Sinna 13: ANUNUNG KIPUMKHATNA ANGEI BATSAKKIKNA

SINNA 13                                       December 22-28

ANUNUNG KIPUMKHATNA ANGEI BATSAKKIKNA

SABBATH NITAK Dec. 22

Tukal sung sim dingte: John 14:1-3, Isa. 11:1-10, Rev.. 21:1-5, 1 Thess. 4:13-18, Rev.. 22:1-5, Isa. 35:4-10.

LAI SIANGTHO BULPHUH: “Ahi hangin, a thuciam bangin thumaanna inn omna van thak leh lei thak ngak in i om hi.” (2 Pet. 3:13).

Lai Siangtho kamciam lianpen te lak ah khat in hong paikikna ding Jesu kamciam ahi hi. Eite lametna in tua kamciam tungah kinga ahih manin, tua kamciam lo eite in neih dang i nei kei hi.Van meii te tawh Christ hong kumkik ciangin tawmvei sung bek kimang man neilo mihing te bawl nate leh leitung nate khempeuh beimang ding hi. Van ah kum tul om khit ciangin gal, kial, natna, leh dipkuathuaina tawh kidim hih leitung a thak in kibawl ding aa tatsa mite omna hong suak in a tawpna ah tatsa mite khempeuh a Topa tawh omkhawm ta ding uh hi.

Christ kumkik ding lametna in Thukhun Thak ih bulphuh pi khat hi aa, kum zalom tampi Christian te in hih kamciam tangtun ding ngaklah in om uh hi. Ei Seventhday Adventist te in zong Ama kumkikna ngak in i om hi. Ih min mahmah in zong tua lametna tangko hi.

Hih a nunung sinna ah, hih kamciam in Christian kipumkhatna dingin bang khiatna nei cih i en ding hi. Mihing cingtaklohna leh thaneemna te in Christ sungah sakhat i hihna hong buaisak thei zel hi. Ahizongin, khen tuamtuam a om nate vensak dinghanciamna kisam nawnlo ding hi. Ahangin, kikhen tuamna om nawnlo ding hi. Kumkik hun ciangin, Topa tawh i omkhawm ta dinga, a tawpna ah a kibawlphakik a kigawmkhawmkik innkuan khat i suak ta ding hi.

SUNDAY December 23

CHRIST’ KUMKIK DING A KICIATNA

John 14:1-3 in Jesu kumkik ding kamciam kithei pen ahi hi. Lei thak ah tatsa mite in koi bangin nuntak nei ding cih hih kamciam in bang hong gen  hiam?

Christian masate in Christ kumkikna pen “lametna thupha” (Titu 2:13) in ngaihsun uh hi. Kumkik hun ciangin Lai Siangtho genkholhna leh kamciam khempeuh a vek in picing dingin lamen uh hi. Ahang in, hih thu mah Christian khualzinna i mungtup ahi hi. Christ a itte khempeuh in Amah tawh maitang kituah aa kimuh theih ni ding ngak in om uh hi. Hih mun aa Ama kammal in Jesu bek tawh hilo in khat leh khat a kinaina leh ki-itna a neihna ding kimu thei hi.

Hih kamciamte a tangtun ding Lai Siangtho in kiciantak in hong gen ahih manin i um hi. Jesu kammal ahi “Ka hong paikik ding hi” (John 14:3) cih um i hih manin khamuanna i nei hi. Christ hong pai masakna ding thu aa kigenkholsa mah bangin, Thukhun Luikhu Lui ma in, Pasian in tuanpupa Enoch kiangah minthanna Messiah hong paina in mawhna beisak ding ahihna genkhin zo hi. Enoch in a genkholhna ah, “En un Topa, a misiangtho te tawh tul mun tul tampi tawh hong pai in mi khempeuh tungah thu khen ding aa, amaute in a pasian-milohna uh tawh ahihsa uh pasian-milohna gamtatna khempeuh le pasian-milo mawhneite in amah langpanga a gensa uh kamkhauhte in a mawhsak ding uh hi” ci hi (Jude 14, 15).

Leitungah Jesu hong paima kum tulkhat lai in, Pasian mite kaikhawm dingin Messiah hong paina ding thu kumpi David in na genkhol khinzo hi. “Eite Pasian  hong pai aa, amah dai om mawklo hi. Ama mai ah mei khat in valhtum aa, a kimkot ah pingpei a kinuai hi. A mite tungah thu a khen theihna dingin tunga van te leh leitung sam a, ‘biakna pia aa kei tawh thukhun a bawl ka misiangtho te aw ka kiangah hong kikhawm un’ a ci hi” (Ps 50:3-5).

