Sinna 13: Rome ah Khualzinna

SINNA 13 

ROME AH KHUALZINNA

September 22-28

       

SABBATH NITAK   

Tukal sung sim dingte: Sawltak 27, 28; Rom 1:18-20.

LAI SIANGTHO BULPHUH: “Paul aw laukei in. Caesar mai ah thu kisit in na ding pelmawh ding hi.” (Sawltak 27:24, ZIV).

Rome khua ah Paul ahawh nop sawt mahmah hi ta leh Jerusalem ah a kimatna in na khempeuh khel mang hi. Jew ngeina tawh kisai a Jerusalem pawlpi makai te genna thu a mang na hangin kum nga phial Rome te khumcipna thuak hi. Hih kikhelna in a nasepna ding geelna nakpi tak susia hi.

Hih nawngkaisakna te om mah ta leh, Rome khua ah Ama thu teci a pang teitei na ding thu Jesu mahmah in kamciam pia khin hi (Sawl. 23:11). Pasian deihbang i cinzawh loh phial hang, Pasian in hunpha hong pia kik zel hi. Eite sepna hangin i thuak dingte pan in bel hong pengsak tuanlo hi. Rome ah thongkia mi a Paul kipaipih bek hilo in, pai ding a lametna leh a ut na Spain ah a paina thu Lai Siangtho matlap omlo hi (Sawl. 15:24).A thongkiat masak na pan in a kikhah khiat khit a sawtlo in A.D. 67 kum in Nero kumpipa khut sungah upna hangin thahna a thuak dingin a kiman kik ding hi ta hi (2 Tim. 4:6-8).

Rome khua ah Paul tung mah hi. Kumpilianpa (em-peror) mai ah thusitna thuak dingin thonginn sungah a om sungin, kol kibulh mah ta se leh thugen veve a (Eph. 6:20, Phil. 1:13), ama kiangah pai khempeuh tungah a dal omlo in thuhilh hi (Sawl. 28:30, 31). Caesar innkuanpih te nangawn tungah thuhilh hi (Phil. 4:22).

SUNDAY                                                                                                September 23

TEMBAW TAWH ROME ZUAN

Caesarea ah kum nih bang a kikhumcip khit ciangin (Sawl. 24:27) Rome ah Paul a kipuak ding hi ta hi. A lai-at kammal zat te et ciangin Italy zuan a tembaw tawh pai na ah Luke in Paul zui a(Sawl. 27:1-28:6), a dang Christian khat mah ahi Aristarchus zong amau tawh paikhawm hi (Sawl. 27:2).A dang a kipulaak mi khat in thongkia te a ki-apna Rome galkap zakhat ukpa Julius zong kihel hi (Sawl. 27:1).

Amaute a paikhiat un khuakhal beikuan hi ta hi. Sawltak 27:9 sunga Antan a cih pen Sian Suahpawi a gen hi a, October kha lang khit ahi hi. Phalbi khua hun hangin, November leh March kha kikal sung Mediterranean tuipi ah khualzin ding kipelh den hi. Ahi zongin, tu tung ahih leh, a kipat a kipan haksatna tampi tuak pah in sawtpi a pai khit uh ciangin Crete tuikhulh tunga Van Siang kici mun tung uh hi (Sawl. 27:8).

Sawltak 27:9-12 sim in. Van Siang ah a om sung, Paul in koi bangin thusai a, a thusaina koi bangin kidawng hiam?

________________________________________________________________

Paul vauhilhna kuamah in thudon lo in nitumna lam maawnh ding khensat uh a, phalbi sung muanhuai tak a om theihna ding uh tua lai pan tai 40 kiim kigamlatna Phoenix lam zuan uh hi. Kamsiatna tawh, khuahun kikhel vatna hangin huihpi lian hong nung a tembaw nasem te in tembaw kemcing zo nawnlo in huih puak na lam zui in leitaw-nitumna lam zuan in leitang panin kigam la semsem uh hi. A sawtlo in tembaw a zang tuamna dingin tembaw puak vante tuipi sungah paikhiat ding hong kul ta hi. Ni tampi sung nitang mulo in mailam gamla pi kimu theilo a, guahpi leh huihpi kithuah gawp ahih manin amaute gim in tawl mahmah ta uh ahih manun, “suahtak zawhna ding lamet beita uh hi” (Sawl. 27:20).

