SINNA 11                                           December 8 – 14

BIAKPIAKNA AH KIPUMKHATNA

SABBATH NITAK Dec.8

Tukal sung sim dingte: Rev.4:8,11; Matt. 4:8,9; Dan. 3:8- 18; Rev. 14:9; Rev. 14:6,7; Acts. 4:23-31.

 LAI SIANGTHO BULPHUH: “Tua khit ciangin vansawltak dang khat van kimlai a leng ka mu aa amah in minam khempeuh, beh khempeuh, pau khempeuh leh, mi khempeuh tungah tangko ding tawntung lungdamna thu a nei hi. Amah in, ‘Ama thu khen ding hun hong tung zo ahi manin Pasian kihta unla, amah   minthanna pia ta un. Vantungte , leitung, tuipi leh tuinakte a bawlpa amah bia un’ ci-in aw ngaihtak in a gen hi” (Revelations 14:6,7).

Pentecost khit a sawtlo in Christian masate in biakpiakna ah a hun uh tampi zang uh hi. “Sawltakpite thuhilhna le amau tawh kithuahna, anlum balkhapna leh thungetna te ah amaute kuhkal (kipia) mahmah uh hi” (Acts 2:42). Thukhun Lui genkholhna tangtunna ahi Jesu pen Messiah hi cih a theihna pan a ngah uh lungdamna in amau lungtang te Pasian tungah lungdamkohna leh nuamna tawh kidimsak hi. Hih thutak theih khaak bangzah in hampha! Christian masate in kithuahna, thusinna, leh thungetna ah hun tampi zat ding a kisapna phawk uh hi.

Hih te khempeuh Jesu nuntakna, sihna, leh thawhkikna leh amaute nuntakna ah Amah in a sepsaknate hangin Pasian tungah lungdam a koh theihna ding ahi hi.

_____________________________________________________

Jesu Christ pawlpi in biakpiakna tawh kipawlkhopna hi a, “Jesu Christ tungtawn in khalam biakpiakna a bawl siampi siangtho dingin khalam inn-a kilam a nungta suangte” ahi dingin Pasian in a sap ahi hi (1 Pet. 2:5). Kipawlna sunga biakpiakna ah Pasian tungah lungdamkohna in mihingte lungtang leh ngaihsutna te puahpha iin Pasian zia leh nasepna ding a kiging dingin bawlpha hi.

Tu kal sinna ah biakpiakna leh biakpiakna in Jesu a umte lak ah koi bangin kipumkhatna kemcing cih thu ih bulphuh ding hi.

SUNDAY December 9

EITE HONG BAWLPA LEH TANPA BIAKNA

Biakpiakna tawh kisai i kikup ciangin biakpiakna ah bangte kihel aa koi bangin sem ding cih ih kikum zel hi. Tua ahileh, biakpiakna i cih thuktak in a khiatna bang hiam? Pasian bia i cih koi bang hiam? Banghangin bia? Ps. 29:2 sungah David in, “Ama min tawh kituak minthanna Topa pia unla, ama siangthona’ thupina ah Topa bia un” ci hi. Hih late kammal in biakpiakna a dik in hong telsak hi. Topa biakna in Amah tawh kituak minthanna leh pahtawina Ama tungah piakna ahi hi.

Mangmuhna 4 leh 5 in vankah khit a Jesu vantungah a kidawnna/muakna hong lak hi. Van a omte in bang thute hangin Pasian le Pasian’ Tuuno Jesu bia uh hiam? Rev. 4:8, 11; 5:9, 10, 12, 13.

________________________________________________________________

Vantung kumpi-tokhom tungah Jesu pen Pasian’ Tuuno le leitung Honpa-in a kimuakna hong lahna in nak thupi lua hi. Ama sepsate hangin a bawlsa te’ pahtawina leh lungdamkohna kammal te pan in biakna thu hong piang hi. Biakpiakna in Pasian’ piansakna leh hotkhiatna tungah lungdamna tawh thuhkikna ahi hi. Hun bei ciangin tatsate in Pasian hotkhiatna hangin tua pahtawina ah hong zom ding uh hi. “Thahatpen Topa Pasian, nangma nasepte lian in piandang hi. Khanghunte kumpipa aw, na lampi te thumaan in thutang hi. Topa aw kua in nang hong kihta lo in na min thangsak lo ding hiam? Ahangin, nangmah bek na siangtho hi. Amaan nangma sepna te kilaak khinzo ahih manin minam khempeuh hong pai in na mai ah hong bia ding uh hi” (Rev. 15:3, 4).

