SINGLAMTEH LONGAL

Kei aa dingin Singlamteh longal kisialpih ding omlo hi. Zawnna ngauna cileng tehpih ding omlo hi. Utlo pipi-in thei gegu mah nawkteitei phulteitei kul khong hi. Eimite pen zangkawhin kiko thei uh hi. Khual Do Lian pen thu-um tapidaw hoihmahmah khat hi. A lawmte khat in, “Khual Do Lian aw, zangkawh” acih ciangin, aman, “tulah ahimah” nacihsan lel hi. Kei nuntakna pen mizawngin hong kiko leh, ahimah, zi leh ta makaih siamlo-in hong kiko leh, tulah ahi mah, hi tawntung lel hi. Pilna tawphah neilo kahihmanin kasep sunsun a neupen munah kipat kul den hi. Kei nasepte kei tawh kituak mahmah hi. Doctor, MA cih khawng ten seem khaleh bel maizum huai mahmah ding hi. Hibang haksatna sungah, Pasian hehpihna ahi sum leh pilna tawh kiteh theilo kangah hi.

Leitung sumlehpai neihsa mi ka batloh hangin, singkhuah suangtum tawh nupa kiliamsakna kanei nai kei uh hi. Khatvei khualzin kawivakna ah ka Pano kiang katun leh, nupa kilemlo singkhuah tawh kivatvat kiliamsak sak thu hong gengen hi. Tua pen khatvei nihvei hilo, a kum aa paikhin hi. Cikzet huai mahmah hi, hong ci hi. Kua ahia? kacih ciangin, SDA sia hi e, hong ci hi.

Church pastor kahih sungteng inn tawh kithuah zawdeuh kahihmanin, naupangte pantah a thunget sak hun kingah hi. Tavuan lian semsem hong kisuanto a, khualzinna tamin innkuan tawh kizopna tawm semsem hi. Tate a neulam pen a nu bektawh khangkhia a, nupa kop-a vaihawm hun omlo hi. En Pasian na semsemin ih nungah innkuanpihte haksatna panpih hun ding omlo hi. Naupang a neulamte kongpua napialmun zaw pah hi. Kacihmawh ciangin hehnepna ding kazong tawmtawm a, Pasian lawm ahi Abraham tangthu, Isaac tangthu, Jacob tangthu kasutsut a, family problem tawh kidim kamuh ciangin, nuamhuai hetlo hinapi kanuam liang zen hi.

See also  KHANGNOTE LEH MUSIC

Naupang a neulai kum-10 pan kum 17 kikal hunkhat hong siahuai mahmah thei hi. Tua pen leitung buppi in, bangkua sung, lamdung lamvai aa kibuaipih khangno tatsiat hun ahi hi. Mi khempeuh kikhel khinlo ding ahi zongin, thungetna tawh Pasian a ki-aap khat muan leh suan penin hong om thei hi. Kata a dangte kahawmthawhna hilo hi. Ka Tanu sang a Nu leh Pa hong lung himawhpih zaw omlo hi. Inn lei u, Nu leh Pa bedroom ci-in a tuamin koih ngiau, zin zong tungsak lo hi. Puan leh niik hong guatte pen kalawm nu in velvel a, “Innlam aate pianuam zen sing e, en khangkhatin zong kisiat nawnlo ding hi,” ci ngeungeu hi. A Nu tawh phone kiho le-u kampau kizomin, na Pa in tua duh tua deih cih pulak khaleh gitneihlohin hong tung pah hi.

Nikhat motor thak hong ciahpih hi. Bangzah man, kacih ciangin “tulsawmguk” hong ci au hi. A motor pen a pua panin mekziau a, ki start thei, a lum avot hong thei hise hi. Tul-20 tul-30 zong hoih mahmah lel lo maw? kacih ciangin, “Nu leh Pa kong tuan sin sak nopman hi e,” hong ci sawnsawn hi. Tua te hangin ama tangthu lui khempeuh sawmsiang khin hi.