Jesu kumkikna in hong pai masakna tawh kipeh (kizom) hi. Ama hong suahna leh nasepna a genkhol genkholhna te in (Gen. 3:15, Mic. 5:2, Isa. 11:1, Dan. 9:25- 26) kumkikna ding kamciam tungah eite lametna leh muanna bulkip tawphah ahi hi. Christ in “Amahmah biakpiakna tawh mawh maisak nading in hong kilang zo hi … Tua bang tektek in Christ zong mi tampi mawhnate lakhia mang dingin khat vei biakpiakna iin kipia zo hi. Tua hi a, mawhna a pua ding hi nawnlo, Amah a ngak mite hotkhiatna a puak dingin a nihveina hong kilang ding hi” (Heb. 9:26, 28).

Nihveina hong paina ding kamciam pan in bang lametna leh kihehnepna ngah thei na hiam?

MONDAY December 24

ANGEI-BATKIKNA DING KAMCIAM 

Isaiah 11:1-10 sim in. Israel tungah bang kamciam kipia aa, tua in tat sate a tawntung tenna mun thu bang hong gen hiam?

See also  LESSON 6: KIPUMKHATNA LIMCINNATE

______________________________________________________________

Leitung a kipiansakna tangthu tawh Lai Siangtho kipan hi (Gen. 1, 2). I nu-le-pa masa Adam le Eve te tungah kipia leitung in a hoih mahmah le a kihualkim leitung ahihna hong lak hi. Pasian bawlsa mihing te aa dingin a picing leitung leh inn a hi hi. Lai Siangtho a nunung a lian nihte in zong tatsa mihingte aa dingin Pasian in a picing leh kihualkim leitung bawlsak ahihna hong gen aa (Rev. 21, 22) ahi zongin, mawhna suksiatsa hih leitung a ngeibang kiksak leh bawlkikna cileng kician zaw lai ding hi.

Tatsate omna ding inn in ngaihsutna, deihna leh mang sunga om peuh hilo in mun taktak aa om ahihna Lai Siangtho mun tampi te ah hong kigen hi. Tatsate in nuntakna thak, thuakna thak ahi mu, za, nam, lawngkha, leh thuaktheih ding uh ahi hi. Isaiah 11 genkholhna in hun thak khat a hong bawl ding Messiah hong paina ding a genkhol thu hoih mahmah ahi hi. Amah in ngongtatna khempeuh beisak in a tawntung kilemna muak ding hi. Hih lei thak ah Pasian ukna in vannuai kithuhualna omsak ding hi.

Rev. 21:1-5 sim in. Hih kithuhualna thak a omna hangin bangte beimang ding hiam?

______________________________________________________________

Bangin tatsa mite ngak cih Ellen White in a gelhna ah: “A tawntung kumte hong kipat ciangin, amaute in Pasian le Christ lahtelna a picing zaw leh a minthang zaw in hong keng ding uh hi. Theihna a khan mah bangin itna, zahtakna, leh lungdamna zong khang ding hi. Mite in Pasian thei semsem Ama nunzia a deihna uh lian semsem ding hi. Satan tawh kidona lianpi sungah tatkhiatna ih hauhna leh a lamdang gualzawhna te Jesu in amaute mai ah a lah ciangin, kipum-apna lianzaw tawh a kitankhia mite lungtang kisai dinga, a khut te uh tawh a ngaihzaw in kham-khausai te tum ding uh hi. Tul sawm mun tul sawm leh a tul tul awte kigawmkhawm in phatna lianpi sa   khawm ding uh hi.” – Ellen G. White, The Story of Redemption, laimai 432, 433.

Tu laitak in zong Pasian nunzia i teltheihna ding bang lampi te om hiam? Midangte tawh kithuhualna leh kipumkhat aa nuntakna in koi bangin Pasian nunzia leh a pianzia hong lak hiam? 