Tua hi a, biakpiakna in a thahat Pasian sepna ahi eite hong piansakna, leh eite hong tatna hanga phatna ahi hi. Biakna tawh Pasian tungah Ama ngahding kituak pahtawina, zahtakna, phatna, itna, leh thumanna a pia ihi hi. Lai Siangtho ah Pasian in eite hong lak bangin eite hong Piangsakpa leh hong Tanpa ahihna I thei hi. Jesu leh ama nasepna tungtawn in Christian te in Pasian i tel theih zaw lai hi (John 14:8-14). Tua hangin, Christian te in Jesu pen Honpa leh Tanpa in kibia aa, Ama ishna le thawhkikna in biakna laigil te ahi hi.

Biakna pia dingin Christian te i paikhop ciangin lamdangsakna leh lungdamkohna tawh biak ding ahi hi.

Christ in eite hong Piangsakpa leh Honpa ahihna leh bang panin hong suakta sak aa eite bang hong pia hiam cih thu ngaihsun in. Banghang in hih thutak te in eite biakna khempeuh i bulpi hisak huai hiam?

 MONDAY December 10

BIAKNA MAANLO

Matt. 4:8-9 sim in. gamlak ah a thumveina Jesu kize-etna bang hiam?

______________________________________________________________

Kiphatsakna leh kiliatsakna tawh hih leitung ama bawl bang keek in Satan in amah le amah leitung ukpa kici aa, hauhna leh minthanna khempeuh a neipa, leitunga om khempeuh te’ pahtawina leh zahtakna angah dinga kilawmpa in kigen hi. Piangsakpa leh Jesu’ Pa ahi Pasian bangzah takin zahko! Satan in biakna i cih bang hiam cih a telzia hong lak hi. Biakna in vannuai a neipa tungah pahtawina leh zahtaana piakna ahi hi.

Daniel 3 (adiak in aneu 8-18) sunga Hebrew lawmta thumte phutkaak thu leh Rev. 13:4 leh 14:9- 11 sunga hunbei kuan aa vangliatna saikaak in. Hunbei ciangin a lauhuai bang om hiam? hih thunih te ah a laigil bang hiam?

 Cain leh Abel panin Babylon ah Hebrew tangval thumte, a nunung thupiangte ah “sapi ciaptehna” (Rev. 16:2) ciang dongin Pasian maan taisan in amah a kibiak theih na dingin Satan in baikna maanlo phut ding  hanciam tawntung hi. Mawhna hong lutma nangawn in zong Pasian bat ding ut khinzo hi (Isa. 14:14). Khangno thumte in milima biak kei vua leh sihna thuak ding cih lauhuaina a tuahna uh leh hun nunung cianga a muanhuai mite in “lim (milim)” a biak kei uh leh sihna thuakna dingin lauhuaina te in a kibang khatawm mawk hilo hi. Pasian maan bia dingin hong kisapna ah banghang in “lim” khat peuh bia ding ih hiam?

“Dura zangkuam aa Hebrew tangval te tuahkhak thu panin sinkhak thu te thupi mahmah hi… Pasian mite mai ah a om lungkhamna hun in a tuuk lo ding upna kal hi. Ama tate in Amah bek biak ding ahihna a lah uh kul aa, ngaihsutna tuamtuam te in nuntakna suplawh ding ciang nangawn in a maanlo biakna ah a puukna dingun amaute kai zolo ding hi. A muanhuai lungtang tungah mawhdim a kicinglo mite sawlna thu in a tawntung Pasian’ kammal tawh tehkaakna in gentham lo hi. Thong ah khiatna, gam pan hawlkhiatna leh sihna te tawh a kivau zongin thumaanthutak kizui zaw ding hi.” – Ellen G. White, Prophets and Kings, laimai 512, 513.

