Sivuina pan Piangthak

 Sivuina pan Piangthak

 Kositela Tito, 33

Fiji, September 21

A pa’ sih lai-in kuamah’n Tito huh nuam vet lo uh hi.

“Hih mihingpa’ misi bel Pawlpi’ mintawh kivuisak zolo ding hi” khat in ci hi.

“Kuun`vui sukziau lel ding hi ee,” adang khat in ci hi.

Fiji gam sung a om, gamdawn mahmah khua ahi Nakavika khua mite in Tito’ pa pen Seventh-day Adventist a suahna hangin nungngat san uh hi. A khuapihteng, Tito zong kihel, pawldang tapidaw ahi khin uh hi.

Tito in ahihleh a pa limtakin kivui leh deih ahih manin, a nu-unaupih ahi, a sanggampa, hausapa’ kiangah hoih takin thuumbawl hi. Hausapa in zongh, sivui nadingin Tito in a lamhsa Adventist pawlpi sivuina ding mun ah vuisak dingin a phal hi.

Tito’ lamhsa sihvuina buuk neu sungah a sanggam naihuai teng hong kikhawm uh hi. Adventist Pastor khat in misite omdan tawh kisai in thugenna hong nei hi.

Dipkua takin Tito in tua sermon hong ngai hi. Ama’ ngaihsutna ah mi khat peuh asih ciangin a khaa vantungah kahto pahpah hi ci-in umh hi. Ahizongin tua Pastor pa in sihna pen ihmutna hi, ci-in Topa Jesu in Johan 11 sunga Lazazuh tangthu, a gen mahbangin hong pulaak hi.

Pastor pa in thu a gengen laitak mah in, Tito’ sanggamnu in Lai Siangtho khat asim dingin Tito kiangah khaak pheii hi. Pastor pa’ gen bang liinlian in Johan 11 sungah Tito in mu takpi hi.

Tua khit ciangin Pastorpa in Thesalonika Masa 4:16 sung hong leempheii in, hong sim leuleu a, Topa Jesu nihveina hong kumkik ciangin misite amau’ omna hankhuuk sung panin hong tho khia ding ahihna hong gen leuleu hi. Hibangin Pastor pa in hong sim hi.  “Pasian’ thupiakna awging lianpi, vantungmi mangpa’ thugenna, le Pasian’ peengkul hong ging ding a, vantung panin Topa mahmah hong paisuk ding hi. Tua ciangin Khris sungah a si mite hong thokik masa ding uh hi.” (NKJV)

Tito in zongh, a Lai Siangtho sungah hong zongg in hong simsuk leuleu leh Pastorpa gen tawh kituak suk liinlian leuleu hi. Amau’ kikhopna biakinn ah tua bang Lai Siangtho munte khatvei zong simngeilo uh hi.

Sivui khit ciangin sigaalteng anne dingin hong ki kaihkhop laitak in, Tito in Adventist pawlpimi lengla khat a khut tawh va len hi.

“Nong hehpihna tawh ka innvuah hong hawh tapeuh in, mihingte asih ciangin bangci om uh hiam, kitel takin ka theih beh nuam mahmah hi,” ci hi.

Tua pa in zongh a innvuah va hawh pah in, misite’ omzia tawh kisai in Lai Siangtho hilhcianna va neih pih hi. Tito in a dang zongh theih beh nuam lai ahih manin nidang ciangin zong a va hilhlai nadingin a sapbeh hi.

Ahizongin Tito’ zi, Vika ahihleh Lai Siangtho sinna ah hong kihel nuam hetlo se hi. Tua pawlpi mite a vahawh ciangin a tategeel tawh innkhaan tuamdang khat sungah kongg ki kalhnelh den uh hi.

Khanih bangh khit ciangin, Tito zongh, a Lai Siangtho sinna “Tui sung aa, kiphumna” ciang dong tungta ahih manin, “tui ka ki phuum taktak ta ding hi,” ci-in hongkiko khia hi.