Sawltak 27:21-26 sim in. A nihvei na Paul in bang amaute tungah bang gen hiam?

________________________________________________________________

Kamsanna tawh, Pasian tung pan a ngah thu tembaw nasem te kiang Paul in gen hi. Lungkiatna ding leh thanemna ding thu omlo hi. Lauhuaina leh supna om lai ding a, ahi zongin a vek un suakta ding uh hi.

Paul bang a citak leh ki-ap mahmah Topa nasem khat in banghangin hihzah ta thuak se hiam? Paul thuakna pan in bang hilhlak ngah thei i hiam?

MONDAY                                                                            September 24

TEMBAW TUAHSIA

A nihvei na mite tungah a thugenna ah, tembaw bek kisia in a tunga tuang mite khempeuh (Sawl. 27:37) sihna manna omlo in a suahtakna ding uh Paul in kipgen hi (Sawl. 27:22). Ni 14 khit ciangin, sawltakpa thugen tangthu hi. Huihpi nasia mahmah in tembaw kikem zolo hi mah leh, tuihual in tuinawl suangte a seemna aw za uh hiam, tembaw nasemte in leitang naita cih thei hi(Sawl. 27:27). Suangtawh kitaih khak ding lau ahih manun  tuithukna a teh zel khit uh ciangin tembaw hatna akhiap theihna ding un tembaw nung lam pan sikkip li khia uh a, zingsang khuavak na ding amau pasian uh tungah nakpi tak in thu ngen uh hi (Sawl. 27:28, 29).

Sawltak 27:30-34 sim in. Hih tangthu sungah eite a ding bang hilhlak om hiam?

________________________________________________________________

Khualzin kipat lam in zakhat-ukpa in Paul hoihtak in bawl hi mah leh tuipi tung khualzinna tawh kisai a khensatna te muanna ding thukip mulo hi. Ahi zongin, kal nih khit ciangin, nate hong kilamdang hi. Tembaw siatna ding tawh kisai a genkholhna hangin zakhat-ukpa zahtak pimuhna Paul in ngah ta hi (Sawl. 27:21-26).

Tembaw tunga tuang mite kiang an anek na ding un Paul in kun hi. Tua hi kei leh, tuipeek in tui nawl a tun theihna dinguh tha neilo ding uh hi. Eite vaipuak sep ding pan in pengna dingin Pasian in hong huh den tawntung khollo hi. “Amaute suahtakna ding Pasian kamciam leh tua bang ngah theihna ding amau ngiat hanciamna kilekkim takin hih tangthu ah kimu thei hi.” – David J. Williams, Acts (Grand Rapids: Baker, 1990), laimai, 438.

Khua a vak ciangin, tembaw nasem te in sehtaak mu uh a tua lai ah tembaw khawl sak sawm uh hi. Ahi zongin sehtaak tungzo lo uh hi. Sehtaak kho khat phu kha in leitungah kinga cip ahih manin tuihual in tembaw sattam gawp hi. Galkapte in thongkia te tuipek in a suahtak khak ding uh dalna in thah sawm uh a, ahi zongin Paul hangin zakhat-ukpa in kham hi. A tawpna ah, Pasian kamciamsa om bangin, nuntakna khat bek mangthang lo hi.

Paul suahtaksak nop manin thongkia te thahloh ding kikham zah dong dingin Paul teci leh a nunzia in bangzah in vanglian cih thu in bang hong hilh hiam?