Eite biakna ngah dinga kilawm Pa bek bialo in midang leh na dang khatpeuh biak khakna dingin hong

ze-et bangte om hiam? Biakna maanlo in eimau ngaihsutna sangin koi bangin simtham in telhak zaw thei hiam? Tu laitak in biak ding hong ze-et bang khawng om hiam?

 TUESDAY December 11

VANSAWLTAK’ MASA THUPUAK

Seventh-day Adventist te in Rev. 14:6-12 sunga vansawltak thumte’ thupuak in amau nasep laigil leh Jesu kumkik madeuh a thupuak in ngaihsun uh hi (Rev. 14:14-20). Hih in “aw ngaih mahmah tawh”leitung a om khempeuh tungah tangko ding thupuak ahi hi.

Rev. 14:6, 7 sim in. Vansawltak masa’ thupuak bang hi a, Pasian tawh kisai bang gen hiam? Hih thupuak ah bang hangin biakpiakna thu om hiam?

Vansawltak thumte’ thupuak lak ah a khatna in leitung bup ah thupuak ahi hi. Matt. 24:14 sunga Jesu genkholhna a tangtunna ahi hi. Hih vansawltak thumte’ thupuak nasep in thukin leh a kinawh thu ahihna kimu thei hi. Thupuak masa in “Ama thukhenna hun hong tungzo” ahih manin Pasian mitsuan ding mite sawl hi (Rev. 14:7). Jesu kumkikna in thukhenna ding ahi hi.

 “Pasian kihta un” vansawltak in ci hi (Rev. 14:7). Pasian thu a kinbawllo mite a dingin hih thupuak in a lungsim sung uah launa omsak ding hi. Ahi zongin, Jesu nung a zuite aa dingin hih thu in zahtakna dingin sapna ahi hi. Amaute in Pasian kamciam te a tangtunna mu ding uh hi. Pasian tungah lungdam aa a zahtakna un amaute tuam ding hi.

“Vantung le leitung, tuipi le tuinakte a bawlpa bia un” (Rev. 14:7). Hih kammal in Piansakna kawk ahi Sabbath thupiak hong lak hi (Ex. 20:8-11). Piangsak Pasian, ama piansak theihna vangliatna phawkna dingin Sabbath a bawlpa biak ding leh zahtaak ding ahi hi.

Hun nuung ciangin biakna in mihingte i muanhuai ki-apa thu ah kidona lianpi bulphuh pipen hong suak ding hi. Leitung bup ah hi tangkona in Piangsakpa biak ding sapna ahi hi. “A nunung buaina i laigil in biakna hi ding hi. Tua sittelna in bang biakna nial cih hilo in kua bia cih sitna ahihna thu Mangmuhna in kician takin hong gen hi. Hun tawpni ciangin leitungah mi pawl nih bek om ding a: Pasian maan zahtak in a bia te (Rev.. 11:1, 18; 14:7) leh thuman thutak mudah aa gulpi leh sapi a bia te hi ding hi (Rev. 13:4-8, 14:9-11).

“Biakna thu in a nunung buaina laigil ahih leh leitung a tengte khempeuh in biak ding a kilawm Piangsakpa bek hi aa, Amah a biak nading un hun nunung lungdamna thu Pasian in a puakna lamdang lo mah hi.” – Ranko Stefanovic, Revelation of Jesus Christ: Commentary on the Book of Revelation (Berrien Springs, Mich.: Andrews University Press, 2002), laimai 444,445.

WEDNESDAY December 12

LAI SIANGTHO SINNA LEH KITHUAHKHOPNA 

Sawl. 2:42 sim in. Christian masate biakna ah bang thute kihel hiam?