A pasal’ khensatna a theih ciangin Vika a kap hi.

“I upna a kibat man bek a, ken nang kong teel hi ven, Seventh-day Adventist suak taktak ning nacih leh i kikhen vilvel hoihzaw ding hi. Ta nih nei hangh. Nang’ khat la in laa, ke’n a khatzaw la ning.” a zi in ci hi.

Tito  dah hi, ahihhang nungkik sawm lo hi.

“Vika aw, tuni a kipanin ka nuntakna sungah Pasian pen nambat khat hi-a, nang pen nambat nihna, na hi hi. Ahizongin thukhat kong ciam hi. Nidangin kong itna pen, za-ah sawmnga ahihleh tu-in, za-ah za ahi hi.”

Tui a kiphum khit ciangin, Tito in azi Vika kiangah, “Sunday ni-in, na biakinn ah na pai thei ding hi. Ahizongin Sabbath ni peuhmah in an huan lo ding, puansawp, puannawt cihte peuhmah sem thei lo ding hi teh. Tua te pen kei mahmah in Sunday nite in ka sem ding hi,” ci hi.

Kha khat hong beito ta-a, Vika in a pasal pen a tenpih ciil lai-a tawh hong kilamdanna hong mu ta hi. Sun sung khempeuh sangah lai ahilh khit ciangin a lawmteng tawh zudawn dingin a paikhiat den daanin hong paikhia nawn lo hi. Zuu dawn zaa teep in midangte a haamsiatsiatna te hong khawl kiuhkeuh zen hi. Tua sangsek in sangtuah ciangin inn ah hongciah pah vingvengin a zi le a tate tawh hunnuan hong la hi. Zuu dawn nawn lo, zaa teep nawn lo-in, mi zongh samsia nawn lo hi.

Nikhat a pasal, thu hong kikuppih hi.

“Tito aw, kong etet ciangin hong ki naak kheel mahmah teh. Ni dang a ka Tito pen hinawnkei mawk teh lawm aw. Nidang in, a ki laiiziahziah den hi hangh aa, tu-in tua daan om nawn lo. Ni dang in, na khat peuhpeuh i deihdan a ki lehbulh denkeei hi-a, tu-in tua bang hi nawn lo. I innkuan aa kikholh khopna tampipi tu-in nei thei ta. Banghang hipeuhmah hiam? Ken zongh tua thumaan thei nuam ingh. Kei zongh tua thumaan hong hilh ve maw.”

Tito in Vika a’ dingin thu ngetsak den ahihmanin tua kammalte a zaak ciangin a lungsim sungah nakpi takin angtang mahmah hi. Thu hong ngen khawm ta uh a, Lai Siangtho zongh hong sin khawm uh hi. A sawt lo in, Vika zongh tui hong kiphum ta hi. Hallelujah!

Tu-in, Tito in sangah lai ahilh banah Sabbath School ah zongh hilh lai hi. Vika in ahihleh Tanlang te hilh hi. Tito in a khuapihte Lai Siangtho hilh aa, mi nih hong ki tuiphum hi.

A upna hangin sanginn ah zongh buaina tuamtuam tuak thei zel hi. Ni khat, a sabuai tungah zun na ki tha sese hi. A ni dang khat vei leuleu, mi khat in sanginn kawm tungah a lim a hoihlo phiaiphuai in na suai gawp hi. Khuapih zukham gilote in tem tawh lauphawn ahih manin, siapipa in palikte sam ngei zel, cih daan in buaina tuamtuam tuak kawikawi hi.

Himah taleh Lungdamna thumaan hopsawn dingin a lungsim khentat den hi. “Topa Pasian aw, Nangma’ thumaan hih munte ah ka pulaak nuam hi. Hih hun nunung ah nong hehpihna tawh, a cingg lo kei, hong zangh in,” ci-in thu ngen hi.

By Andrew McChesney