TUESDAY December 25

THAHWKIKNA LEH ANGEI-BANGKIK KIZOPNA

Pawlpi kipat cil hun lai pek panin thudang te sangin Christ kumkik ding kamciam in Pasian’ mite’ lungtang zeet haksat hun ah thaguan in kipsak hi. Bangzah in a thuakte uh lauhuai in, a dahna leh natna te uh hehnepzawh ding hilo mah leh amaute in Christ kumkik ding lametna nei uh a, Nihvei hong paina tawh kisai kamciam hoih khempeuh nei uh hi.

1 Thess. 4:13-18 sim in. Hih sungah bang kamciamte om hiam? Hih in angei bangkik ding kizopna thu tawh kisai bang lametna hong gen hiam?

Christ’ nihvei hongpaina in mi khempeuh theih in kikhelna hong tun ding hi. Pasian gam phutna ah a thupi ahmah khat in teelsa te kaihkhopna ahi hi. “Amah in ngaihtak in pengkul aa sapna tawh a vansawltakte sawlkhia ding hi. Amaute in van mong khat pan mong khat dong huih li te pan in a teelsa mite a kaikhawm ding hi” (Matt. 24:31). Hih kaihkhop hun laitak in, a si midikte hong tho in sihtheihlohna pumpi nei ding uh hi (1 Cor. 15:52, 53). “Christ sungah a sis ate tho masa ding hi” (1 Thess. 4:16). Hih in i ngakngak hun ahi hi. A thokik misiangte in amau’ itna leh nuntak ding a ngak den a itte uh tawh kigawm ding uh hi. Paul in hih thu kipaak mahmah na tawh a genna ah, “Sihna aw na zawhna koi ah om hiam? Sihna aw na guu koi ah om hiam?” (1 Cor. 15:55).

A thokik pumpi in hansungah a pai natna a dim, a guai, mellawm lo pumpi hilo in a thak, sitheilo, a picing pumpi, mawhna in a piansak siatna pawn leh muatna cihte omlo hi. A thokik misiangte in a ngeibatkikna ding Christ nasepna cing takin ngah uh aa, piansak lai aa Pasian’ geel mel picing kilang ding hi (Pian. 1:26), 1 Cor. 15:46-49).

Jesu kumkikna ah, a sisa tat sate hong thawhkik hun in leitung ah a nungta lai midikte kikhel ding aa, a picing pumpi thak kipia ding hi. “Ahangin, a siathei te in siattheihlohna silh in, a sithei te in sihtheihlohna a silh ding hi” (1 Cor. 15:53). Tua hi a, hih tatsa pawl nihte – a kithokiksak leh a kikhel midikte – “huih lak ah Topa dawn dingin  meii lakah kilato khawm ding hi. Tua tak ciangin Topa tawh om khawm tawntung ding hi” (1 Thess. 4:17).

See also  Lesson 11: Upna Innkuante

Tulai teihpan (scientific) hun ah, na khempeuh aa ding dawntelna, hilhcianna Christian te pawlkhat nangawn in zong uh aa “nalamdang” te nangawn pianngei nate tawh kizui in kantel ding hanciam uh hi. Hih thawhkikna kamciam in pianngeival (supernatural) ahi Pasian nasepna bek in eite hong honkhia thei ahihna hong bangci telsak hiam?

WEDNESDAY December 26

TATSATE’ AA DING LEI THAK KHAT

“En un, a thak vante le leithak khat ka piangsak ding hi. Amasa nate kiphawk nawnlo in lungsim in zong a kingaihsun kha kei ding hi” (Isa. 65:17). Isaiah leh John (Rev. 21:1) in a mangmuhna uah kamciam ahi lei thak mu uh hi.

Mang. 21:2, 9-27 sunga tats ate khuapi Jerusalem Thak thu John in a genna ngaihsun in. Hih mun in tua khuapi sunga om ding kipumkhatna le kithuhualna bang hong gen hiam?

_______________________________________________________________

Mang. 22:1-5 sim in. Pasian’ kumpi tokhom pan hong luangkhia nuntakna gun leh tua gungei aa po nuntakna singkung te in tua khuapi thak tawh kisai a thupi thunihte ahi hi. Lei Thak ah tua tegel bang ngimna tawh om hiam?