Sang khak aa kipan mohman ding matkhat hamu ka pua sak den hi. Kei pattah siamlohna hangin, hong gol semsem ciangin , poeda, tanakha kisam, nikhoih puanhoih kisam ahihmanin sum hong nakdeih mahmah hi. Kihilh thei nawn vetlo hi. Sabbath ni khatvei thu kangen a, “Topa hih katanu sum deihdan nathei hi. Nangma Khasiangtho huhna longal tawh kei septheih themcik zong omlo hi. Ama khansung adeih bangbang sum a zat zawh nang thupha napia in,” ci-in kakkap hi. A sanggamte lakah hong picing masa pen hi. Inn, motor hoihnono a tuan zawh nangin nasep hanciam mahmah hi. “Kata nidangin hibang nong suak ding sa kei ing,” ci’n kakap kha zelzel hi.

See also  How Congregationalism Would Enhance the Mission of the Church

Pastor khat a tapa in Jeep hoih mahmah khat leisak hi.. A Pa nuam lua ahihmanin” Nu ei bawi, nang kek kek in, motor nong leisak ding lamen kei lua ing,” ci-in kap hi. Tua ni-in a tapa hoihlohna leh tangthului khempeuh meiikhu suakin lengmang khin hi.

Haksatna ih puak kibang.
Kalawm it khat gilpi aatin zato lum, cih kaza hi. Lungnuam lo-in tawmcik tawh kaveh hi. Kei zong zi leh ta vaaklai kahih ciangin kapiaknop zah zong kapia zo kei hi. A nopdeuh ciangin lai hong khakin lungdam hong ko hi.Ki-itna hang hi keileh lungdam kohtak zong cing peuhmah lo hi. “Lawm aw, nidangin nathuumthum, tu’n navek un US tung nahih manun, a tang’tang’ khat om inteh. Kei zong numeino teng mizah ahi kei zongin, ki-om thei ciang hong suak uh. Khat ka neihsun buaipih thei mawk ingh. Pulpit tungaa thugen laitak khawngin, zukhamsa-in biakinn mai lamdung khawngah hong diang thei veh aw, cihnang kithei kei mawk! hong ci hi. Mikhempeuh eimah bang lel hi, Pasian in muanpen suan pen hong suaksak thei hi. Nu leh Pa thungetna Pasian in mawkmaisak ngeilo hi, ci-in ka hehnem hi.

Zi neileh a phatuam tam, ci-in khualam kazongsak hi. Sanggamte mahtawh hong kithei uh hi. Pawibawl dingin misapna laikhempeuh hawmkhia khin ung hi, a zing ciang aa kiteng ding hita hi. Nitak hong ciah ciangin zukhamsa-in inn hong tung mawk ! A zi ding pen zingsang ciangin namang hiau!Lawh nang kithei lo, kuamah hong pailoh nadingin phone set zangzangin, mawipawi kiphiat hi, ci-in gen kul mawk ei,” ci hi.

Nu leh Pa te pen bangmah thusia a omkei zongin tate aading deihsakna hangin lungkhamin maitang sa tawntung hi. Taneu neilaite in thungenngen un. Leitung hoih nawnlo hi. Satan in zawhnop hongsa mahmah hi. Kei nuntak hunsung pen” Sihna guamsung tawnin kapai a, Topa mitsuanin ka om den hi.” Midangte hong theihpih loh thuaksiatna kong gen ding tampi om hi. Hong zomlai ding hing. Hih tangthu kangaihsut ciangin, Pasian hong itna bangzahin lian ci-in kaphawk hi. Singlamteh simloh kakisialhpih ding omlo hi. Nidangin kapa tapa hing, Gualnam tupa hing,kacih theih peh SDA kasuah aa kipan cingam nawn keng.

Pr Thang Siangh. zogampalpi@yahoo.com

See also  Prime Minister of Tanzania Joins Adventist Church Celebration of Family Ministries

Admin

Admin

Top