 “Sawltakpi te thuhilhna leh kithuahna ah amaute kuhkal (kipia) mahmah uh hi” (Sawl. 2:42). Pawlpi om cil hun pek panin biakpiakna ah Pasian kammal sinna in a laigil thu ahihna sawltakte tung panin kimu thei hi. Christian masate in Messiah Jesu thu a gen Lai Siangtho sinna ah citak mahmah uh hi. Pasian i piak thuphate khat le khat kihawm in kithuahkhawm den uh aa Pasian tawh khalam kalsuanna ah khat le khat tha kipia uh hi. Pasian kammal sungah thutak siangtho te kalkhia uh aa leitung ah amau thupuak tawphah hong suak hi.

Anuai a munte in thu-umte kithuahkhopna ah Pasian kammal sinna in bangzah in thupi cih bang hong lak hiam?

2 Kings 22:8-13 _______________________________________

Acts 17:10-11  ________________________________________

2 Tim. 3:14-17 ________________________________________

“Lungdamna thutak a kitangkona mun peuh ah, dik takin gamtat ding a lunggulhte in Lai Siangtho kan beh nuam uh hi. Leitung hun bei kuan ciangin nisim in Lai Siangtho sinna ah Berean te etteh in a kitangko thutak te Pasian kammal thupuak tawh saikaak aa sittel uh hi leh Pasian thukham ah a muanhuai mi tu aa tawmno a om bang hilo in tam zaw tham ding hi.” – Ellen G. White, The Acts of the Apostles, laimai 232.

Pasian kammal ah i muh thumaan i tangkona hangin eite a kipumkhat te ihi hi. Hun masa lai in hih in Pasian pawlpi ah amaan thu hi aa tu hun in zong maan lai hi. Pasian kammal sinna in Pasian biakna leh vansawltak thumte’ thupuak tangko dinga sapna ah kipumkhatna hong neisak hi. Kithuahkhopna leh biakpiakna ah innkuan khat bangin i om ciangin Pasian kiang pan hong pai kammal te Lai Siangtho in hong gen aa Jesu kumkikna ding leh i nasep nading in kigintheihna ding hong makaih hi.

Lai Siangtho thu na upna ah bagnzah in na zungkip hiam? Hebrew tangval thumte bangin sihna thuak dong ah a kip dingin na zung kha nai hiam?

 

THURSDAY December 13

ANLUM BALKHAPNA LEH THUNGETNA

Pawlpi masate in bang haksatna tuak ta leh Jesu sungah a upna uh leh leitungah a tangko dinguh thutak ah amaute kipumkhat uh hi. Hih thu mah Peter in “tulai thutak” na ci hi (2 Pet. 1:12). Tua hi a, thutak ah kipumkhat in amaute in lamtuamtuam tawh amau kipumkhatna lakkhia uh hi.

“Amaute in … anlum balkhapna leh thungetna ah kuhkal mahmah uh hi” (acts 2:42). Hih anlum balkhapna in thu-umte lakah annekkhopna, kilawmtatna ah nekna a gen nuam hi kha ding hi. Hih bang annek khopna pawlkhat te ah anlum leh lenggah zu thupha pia in Jesu sihna leh thawhkikna phawkna leh hong paikik ding lametna in nei zel uh hi. Tua hi a, Christian masate in a hun neih te uh Jesu nuntak le nasepna te phawkna in zang uh aa, annekkhopna te ah gen ding nuamsa uh hi.

Annekkhopna te biakna hun suak pah hi. “Nisim in biakinnpi huangte sungah a kithuah khawm ngitnget uh hi. Amaute inn ah anlum balkham in lungdamna le itna lungsim tak tawh nekhawm uh aa, Pasian phat in mi khempeuh in angvanna nuam asa uh hi. Topa in nisim in amau pawl sungah a kihonkhia mi a kibehlapsak hi” (Acts 2:46, 47). Hih kithuahkhopna hun in Jesu sungah a neih uh kipumkhatna khauhsak takpi ahihna muanmawh huai hetlo hi.

Sawltak thubu sungah Christian te thunget khopna tawh kisai etteh ding a dang a om hiam? Amaute in bang ngen uh hiam?

