ding nasia lua na sa hiam? Christ in kei’a ding bang hong pia hiam, ci-in nang-le-nang kidong dih in. Ei hong tatna dingin Pasian’ Tapa in, nuntakna, itna, gim thuakna a vekpi-in hong pia hi. Hih zah itna lianpi tawh a kilawm zo het lo eite lellel in, ih lungsimte Amah pia ngam lo lai ding ih hiam? Ih nuntakna hun khempeuh Ama thupha vive ahih manin, bang zahta haina le gimna sung panin eite hong kihon khia hiam cih nangawn ih phawk khin zo kei lai hi. Ih mawhna in adawt gawp Pa en gige sa-in, Ama hong itna le hong kipiakna khempeuh mudah thei lai mawk ding ih hiam? Vanglian Topa hong kiniam khiatna ngaihsun lehang, galdona le kiniam khiatna tawh ei zong nuntakna sung tum thei bek ding ih hihna thu ah phunphun ding ih hi hiam?
 
Lungsim kiphasak mi tampite in, “Pasian in hong sang hi cih ih theih tel ma-in kisikkikna le kiniam khiatna bang kul se ding hiam,” ci thei uh hi. Christ en un. Amah in mawhna nei lo tham lo-in, vantung Kumpipa hi lai hi; hi napi mawh nei mihingte’ tang dingin Amah, mawhna hong suak hi. “Thu palsatte tawh Amah kisim khawm hi; Amah in mi tampite’ (46)mawhna pua-in, thu palsatte’ a dingin thuumna bawl sak hi” (Isaiah 53:12).
 
Eite ih kipum piak ciangin bang teng nusia in nungngat ih hiam? Jesu in ahah siang ding, A sisan tawh asil siang ding, mawhna tawh adim ih lungtang ahi hi. Tua nangawn mite in piak khiat haksa sa lai uh hi! Hih thu a kigenna ka zak ding ka maizum a, ka gelh ding zong ka maizum hi.
 
Ih neih lai dinga ahoih nate a paai khia dingin Pasian in hong sawl lo hi. A hihna khempeuh ah Pasian in A tate’a ding ahoih thei bel hong ngaihsut sak hi. Christ ateel lo khempeuhte in zong, amaute’ zon tawm sanga a hoih zaw tham Christ in nei ahih lam theih huai hi. Pasian’ deihna tawh a kituak lo pipi ngaihsuna a gamtat ciangin, mihing pen amah-le-amah a kiliam sak, a kibawlsia ahi hi. A pian sak mite’ a ding ahoih bel thei-a, amau’ phat tuamna ding a vaihawmsak Pa in a khamna lampi ah lungnopna taktak kimu thei lo hi. Thu palsatna lampi pen gimna le siatcipna lampi ahi hi.
 
A tate in gimna a thuak pen Pasian in muh nop asa ding banga ngaihsutna in khialhna ahi hi. Vantung buppi in mihing’ nopsakna ding bek ah lawpna nei uh hi. Vantung ah a om ih Pa in a piansak mite’ nopsakna ding khat beek khak tan lo hi. Pasian’ deihna pen, gimna le lungkhamna hong tun a, lungnopna le vantung kongpi ahong khak nelh theite ih pelh ding hibek hi. Leitung Tanpa in mihingte ih hi bang lel mahin, ih kisapna, ih kicin lohna leh ih thanemnate mah tawh hong sang hi; mawhna pan A sisan tawh hong silsiangin hong tan (47) khia bek tham lo-in, Ama hakkol kisuan a, Ama van apua nuam mi khempeuhte’ lungsim tawldamsak lai ding hi. Nuntakna an duha Ama kiang azuan khempeuhte, lungnopna le tawldamna Ama’n hong pia nuam hi. Thu mang lo mite atun theih ngei lohna, nopna a sangbel dong ahong tunpih ding nate bek mah ih sep ding Ama’n hong deih hi. Amann leh a nuam bel kha nuntakna pen vanglian lametna ahi Christ ih sungah hong omna ahi hi.
 
Mi tampi in, “Pasian’ tungah kei mahmah koici kipiak ding ka hiam?” ci uh hi. Nang mahmah Ama tungah na kipiak nop hangin, na pumpi thanem in, up lahna zong nei-in, mawhna zongsatna in nang hong ukcip hi. Na kamciamte le na khensatnate zong sehnel khau tawh kibang lel hi. Na ngaihsutnate, na utnate le na lawpnate na uk zo kei hi. Na kamciamte pelh in, na khap nate na cit zawh loh lam thei-a, nang-le-nang zong kimuang zo nawn lo-in, Pasian in hong sang zo ke’n teh ci-a na ngaihsut leh: lung himawh kei in. Na theih ding a kisam khat pen utna ii thahatna ahi hi. Tua in mihing’ pianzia a uk, khensat zawhna ahih kei leh teel theihna ahi hi. Na khempeuh pen utna ih zat khiat dan tawh kisai hi. Pasian in mihingte a piak deih teel theihna pen azat ding uh ahi hi. Na lungsim na khel thei kei-a, nang mahmah le na lawmte Pasian na kipia thei kei hi; ahi zongin Amah biak ding na teel thei hi. Na utna Amah na pia thei hi; tua ciangin Amah in, Ama deih bangbang na sep nopna dingin na sungah na hong sem ding hi. Tua bangin na pianzia abup in Christ’ Kha ukna nuai hong tung ding hi; na lawpnate Ama tung bek hidinga, na ngaihsutnate Ama a tawh hong kituak ding hi.
 
Gamtat hoih ding le siantho ding utna pen ahoih ahi hi; ahi zongin utna ciang bek tawh atawp leh kimanna om lo hi. Christian hih ding ut a asawm mi tampi mangthang ding (48) hi. Pasian’ tungah a lungsim uh ki-apna ciang dong taktak amaute kalsuan lo uh hi. Amaute in tu mahmah a Christian suah ding teel lo uh hi.
 
Utna lungsim a maan na zat leh na nuntakna ah kibitkhelna hong om ding hi. Na utna lungsim Christ na piak leh kumpite le ukpite khempeuh’ tunga vanglian Pa tawh a kipawl nahi hi. Kip tak a nang hong len ding tung lam pan thahatna na ngah dinga, tua banga Pasian’ tungah na kipiak tawntung leh upna tawh nuntakna ahi, nuntakna thak na nungta thei ding hi.
 
&&&&&&&&&&&
 
See also  SC 4: Thuumna
Tags: ,

Admin

Admin

Top