TUESDAY                                                                          September 25

MALTA AH

Tui gei ah a suahtak khit uh ciangin tua lai lai pen Mediterranean tuipi laizang, Sicily leitaw lam a om tuikhulhneu Malta ahih lam thei pan uh hi. Kal nih sung bang tuipi tungah huih nun na lamlam ah kiseem in a om sung Crete a om Van Siang a cihna panin tuipi tung a khualzinna teng uh tai 475 bang pha hi. A khualzin uh a zop kik theihna dingun kha thum sung bang tua lai ah a ngak uh kul hi (Sawl. 28:11).

Sawltak 28:1-10 sim in. Malta tuikulh a tun uh ciangin Paul tungah bang thu piang a koi bangin Pasian in amah zang hiam?

_________________________________________________________________

Malta tuikhulh a om mite thunuam mahmah uh aa, tuikawt in khua dam ahih manin Paul leh a tuanpih te khua alum theihna dingin mei cihsak uh hi. Hih hun in Malta khuahun pen a lumna 50° F (10° C) sangin lum zawlo hi.

Gul vai a thupiang hangin Malta mite in Paul thu lunglut mahmah uh hi. A masa in, hih dawibia mite in gultukna pen pasian gawtna (daan piakna) in ngaihsun uh hi. Amaute in hih Paul pen tualthat khat hi in, tuipi sungpan a suahtak hangin pasiante (thutang leh phula ahi Greek nusian Dike) in man kha veve uh ci uh hi. Sawltakpa silo ahih manin tua ma lai a Lystra a thupiang bangin pasian hi ci leuleu uh hi (Sawl. 14:8-18). Luke in hong genloh hangin, hih thu piang hangin ana a sepsak Pasian a ding teci pan theihna dingin Paul in hunpha la hi leh kilawm hi.

Publius in Malta a Rome kumpi gam-uk khat maw ahi kei leh tua lai a khuasung mite zahtak khat maw hi ngel hi. Bangbang hi ta leh, Paul leh a lawmte zintungsak in a omna ding mun a muh madong uh nithum sung tua lai ah hoihtak in zindo hi. Paul in Publius pa a damsakna hangin Malta mite lak ah cina te damsak na ding hunpha khat hong ngah hi.

Luke ciaptehna ah, Malta panin Paul a paikhiat ciangin khat beek kikhel cih genna omlo hi.A genloh mawkmawk zong hi thei a, ahi zongin hih thu in leitungah eite nasepna in tuiphumna leh pawlpi phutna ding bek hilo in mite kisapna leh a haksatna te lunghimawh pihna cih hong lak hi. Tua in lungdamna thu nuntakpihna a hi hi (Sawl. 20:35 leh Titu 3:14 enkaak in).

Hih tuikulh mite in pasian thutangna tawh kisai a theihna uh bangzah in lamdang hiam? Tua bang theihna koi bang hong pai hiam? Rom. 1:18-20 en in.

WEDNESDAY                                                                                     September 26

ROME AH PAUL TUNG TAKTAK TA

Malta ah kha thum sung a om khit ciangin, Paul leh a tonpih te in a khualzin uh zomkik thei ta hi (Sawl. 28:11). Puteoli, tuhun Naples sehtaak a om Puzzuoli, tung uh a, tua lai pan in Rome ah leilam tawh khualzin zom uh hi (Sawl. 28:11-16).

Rome ah Paul a paina thu kizel pah a, tua lai a om thu-um mite amah dawn dingin tai tampi khualzin uh hi. Rome ah khat vei beek a tun ngei nailoh hangin, sawltakpa in khualpi sungah naseppih, a kikhel thu-ummi, innkuan naihuai, leh amah a it lawm tampi nei khinzo hi (Rom. 16:3-16).Tembaw kisiatna hang leh thongkia khat ahihna tawh Appian Lampi ah thu-um te tawh kimuhna in lungsim la mahmah kha ding hi. Hih bangin a lawmte in amau itna leh donna alahna thu a muh ciangin Paul in Pasian tungah lungdam ko a, kumpilianpa mai ah thusitna a thuak dingin thakhauhtuam mahmah hi.