Acts 1:14 __________________________________________

Acts 4:23-31  _______________________________________

Acts 12:12 _________________________________________

Pawlpi masate in Pasian tawh kiholimna ding  hunpha a ngahte uh hoihtak zang siam uh aa, biakpiakna pia dingin a kikaihkhop sim un Ama tungah thungetna pelh ngeilo uh hi. Timothy tungah alaikhak masakna ah Christian te a omkhop uh ciangin thungetna a thupina Paul in gen hi (1 Tim. 2:1). Ephesian te tungah thunget a kulna bulphuh aa: “Tua ciangin hun khempeuh ah thungetna nam khempeuh le ngetna tawh Kha-in thu nangen un. Hih thu ngaihsun kawm in pilvang unla misiang khempeuh aa ding thu nangetsak den un” (Eph. 6:18).

Mawhthum thngetna i vangliatna tungtawn in koi bangin a thukzaw kipumkhatna nei thei ding i hiam? Hih thungetna in pawlpi kipumkhat ding koibangin panpih hiam?

FRIDAY December 14

NGAIHSUT BEH DING: Ellen G. White Encylopedia sung a “Thugetna” laimai 1044-1046 leh “Biakpiakna” laimai 1290, 1291 sim in.

“Sabbath pen piansakna phawkna ahihna i thupina in Pasian pen Piangsakpa ahihna le eite piansak i hih manin Pasian pen biak ding cih thumaan hong lak tawntungna hang ahi hi. Pasian biakna bupi khempeuh ah Sabbath om aa, thudang te in a pulaak theihloh alian thumaan thutak hong hilh hi. Piangsakpa leh piansakte kibatlohna ah Pasian biakna diktak kimu thei hi. Hih a lian thu in maimang ngeilo ding aa, a kimangngilh thei ding zong hilo hi.” – J. N. Andrews, History of the Sabbath, Chapter 27. Mihingte lungsim ah hih thutak kep den ding hi aa, Eden huan ah Pasian in Sabbath phut aa, Aah eite hong Piangsakpa ahih lai teng Amah i biak ding ahi hi.

Sabbath in ciaptehna leh phawkna hi paisuak ding hi. Leitung bup in Sabbath zui uh hi leh mihing ngaihsutna le deihnate in zahtaak ding  leh biakding ahi Piangsakpa kiangah om dinga, milim bia, pasian neilo, leh biakna upna neilo cih om ngeilo ding hi. Sabbath kepna in Pasian maan tungah muanhuaina lim hi a, “Amah pen vantung le leitung, tuipi le tuinakte a Bawlpa” cihna lim ahi hi. Pasian bia aa Ama thupiakte zuih ding sawlna thupuak in a diakk in thupiak lina zuih dingin sapna ahi hi.” – Ellen G. White, The Great Controversy, laimai 437, 438.

KIKUP DING DOTNATE:

1. Biakna, piansakna, leh hotkhiatna thu Lai Siangtho luanzia ah kinai mahmah ahih manin Sabbath pahtawina in biakna maanlo lehna (thukkikna) Pasian zatui hi thei dingin na koici ngaihsut hiam? Mang. 14:6,7 genkholhna ah Sabbath in bang panlaak nei hiam? Banghang in vansawltak masa thupuak ah Sabbath thu om hiam? 

2. Khat veivei biakna thu i gen ciangin biakpiakna sungah sephuai leh sephuailo te bangin i ngaihsun kha hi. A kicing zo hiam? Biakpiakna i cih bang hi takpi hiam? Na khuatual pawlpi in khiatna nei biakpiakna koi bangin nei thei ding hiam? 

3. Mun pawlkhat te ah, daitak (ol, dam, uai tak) iin biakpiakna apia Adventist pawlpi mahmah leh Christian pawlpi te kimangngilh in kinusia hi. Hih bang thu koi bangin dal thei ding na hiam?

 

Ahuampi in: Biakpiakna pen Christian thu-umte in Pasian hotkhiatna letsong hanga Ama tungah lungdam thuhna ahi hi. Biakpiakna in Christian te kipumkhatna leh kithuahna ah a thupi khat ahi hi. Thungetna leh Pasian thutak lunggulhna tawh Lai Siangho sinna lo tawh i pawlpi in Christ sungah sakhat hihna nuntakpih theilo ding hi.