_______________________________________________________________

Ama thupalsatna hangin Adam in a taan nungtakna singkung (Pian. 3:22-24) pen Jerusalem Thak ah Christ in koihkik ding hi. Hih singkung nek theihna in a gualzo mite tungah kamciam khat ahi hi (Mang. 2:7). Singgah nam sawm-le-nih, kha simin gah cihna in a hang khat ahi lei thak ah “kha thak khat pan a dang khat ah, Sabbath khat pan sabbath, mi khempeuh hong pai in ka mai ah a kun ding uh hi, Topa in ci hi” (Isa. 66:23). “Minamte damna” cih thu in mite kikal a kideina te Pasian in a hepkhiatnopna leh mihingte a ngeibatkikna ding a geelna masa ahi mi khempeuh, beh khempeuh, leh gam khempeuh a kikhenlo innkuan khat hi in kithuhualna leh kilemna tawh nungta dinga Pasian tungah minthanna piakhawm ding ahi hi.

Minamte damna ding cih in kampau le minam kideina leh kikhenna te lakkhiatna ding genna ahi hi. Nuntakna singkung a tehte in minamte ngeina kisiatna te damsak ding hi. Minamte in “gentile’ te hi nawnlo in Pasian mite taktak hi in innkuan khat ah kigawm ding hi (Rev. 21:24-26). Tua ma kumzalom tampi lai in Micah in a lamet thu hong tangtung ta hi, “… minam khat le khat namsau kiliiksan nawnlo ding uh a, galsim dingin zong a kisin nawn kei ding uh hi. Mi peuhmah ama lenggui nuai le ama theikung nuai ah tu ding a … kua mah in amaute a lausak kei ding hi” (Micah 4:3-4, enkaak Isa. 2:4). Tua nuntakna gungei ah tatsa mite in tua nuntakna singliim nuai ah “a vengte a tu dingin zawn” ding uh hi (Zech. 3:10). Tua singteh in meima khempeuh damsak ding hi. Khangtawn in mihingte a kikhensak a balkham phung le taang, minam, beh, le kampau te damsak ding hi.” –Ranko Stefanovic, Revelation of Jesus Christ: Commentary on the Book of Revelation, laimai 593.

THURSDAY December 27

LEITHAK AH NUNTAKNA

Isaiah 35:4-10, 65:21-25 sim in. Tua hun ciangin tu aa i phutkhaak nuntakna tawh bangzah in kilamdang ding hiam?

Isaiah thubu sungah a thak pawlkhat kimu thei hi:  “athak nate” (42:9, 48:6), “la thak khat” (42:10), “na thak khat” (43:19), “min thak khat” (62:2). A lian v.65 sunga a thak in nate omzia thak ahi hi. Pasian piansak nate khempeuh lakah kithuhualna leh kilemna om hi. Thumanlohna leh lehdona hanga leitang tungah samsiatnate (Siam. 26:14-17, Deut. 28:30) a tawntung in kilakhia ding hi. Ahang in, mawhna om nawnlo ding hi. Tua sangsik in, thupha tampi om ding a, tenna ding innte leh nek ding ante tampi om ding hi.

Tua bang ahoih mahmah mun ah nuntakna koi bang ahi tam? A si theilo pumpi nei in Pasian lim picing ih ngah khit ciangin i innkuanpih te leh i lawmte tawh i kithei lai diam ci-in mi pawlkhat in ngaihsun uh hi. Christ thawhkik khit ah zong a nungzui te in Amah thei uh hi. Mary in a aw thei hi (John 20:11-16). Thomas in Jesu pumpi omzia thei hi (John 20:27,28). Emmaus khua aa nungzui nihte in annek sabuai kiangah Jesu pianliim a omzia in thei uh hi (Luke 24:30, 32, 35). Tua hi a, i pumpi in a thokik Jesu pumpi a bat ding aa leh, khat lekhat ih kithei taktak dinga, a tawntung kizopna i lamen thei ding hi. Eite tawh a kithei, a ki-it, leh eite tawh a om mite tawh kizopna a neisuak dingin i ngaihsun thei hi.

See also  Lesson 5: Pawlpi Masa Sungah Kipumkhatna

Tatsa mite in amau a kitheih bangin amau zong thei ding uh hi. Pasian mahmah in pumpi sungah a suansa itna leh lainatna amaute in diktak leh khumtak in zang thei ding uh hi. A siangtho nuntakna neite tawh kikholhna siangtho thupha ngah vansawltakte tawh kithuhual a kithuahkhopna leh Tuuno sisan sungah a puan uh sawpsiang aa a paaksak khangtawn aa thumaan mite tawh a siangtho kikholhkhopna in “van le lei ah innkuan bup” hong suah ding a (Eph. 3:15) tua in tat sate lungdamna omsak ding hi.” – Ellen G. White, The Great Controversy, laimai 677.