A lai khakna ah Rome thukham tawh kizui in Paul in bangmah khialhna a neihlohna thu gelh kha ngel ding hi (Sawl. 25:26, 27; 26:31, 32). Thonginn leh galkap te omna ah ki omsak lo a, Rome ngeina bangin sikkol kibulh ahih teei hangin ama aituam inn sap in a om theihna in khialhna lianpi neilo ahihna hong lak hi (Saw. 28:30).

Sawltak 28:17-22 sim in. Rome a tun khit phet in Paul in bang hih hiam?

________________________________________________________________

Kikhopna inn ah Paul a pai theihloh hangin, kikhawm dingin ama kiangah mite pai thei hi. Tua hi a, a tun zawh a sawtlo in, Jew te kiang thu a gen masak den bangin (Rom. 1:16)tua lai a om Jew makai te sawmkhawm aa, amawhlohna thu leh tua ma lai aa a septe, Israel te lametna thu ah lo buang akimatna in thudang ahihlohna gen hi (Sawl. 23:6, 24:15, 26:6-8). A geelna in lungdamna thu tangko theihna dingin mite tung pan muanna a ngah theihna dingin kihuutna hilo a, Jesu thawhkikna in Israel te tanglai lametna pi tangtunna ahih zia lahna ding hi zaw hi. Jerusalem panin bang mah thu zalo uh hih manun Paul thugen te ngai uh hi.

Sawltak 28:22 sim in. Hih hun in zong lungdamna thu a kilangpan zia hih thu in bang hong gen hiam?

Midang te in eite upna hong langpan hangin koi bangin muanhuai den zo ding i hiam?

THURSDAY                                                                                         September 27

LUNGDAMNA THU GUALZAWHNA

A kiseh ni a tun ciangin, Paul gen lungdamna thu a ngai dingin Jew te tampi hong kikhawm uh hi (Sawl. 28:23).

Sawltak 28:24-31 sim in. Isaiah thubu a bulphuh-na ah Paul gennop bang hiam?

_______________________________________________________________

Isaiah 6:9, 10 a bulphuhna in mite in Pasian thupuak a nial den ciangin amau tungah bang thupiang cih lahna a hi hi. Jew te pawlkhat in up uh hangin pawlkhat in umlo uh hi. Amau sungah kinialna lianpi om ahih manin, sawltakpa zong Gentile te kiang gen ding simloh tel ding dang neilo hi (Sawl. 13:46, 47; 18:6).

Ama inn-thong sung pan a paikhiat theihloh hangin, ama kiang ah a pai mi khempeuh tungah daltanna omlo in lungdamna thu hilh thei veve hi. Sawltak thubu a tawpna a kigelh thu in lungdamna thu gualzawhna bulphuh hi. Jew ahi a Rome thahatna ahi zongin lungdamna thu daltan zolo ding hi cih thu ahi hi.

Banghangin Luke in hih bangin a laigelh tawpsak cih a kitelloh hangin, thongkhiatna panin Paul kikhah kik in nasep khualzinna khat nei lai a tua khit ciangin Rome ah matna thuak in thahna thuak hihna mundang ah kimu thei hi (2 Tim. 4:6-8). Luke gelhna mun pan et ciangin, Rome dong lungdamna thu a tunna in, lungdamna thu in “leimong dong tung khinta” kici thei hi (Sawl. 1:8).

“Thumaanlo a akimat sung tawntung Paul lungduaina leh lungnop maitaina, a hangsanna leh upna te in thugen (sermon) hi den hi. Leitung lungsim bang a hilo ama lungsim in leitung neih ahilo a sangzaw vangliatna nei hi. Ama sepna etteh in, Christian tampi te in Paul kiangpan kilakhia mipi tungah lungdamna thupuak nasepna sem dingin nakpi tak in tawsawnte suak uh hi. Hih bangin sawltakpa huzaap in bei tuanlo a, a vangliatna leh a kizatna a kikhaktan tawh akibat hun, mite muhna ah bangmah sem thei nawnlo in a ngaihsut laitak in amah akipaisak lohna mun te ah Christ a ding lolai a buhlom te amah in kaikhawm khinta hi.” – Ellen G. White, The Acts of the Apostles, laimai, 464.