“Tua hi a ka lungkia kei uh hi … a cihtak lo leh hun tomno sung ka thuak uh lungkhamna te in tuate khempeuh akhup tawntung minthanna kote hong ngahsak hi. Tua ahih ciangin, a kimu thei te mitsuan lo in, a kimu theilo te ka mitsuan zaw uh hi. Ahangin, a kimu thei te tomkal sung bek om aa, a kimu theilo pen ahih leh a om tawntung ahi hi” (2 Cor. 4: 16-18). Tomno sung bek ahi a bei hanhan leitungah a om eite in a kimu theilo leh tawntung nate mitsuan ding koi bangin kisin thei ding ih hiam?

FRIDAY December 28

NGAIHSUT BEH DING: Ellen G. White gelh Counsels for the Church sunga “En in, a manlang in kong pai ding   hi” laimai 355-359. The Ellen G. White Encyclopedia sunga “Thawhkikna” laimai 1082-1084 leh “Vantung leh Lei Thak” laimai 863, 864 sim in.

“I Topa thawhkikna leh vankahna in sihna leh hankhuk tungah Pasian misiangthote gualzawhna teci kician hi aa, Tuuno sisan sungah a gamtatna puanpi uh a sawpsiang te aa dingin vantung in kihong den in om cih ciamna ahi hi. Mihing te palai (tangding) hihna tawh Pa kiangah Jesu pai to hi. Ama mel a lengsak (kilangsak) mite Pasian in Jesu minthanna musak dinga, Amah tawh minthang khawmna ah lutsak ding hi.

Leitung a khualzin mite aading in inn om hi. Midik te aa dingin puanpaak minthanna leh gualzawhna khamlukhu om hi. Hih leitung ah i telloh thute siangtak in kitel ding hi. a telhak thute gencianna leh hilhcianna kingah ta ding hi. Hehpihna thuthukte eite mai ah hong kihong ding hi. A kiciangtan i ngaihsutna tawh lungbuaina leh kamciam te, a tumtawng bek in i theih nate a kicing leh a hualkim in i mu ta ding hi. A lungzin huai tuahkhak thute a bei theilo itna hangin hong piang cih i thei ta ding hi. Na khempeuh eima hoihna dingin a bawlpa kepcingna sungah om cih i tel ciangin, a kigen theilo lungdamna leh minthanna lianpi tawh kipaak in i om ding hi.” – Ellen G. White, Counsels for the Church, laimai 358.

KIKUP DING DOTNATE:

  1. Christian dangte (avek in bel hilo) in Jesu kumkikna om takpi ding cih a up uh hangin, Christ kumkiknading Adventist te lametna in a tuamdiak ahihna bang hiam? 
  1. Ngasa nih tui a peek kawm un kiho uh a, khat in “tui a nuam hia (alem hia)?” ci in a dot leh, ngasa khat pen in, “tui i cih bang ahia?” ci-in dawng hi. Gennop thu in na khat peuh ngeina seh luat manin a omlam (banghiam) zong kitheilo thei hi. Gentehna in, mawhna sungah suak, mawhna tawh kidim ban ah mawhdim leitung ah nungta i hih manin, koi bangin van thak leh lei thak ah a lamdang nuntakna thak nei thei ding cih hoihtak in telthei ding ih hiam? Bang hangin hanciam in mitkha ah bawl in ngaihsut huai hiam? 
  1. Lei thak ah koi bang dan nuntakna i nei zongin, mi khempeuh tawh kipumkhat in nungta ding cih kitel mahmah hi. Tu laitak in tua bang nunzia dingin koi bangin kiging thei ding i hiam?

 Ahuampi in: Hih leitung kibawlkik in mawhna siatsak nate a kiphiat mai tawntungna ding hun Lai Siangtho in muanhuai takin hong gen hi. A tawpna ah a om masa geelna ah mihingte tunkik in, mi khempeuh kithuhual takin nungta khawm ta ding hi. Tu laitak in Christ sunga ih kha sakhat hihna in cingtak nailo hi mah leh tua hun ciangin taksuak in a tawntung nungta ding hi.

Tags: ,

Admin

Admin

Top