Pawlpi nasepna lampan en leng, Sawltak thubu ahih kei leh pawlpi nasepna in kizo nailo a, eite i vek in tua thu sungah a kihel te vive hi ta hi hang. Kum zalom tampi sungin a lunglut huai thu tampi kigelh khinzo a, pawlkhat te Pasian sawltak muanhuai te sisan tawh kigelh zo hi. Laigual behlap aa a at ding eite vaipuak hi ta a, a nunung pen lametna (eite lametna) leh nungzui te tungah zawh dinga Jesu in a piak sawlna i zawh dong i sem dinga tua ciangin “beina hong tung ding hi” (Matt. 24:14).

FRIDAY                                                                              September 28

NGAIHSUT BEH DING: “Pawlpi tungah vaipuak siangtho Christ in hong pia zo hi. Genzawhloh Christ hauhna ahi Pasian hehpihna gou, pawlpi mimal kim tungtawn in Pasian in leitung mite tungah puak ding ahi hi. Ama Kha leh Ama nunzia leitung mite tungah lah ding sangin Honpa in a lunggulh zawk om lo hi. Honpa itna mihing te tungtawn in a kilat ding sangin leitung in a kisap zawk na dang omlo hi. Christian biakna i vangliat zia Pasian in amau tungtawnin a kilat sakk theihna ding numei leh pasal te vantung khempeuh in ngak dimdem in om hi.” – Ellen G. White, The Acts of the Apostles, laimai, 600.

“Mikhat sim in a septheih bangbang tawh Ama na asep theihna dingin pawlpi bup in nasepna ding lunggulhna a neih ding Pasian in a ngak zawh sawt ta hi. Inn ahi a pua lam ah ahi zonginPasian pawlpi mite in a kiseh amau vaipuak ciat a sep uh ciangin, leitung bup vauhilhsa hong suak dinga, hih leitungah vangliatna leh minthanna lianpi tawh Topa Jesu hong kumkik ta ding hi.” – laimai, 111.

KIKUP DING DOTNATE:  

See also  Lesson 2: Meivak Khuamte Lakah

1. Rome ah a khualzin sung tawntung Paul in Pasian a upna Luke in koibangin hong lak hiam? Tua banga akip akho upna in midang te koi bangin sukha hiam?

2.  Bangbang a tuak zongin Paul in a upna leh a sepna nusia lo hi. Rome ah zong, a suahtakna kiciangtan ta seleh lungdam thu tangko veve hi. Mikhat peuh tungah lungdamna thu i tangkona ah lungkiat huai i tuah ciang bang hih ding i hiam?

3.    Rom. 1:14-15 sim in.Banghangin lungdamna thu gen ding leiba bangin Pau in ngaihsun hiam? Amah sangin eite tungah mawhpuak neuzaw hiam? Hih kammal ngaihsun in: “Christ a pulaak mi peuhpeuh in kha gupkhiat ding nasep bulpi hi ding hi. Pasian hong piak hehpihna, eite tungah hong tang khuavak, leh thutak (thumaan) i hoihna leh vangliatna hangin tua thu gen ding leitung mite tungah leiba nei te i hi hi.”– Ellen G. White,Testimonies for the Church, vol. 4, laimai, 53. 

4. Paul bulphuh Isaiah thubu sung simkik in. Hih thu in tu hun tawh koi bangin kituak hiam? Thutak tampi eite tungah hong kipia khin a, ahi zongin lungtang khauh in eite deihna leh lunggulhna te tawh kitukalh te ngailohna in kha lam bang lauhuaina te hong tun thei hiam?

5. Paul tawh kol akibulh khawm galkappa dingin ki ngaihsun in. Nang tawh kikhih khawm mipa tungah bang mu dingin na ngaihsun hiam?

Tags:

Admin

Admin

Top